Abavakalisi BoBukumkani Bayabalisa
AmaNgqina KaYehova Azuza Imiphumo Emihle Ngokushumayela Ngokungacwangciswanga
ABANTU abaninzi baqala ukuva ngenyaniso yeBhayibhile xa omnye wamaNgqina kaYehova washumayela kubo ngokungacwangciswanga. Ngokwenza oku amaNgqina axelisa umzekelo kaYesu Kristu, owashumayela ngokungacwangciswanga kumSamariyakazi equleni xa wayeze kukha amanzi. (Yohane, isahluko 4) EMpuma Afrika, omnye wamaNgqina kaYehova washumayela ngokungacwangciswanga kunongendi ongumKatolika. Iofisi yesebe leWatch Tower Society ibalisa oko kwaba ngumphumo woku:
◻ Ngenye intsasa xa lalisendleleni eya edolophini, elinye iNgqina ladibana nonongendi ongumKatolika. Lasebenzisa elo thuba ukumbuza lo nongendi lisithi: “Khawutsho, uya phi kwasekuseni kangaka?” Impendulo yathi: “Ndisaya kuthandaza kuThixo wam.” Landula ke lambuza lo nongendi: “Ngaba uyalazi igama loThixo wakho?” “Igama lakhe asingoThixo na?” waphendula watsho unongendi. Eli Ngqina lacela ukuza ekhayeni lakhe ngemva kwemini yolo suku ukuze baxubushe ngegama likaThixo. Emva kwencoko unongendi wahamba waya ecaweni yakhe waza wabuza omnye wabefundisi enoba ebekwazi kusini na oko igama elithi “Yehova” likumelayo. Waphendula ngokuthi, “Elo ligama likaThixo.” Lo nongendi wothuka gqitha kukuva ukuba umfundisi wayekwazi oku kodwa akazange amfundise.
Eli Ngqina lalityelela eli bhinqa iintsuku ezisithoba ezilandelelanayo laza lalifundisa inyaniso engoBathathu Emnye, ngomphefumlo, ngesihogo somlilo nangethemba labafileyo. Eli bhinqa lakuphulaphula ngomonde konke oku laza lacela eli Ngqina ukuba liliphe ixesha elithile lokukhe licinge nzulu ngazo zonke ezi mfundiso zintsha. Emva kweeveki ezimbini eli bhinqa laphinda laqhagamshelana neli Ngqina laza lacela ukuba liphinde libe neengxubusho kwakhona. Ngeli xesha unongendi wayesele enze isigqibo sokuyishiya icawa yaye wayesele eyitshabalalisile imifanekiso yakhe eqingqiweyo, iirosari nomnqamlezo. Umfundisi wazama ukumcenga ukuba abuye, kodwa wayezimisele ukuhamba ekhondweni lenyaniso. Kamva wabhaptizwa waza wakhonza njengovulindlela ongumncedani ngokusisigxina kangangeenyanga ezininzi phezu kwayo nje impilo yakhe enkenenkene nokwaluphala.
Ekubeni eli bhinqa linendlu enkulu, liye layinikela ebandleni ukuba isetyenziswe njengeHolo yoBukumkani. Abazalwana baye bafaka uphahla olutsha, badiliza iindonga ezingaphakathi, baza inxalenye enkulu yale ndlu bayenza indawo entle yokuqhubela iintlanganiso. Lo wayesakuba ngunongendi ongumKatolika uhlala kwigumbi elingasemva kweholo. Uvuya gqitha kukukwazi ukunikela ngale ndlela kunqulo lukaYehova.
◻ Amanye amava abonisa ubulumko bokunikela ubungqina obungacwangciswanga ngavela eKampala, eUganda. Ngoxa lalisiya kwiofisi yakwarhulumente, iNgqina elingumvangeli wasemazweni lathetha ngokungacwangciswanga nabo babekunye nalo kwizinyuko ezisebenza ngombane (elevator). Enye indoda, uMnu. L——, yabonakalisa umdla wokulwamkela uncwadi olwalunikelwa kuyo kodwa yayingakwazi ukuluthabatha ngelo xesha. Ngoko yanika loo mvangeli wasemazweni igama layo nekhelingi yeofisi yayo. Kamva loo mvangeli wasemazweni waya apho waza wafuna uMnu. L——. Wabizwa kodwa okothusa lo mvangeli wasemazweni kukuba, kwavela mntu wumbi. Kwakukho abantu ababini ababenegama elinye ababesebenza kuloo ofisi. Kwanikelwa ubungqina ngokufutshane kuMnu. L——, wesibini, yaye wabonakalisa umdla okhethekileyo. Nangona uMnu. L——, wokuqala waphelelwa ngumdla, kwaqaliswa isifundo noMnu. L—— wesibini. Sithetha nje uliNgqina elibhaptiziweyo, yaye umkakhe nabantwana bakhe benza inkqubela entle belungiselela ukubhaptizwa.
UYesu Kristu nguMalusi Olungileyo yaye uyabazi abanjengezimvu abaneentliziyo ezityekele ebulungiseni. La mava abonisa ukuba ukhokelela abalandeli bakhe kwabanjalo. Ukushumayela ngokungacwangciswanga kunokuvelisa isiqhamo!—Yohane 10:14.