UYehova Wasinyamekela Ngoxa Umsebenzi Wethu Wawuvaliwe—Icandelo 2
EBUDENI beMfazwe Yehlabathi II, ikhonkco lebhanti yempahla yam yobujoni yamaNazi lalinombhalo othi “UThixo Unathi.” Mna oku ndakubona njengomnye umzekelo wokubandakanyeka kweecawa kwimfazwe nakuphalazo-gazi. Kwandicaphukisa. Ngoko xa amaNgqina kaYehova amabini ancokola nam eLimbach-Oberfrohna, eMpuma Jamani, ndandiluchase kakhulu unqulo yaye ndandingabukholelwa ubukho bukaThixo ibe ndandikholelwa kwindaleko.
“Ningacingi ukuba ndiza kuba ngumKristu,” ndawaxelela oko amaNgqina awayendityelele. Kodwa ingxoxo yawo yandeyisela ekuqondeni ukuba ukhona uThixo. Ndinomdla wokwazi, ndathenga iBhayibhile ibe ngokukhawuleza ndaqalisa ukuyifunda kunye nawo. Kwakusentwasahlobo yowe-1953, xa umsebenzi wamaNgqina eMpuma Jamani wawusel’ uvaliwe ngamaKomanisi kangangeminyaka emithathu.
IThe Watchtower ka-Agasti 15, 1953, yayichaza imeko yamaNgqina kaYehova ngoko, isithi: “Nangona esoloko ebekw’ esweni yaye esongelwa, nangona engakwazi ukuhambelana ngaphandle kokuqala aqiniseke ukuba akukho bani uwalandelayo, nangona ukufunyanwa kukabani enoncwadi lweWatchtower kunokuthetha iminyaka emibini okanye emithathu entolongweni ngenxa ‘yokusasaza uncwadi olunempembelelo embi,’ yaye nangona amakhulu-khulu abazalwana abaqole ngakumbi, ababekhokela, besentolongweni, sekunjalo abakhonzi bakaYehova eMpuma Jamani bayaqhubeka beshumayela.”
Ngowe-1955 mna nomfazi wam, uRegina, saya kwindibano yezizwe ngezizwe yamaNgqina kaYehova eNuremberg, eNtshona Jamani, ibe kunyaka olandelayo sobabini sabhaptizwa eNtshona Berlin. Kambe ke, oko, kwenzeka ngaphambi kokwakhiwa koDonga lwaseBerlin ngowe-1961, lusahlula iMpuma Jamani kwiNtshona Berlin. Kodwa kwanangaphambi kokuba ndibhaptizwe, ukunyaniseka kwam kuYehova uThixo kwavavanywa.
Ukwamkela Imbopheleleko
Kwibandla lamaNgqina kaYehova esasiqalise ukuya kulo eLimbach-Oberfrohna kwakufuneka umntu owayeza kulanda uncwadi lweBhayibhile eNtshona Berlin. Sasineshishini elincinane nabantwana abaselula ababini, kodwa ukukhonza uYehova kwakusele kuyinto eza kuqala ebomini bethu. Salungisa inqwelo-mafutha yethu endala, sayenza yalungela ukuba singafihla iincwadi ezingama-60. Ukuba ngumthunywa kwakungumsebenzi oyingozi, kodwa kwandifundisa ukuthembela kuYehova.
Ukuwela ngenqwelo-mafutha usuka eMpuma Berlin ukuya kummandla waseNtshona kwakungelula, yaye ndandisoloko ndizibuza ngendlela esasiphumelela ngayo. Sakufika kummandla okhululekileyo, sasithabatha uncwadi size silufihle kwinqwelo-mafutha ngaphambi kokuba siwele umda sibuyela emva eMpuma Jamani.
Ngesinye isihlandlo, sasisandul’ ukugqiba ukufihla iincwadi xa kwaphuma umntu esingamaziyo kwindlu enamagumbi aqeshiswayo. Wakhwaza wathi, “Heyi nina.” Ndothuka ndabanda. Makube bethu ebesijongile? “Kuza kufuneka niye kwenye indawo kwithuba elizayo. Inqwelo-mafutha enonomathotholo wonxibelelwano yamapolisa aseMpuma Jamani imiswa phaya ekujikeleni, yaye asenokunibamba.” Zehla izibilini. Akuzange kubekho ngxaki ekuweleni umda, yaye sobane kwinqwelo-mafutha sacula yonke loo ndlela ibuyela ekhaya.
Ukuxhotyiswa Ngaphambi Kokwahlukaniswa
Kwiminyaka yee-1950 abazalwana eMpuma Jamani babethembele kwabo baseNtshona ngoncwadi nokhokelo. Kodwa ngowe-1960 kwenziwa uhlengahlengiso olwanceda iNgqina ngalinye eMpuma Jamani ukuba lihlale linxibelelana namanye amaNgqina akwindawo elihlala kuyo. Kwaza ngoJuni 1961 kwaqhutywa iklasi yokuqala yeSikolo Sobulungiseleli SoBukumkani sabadala eBerlin. Ndaya kwisikolo sokuqala esithabatha iiveki ezine. Kungaphelanga neeveki ezintandathu kamva, sahlukaniswa ngesiquphe neNtshona xa kwakhiwa uDonga lwaseBerlin. Ngoku sasingasasebenzi sithubeleza nje kuphela kodwa sasahlukanisiwe.
Bambi babesoyika ukuba umsebenzi wamaNgqina kaYehova eMpuma Jamani wawuya kude uyekwe tu. Noko ke, uhlengahlengiso olwenziwa yintlangano kwisithuba esingaphantsi konyaka ngaphambili lwasinceda ukuba sigcine umanyano nokomelela ngokwasemoyeni. Ukongezelela, uqeqesho olwalufunyenwe ngabadala ababeye kwiklasi yokuqala yeSikolo Sobulungiseleli SoBukumkani lwabaxhobisa ukuze baqeqeshe abanye abadala. Ngoko uYehova wasixhobisa ngaphambi kokuba sahlukaniswe njengoko wayesixhobisile ngaphambi kokuvalwa komsebenzi ngowe-1950 ngeendibano zesithili zowe-1949.
Ekubeni sasahlukanisiwe neNtshona, kwakucacile ukuba kwakufuneka siyigcine ngokwethu intlangano iqhubeka. Sabhalela abazalwana bethu abangamaKristu eNtshona Berlin saza sacebisa ukuba sidibane kuhola wendlela oseMpuma owayenokufikelelwa ngabahambi abavela eNtshona. Senza ngathi sonakalelwe yinqwelo-mafutha kwindawo esasigqibe ukudibana kuyo. Emva kwemizuzu embalwa abazalwana bafika, besiphathele uncwadi lweBhayibhile. Okwandivuyisayo kukuba babendiphathele nencwadi yam yeSikolo Sobulungiseleli SoBukumkani, amanqaku endandiwathabathile neBhayibhile endandiyishiye eBerlin kuba ndandifuna ukukhuseleka. Hayi indlela endavuya ngayo ndakuzifumana! Ndandingayiqondi kangako indlela endandiya kuzifuna ngayo kwiminyaka embalwa elandelayo.
Ukuqhuba Isikolo Ngokufihlakeleyo
Emva kweentsuku ezimbalwa, sayalelwa ukuba silungiselele iiklasi zeSikolo Sobulungiseleli SoBukumkani kuyo yonke imimandla yeMpuma Jamani. Kwamiselwa abahlohli abane, kuquka nam. Kodwa kum kwabonakala kuyinto engenakwenzeka ukuqeqesha bonke abadala ngoxa umsebenzi wethu wawuvaliwe. Ukuze sifihle oko sasikwenza, ndagqiba kwelokuba ezi klasi ndizilungiselele ngendlela yokuba sibe ngathi singabantu abeze ekhefini.
Klasi nganye yayisiba nabafundi abane nam njengomhlohli, nomzalwana wesithandathu owayenceda ekuphekeni. Abafazi nabantwana babebakho. Ngoko sasidla ngokuba neqela labantu abali-15 ukuya kwabangama-20. Indawo ekudla ngokumiswa kuyo iintente yabonakala ingenakulunga, ngoko mna nentsapho yam saqalisa ukukhangela iindawo ezifanelekileyo.
Ngesinye isihlandlo, xa sasidlula kwenye idolophana, sabona indledlana eyayisiya kwindawo enegcume lemithi qelele neendlela ezinkulu. Yabonakala ifanelekile, ngoko ndaya kusibonda wedolophu. Ndachaza: “Sikhangela indawo yokuchithela iiveki ezimbalwa kunye nezinye iintsapho ezimbalwa. Sifuna ukuba sibe sodwa ukuze abantwana bakwazi ukudlala yonke indawo. Ngaba singayisebenzisa laa mithi iphaya?” Wavuma, ngoko senza amalungiselelo.
Kuloo ndawo, sagxumeka iintente kunye nenqwelo yam erhuqwayo ukuze senze ibala elinamacala amane nelalingenakubonwa ngaphandle. Inqwelo erhuqwayo sasiyisebenzisa njengegumbi lokufundela. Sasidibanela kuyo ukuze sifundisise ngokunzulu kangangeeyure ezisibhozo ngosuku iintsuku ezili-14. Kwindawo ebiyelweyo kwakukho izitulo netafile, zilungiselelwe xa kunokufika iindwendwe ezingalindelekanga. Yaye zafika! Kumathuba anjalo sasiyixabisa ngokwenene inkxaso yothando yeentsapho zethu.
Ngoxa sasiqhubeka sifunda, iintsapho zethu zazijonga abantu abezayo. Ngesi sihlandlo sikhethekileyo, usibonda wedolophu owayekwangunobhala weqela lamaKomanisi lasekuhlaleni, wabonwa esiza ngendledlana eyayisiza kule ndawo sasikuyo. Lowo wayelindile wacofa iqhosha elalinxityelelaniswe ngeentambo zombane kwisixhobo esikhalayo (alarm) esasikwinqwelo erhuqwayo. Ngokukhawuleza satsiba ukuphuma enqweleni saza sahlala kwiindawo ezazisele zilungisiwe etafileni saqalisa ukudlala amakhasi. Kwakukho nebhotile yotywala ukuze sibonakale njengabantu abazonwabeleyo ngokwenene. Usibonda wasityelela ngobuhlobo waza wabuyela ekhaya engakhange abe nasikrokro soko kwakuqhubeka ngokwenene.
Iiklasi zeSikolo Sobulungiseleli SoBukumkani zaqhutywa elizweni lonke ukususela ngentwasahlobo yowe-1962 ukuya kuthi xhaxhe ngasekupheleni kowe-1965. Uqeqesho olucokisekileyo olwafunyanwa apho, nolwaluquka inkcazelo engendlela yokuhlangabezana nemeko esasikuyo eMpuma Jamani, lwaxhobisa abadala ngendlela yokuvelela umsebenzi wokushumayela. Ukuze bakwazi ukuya kwiiklasi, abadala babengancami nje kuphela amaxesha ekhefu labo kodwa babezibeka nasengozini yokuvalelwa entolongweni.
Iingenelo Zesikolo
Abasemagunyeni babekujonge ngeliso elibukhali konke esasikwenza, yaye ekupheleni kowe-1965, emva kokuba uninzi lwabadala sele luyile esikolweni, bazama ukuwubhangisa umsebenzi wentlangano yethu. Kwabanjwa amaNgqina ali-15 awayegqalwa njengalawo akhokelayo emsebenzini. Eso yayisisenzo esicwangciswe kakuhle, esachaphazela lonke elo lizwe. Kwakhona, abaninzi bacinga ukuba amaNgqina ayeza kuyeka ukusebenza. Kodwa ngoncedo lukaYehova sazilungelelanisa nemeko saza saqhubeka nomsebenzi njengakuqala.
Eyona nto yabangela oku kwaba nokwenzeka yayiluqeqesho olwafunyanwa ngabadala kwiSikolo Sobulungiseleli SoBukumkani kunye namaqhina okuthembana awomelezwa lunxulumano abalunandipha ebudeni bezi klasi. Ngaloo ndlela, intlangano yabonakalisa ukomelela kwayo. Hayi indlela ekwakubaluleke ngayo ukuba ngentobelo sasilulandele ngokusondeleyo ulwalathiso lwentlangano!—Isaya 48:17.
Kwiinyanga ezilandelayo kwabonakala ukuba imiqathango enzima yamagosa aseburhulumenteni ayizange iwuphazamise kangako umsebenzi wethu. Emva kwethutyana, sakwazi ukuphinda siqhubeke neeklasi zeSikolo Sobulungiseleli SoBukumkani. Xa abasemagunyeni baphawula ukuba sasibuye somelela ngokukhawuleza, banyanzeleka ukuba batshintshe iindlela abasebenza ngazo. Olunjani lona uloyiso ngoYehova!
Ukukhuthala Kubulungiseleli
Ngelo xesha amaqela ethu eSifundo Sencwadi Sebandla ayebunjwe ngabantu abamalunga nesihlanu. Ngamnye wethu wayefumana uncwadi lwethu lweBhayibhile kweli lungiselelo lesifundo sencwadi, yaye umsebenzi wokushumayela wawulungelelaniswa kwezi zifundo zamaqela amancinane. Kwasekuqaleni uYehova wasisikelela mna noRegina ngabantu abaninzi abanomnqweno wokufunda iBhayibhile.
Umsebenzi wendlu ngendlu walungiselelwa ngendlela yokuze sikhuseleke ekubhaqweni nasekubanjweni. Sasingena kwenye indlu, size sitsibe amakhaya ambalwa ngaphambi kokunkqonkqoza komnye umnyango. Kwenye indlu mna noRegina samenywa linenekazi elithile ukuba singene. Sasixubusha nalo ngeZibhalo xa kwangena unyana walo. Wayengagwegwelezi tu kwaphela.
“Ngaba nakha nambona na uThixo wenu?” wabuza. “Yazini le nto ke, mna ndikholelwa kwendikubonayo kuphela. Enye nenye yinkunkuma.”
Ndaphendula ndathi: “Andikukholelwa oko. Ngaba wakhe wabubona ubuchopho bakho? Yonke into oyenzayo ibonisa ukuba unabo.”
Mna noRegina sambonisa eminye imizekelo yezinto ezininzi esizamkelayo singaziboni, njengombane. Lo mfana waphulaphula ngenyameko, yaye kwaqaliswa isifundo seBhayibhile sekhaya kunye naye nonina. Bobabini baba ngamaNgqina. Enyanisweni, abantu abali-14 esabafundelayo mna nomfazi wam baba ngamaNgqina. Isiqingatha sabo sadibana naso kutyelelo lwethu lwendlu ngendlu, kanti esinye isiqingatha sadibana naso xa sasinikela ubungqina obungacwangciswanga.
Nje sakuba isifundo seBhayibhile siqhutywa rhoqo yaye sibona ukuba umntu lowo unokuthenjwa, sasimmemela ezintlanganisweni. Phofu ke, eyona nto sasiyijonga ngokuyintloko, yayikukuba isifundo sasingalubeki emngciphekweni na ukhuseleko lwabantu bakaThixo. Ngaloo ndlela, maxa wambi kwakuthabatha ithuba elingangonyaka ngaphambi kokuba umfundi weBhayibhile simmemele entlanganisweni, yaye kwezinye iimeko kwakuba ngaphezu koko. Ndikhumbula enye indoda eyayidume ngandlel’ ithile; yayinobuhlobo obusenyongweni namagosa aphezulu kwiQela LamaKomanisi. Yaqhutyelwa isifundo seBhayibhile iminyaka elithoba ngaphambi kokuba ivunyelwe ukuya ezintlanganisweni! Namhlanje le ndoda ngumzalwana wethu ongumKristu.
Abasemagunyeni Basesemva Kwethu
Emva kowe-1965 sasingabanjwa sonke ngaxeshanye, kodwa sasingayekwanga siseluxolweni. Abasemagunyeni babesasibeke esweni. Ngeli thuba ndandisebenzisana ngokusondeleyo netlangano yethu, ngoko ndandijongwe ngokukhethekileyo ngabasemagunyeni. Kangangezihlandlo ezininzi babendithabatha baye kundincina, babendisa esikhululweni samapolisa baze bandipheke bendophula ngemibuzo. Babedla ngokuthi: “Ngoku ungalibala ngenkululeko yakho, uya entolongweni.” Kodwa ekugqibeleni babesoloko bendiyeka ndihambe.
Ngowe-1972 amagosa amabini aseburhulumenteni andityelela yaye engaqondi ancoma intlangano yethu. Ayephulaphule kwiSifundo sethu SeMboniselo sebandla. Ngelichasayo athi: “Inkcazelo ekweli nqaku siyifumanise ingathandeki konke konke.” Ngokucacileyo ayexhalabele okwakunokucingwa ngabanye abantu ngeengcamango zamaKomanisi xa babenokufunda elo nqaku lalixutyushwa. Athi: “Ngapha koko, kusasazwa izigidi ezihlanu okanye ezithandathu zeMboniselo, yaye iyafundwa kumazwe asakhasayo. Ayilophephandaba njee elikumgangatho ophantsi.” Ngaphakathi ndathi: ‘Hayi indlela eninyanise ngayo!’
Ngowe-1972 yayiyiminyaka engama-22 umsebenzi wethu uvaliwe, yaye uYehova wasikhokela ngothando nangobulumko. Sasiyilandela ngenyameko imiyalelo yakhe, kodwa yayiseza kuba yiminyaka eli-18 ngaphambi kokuba amaNgqina aseMpuma Jamani akhululeke ngokusemthethweni. Hayi indlela esinombulelo ngayo ngenkululeko emangalisayo esiyinandiphayo ngoku yokunqula uThixo wethu, uYehova!—Ngokubaliswa nguHelmut Martin.