Abavakalisi BoBukumkani Bayabalisa
Obengunongendi Iminyaka Engama-25 Uva Inyaniso Ekugqibeleni
IBHAYIBHILE yaxela kwangaphambili ukuba “isihlwele esikhulu” esiphuma kuzo zonke iintlanga sasiya kuza size sinqule etempileni kaYehova engokomoya. (ISityhilelo 7:9) Oku kuyenzeka namhlanje, yaye siyavuyiswa kukubona ukuba abaninzi, ngoncedo lwenyaniso kaThixo, ngaloo ndlela bayawaqhawula amakhamandela onqulo lobuxoki. Amava alandelayo abonisa oku.
◻ Elinye ibhinqa eRome, eItali, libalisa oku: “Ukususela kwixesha endandisemncinane owona mnqweno wam wawukukuba ngunongendi, ekubeni ndandikunqwenela ngentliziyo yam yonke ukukhonza uThixo. Ndakwazi ukuwuzalisekisa umnqweno wam xa ndandineminyaka engama-32 ubudala, ngoDisemba 8, ngowe-1960, xa ndenza okokuqala isibhambathiso sokuthobeka, sobuhlwempu nesokuhlala ndinyulu. Umsebenzi endandiwabelwe wawukukunyamekela ubusuku nemini abantwana abangamahlwempu nabalahliweyo ababeziinkedama okanye bamabanjwa abamalunga nama-30. Ndandiwuthanda gqitha lo msebenzi.
“Ukholo lwam lwagungqiswa emva kweminyaka elishumi ndikule nkonzo xa kwabakho imbambano kweli ziko. Ndazibuza isizathu sokuba uThixo eye wavumela ukuba kubekho iimbambano neziphithiphithi ezinjalo endlwini yakhe, ukuba nguye owayesalathisa izinto.”
Lo nongendi wayenodade wabo owayehlala eFransi nowayengomnye wamaNgqina kaYehova. Wamshumayeza lo nongendi ngeleta waza wamthumelela iNew World Translation of the Holy Scriptures. Lo nongendi ubalisa esithi: “Emva kweminyaka engama-23, ndandiqala ukudibana neLizwi likaThixo.” Kwaba ngelo xesha ke awathi wakwamkela ukufundisisa iBhayibhile namaNgqina kaYehova. Uthi: “Njengoko ndandiqhubela phambili ekufundisiseni, ndamazi uYehova uThixo nezinto azifunayo kunye neempawu zakhe ezimangalisayo. Ndaba buhlungu kakhulu xa ndafumanisa ukuba akakuvumeli ukusebenzisa imifanekiso eqingqiweyo, ekubeni iziko endandikulo lalizele yimifanekiso eqingqiweyo yabo bonke ubukhulu nalo lonke uhlobo. Ndaqonda ukuba ukuba ndandifuna ukukholisa uYehova, ndandingenakuhlala kuloo ndawo. Emva kweminyaka engama-25 yenkonzo yokuzinikela njengonongendi, ekugqibeleni ndandiyifumene inyaniso. Ngoko ngo-Oktobha 1, 1985, ndazisa ukuba ndiyalishiya iziko, nto leyo eyazikhwankqisa gqitha iziphatha-mandla zam.
“Abazalwana noodade bam abanothando bandinceda ngokomoya nangezinto eziphathekayo. Ndiyambulela uYehova nentlangano yakhe, kuba ngoAgasti 30, 1986 ndabhaptizwa, ndaza ndaqalisa ukuba sendleleni yokwenene esa kubomi obungunaphakade.”
UYehova Usikelela Umnqweno Wothile Okwishumi Elivisayo Wokukhonza UThixo
◻ Umfundisi-ntsapho othile waseBrazil owayengomnye wamaNgqina kaYehova waphawula ngoxa wayeqwalasela amaphepha eemviwo zesikolo ukuba omnye umfundi oneminyaka eli-14 ubudala wabhala ebonisa umnqweno anawo wokufunda okungakumbi ngoThixo. Waqalisa ukufundisisa iBhayibhile kunye nalo mfundi, kodwa njengoko le ntombazana yayiqhubela phambili, intsapho yakowayo engamaKatolika yasalela isifundo yaza yalutshabalalisa uncwadi lwayo. Lo mfundi uselula waqalisa ukufundisisa iBhayibhile ebudeni bexesha lonqumamo esikolweni, kodwa wabhaqwa. Ngoko isifundo saqhutywa ngembalelwano. Noko ke, kungekudala, intsapho yakowabo yazifumana iileta zakhe yaza yazitshisa. Utata wakhe waqalisa ukumnyanzelela ukuba aye kwidini leMisa. Waya kodwa wathabatha umbhalo weMboniselo ukuze awufunde ebudeni benkonzo, ewufihla phakathi kwamaphepha encwadana yecawa. Oku kwaqhubeka iinyanga ezintandathu, de ngenye imini yazimela kokwayo yaya kwiHolo yoBukumkani. Ebudeni bentlanganiso utata wayo wathi gqi emnyango waza waxelela abazalwana ukuba baxelele intombi yakhe ukuba wayeza kuyibetha xa ifika ekhayeni. Imigudu yabazalwana yokuqiqa naye yalambatha.
Ngemini elandelayo, yonwabile yaye incumile, yaya kubona abazalwana. Yababonisa imivumbo emininzi emzimbeni wayo apho yayibethwe khona ngutata wayo. Ngoko, yintoni eyayibangela ivuye? Emva kokumka eHolweni yoBukumkani, utata wayo wayebuze abantu abaliqela edolophini, kuquka usibonda wedolophu, ngeengenelo nangeengozi zokuba intombi yakhe ibe ngomnye wamaNgqina kaYehova. Usibonda wedolophu wathi amaNgqina ayengabantu abalungileyo, abafanele bathenjwe. Wongezelela ngelithi babenemilinganiselo yokuziphatha ephakame gqitha nokuba bekuya kuba kuhle kakhulu ukuba nomntwana onale milinganiselo, eyayiphakeme gqitha kunaleyo yolutsha oluqhelekileyo.
Phezu kwako oku, le ntombazana yabethwa. Kodwa utata wayo wayixelela ukuba wayeyibetha ngenxa yokuba iye yemka ekhaya ngaphandle kwemvume. Yaye wathi wayeya kuyibetha kwakhona ukuba ikhe yayeka ukufundisisa iBhayibhile okanye ukuya kwiintlanganiso zamaNgqina kaYehova! Le ntombi ngoku ingumvakalisi onenzondelelo, yaye abanye bentsapho yakowayo babonisa umdla kwinyaniso.
Enyanisweni, uYehova uyabasikelela abaselula abanomnqweno onyanisekileyo wokumkhonza, njengoko la mava ebonisa.—INdumiso 148:12, 13.