Iintsikelelo Zemfundo YaseGiliyadi Zinwenwela Ehlabathini Lonke
IMFUNDO kweli hlabathi lidala inexabiso nje elilinganiselweyo. Ekubeni isekelwe ngokuyintloko kwiingcamango zabantu kunokuba isekelwe kwinyaniso kaThixo, ayinako ukudlulisela injongo yokwenyaniso ebomini. Kodwa iSikolo saseGiliyadi sahlukile. Kumagqabaza akhe entshayelelo kwabo baphumelele kwiklasi yaseGiliyadi yama-93, uTheodore Jaracz weQumrhu Elilawulayo wavelisa ingongoma yokuba esi sikolo sinikela imfundo enentsingiselo yokwenyaniso. Njengoko INdumiso 119:160 isithi, “isimbuku [intsingiselo, NW] selizwi likaThixo siyinyaniso.” Ngoko bezele yimincili abantu abamalunga nama-6 000 baphulaphula ucwangciso lwabaphumeleleyo ngoSeptemba 13, 1992.
Intetho yokuqala kusasa, eyanikelwa nguLon Schilling weKomiti yeeFama zeWatchtower, yayinomxholo othi “Qhubekani Nisoyisa Ihlabathi Nomphathi Walo.” UMzalwana uSchilling wanikela ingqalelo kwiSityhilelo 12:11 waza wakhankanya ukuba le ndinyana ibonisa iindlela ezintathu zokoyisa: (1) ngegazi leMvana, (2) ngokunikela ubungqina, yaye (3) nangokuba nomoya wokuzincama. Wakhumbuza abo bafundi ukuba abakhonzi bakaYehova abaninzi baye babonakalisa umoya onjalo yaye bade bakulungela ukujamelana nokufa ukuze bahlale benyanisekile kwaye begcine ingqibelelo yabo.
UJohn E. Barr weQumrhu Elilawulayo wanikela intetho enomxholo othi, “Londolozani Intembelo Yenu Entle.” Ngelizwi lakhe elaziwa njengelifudumeleyo, wathelekisa intembelo ephakathi kukaYehova nabakhonzi bakhe kunye nentembelo ebakho kumtshato owonwabileyo. Esebenzisa iingongoma ezikweyesi-2 kuTimoti 1:12, 13, wabongoza abo bafundi ukuba balondoloze intembelo yabo ngokubambelela ngokuqinileyo ‘kumzekelo wamazwi aphilileyo’ aseBhayibhileni. Wabethelela ukuba ukuba nesifundo sobuqu kuyinto ebalulekileyo kucwangciso lwemihla ngemihla waza ngobubele wabaluleko abo bafundi ukuba bangaze benze amagqabaza abo kwiintlanganiso abe ngumbandela nje wokudlulisela usana kunina kodwa ngamaxesha onke bafanele bawenze abe nentsingiselo.
UWilliam Van De Wall weKomiti yeSebe leNkonzo wanikela intetho elandelayo eyayisithi, “Bonakalisani Inkxalabo Enothando Ngabantu Abanjengezimvu.” Wabuza abo bafundi ngeempawu ababenokufuna ukuba ugqirha onyamekela intsapho yabo abe nazo waza wababongoza ukuba bahlakulele uvelwano, imfesane nenceba efanayo ababeya kuyixabisa.
UDaniel Sydlik weQumrhu Elilawulayo wathetha ngehlombe ngomxholo othi “Zonke Izinto Zinokwenzeka KuThixo.” Wakhumbuza abo bafundi ukuba uAbraham noSara balihleka ithemba elalibonakala lingenakuzaliseka lokuba babe nonyana ekwaluphaleni kwabo. Izithembiso zikaThixo ezininzi zibonakala zingenakwenzeka ngokokubona kwabantu; kodwa njengokuba isithunywa sezulu sabuza oku kuAbraham, “kukho nto ingamnqabelayo na uYehova?” (Genesis 18:14) UMzalwana uSydlik wabongoza abo bafundi ukuba babonakalise ukholo kumandla kaThixo okwenza okungenakwenzeka, bangaze bavumele ukholo lwabo ukuba luye lusihla okanye luxengaxenge, kungakhathaliseki iimvavanyo abajamelana nazo.
Abahlohli Banikela Isiluleko
Ngokulandelayo kwathetha abahlohli ababini baseGiliyadi. Owokuqala, uJack D. Redford wanikela intetho enomxholo othi, “Ukuzenzela Igama Elihle NoThixo.” Waqiqa ngale ndlela, yintoni eyenza ukuba igama libe lihle okanye libe libi, ngumntu walo. Wathelekisa amagama anjengelika Adam, uNimrodi, uIzebhele, uSawule, nelikaYuda kunye namagama anjengelika Nowa, uAbraham, uRute, uPawulos nelika Timoti. Kukho iingcamango neemvakalelo ezininzi ezinxulunyaniswa negama ngalinye ngenxa yekhondo lobomi lomntu oneloo gama. Wabuza abo bafundi ngohlobo lwegama ababeya kuba nalo kwiminyaka eli-10, eli-100 okanye eli-1 000 ezayo—umkreqi okanye unozikhalazo okanye eloo lomvangeli wasemazweni othembekileyo? Wabaluleka ngokuthi bafanele banikel’ ingqalelo kwizicombululo nakusukelo kunokujonga kwiingxaki.
Intetho eyayinomxholo owawuxhokonx’ iingcinga owawusithi “Ululondoloza Kakuhle Kangakanani Ukholo Lwakho?” yanikelwa ngu-Ulysses V. Glass. Wafanisa ukholo olomeleleyo nekhampasi esemgangathweni esoloko isalatha endleleni elungileyo. Ikhampasi ekwinqwelo-mafutha isenokuphazanyiswa zezinye izinto ezinombizelane (magnetic field) ngaphandle kwalowo womhlaba, yaye izinto ezinjalo kufuneka zenziwe zingakwazi ukusebenza. Ngokukwanjalo, eli hlabathi lidala livelisa iimpembelelo ezininzi ezinokusenza siphambuke okanye sibe buthathaka ngokokholo ukuba siyazivumela. Njengoko wayelumkisa loo klasi nxamnye neempembelelo ezinjalo, uMzalwana uGlass wakwabancoma ngokuziqonda kwabo kakuhle izimo zengqondo neemvakalelo zabanye.
Intetho yokugqibela ngaloo ntsasa yanikelwa nguAlbert D. Schroeder, ilungu leQumrhu Elilawulayo. Wabakhuthaza abo bafundi ukuba ‘Balondoloze Umoya Wobuvangeli Basemazweni,’ ebancoma ngokubonakalisa umoya wobuvangeli basemazweni ofana nalowo weklasi yokuqala emva phayaa ngowe-1943, xa wayekhonza njengomamkeli wabafundi (registrar). Wakhankanya ukuba babengabantu abanomdla ebantwini, abashumayeli ngokwemvelo, ababethanda ukwalathiswa ngumoya kaThixo. Wababongoza ukuba baqhubeke bewukhulisa loo moya, beyisebenzisa ngokuzeleyo iNew World Translation kwisifundo sobuqu. Waqukumbela ngengxubusho yendinyana ngendinyana ekwiNdumiso 24 njengomzekelo.
Emva koko, abafundi baseGiliyadi baba ngabaphumelele eGiliyadi! Banikwa iziqinisekiso zabo zokuphumelela njengoko kwakufundwa izabelo zabo zobuvangeli basemazweni ngokuvakalayo, nabaphulaphuli beqhwaba izandla.
Emva kwemini, uCalvin Chyke weKomiti yoMzi-mveliso waqhuba iSifundo seMboniselo. Kwalandela ucwangciso oluluncuthu mazangwa lwabafundi, olwalubhekisela kumava asentsimini abafundi ebudeni bezo zifundo zeenyanga ezintlanu yaye lwakwabonisa imifanekiso yamanye amazwe ababelwe kuwo. Ukongezelela koku, kwadliwan’ indlebe nesinye isibini esikhulileyo, yaye sabalisa ngobulumko amava esasiwafumene kwiminyaka emininzi njengabavangeli basemazweni ngayo. Ucwangciso lwasemva kwemini lwaqukunjelwa ngomdlalo osexesheni onomxholo othi Musani Ukulahlekiswa Okanye Nihlekise NgoThixo.
Abaphulaphuli bashiyeka benovuyo, benemincili kukubona oko imfundo yenyaniso kaThixo inokukwenza yaye bechulumancile kukwazi ukuba iingenelo zemfundo enjalo ziya kuqhubeka zinanditshwa emhlabeni wonke. Njengokuba aba bavangeli basemazweni bangama-48 besiya kwizabelo zabo, bathandazelwa ngemithandazo emininzi, evakalisa intembelo esuk’ entliziyweni yokuba aba bathembekileyo baya kuba yintsikelelo kubantu bakaThixo naphi na apho baya khona.
[Ibhokisi ekwiphepha 19]
Inkcazelo Engabafundi
Inani lamazwe abavela kuwo: 7
Inani lamazwe ababelwe kuwo: 18
Inani labafundi: 48
Inani lezibini ezitshatileyo: 24
Umlinganiselo wobudala: 32,8
Umlinganiselo weminyaka besenyanisweni: 15,3
Umlinganiselo weminyaka bekubulungiseleli bexesha elizeleyo: 10,4
[Ibhokisi ekwiphepha 20]
IKLASI EYANDISIWEYO YABAPHUMELELE EGILIYADI
NgoJuni 21, 1992, iqela labavangeli basemazweni abangama-24 laphumelela kwiklasi yesine yeSikolo saseGiliyadi Esandisiweyo eSelters/Taunus, eJamani. Le klasi, inezibini ezitshatileyo ezili-11 noodade aba-2 abangatshatanga abasuka kumazwe asixhenxe, abanomlinganiselo weminyaka engama-32 ubudala, beneminyaka eli-14 bebhaptiziwe neminyaka esi-8,5 yenkonzo yexesha elizeleyo yomsebenzi wokushumayela. Abangaphezu kwama-2,000 babekho kolo cwangciso lwaba baphumeleleyo.
UMzalwana uJaracz waluvula olo cwangciso ngengxubusho ekwiMizekeliso 11:24, ethi: “Kukho ohlakazayo, aye esanda ngokwanda.” Wakhankanya ukuba lalisondele ixesha lokuba abafundi basasazeke yaye ngokuqinisekileyo babeya kukhulisa ulwando.
Kwanikelwa iintetho ezikhuthazayo zezibhalo nguRichard Kelsey, umlungelelanisi weKomiti yeSebe laseJamani; uWolfgang Gruppe weSebe leNkonzo; uWerner Rudtke noEdmund Anstadt, nabo abangamalungu eKomiti yeSebe; nabahlohli ababini, uDietrich Förster noLothar Kaemmer. UAlbert Schroeder weQumrhu Elilawulayo wanikela intetho ebangel’ umdla enomxholo othi, “Qhubekani Nisiba Ngabafuni Bamatye Anqabileyo Okomoya.” Incopho yolo cwangciso yaba kukunikezelwa kwezabelo zokuya kumazwe ali-11 eAfrika, kuMbindi Merika naseMpuma Yurophu, emva koko omnye wabaphumeleleyo wafunda ileta evela kwiklasi leyo eya kwiQumrhu Elilawulayo evakalisa uxabiso olusuk’ entliziyweni.
[Umfanekiso okwiphepha 18]
Abaphumelele Kwiklasi Yama-93 YeSikolo SeBhayibhile SeWatchtower SaseGiliyadi
Kuludwe olungezantsi, kubalwa kuluhlu olungaphambili ukuya kwabangasemva, yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) Hitesman, C.; West, P.; Evans, D.; Hipps, M.; Simonelli, N.; Wood, S.; Corkle, M.; Flores, C.; Thomas, J. (2) Jones, M.; Nissinen, J.; Sponenberg, M.; Zachary, K.; Ravn, G.; Backman, M.; Wettergren, A.; Evans, D.; Flores, R.; Caporale, G. (3) Simonelli, N.; Rechsteiner, M.; Rechsteiner, M.; Ruiz-Esparza, L.; Gerbig, B.; Simpson, C.; Zanewich, C.; Zachary, B.; Ricketts, L.; (4) Simpson, J.; Backman, J.; Corkle, G.; Gerbig, M.; Ricketts, B.; Bagger-Hansen, L.; Jones, A.; Zanewich, K.; Ravn, J.; Hipps, C. (5) Sponenberg, S.; Hitesman, A.; Caporale, L.; Ruiz-Esparza, S.; Thomas, R.; Bagger-Hansen, B.; Wood, M.; West, M.; Wettergren, C.; Nissinen, E.