Kungekudala—Kuza Kubakho Ihlabathi Elingenabantu Baphelelwe Lithemba

UBOMI buya busiba nzima ngakumbi, kwaye baninzi oonobangela bokuphelelwa lithemba. Xa sikhathazekile, sisenokukufumanisa kunzima ukulawula iimvakalelo zethu. Ewe, kwanabantu ababuthandayo ubomi bakhe bangonwabi nje konke konke! Makhe siqwalasele imizekelo embalwa.

Mandulo phayaa, umprofeti uMoses wadimazeka kangangokuba wathi kuThixo: “Nceda usele undibulala ndife fi, ukuba ndikholekile emehlweni akho, ndingayiboni intlekele yam.” (Numeri 11:15) Esaba kwiintshaba zakhe, umprofeti uEliya wadanduluka esithi: “Kwanele! Owu Yehova, wuthabathe umphefumlo wam [ubomi].” (1 Kumkani 19:4) Kwaye nomprofeti uYona wathi: “Khawuncede, Yehova, uwuthabathe kum umphefumlo wam, kuba kulunge ngakumbi ukufa kum kunokuphila.” (Yona 4:3) Kodwa uMoses, uEliya noYona abazange bazibulale. Bonke babewazi umthetho kaThixo othi: “Uze ungabulali.” (Eksodus 20:13) Ekubeni babenokholo olomeleleyo kuThixo, babesazi ukuba ayikho imeko eyenza ukuba ubani aphelelwe lithemba nokuba ubomi busisipho esivela kuThixo.

Kuthekani ngeengxaki esijamelana nazo ngoku? Ukongezelela ekudandathekeni komphefumlo okanye kwiingxaki zempilo, maxa wambi kusenokufuneka sinyamezele ukuphathwa kakubi ngamalungu entsapho, ngabamelwane okanye ngabantu esisebenza nabo. IBhayibhile ithetha ngabantu abazele “yiyo yonke intswela-bulungisa, ubungendawo, inkanuko, ububi, ukuzala ngumona, ukubulala, imbambano, inkohliso, utyekelo lokuba nolunya, bengabasebezi, abadli-zithende, bemthiyile uThixo, bengabasileyo, abanekratshi, abazidlayo, abayili bezinto ezimbi, bengabathobeli abazali, bengenakuqonda, besaphula izivumelwano, bengenawo umsa wemvelo, bengenanceba.” (Roma 1:28-31) Ukungqongwa ngabantu abanjalo umhla nezolo kusenokwenza ubomi bubonakale buluxanduva. Sinokubanceda njani abo bafuna intuthuzelo nesiqabu?

Ukukulungela Ukuphulaphula

Amanzithinzithi kunye neenkxwaleko zinokubangela ukuba ubani angacingi ngendlela elungeleleneyo. Enye indoda esisilumko yathi: “Ingcinezelo nje isengasiphambanisa isilumko.” (INtshumayeli 7:7) Ngoko umntu othetha ngokuzibulala akafanele atyeshelwe. Iingxaki ajamelana nazo, enoba zezeemvakalelo, zezempilo, zezengqondo, okanye zezokomoya, zisenokufuna ingqalelo ekhawulezileyo. Kakade ke, unyango olunikelwa ngoogqirha luyahluka, kwaye isigqibo sokuba usebenzisa luphi na unyango sifanele senziwe nguye.—Galati 6:5.

Enoba siyintoni na isizathu sokuba umntu afune ukuzibulala, xa enomntu oqondayo, onovelwano nonomonde anokuzityand’ igila kuye, oko kunokudala umahluko omkhulu. Amalungu entsapho nabahlobo abakulungeleyo ukuphulaphula basenokukwazi ukunceda. Ukongezelela kuvelwano nakububele, iingcamango ezakhayo ezisuka kwiLizwi likaThixo zinokuba luncedo gqitha kwabo baphelelwe lithemba.

Uncedo Lokomoya Kwabo Badandathekileyo

Unokumangaliswa kukubona indlela ukufunda iBhayibhile okukhuthaza ngayo. Nangona ingeyoncwadi eyilelwe ukuphilisa ingqondo, iBhayibhile inako ukusinceda sibuxabise ubomi. UKumkani uSolomon wathi: “Ndiyazi ukuba akukho nto ilunge ngakumbi kulo kunokuba nemihlali nokwenza okulungileyo ebudeni bokudla kwalo ubomi; kwanokuba wonk’ umntu ufanele adle, asele aze ngokwenene abone okulungileyo kuko konke ukusebenza kwakhe nzima. Sisipho sikaThixo eso.” (INtshumayeli 3:12, 13) Nangaphandle komsebenzi owanelisayo owenza ubomi bube nentsingiselo, izinto ezincinane nje—ezinjengempepho emyoli, ukukhanya kwelanga, iintyatyambo, imithi neentaka—zizipho ezivela kuThixo esinokuzinandipha.

Okukhuthaza nangakumbi sisiqinisekiso esiseBhayibhileni sokuba uYehova uThixo noNyana wakhe, uYesu Kristu, bayasikhathalela. (Yohane 3:16; 1 Petros 5:6, 7) Ngokufanelekileyo, umdumisi wathi: “Makabongwe uYehova osithwalela umthwalo mihla le, uThixo oyinyaniso wosindiso lwethu.” (INdumiso 68:19) Nangona sisenokuziva singabalulekanga yaye singento yanto, uThixo uyasimema ukuba sithandaze kuye. Qiniseka ngento yokuba nabani na ocela uncedo lwakhe ngokuthobeka nangokunyaniseka akayi kujongelwa phantsi.

Akakho umntu onokulindela ngokufanelekileyo ukuphila ubomi obungenazo iinkathazo namhlanje. (Yobhi 14:1) Ukanti, inyaniso evela kwiLizwi likaThixo iye yabonisa abantu abaninzi ukuba ukuzibulala akuyondlela ilungileyo yokucombulula iingxaki zabo. Khawubone nje indlela umpostile uPawulos awamnceda ngayo umgcini-ntolongo owayephelelwe lithemba, owathi ‘akuvuka ebuthongweni waza wabona iingcango zentolongo zivulekile, wathi rhuthu ikrele lakhe yaye sele eza kuzibulala, ecinga ukuba amabanjwa abalekile.’ Ngethutyana nje elingephi, lo mgcini-ntolongo wagqiba kwelokuba kwakubhetele ukuzibulala kunokwenziwa intlekisa aze mhlawumbi abulawe ngendlela engcungcuthekisayo ngenxa yentsilelo yakhe. Lo mpostile wakhwaza esithi: “Musa ukuzenzakalisa, kuba sonke silapha!” UPawulos akazange aphelele ekuthetheni loo mazwi. Eneneni, yena noSilas bamthuthuzela lo mgcini-ntolongo baza baphendula umbuzo wakhe owawusithi: “Bahlekazi, ndimele ndenze ntoni na ukuze ndisindiswe?” Baphendula: “Kholwa kwiNkosi uYesu yaye uya kusindiswa, wena nendlu yakho.” Emva koko bathetha ilizwi likaYehova kuye nakwindlu yakhe, ibe umphumo waba kukuba “yena nendlu yakhe babhaptizwa ngaphandle kokulibazisa.” Loo mgcini-ntolongo nendlu yakhe bavuya gqitha baza bafumana intsingiselo yobomi.—IZenzo 16:27-35.

Hayi indlela ekuzisa isiqabu ngayo namhlanje ukwazi ukuba asingoThixo obangela ubungendawo! ILizwi lakhe lichaza isidalwa somoya esingendawo, ‘esibizwa ngokuba nguMtyholi noSathana,’ njengalowo “ulahlekisa umhlaba omiweyo uphela.” Kodwa ixesha lakhe lixhatshwe yinja. (ISityhilelo 12:9, 12) Kungekudala, lonke udandatheko oluye lweziswa nguSathana needemon zakhe kubemi bomhlaba luza kupheliswa kukungenelela kukaThixo. Liya kwandula ke ihlabathi elitsha elithenjiswe nguThixo libaphelise ngokusisigxina oonobangela bokuphelelwa lithemba nokuzibulala.—2 Petros 3:13.

Intuthuzelo Kwabo Bacela Uncedo

Kwanangoku, abo baphelelwe lithemba banako ukufumana intuthuzelo kwiZibhalo. (Roma 15:4) Umdumisi uDavide wavuma ingoma esithi: “Intliziyo eyaphukileyo netyumkileyo, Thixo, akuyi kuyidela.” (INdumiso 51:17) Kuyinyaniso kona ukuba, asikwazi kuziphepha ezinye zezilingo esidibana nazo kwaye siyayiva imiphumo yokungafezeki. Kodwa ukungenisa ulwazi oluchanileyo ngoBawo wethu wasezulwini onobubele, onothando nosengqiqweni kuya kusiqinisekisa ukuba sixabisekile emehlweni akhe. UThixo unokuba nguMhlobo wethu osenyongweni kunye noMyaleli wethu. Ukuba sihlakulela ulwalamano lothando noYehova uThixo, akasayi kuze asiphoxe. UMdali wethu uthi: “Mna, Yehova, ndinguThixo wakho, Lowo ukufundisa okuyingenelo kuwe, Lowo ukubangela unyathele endleleni ofanele uhambe ngayo.”—Isaya 48:17.

Ukwayama ngoThixo kuye kwabanceda abantu abaninzi. Ngokomzekelo: UMara wayesele eqotywe ludandatheko xa wafelwa ngokuphela konyana wakhe kwingozi yendlela.a Waba liphakuphaku waza wazama ukuzibulala. Noko ke, sithethanje uvuka ngenj’ ixukuxa yonke imihla aze enze imisebenzi yakhe yasekhaya. Uthanda ukuphulaphula umculo nokunceda abanye. Ithemba lokuba “kuza kubakho uvuko lwamalungisa nabangengomalungisa” liye layithomalalisa intlungu yokufa okulisikizi konyana abemthanda kunene kwaye liye lalomeleza ukholo lwakhe kuThixo. (IZenzo 24:15) Ekubeni uMara engazange anqwenele ukufana nengelosi ezulwini, amazwi eNdumiso 37:11 aye ayichukumisa intliziyo yakhe: “Abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.”

Elinye ibhinqa laseBrazil, uSandra, lalizibhokoxa lisebenzela ukuba libe ngumama olungileyo kubantwana balo abathathu. Liyavuma: “Ndandixakeke gqitha kangangokuba xa utata wafa ngesiquphe ndaza, kwangaxeshanye, ndafumanisa ukuba umyeni wam wayethandana nelinye ibhinqa, andizange ndiyicinge kwaukuyicinga into yokuthandaza ndize ndicele uncedo kuThixo.” Ephelelwe lithemba, uSandra wazama ukuzibulala. Yintoni eye yamnceda wabuyela kwimeko yakhe yangaphambili? Luxabiso lwakhe ngezinto zokomoya. “Ngengokuhlwa nganye ndifunda iBhayibhile ngaphambi kokuba ndilale, kwaye ndizama ukuzibeka kwimeko yabo bantu ndifunda ngabo. Kwakhona ndifunda iphephancwadi IMboniselo noVukani!, kwaye ndiwathanda ngokukhethekileyo amabali obomi kuba andinceda ndanele zizinto endinazo ebomini.” Esazi ukuba uYehova ungumhlobo wakhe osenyongweni, uye wafunda ukuthetha ngokuphandle xa ethandaza.

Ixesha Elizayo Ekungayi Kubakho Bantu Baphelelwe Lithemba

Hayi indlela ekuthuthuzela ngayo ukwazi ukuba ukubandezeleka kwabantu yinto yexeshana! Phantsi kolawulo loBukumkani bukaThixo, abantwana nabantu abakhulu ngoku abangamaxhoba olwaphulo-mthetho, okudlelw’ indlala okanye ekhethe, baya kuvuya. Njengoko kwaxelwa kwangaphambili kwindumiso esisiprofeto, uKumkani omiselwe nguYehova, uYesu Kristu, “uya kumhlangula lowo ulihlwempu ukhalela uncedo, kwanalowo uxhwalekileyo nabani na ongenamncedi.” Ngaphezu koko, “uya kuba nosizi ngesisweli nangehlwempu, nemiphefumlo yabangamahlwempu uya kuyisindisa.” Okunene, “uya kuwukhulula umphefumlo wabo kwingcinezelo nakugonyamelo, negazi labo liya kuxabiseka emehlweni akhe.”—INdumiso 72:12-14.

Sele lisondele ixesha lokuba loo mazwi esiprofeto azaliseke. Ngaba ingcamango yokuphila ubomi obungenasiphelo emhlabeni phantsi kweemeko ezinjalo ayinamtsalane kuwe? Ukuba kunjalo, usibonile ke isizathu sokuba novuyo nesokuxabisa ubomi njengesipho esivela kuThixo. Kwaye ukuba wabelana nabanye ngala madinga athuthuzelayo avela kwiZibhalo, unokwenza abo bacela uncedo baphile ubomi obonwabisayo kweli hlabathi lingenamvakalelo, nelingenaluthando.

[Umbhalo osemazantsi]

[Umfanekiso okwiphepha 6]

Zininzi izihlandlo ezonwabisayo kule mihla

[Umfanekiso okwiphepha 7]

Ngaba ukhangele phambili kwihlabathi elinganabantu baphelelwe lithemba?