“Buyelani Kum, Ndibuyele Kuni”

INTSAPHO yayinandipha ukubethwa ngumoya okuchwayitisayo ehlathini. Wandula ke, uPeter onguntondo, wayishiya intsapho, esihla ngenduli eleqa unomatse. Ngequbuliso, izulu laxubayela kwaza kwaqalisa ukuna. Ekuqaleni yaba yintshizane engephi, kodwa ngokuthe ngcembe yaqalisa ukugalela ngamandla. Intsapho yakhawuleza yaqokelela izinto zayo yaza yabalekela kwisithuthi sayo. Yaye wonke ubani wayezibuza apho uPeter wayekhoyo.

Ngelo xesha, uPeter, wayezama ukubuyela entsatsheni. Kwakunzima ukubona ngaphambili, yaye indlela yokunyuka apho yayimtyibilizi ngenxa yemvula. Engalindelanga, wasuka umhlaba wahofo-hofo watshona emngxunyeni onzulu ofihlakeleyo. Wazama ukuphuma apho, kodwa amacala awo ayemtyibilizi kakhulu.

Amanzi emvula aqukuqela ukuhla kuloo nduli ibe ayewuzalisa loo mngxuma ngodaka. Ngokwenene uPeter wayesengozini yokutshona. Kodwa ke uyise wamfumana waza wamtsala ngentambo. Kamva, uPeter wangxoliswa kabukhali ngenxa yokubhadula. Sekunjalo, esongelwe ngengubo ezandleni zikanina, kwaba lula kakhulu ukuba akwamkele oko kungxoliswa.

La mava akufanekisela kakuhle oko kwenzeka kwabathile ababesakuba phakathi kwabantu bakaThixo. Baye bawela kumngxuma onzulu wale nkqubo yezinto yaye ngokungenakuzinceda bazama ukuphuma baze babuyele kwikhusi eliyintlangano kaYehova. Hayi indlela ekuvuyisa ngayo ukwazi ukuba uYehova unenceba yaye ukulungele ‘ukubaphosel’ intambo’ aze abancede babuyele kwinkuselo!

Iinkqubano ZikaYehova Ezinenceba

Emva phayaa kwimihla yamaSirayeli, ekugqityweni kokwakhiwa kwetempile, uSolomon wenza umthandazo wokuyinikezela awathi kuwo wacela uYehova ukuba aphulaphule iingcelo ezingetempile. Wandula ke wathi: “Xa bathe [amaSirayeli] bakona (ngokuba akukho mntu ungoniyo), waba nomsindo, wabanikela elutshabeni, . . . baza bakunyamekela oko ngentliziyo kwelo zwe bathinjelwe kulo, babuya, batarhuzisa kuwe ezweni lababathimbileyo, . . . yiva ke emazulwini, endaweni ohlala kuyo, ukuthandaza kwabo nokutarhuzisa kwabo.”—1 Kumkani 8:46-49.

Isicelo sikaSolomon sazalisekiswa kwizihlandlo ezininzi ebudeni bembali kaSirayeli. Ngokuphindaphindiweyo, abantu bakaThixo batyeka baza bamshiya. Ngoko bayiqonda impazamo yabo baza babuya, bamfuna. Yaye uYehova wabaxolela. (Duteronomi 4:31; Isaya 44:21, 22; 2 Korinte 1:3; Yakobi 5:11) Esebenzisa uMalaki, uYehova wathetha ngeminyaka eliwaka yenkqubano nabantu Bakhe xa Wathi: “Kususela kwimihla yoyihlo, nimkile emimiselweni yam, anayigcina. Buyelani kum, ndibuyele kuni.”—Malaki 3:7.

Oonobangela Bokukhubeka

NjengamaSirayeli, uninzi lwabantu bakaThixo namhlanje luyatyeka luze luzahlule kwintlangano kaYehova. Kutheni? Bambi baleqa into ebonakala imsulwa ekuqaleni, njengoPeter owayeleqa unomatse. Oku koko kwenzekayo kuAda. Unikela le ngxelo: “Kwakulisiko lethu nabo ndandisebenza nabo ukuba siye kunye kwisidlo sasemini kwindlu yokutyela ekufutshane. Ngoko xa bandimemayo ukuba ndiye kufumana ikofu ekupheleni kosuku, ndavuma lula. Ndaqiqa ngelokuba ndandingasebenzisi ixesha ebelifanele ukusetyenziselwa iintlanganiso okanye ukushumayela. Andizange ndiqonde ukuba oku isengakukusilela ukugcina umgaqo okweyoku-1 kwabaseKorinte 15:33.

“Kungabanga thuba lide, ngeMigqibelo ndandisiya kukhwela amahashe kunye nabo. Ndandule ke ndiye kwimifanekiso eshukumayo nakwiholo yemiboniso kunye nabo. Oko kwakhokelela ekuphosweni kwam ziintlanganiso ezithile. Ekugqibeleni, ndandingasayi kuzo zonke iintlanganiso ndingasenasabelo nakumsebenzi wokushumayela. Xa ndakuqondayo okwenzekayo, ndandingasanxulumani nentlangano.”

Kwezinye iimeko isizathu isenokuba sisono esinzulu esifihliweyo esimbangela umntu azive engafanelekanga ukuba akhonze uThixo. (INdumiso 32:3-5) Okanye ubani usenokukhutyekiswa yinto ethethwe okanye eyenziwe ngamaqabane angamaKristu, ngokutsho kukaSolomon, engaqondi ukuba “akukho mntu ungoniyo.”—1 Kumkani 8:46; Yakobi 3:2.

Sekunjalo abanye badinyazwa kukufumana uqeqesho. (Hebhere 12:7, 11) Umtsalane wendlela yokuphila yezinto eziphathekayo uye wakhokelela abaninzi ukuba bayeke ukukhonza uThixo. Ngokufuthi, kwiphulo labo lokufuna impumelelo yehlabathi, baye batshona zwabha kumsebenzi wehlabathi ngokokude kubomi babo bangabi nalo ithuba lenkonzo kaThixo. (Mateyu 13:4-9; 1 Timoti 6:9, 10) Ngaba akukho themba ngemeko yabo banjalo?

Ngaba Uya Kusabela Kwisimemo SikaYehova?

Ngesinye isihlandlo uYesu wathetha into ekwakunzima ukuyiqonda, yaye bambi yabakhubekisa. Ingxelo ithi: “Ngenxa yoko into eninzi yabafundi bakhe yabuya umva, ayaba sahamba naye.” Kodwa asingabo bonke abakhubekayo. Ingxelo yeBhayibhile ihlabela mgama isithi: “Wathi ngoko uYesu kwabalishumi elinababini, Nani nifuna ukumka, yini na? Wamphendula ngoko uSimon Petros wathi, Nkosi, sosuka siye kubani na? Nguwe onamazwi obomi obungunaphakade.” (Yohane 6:66-68) Ngobulumko abapostile bakaYesu babona ukuba kwakuya kuba yintlekele ukushiya uYesu.

Bambi babo baye bawa ekugqibeleni baye bafikelela kwisigqibo esifanayo. Bayaqonda ukuba ukushiya intlangano kaThixo kwakulinyathelo eliyintlekele, kwanokuba amazwi akhokelela ebomini banokuwafumana kuYehova noKristu kuphela. Xa baye bakuqonda oko, bakwafanele baqonde ukuba akunakuze ushiywe lixesha lokuba ucingisise kakuhle, ucele ukuxolelwa nguYehova uze ubuyele kuye. NguYehova ngokwakhe owanikela esi simemo: “Buyelani kum, ndibuyele kuni.”—Malaki 3:7.

Eneneni, yiyiphi indawo umKristu onyanisekileyo anokufumana kuyo ulonwabo ukuba akanakulufumana ekukhonzeni uYehova? Ukuba umntu uyakhukuliswa emva kokuba ebeyinxalenye yentlangano kaThixo kangangexesha elithile, yintoni emlindeleyo ngaphandle ehlabathini? Uya kukhawuleza ayiqonde into yokuba ngoku uyinxalenye yehlabathi eliya lisiba nogonyamelo ngakumbi nangakumbi. Uya kuzifumanisa ebandakanyeke kwinkqubo yezinto ezele luhanahaniso, ubuxoki, inkohliso nakukuziphatha okubi, ihlabathi eliyingozi nelingayolisiyo kanye njengomngxuma onodaka owawusongela ubomi bukaPeter oselula. Xa ebuyela ezingqondweni aze aqonde ukuba ubomi bakhe obungunaphakade busengozini, akafanele aphozise maseko ukufuna uncedo lokuzikhulula kulo meko. Kusenjalo, ukubuya kusenokungabi lula.

Ngaba ungomnye obekhe wazama ukubuyela kuYehova kodwa wakufumanisa kunzima? Ngoko yazi ukuba ufuna uncedo. Yaye likholelwe elokuba abazalwana noodade bakho abakwintlangano kaThixo bakulungele ukukunika uncedo. Kodwa umele wenze umgudu wokubonisa uYehova umnqweno wakho. Lixesha lokuba ‘ubuyele ezingqondweni’ uze ‘ubuyele kuYehova.’—1 Kumkani 8:47, NW.

Abancedwayo Ukuba Babuyele

UAda ucacisa oko kwamncedayo ukuba abuyele kuYehova: “Kanye ngexesha elifanelekileyo, udade owayendiqhubele isifundo wandimema ukuba ndiye endibanweni yesiphaluka kunye naye. Wayenobubele gqitha! Akazange andigculele kwaphela! Wabonakalisa uthando. Kwakusele kudlule unyaka ndagqibelayo ukuya kwiintlanganiso, kodwa ndandicamngca ngokungabi nto kwehlabathi nangenkalo yokuba, ngaphaya komtsalane walo wangaphandle, kwakukho ubuhlungu, unxunguphalo nokuziphatha kakubi kuphela. Ngoko ndagqiba kwelokuba ndiye endibanweni. Xa ndafikayo kwiholo yemiboniso eyayinendibano, ndaya kwizihlalo ezisekugqibeleni ndaza ndazifihla ekoneni emnyama. Ndandingafuni ukuba abazalwana bandibone baze bandibuze imibuzo.

“Noko ke, olo cwangciso lwanikela isiluleko endandisifuna ngamehlw’ abomvu. Ekupheleni kwalo, ndandizimisele ukungabuyeli nje kubantu bakaYehova kuphela kodwa ndandizimisele ukuzinikela kuye ngentliziyo yam yonke. Abazalwana bandamkela ngezandla ezifudumeleyo yaye ‘obelahlekile’ wabuya.” (Luka 15:11-24) Konke oko kwenzeka kudala, yaye ngoku uAda ebekwinkonzo yexesha elizeleyo kangangeminyaka engaphezu kwama-25.

Imeko yomnye owazahlulayo ngokufanayo yaba nemiphumo evuyisayo. Abadala abathile bamluleka uJosé ngendlela eyayibonakalisa ukucinga kwabo kunemigaqo yeBhayibhile. UJosé, edimazekile yaye ecaphukile, ekugqibeleni waphola. Kangangeminyaka esibhozo wayezahlule kubantu bakaThixo, yaye ebudeni belo xesha watshata nomntu ongakholwayo waza wanabantwana, omnye wabo awamvumelayo ukuba abhaptizwe kwiCawa yamaKatolika.

Ekugqibeleni, wancedwa xa umveleli wesiphaluka wenza utyelelo lokwalusa kuye waza wakhuthaza abadala ukuba benze okufanayo. Wabuyiselwa yaye wavuyiswa kukubona umfazi wakhe enomdla enyanisweni. Ngoku uJosé ukhonza njengomdala webandla. Njengokuba la mava aba bantu babini ebonisa, uYehova akazigogotyi iintsikelelo kwabo basabelayo kwisimemo sakhe sothando sokuba babuye.

Noko ke, ukuze anandiphe iintsikelelo ezinjalo, ubani umele kuqala aluxabise uncedo alunikiweyo aze asabele kulo. Kumabandla amaninzi abazalwana bayabakhumbula abo baye baphola baze babatyelele ngamathuba athile, bezama ukubanceda. Ukusabela kuncedo olunjalo kubonisa uxabiso ngenceba kaYehova.—Yakobi 5:19, 20.

Ngokwenyaniso, eli lixesha lokusabela kwisimemo sikaYehova esithi: “Buyelani kum.” (Malaki 3:7; Isaya 1:18) Musa ukuba saphozisa maseko. Iziganeko zehlabathi zihamba ngokukhawuleza ngokuphawulekayo. Eyona ndawo onokuba kuyo ebudeni bamaxesha azayo oqhwithela kukwintlangano kaYehova, ukhuseleke phantsi kwenkuselo yakhe. Kuphela ngabo bazimela ngoYehova abanethemba eliqinileyo lokusitheliswa kwingqumbo yakhe ngemini enkulu yomsindo wakhe.—Zefaniya 2:2, 3.

[Umfanekiso okwiphepha 30]

Ngaba uya kusabela kwisimemo sikaYehova esithi, “Buyelani kum”?