Imibuzo Evela Kubafundi
Yiyiphi imbopheleleko amaKristu anayo ekuthobeni isantya sokungcoliswa kwemeko-bume esiphila kuyo—umhlaba, ulwandle, nomoya?
NjengamaNgqina kaYehova, sizixhalabele ngokunzulu iingxaki ezininzi zokonakaliswa kwendalo ngoku ezichaphazela ikhaya lethu elingumhlaba. Ngaphezu kwabantu abaninzi, siyaqonda ukuba umhlaba wawudalelwe ukuba likhaya, elicocekileyo nelinika impilo kwintsapho engabantu abafezekileyo. (Genesis 1:31; 2:15-17; Isaya 45:18) Sikwanesiqinisekiso sikaThixo sokuba ‘uya konakalisa abo bawonakalisayo umhlaba.’ (ISityhilelo 11:18) Ngaloo ndlela kufanelekile ukwenza imigudu esengqiqweni ukuze siphephe ukuba negalelo ngokungeyomfuneko ekonakalisweni komhlaba wethu ngabantu. Noko ke, phawula igama “esengqiqweni.” Kukwafanelekile nangokweZibhalo ukulumkela ukuba iingxaki zokonakaliswa kwendalo kube yeyona nto isixhalabisileyo.
Kwanokuphila kwabantu ngokuqhelekileyo kubangela ukungcola. Ngokomzekelo, ukutyala, nokusetyenzwa, nokutyiwa kokutya kubangela ukungcola, nangona uninzi lwako lunokuguqulelwa kwizinto ezingenabungozi. (INdumiso 1:4; Luka 3:17) Intlanzi eyosiweyo uYesu ovusiweyo awayenzela abafundi bakhe imele ukuba yabangela umsi, uthuthu, nenkunkuma yamathambo entlanzi. (Yohane 21:9-13) Kodwa iinkqubo okanye imijikelo yezinto eziphilayo nezingaphiliyo zasemhlabeni zenzelwe ukuba zikulungise oko.
Abantu bakaThixo abafanele bangayithabatheli ngqalelo imicimbi yokonakaliswa kwendalo. UYehova wayefuna abantu bakhe bamandulo bathabathe amanyathelo ngokulahlwa kwenkunkuma, amanyathelo awayenokuthanani nendalo kunye nempilo. (Duteronomi 23:9-14) Yaye ekubeni siyazi imbono kaThixo ngabo bonakalisa umhlaba, ngokuqinisekileyo asifanele sizityeshele izinto esinokuzenza ukuze sigcine imeko-bume icocekile. Sinokukubonakalisa oku ngokulahla inkunkuma kwindawo efanelekileyo, ingakumbi izinto eziyityhefu. Sifak’ isandla ngenkuthalo kwimigudu yokucholwa kwezinto eziza kuphinda zisetyenziswe, sikwanesizathu sokwenjenjalo ngakumbi ukuba oko kuyalelwe nguKesare. (Roma 13:1, 5) Bambi abantu bazanelisa ngokuthabatha amanyathelo angakumbi, afana nokukhetha ukusebenzisa izinto ezinokuguqulelwa kwizinto ezingenabungozi endaweni yezo ziya kongeza kwintaba yenkunkuma esemhlabeni nephantsi kweelwandle.
Noko ke, eyokuba umKristu uya kuhamba aye kuma phi na kule nkalo ngumcimbi wobuqu ngaphandle kokuba uyalelwe ngumthetho. Ngokuphuma kwimithombo yeendaba kucacile ukuba abantu abangafezekanga bawela ngokulula emgibeni wokugabadela. Ngokuqinisekileyo icebiso likaYesu lifanelekile: “Musani ukugweba, ukuze ningagwetywa . . . Yini na ke ukuba usibone isibi esisesweni lomzalwana wakho, kanti akuwuqiqi wona umqadi okwelakho iliso?” (Mateyu 7:1, 3) Ukuhlala sikukhumbula oku kusenokusinceda singabalibali abanye oothunywashe ababalulekileyo.
Umprofeti uYeremiya wabhala: “Ndiyazi, Yehova, ukuba ayikhona emntwini indlela yakhe; akukhona endodeni ehambayo ukuqinisela ukunyathela kwayo.” (Yeremiya 10:23) Ukutyeshela lo mgaqo kuye kwabangela uluntu lwajamelana ‘namaxesha omngcipheko,’ njengoko kuphawulwe kweyesi-2 kuTimoti 3:1-5. Yaye oko uThixo akubhale kwiSityhilelo 11:18 kungqina ukuba imigudu yabantu yokuphelisa ingxaki enkulu yokonakaliswa komhlaba, kuquka ukungcoliswa, ayiyi kuphumelela ngokupheleleyo. Kusenokubakho inkqubela ethile apha naphaya, kodwa ekuphela kwesicombululo esiya kuhlala sihleli siya kufumaneka ngokungenelela kukaThixo.
Ngenxa yoko imigudu yethu nobuncwane bethu sibujolisa kwisicombululo sikaThixo, kunokuzama nje ukuphelisa imiphumo yengxaki. Ngokwenza oku silandela umzekelo kaYesu, owachitha inxalenye enkulu yobulungiseleli bakhe ‘engqinela inyaniso.’ (Yohane 18:37) Endaweni yokondla ihlabathi okanye ukukhulula abantu ngokubanzi ezingxakini—kuquka ungcoliso—uYesu walatha kwisicombululo esigqibeleleyo seengxaki ezithwaxa uluntu.—Yohane 6:10-15; 18:36.
Ngoxa uthando ngabanye abantu lusiqhubela ukuba siphephe ukungcolisa ngokungeyomfumeko umhlaba, umoya ojikeleze umhlaba, okanye amanzi, siqhubeka singqinela inyaniso. Oku kuquka ukufundisa abantu ukusebenzisa inyaniso yeBhayibhile baze ngaloo ndlela baphephe ukungcolisa imizimba yabo ngokutshaya, ngokusela utywala ngokugqithiseleyo, okanye ngeziyobisi eziyingozi. Njengoko izigidi zabantu abasebatsha ziye zaba ngabafundi, ziye zafunda imikhwa yokucoceka nokuba nolwazelelelo ngabanye. Ngoko namhlanje umsebenzi wokushumayela uye wanegalelo ngokoqobo ekunciphiseni ingxaki eqhelekileyo yongcoliso. Kodwa okubaluleke ngakumbi, abafundi abangamaKristu bazabalazela ukuguqula ubuntu babo nemikhwa yabo ngoku ukuze bakwazi ukulungela ukuphila kumhlaba ococekileyo oyiParadisi uThixo aya kuwulungiselela abanquli bakhe bokwenyaniso kungekudala.