Vuyani KuYehova Nize Nigcobe
KUYAVUYISA kakhulu xa umsebenzi obalulekileyo ugqityiwe. Uthweso-zidanga olwaqhutywa ngoMatshi 13, 1999, kwiZiko Lemfundo leWatchtower ePatterson, eNew York, ngokuqinisekileyo yayisisihlandlo kanye esinjalo kubafundi abangama-48 beklasi ye-106 kwiSikolo seBhayibhile seWatchtower saseGiliyadi.
Amagqabaza okuvula kaTheodore Jaracz, ilungu leQumrhu Elilawulayo, owaphumelela kwiklasi yesixhenxe yaseGiliyadi, nosihlalo wocwangciso lokuvuyisana nabaphumeleleyo, wabalaselisa amazwi akwiNdumiso 32:11 athi: “Vuyani kuYehova, nigcobe, nina malungisa.” Ecacisa isizathu sokuba kufanelekile ukuba bonke bavuye ngesi sihlandlo, wathi: “Kungenxa yoko uYehova akuphumezayo ngabo baneentliziyo ezilungileyo, kuquka nabafundi bethu baseGiliyadi, ukuba sivuye ngezihlandlo ezinjengesi.” Nangona abafundi benze amalungiselelo okuza kwiSikolo saseGiliyadi baze bazibhokoxa ngamandla ukuze bayifanelekele inkonzo yobuvangeli basemazweni, nguYehova oye wenza kwenzeka oku ukuze konke kuphumelele kakuhle ekugqibeleni. (IMizekeliso 21:5; 27:1) UMzalwan’ uJaracz wagxininisa esithi, eso sesona sizathu ‘sokuvuya kuYehova.’
Phakathi kwabo babekho kwiholo yasePatterson yayingamalungu eentsapho neendwendwe zabafundi abavela kumazwe ali-12 ukuze baze kubona esi sihlandlo sivuyisayo. Njengoko abantu abangama-5 198 ababekho—kuquka namalungu entsapho yaseBheteli eBrooklyn, ePatterson naseWallkill, babenandipha olu cwangciso ngokuluphulaphula nangokulubona ngevidiyo—babekhangele phambili ngolangazelelo kucwangciso olwaluza kulandela, yaye kwakucacile ukuba kwakukho umoya wovuyo.
Ukubongozwa Ukuze Balondoloze Umoya Wolonwabo
Njengoko uMzalwan’ uJaracz wayequkumbela amagqabaza akhe okuvula, wabiza isithethi sokuqala kwezihlanu, esasilungiselele isiyalo esikhuthazayo seZibhalo esasilungiselelwe kungekuphela nje abo baphumeleleyo baseGiliyadi kodwa nabo bonke ababekho apho.
Owokuqala ukuthetha yayinguWilliam Malenfant, owaphumelela kwiklasi yama-34 yaseGiliyadi, ngoku okhonza njengomncedisi kwiKomiti Yokufundisa yeQumrhu Elilawulayo. Ngokuphathelele umxholo wakhe othi “ ‘Asiyona Yonke’ Into Engamampunge!” esekelwe kwiNtshumayeli 1:2, wabuza umbuzo othi: “Ngaba uSolomon wayethetha ukuba yonke into, ngokwenene, ingamampunge?” Impendulo: “Akunjalo. Wayebonisa ukuba imisebenzi yabantu yokutyeshela ukuthanda kukaThixookay for Xhosa, usukelo olunxamnye nokuthanda kukaThixo—zonke ezo zinto zingamampunge.” Ngokwahlukileyo koko, ukukhonza uThixo wokwenyaniso, uYehova, akungawo amampunge; kungekhona nokufundisisa iLizwi likaThixo, iBhayibhile, nokulifundisa abanye. UThixo akayilibali imigudu enjalo yabakhonzi bakhe. (Hebhere 6:10) Eneneni, kwanokuba basenokufikelwa yintlekele abo uThixo akholiswayo ngabo, ‘bobotshwa esiqhumeni sabaphilileyo kuYehova uThixo.’ (1 Samuweli 25:29) Hayi indlela evuyisa ngayo loo ngcamango! Ukukhumbula ezi ngongoma kunokunceda bonke abakhonzi bakaYehova ukuba bahlale bevuya.
UJohn Barr, ilungu leQumrhu Elilawulayo, wayikhuthaza le klasi ngentetho yakhe ethi “Yiba Novuyo Kwisabelo Sakho Sobuvangeli Basemazweni.” Wabonisa ukuba inkonzo yobuvangeli basemazweni yinto ebesoloko enomdla kuyo uYehova uThixo. “Yenye yeendlela ezibalulekileyo uYehova abonakalisa ngazo uthando lwakhe ngehlabathi. Wathumela uNyana wakhe ekuphela kwamzeleyo emhlabeni. UYesu wayengoyena mvangeli wasemazweni ubalaseleyo, umvangeli wasemazweni wokuqala.” Ngoxa abafundi babecinga ngotshintsho uYesu okwafuneka alwenze ukuze aphumelele kwisabelo sakhe emhlabeni, iingenelo zenkonzo yobuvangeli basemazweni kaYesu zisafumaneka kubo bonke abaya kuxhakamfula eli thuba. Oku kungenxa yokuba, njengoko uMzalwan’ uBarr wabonisayo, uYesu wayekunandipha ukwenza umsebenzi kaThixo, yaye wayebathanda oonyana boluntu. (IMizekeliso 8:30, 31) UMzalwan’ uBarr wabongoza abo baphumeleleyo ukuba babambelele kwizabelo zabo, kungekhona nje ngenxa yokuba benyamezele, kodwa kuba bekunandipha ukwenza oko. Wabongoza le klasi esithi: “Kholosani ngoYehova; akangekhe aniphoxe.”—INdumiso 55:22.
“Ukuhamba Ngegama LikaYehova Ngonaphakade” yayingumxholo owakhethwa sisithethi esilandelayo, uLloyd Barry, elinye ilungu leQumrhu Elilawulayo. Ekubeni wayesele ekhonze iminyaka engaphezu kwama-25 njengomvangeli wasemazweni eJapan emva kokuphumelela kwiklasi ye-11 eGiliyadi, uMzalwan’ uBarry wachaza amava obuvangeli basemazweni bangaphambili waza wachaza ucelomngeni ekwakufanele bajamelane nalo. Wayicebisa wathini le klasi? “Phezu kwako konke, londolozani imeko yenu engokomoya. Kwakhona, fundani ulwimi nendlela yokuphila. Hlalani ninoburharha. Nize nibambelele emsebenzini; musani ukudinwa okanye ninikezele.” UMzalwan’ uBarry waxelela aba baphumeleleyo ukuba kwizabelo zabo kwamanye amazwe, baza kudibana nabantu abaninzi abalandela oothixo nezithixo ezahlukahlukeneyo, waza wabakhumbuza ngamazwi kaMika athi: “Zonke izizwe zihamba, sona eso egameni lothixo waso; thina ke sihamba egameni likaYehova uThixo wethu, ngonaphakade kanaphakade.” (Mika 4:5) Umzekelo wabavangeli basemazweni bangaphambili ngokuqinisekileyo yimpembelelo enamandla kubakhonzi bonke bakaThixo ukuba baqhubeke behamba ngegama likaYehova yaye bemkhonza ngokuthembekileyo.
Owalandela kolu cwangciso ngumhlohli waseGiliyadi uLawrence Bowen. Umxholo wentetho yakhe yayingumbuzo othi, “Uya Kuzingqina Ungubani?” Wabonisa ukuba impumelelo kwinkonzo kaThixo ixhomekeke kukholo nokuthembela kuYehova. Ukuthembela ngokupheleleyo kuYehova kwamenza uKumkani uAsa wawoyisa ngokupheleleyo umkhosi weentshaba zakhe wamadoda asisigidi. Sekunjalo wakhunjuzwa ngumprofeti uAzariya ngemfuneko yokuqhubeka ethembela kuThixo: “UYehova unani ekubeni ninaye.” (2 Kronike 14:9-12; 15:1, 2) Ekubeni igama likaThixo, uYehova, libonisa ukuba uzibangela abe yiloo nto ifunekayo ukuze azalisekise injongo yakhe—enoba oko kuthetha ukuba abe nguMlungiseleli, uMkhuseli, okanye uMphumezi Wemigwebo—abavangeli basemazweni abathembele kuYehova nabasebenzisana ngokuvisisanayo nenjongo yakhe baya kuphumelela kwizabelo zabo. (Eksodus 3:14) UMzalwan’ uBowen waqukumbela ngelithi: “Nize ningalibali ukuba logama nisenza injongo kaYehova injongo yenu, uya kwenza nantoni na ukuze nizifeze izabelo zenu.”
Isithethi sokugqibela kule nxalenye yolu cwangciso yayinguWallace Liverance, owayesakuba ngumvangeli wasemazweni yaye ngoku ugcina iingxelo zesi sikolo. Intetho yakhe, enomxholo othi “Gcina ILizwi LikaThixo Liphila Yaye Lisebenza Kuwe,” yatsalela ingqalelo kwisigidimi okanye kwisithembiso sikaThixo esingasokuze sisilele, esisoloko sihambela phambili ukuba siqgqitywe. (Hebhere 4:12) Lichaphazela ubomi babo balivumelayo ukuba lenjenjalo. (1 Tesalonika 2:13) Ngaba elo lizwi linokugcinwa njani liphilile kwaye lisebenza ebomini bethu? Ngokufundisisa iBhayibhile ngenkuthalo. UMzalwan’ uLiverance wakhumbuza abaphumeleleyo ngeendlela ezifundwe eGiliyadi zokufundisisa iBhayibhile eziquka ukufunda nokufumana ingqiqo nokusebenza kweLizwi likaThixo. Wacaphula amazwi ka-Albert Schroeder, ilungu leQumrhu Elilawulayo elalikhonza njengosihlalo wekomiti eyayila iSikolo saseGiliyadi kwiminyaka engama-50 eyadlulayo athi: “Ngokusebenzisa ingxelo yayo, ubani angakwazi ukufumana amandla apheleleyo, achanileyo nawokomoya afumaneka kuThixo ngeLizwi lakhe.” Le ndlela yofundisiso lweBhayibhile igcina iLizwi likaThixo liphila kwaye lisebenza.
Amava Avuyisayo Nodliwano-ndlebe
Emva kweentetho, abaphulaphuli bonwatyiswa ngamava avuyisayo avela kubafundi. Phantsi kolwalathiso lukaMark Noumair, owayesakuba ngumvangeli wasemazweni nongumhlohli waseGiliyadi ngoku, iqela labaphumeleleyo labalisa laza labonisa ngendlela eliye lenza umgudu ngayo ukunikela ubungqina kwiimeko ezahlukahlukeneyo. Abanye bakwazi ukuqalisa nokuqhuba izifundo zeBhayibhile nabantu abasentsimini ngokuqwalasela iimeko zabo nokuphulaphula oko bakuthethayo nangokubonakalisa umdla ebantwini. Ngaloo ndlela abafundi ‘banikela ingqalelo rhoqo kubo nakwimfundiso yabo’ yaye babenomdla ngokwenene ukunceda abanye bafumane usindiso.—1 Timoti 4:16.
Kwanikelwa amacebiso amaninzi asebenzayo, yaye uvuyo lwenkonzo yobuvangeli basemazweni lwabonakaliswa ngabazalwana abanamava ababefundiswa kwesi sikolo samalungu ekomiti yesebe esaqhutywa kwiZiko Lemfundo leWatchtower. UMzalwan’ uSamuel Herd noRobert Johnson bekomkhulu benza udliwano-ndlebe nabameli beeofisi zoMbutho baseBolivia, eZimbabwe, eNicaragua, eCentral African Republic, eDominican Republic, ePapua New Guinea naseCameroon.
Emva kwamava nodliwano-ndlebe, uGerrit Lösch, owaphumelela kwiklasi yama-41 yaseGiliyadi yaye ngoku olilungu leQumrhu Elilawulayo, wanikela intetho enomxholo oxhokonx’ ingcinga othi “Ngaba ‘Ungumntu Onqwenelekayo’?” Okokuqala uMzalwan’ uLösch wakhumbuza abaphumeleleyo ukuba uYesu, uNyana kaThixo ofezekileyo, akazange agqalwe njengonqwenelekayo ngabantu, kodwa ‘wayedeliwe yaye eshiyiwe ngabantu.’ (Isaya 53:3) Akumangalisi ke ngoko ukuba namhlanje kwiindawo ezininzi ehlabathini, abavangeli basemazweni bagqalwa njengabantu abangamkelekanga. Kwelinye icala, ebudeni beminyaka emininzi uDaniyeli ekhonza eBhabhiloni, uMdali esebenzisa isithunywa wambiza uDaniyeli ngokuthi uyindoda ‘enqwenelekayo’ kangangezihlandlo ezintathu. (Daniyeli 9:23; 10:11, 19) Yintoni eyenza uDaniyeli wanqweneleka? Akazange alalanise imigaqo yeBhayibhile xa wayezama ukuqhelana nendlela yokuphila yaseBhabhiloni; wayenyanisekile ngayo yonke indlela, engazange asebenzise isigxina sakhe ukuze kungenelwe yena; yaye wayengumfundi okhutheleyo weLizwi likaThixo. (Daniyeli 1:8, 9; 6:4; 9:2) Kwakhona wayethandaza ngokuthe rhoqo kuYehova yaye wayesoloko ekulungele ukuzukisa uThixo ngoko akwenzileyo. (Daniyeli 2:20) Ngokulandela umzekelo kaDaniyeli, abakhonzi bakaThixo basenokuba ngabanqwenelekayo, kungekhona kweli hlabathi, kodwa kuYehova uThixo.
Ukuqukumbela olu cwangciso lukhuthazayo ngokomoya, usihlalo wafunda iincwadi nemiyalezo evela ehlabathini lonke. Emva koko, ngasinye kwizibini ezingama-24 safumana iziqinisekiso zaso, kwaza kwachazwa namazwe ezabelwe kuwo. Ekugqibeleni, ummeli weklasi wafunda incwadi ebhalelwe iQumrhu Elilawulayo nentsapho yaseBheteli, ebonisa uxabiso lweklasi ngokuqeqeshwa nokuxonxwa kwayo kwiinyanga ezintlanu ezidluleyo.
Njengoko olu cwangciso lwafikelela esiphethweni, kwakuvakala ‘uvuyo, nemibulelo’ phakathi kwesihlwele esindulukayo.—Nehemiya 12:27.
[Ibhokisi ekwiphepha 27]
Inkcazelo Engabafundi
Inani lamazwe abavela kuwo: 10
Inani lamazwe ababelwe kuwo: 19
Inani labafundi: 48
Inani lezibini ezitshatileyo: 24
Umlinganiselo wobudala: 33
Umlinganiselo weminyaka besenyanisweni: 16
Umlinganiselo weminyaka bekubulungiseleli bexesha elizeleyo: 13
[Umfanekiso okwiphepha 25]
Iklasi Ye-106 Ephumelele KwiSikolo SeBhayibhile SeWatchtower SaseGiliyadi
Kuluhlu olungezantsi, kuqalwa kuluhlu olungaphambili ukuya kolungasemva, yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez,; R.; Helly, F.; Smith, M. Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.