UYehova Wasinyamekela Ngoxa Umsebenzi Wethu Wawuvaliwe—Icandelo 1
Kangangamashumi eminyaka amaNgqina kaYehova ebesoloko ebuza ngabazalwana bawo abakumazwe apho umsebenzi wobuKristu ubuvaliwe khona. Sivuyiswa kukukhupha elokuqala kumanqaku amathathu atyhila okunye koko bekusenzeka. Ezi ziingxelo zobuqu zamaKristu athembekileyo kwindawo eyayisakwaziwa njengeMpuma Jamani.
NGOWE-1944, ndandilibanjwa lemfazwe laseJamani, ndandingumlindi esibhedlele kwiNkampu yaseCumnock, kufutshane neAyr, eSkotlani. Nangona ukunxulumana nabantu basekuhlaleni kwakwalelwe, ndandivunyelwe ukuphuma ngaphandle kwenkampu. Xa ndandihambahamba ngenye iCawa, ndadibana nendoda eyenza imigudu enyanisekileyo yokundicacisela ngezinto eziseBhayibhileni. Kamva sasidla ngokuhambahamba kunye.
Ekuhambeni kwethuba yandimemela kwintlanganiso eyayiqhutyelwa endlwini ethile. Ekubeni ndandililungu lohlanga olulutshaba, oku kwakuyingozi kuyo. Ngelo xesha andizange ndiqonde ukuba yayilelinye lamaNgqina kaYehova—ngokucacileyo le ntlanganiso yayiyenye yezifundo zawo zeBhayibhile zamaqela amancinane. Nangona ndingasaqondi kakuhle, ndiwukhumbula ngokucacileyo umfanekiso womntwana owayenxibe isinxibo eside esimhlophe ekunye nengonyama nemvana. Lo mfanekiso wehlabathi elitsha, njengoko uchazwe kwincwadi yeBhayibhile kaIsaya, wandichukumisa ngokunzulu.
NgoDisemba 1947, ndakhululwa kwinkampu yentolongo. Ekubuyeleni kwam ekhaya eJamani, ndatshata noMargit, endandimaze ngaphambi kwemfazwe. Sazakhela ikhaya eZittau, kufutshane nemida yePoland neCzechoslovakia. Kwiintsuku ezimbalwa, kwankqonkqoza omnye wamaNgqina kaYehova kumnyango wethu. Ndamxelela oku umfazi wam, “Ukuba eli ikwaliqela endadibana nalo eSkotlani, kuza kufuneka silithelele.” Kwangaloo veki inye, saya kwintlanganiso namaNgqina okwesihlandlo sokuqala.
Kungekudala sayiqonda ngokuphuma eBhayibhileni imfuneko yokuya rhoqo kwiintlanganiso zamaKristu nokuba nesabelo kumsebenzi wokushumayela. Enyanisweni, oko kwakufundiswa ngamaNgqina ngokuphuma eBhayibhileni ngokukhawuleza kwaba yeyona nto ibalulekileyo ebomini bethu. Ekuhambeni kwethuba ndaqalisa ukuqhuba isifundo seBhayibhile seqela. Kwaza, ngoFebruwari 1950, abaveleli bamaKristu ababini abahambahambayo babuza: “Ngaba anifuni kusini na ukubhaptizwa?” Kwangaloo mva kwemini mna noMargit safuzisela uzahlulelo lwethu kuThixo ngobhaptizo.
Ukuqalisa Kobunzima
IZittau yayikummandla weJamani ophantsi kweSoviet, ibe imigudu yokukhathaza amaNgqina kaYehova yayiqalise ngowe-1949. Kuphela kusemva kobunzima obungathethekiyo ekwathi kwafunyanwa indawo yokuqhubela indibano encinane eBautzen. Kwaza ehlotyeni, oololiwe abakhethekileyo bokuya kwindibano enkulu eBerlin barhoxiswa ngequbuliso. Kodwa amawaka aya.
Neentlanganiso zebandla zaziphazanyiswa. Abagculeli babesiza ukuze nje bangxole babethe namakhwelo. Ngesinye isihlandlo saphantse sanyanzeleka ukuba siyiyekise phakathi intetho yomveleli ohambahambayo. Amaphephandaba ayesibiza ngokuba singabaprofeti bentshabalalo. Amanqaku amaphephandaba ayede abhengeze ukuba sasihlanganisene ezincotsheni zeenduli ngoxa sasilindele ukuxwilelwa emafini. Amaphepha ayecaphula namantombazana athile esithi amaNgqina azama ukuba neentlobano zokuziphatha okubi kunye nawo. Inkcazelo ethi ‘abo bazahlulele kuYehova baya kuzuza ubomi obungunaphakade’ yaguqulelwa ekuthini abo baye baba neentlobano zesini namaNgqina babeya kuzuza ubomi obungunaphakade.
Kamva sakwatyholwa ngokuba ngabaxhokonxi bemfazwe. Esasikuthetha ngemfazwe kaThixo yeArmagedon kwachazwa phosakeleyo ngokuthi sasikhuthaza ukhuphiswano lwezixhobo zenyukliya nemfazwe. Hayi indlela ekwakububudenge ngayo! Sekunjalo, ngoAgasti 1950, xa ndandifika emsebenzini ndiza kungena ebusuku kwindawo yokushicilela amaphephandaba yasekuhlaleni apho ndandisebenza njengomshicileli, ndanqandwa esangweni. Umlindi owayephelekwe lipolisa wathi, “Ugxothiwe, nina bantundini nixhasa imfazwe.”
Ekufikeni ekhaya, uMargit wakuvuyela oku. Wathi, “akusayi kuphinda uphangele ebusuku ngoku.” Asizange sixhalabe. Ngokukhawuleza ndafumana omnye umsebenzi. Sasithembe ukuba uThixo wosilungiselela, ibe wenjenjalo.
Umsebenzi Wethu Uvaliwe
NgoAgasti 31, 1950, umsebenzi wamaNgqina kaYehova kwiMpuma Jamani wavalwa. Kwalandela ukubanjwa kwabantu abaninzi. AmaNgqina aziswa phambi kwenkundla, amanye agwetyelwa ukuhlala entolongweni ubomi bawo bonke. AmaNgqina amabini awayesuka eZittau, nawayebandezeleke kwiinkampu zoxinaniso phantsi kwamaNazi, avalelwa entolongweni ngamaKomanisi.
Umveleli webandla lethu wabanjwa kunye nenkosikazi yakhe. Abo bababambayo bashiya abantwana babo ababini abancinane endlwini ukuze bazibonele. Uyisemkhulu noninakhulu baba bantwana babathabatha, ibe namhlanje omabini loo mantombazana ngenzondelelo axelela abanye ngoBukumkani bukaThixo.
Abathunywa ababesuka kumabandla aseMpuma Jamani babequqa eBerlin belanda uncwadi kwiindawo ezazilungiselelwe oko kwicandelo lentshona elalikhululekile. Uninzi lwaba bathunywa bakhaliphileyo lwalubanjwa, luziswe phambi kwenkundla, luze lugwetyelwe ukuvalelwa entolongweni.
Abasemagunyeni bafika kwangentseni ngenye imini bezokugqogqa ekhayeni lethu. Sasikulindele ukufika kwabo, ngoko ndandizithabathe zonke iingxelo zebandla, endandizigcinile ndazifaka kuvimba wethu, osecaleni kwendlwana yoonomeva. Ezo zinambuzane zange zindikhathaze mna, kodwa xa la madoda aqalisa ukukhangela yonke indawo, ngequbuliso agutyungelwa lilifu loonomeva. Ekuphela kwento awayenokuyenza loo madoda yayikukubaleka ukuze asinde!
UYehova wayesixhobisele ukuvalwa komsebenzi kwangaphambili ngeendibano ezaziqhutywe ngowe-1949. Sakhuthazwa kucwangciso ukuba sikhuthalele ufundisiso lobuqu, ukuya kwiintlanganiso, nomsebenzi wethu wokushumayela kwanokuba omnye axhomekeke komnye ngenkxaso nokhuthazo. Ngenene oku kwasinceda ukuba sihlale sinyanisekile. Ngaloo ndlela, nakubeni abantu babesoloko besigxeka yaye besiqalekisa oko akuzange kusiphazamise.
Ukuqhuba Iintlanganiso Phantsi Kokuvalwa Komsebenzi
Emva kwesaziso sokuvalwa komsebenzi, ndahlanganisana namanye amaNgqina amabini ukuze sixubushe indlela yokuqhubeka neentlanganiso zethu zebandla. Ekubeni ukubanjwa ngoxa ukuzo kwakunokuthetha ukugwetyelwa ukuvalelwa entolongweni, ukubakho kuzo kwakuyingozi. Samema amaNgqina asekuhlaleni. Amanye ayenexhala, kodwa kwakukhuthaza ukuba ngamnye wayeyiqonda imfuneko yokuya kwiintlanganiso.
Indoda enomdla eyayinovimba yanikela ngawo ukuba ube yindawo yokuqhubela iintlanganiso. Nangona wawumi ethafeni, kwindawo owawunokubonwa nguye wonke ubani kuyo, lo vimba wawunocango olwaluphumela kwindledlana eyayigqunywe ngamatyholo. Ngoko sasingabonwa xa singena naxa siphuma. Bonke ubusika loo vimba waba yindawo yeentlanganiso zethu ezaziqhutywa sikhanyise ngekhandlela, ingabantu abamalunga nama-20 abakhoyo. Sasidibana veki nganye ukwenzela isifundo sethu sephephancwadi IMboniselo neNtlanganiso Yenkonzo. Ucwangciso lwaluvisisaniswa neemeko zethu, lubethelela ingongoma yokuhlala sikhuthele ngokomoya. Kungekudala sakuvuyela ukwamkela le ndoda inomdla njengomzalwana wethu omtsha enyanisweni.
Phakathi kwiminyaka yee-1950, izigwebo zenkundla zaya zisihla, ibe abanye abazalwana bakhululwa entolongweni. Abaninzi bagxothelwa eNtshona Jamani. Kwelam icala izinto zajika ngokungalindelekanga emva kotyelelo lomzalwana ovela eNtshona Jamani.
Isabelo Sam Sokuqala Esikhulu
Lo mzalwana wazibiza ngokuba nguHans. Emva kokuba sincokole, ndacelwa ukuba ndiye kwindlu ethile eBerlin. Ekuwufumaneni kwam ubhalwe emnyango umbhalo ekwathiwa ndize ndiwufune, kwathiwa mandingene. Kwangena abantu ababini baza bandibandakanya kwincoko emnandi kodwa engezinto eziqhelekileyo. Bade bangqala koko babefuna ukukuthetha: “Ukuba ubunokunikwa isabelo esikhethekileyo, ngaba ubuya kusamkela?”
“Ngokuqinisekileyo,” ndaphendula.
Bathi, “Kulungile, koko ebesifuna ukukwazi. Uhambe kakuhle.”
Emva kweeveki ezintathu ndacelwa ukuba ndibuyele eBerlin ibe kwakhona ndaphinda ndangena kwakwelaa gumbi. Bendinika imaphu yommandla ongqonge iZittau, aba bazalwana bathetha ngenjongo yaloo ntlanganiso. “Asinalunxibelelwano namaNgqina akulo mmandla. Ingaba ungasihlaziyela unxibelelwano?”
Ndaphendula ngokukhawuleza ndathi, “Ngokuqinisekileyo ndiya kwenjenjalo.” Lo mmandla wawumkhulu, umalunga neekhilomitha ezili-100 ubude, ukusuka eRiesa ukuya eZittau, yaye uziikhilomitha ezingama-50 ububanzi. Yaye ekuphela kwento endandinayo yayiyibhayisikile. Emva kokunxibelelana neNgqina ngalinye, ngamnye wadityaniswa nebandla lakhe, elalithumela ummeli rhoqo eBerlin ukuya kulanda uncwadi nemiyalelo. Le ndlela yokusebenza yakhusela ukubekwa engozini kwamanye amabandla xa abasemagunyeni babetshutshisa naliphi na ibandla.
Ukukholosa NgoYehova
Phezu kwayo nje intshutshiso, sithobela imiyalelo yeBhayibhile, asizange siyeke ukuya kwindlu ngendlu nesigidimi sethu esingoBukumkani bukaThixo. (Mateyu 24:14; 28:19, 20; IZenzo 20:20) Sasisiya kwezinye izindlu ngoncomelo oluvela kubantu esasisele sibazi kakade, ibe sasisiba namava amnandi ngqitha. Maxa wambi ukuphazama kwethu kwakusiba yintsikelelo, njengoko oku kulandelayo kubonisa.
Mna nomfazi wam sanikwa idilesi yendlu ekwakufuneka siye kuyo, kodwa saya kwindlu ephosakeleyo. Xa kwavulwa ucango, saphawula impahla yamapolisa ixhonyiwe. Ubuso bukaMargit bajika bamhlophe; uvalo lwam lwangongoza. Oku kwakusenokuthetha ukuvalelwa entolongweni. Okwakufuneka yayikukuthandaza ngokukhawuleza.
“Ningobani?” yabuza le ndoda ngokukhawuleza. Asizange sibhabhazele.
“Ndiqinisekile ukuba kukho apho ndakha ndakubona khona kodwa andikwazi kukhumbula ukuba kuphi. Ndiyakhumbula, ulipolisa. Kumele ukuba ndakubona usemsebenzini,” watsho uMargit.
Oku kwayithomalalisa le ndoda, ibe yabuza ngelizwi elinobuhlobo, “NingamaNgqina?”
“Ewe, singawo, ibe umele uqonde ukuba kufuna inkalipho ukunkqonkqoza kumnyango wakho. Sinomdla kuwe ngokobuqu,” ndangenelela.
Wasimemela ekhayeni lakhe. Samtyelela izihlandlo eziliqela saza saqalisa isifundo seBhayibhile. Ekuhambeni kwethuba le ndoda yaba ngumzalwana wethu ongumKristu. Hayi indlela loo mava awakomeleza ngayo ukukholosa kwethu ngoYehova!
Oodade ngokufuthi babesebenza njengabathunywa, okwakufuna ukuba bakholose ngoYehova ngokungagungqiyo. Kwakuyimeko efanayo ngoMargit xa ngesinye isihlandlo wayesiya eBerlin ukuya kulanda uncwadi. Wafumana oluninzi kunokuba wayelindele. Kwakusetyenziswe intambo yokwaneka impahla ukubopha isutikheyisi eyayinzima neyayizele qhu. Izinto zonke zamhambela kakuhle uMargit wade wayokufika kuloliwe. Kwaza kwafika igosa lemida.
“Yekabani, ibe inantoni?” labuza lalathe isutikheyisi.
“Yimpahla yam eyokuhlanjwa,” waphendula uMargit.
Likrokra, lamyalela ukuba ayivule. Ethe chu ngabom, ekhulula iqhina elinye ngexesha, uMargit waqalisa ukukhulula intambo eyayibotshwe ngayo isutikheyisi. Ekubeni umsebenzi wegosa wawukukuhamba ngololiwe umgama othile kuphela lize lehle likhwele omnye uloliwe obuyela emva, laya liphelelwa ngumonde. Ekugqibeleni, xa kwakusele amaqhina anokuba mathathu kuphela, lanikezela. “Suk’ apha, uhambe nale mpahla yakho!” ladubuleka latsho.
Inkathalo kaYehova Yobuqu
Ngokufuthi ndandingalali ngaphezu kweeyure ezine ngobusuku, ekubeni ngokuqhelekileyo ndandinyamekela imicimbi yebandla phantsi kwamathunzi obumnyama. Kwakusemva komsebenzi onjalo xa amagosa ankqonkqoza kumnyango wethu ngenye intsasa. Ayezokuguqulula. Kwakungasekho xesha lakufihla.
Amagosa achitha intsasa yonke eguqulula, ade angena nakwindlu yangasese ukuba kungathi kanti kukho nto ifihlwe apho kuyo. Akukho namnye owacinga ngokukhangela ebhatyini yam eyayixhonyiwe. Ngokukhawuleza ndandifihle amaxwebhu kwiipokotho zayo ezininzi. Ezo pokotho zazikhukhumele zezo zinto kanye amagosa ayezifuna, kodwa abuya nembande yesikhova.
Ngesinye isihlandlo, ngoAgasti 1961, ndandiseBerlin. Yaba lityeli lam lokugqibela lokuya kulanda uncwadi ngaphambi kokwakhiwa koDonga lwaseBerlin. Isikhululo sikaloliwe saseBerlin sasizele ngabantu njengoko ndandilungiselela ukubuyela eZittau. Wafika uloliwe, ibe abantu bonke bagxalathelana ukuya kukhwela. Ndahamba nesosihlwele, ndaza ngequbuliso ndazibona ndikwicandelo likaloliwe elingenabantu. Kungekudala ndikhwele igadi yatshixa iingcango. Ndema ndedwa kwelinye icala, ngoxa abanye babexinaniswa kuloliwe wonke.
Sanduluka ukuya eZittau. Kangangexesha elithile ndandindedwa enqwelweni. Waza uloliwe wema, ibe iingcango zeli candelo ndikulo zavuleka. Kwangena amajoni aseSoviet amaninzi. Ndaqonda ngoko ukuba ndandikhwele kwicandelo eligcinelwe umkhosi waseSoviet. Ndanga ndingathi vuleka mhlaba ndingene. Kodwa amajoni abonakala engaboni nto iphosakeleyo.
Saphinda saqhubeka nohambo lokuya eZittau, apho iingcango zecandelo lethu zavulwa ngamandla, ibe amajoni atsiba ehla. Aqalisa ukugqogqa bonke abo bantu babelapho esikhululweni. Ndim kuphela umntu ongazange aphazanyiswe. Amaninzi kuloo majoni ade akhahlela kum, ecinga ukuba ndiligosa eliphezulu.
Saqonda kamva indlela olo ncwadi olwaluxabiseke ngayo, kuba ukwakhiwa koDonga lwaseBerlin kwaluphazamisa okwexeshana ucwangciso lwethu lokufumana uncwadi. Kanti olo ncwadi lwaluzanele iintswelo zethu okweenyanga eziliqela. Okwelo xesha, amalungiselelo okunxibelelana nathi ayenokwenziwa.
Ukwakhiwa koDonga lwaseBerlin ngowe-1961 kwezisa iinguqulelo kuthi eMpuma Jamani. Kodwa njengoko uYehova ehlala esenza, wayebona kusengaphambili. Waqhubeka esinyamekela ngoxa umsebenzi wethu wawuvaliwe.—Ngokubaliswa nguHermann Laube.
[Picture of Hermann and Margit Laube on page 26]
[Umfanekiso okwiphepha 27]
Sanandipha indibano encinane eBautzen