Ukushenxisa Ungcoliso Entliziyweni Nasengqondweni

UYEHOVA akazange enze abantu ukuba balangazelele ukungcola okanye ukungalungelelani. Isijikelezi-langa esilikhaya labo sasenzelwe ukuba sibe yiparadisi ecocekileyo, elungeleleneyo, nentle. UThixo wayengenanjongo yokuba liwohloke libe yindawo engabukelekiyo yokulahla inkunkuma.—Genesis 2:8, 9.

Noko ke, emva kokuba abantu begatye ulwalathiso lukaThixo, baqalisa ukwenza olwabo uhlobo lolungelelwaniso lwehlabathi. Ngenxa yokungafumani ubulumko obuvela kuThixo nokungabi namava, banyanzeleka ukuba benze le naleya bezama ukuphumelela. Imbali yehlabathi iyayingqina inyaniso yeBhayibhile yokuba abantu abanakukwazi ukuzilawula ngokuphumelelayo; kangangamawaka eminyaka ‘umntu ebegunyazela umntu, kube kubi kuye.’ (INtshumayeli 8:9; Yeremiya 10:23) Ingxaki yongcoliso yanamhlanje, ngazo zonke iindlela, ingumphumo wokungakwazi komntu ukulawula.

Ukuba Nembono KaThixo

Abantu abanqwenela ukukholisa uThixo bazama ngamandla ukuphila ngokuvisisana nemilinganiselo yoMdali yococeko. Ngaloo ndlela, amaNgqina kaYehova aba nengxaki xa kulungiselelwe ukuba kubekho indibano ePrague, eCzechoslovakia, phakathi kowe-1991.a Kwakuza kubakho abantu abamalunga nama-75 000, isihlwele esasinokonela kakuhle eStrahov Stadium. Kodwa elo bala lezemidlalo lalingasasetyenziswa kangangeminyaka emihlanu. Lalidlakadlaka, lonakaliswe yimozulu. AmaNgqina kaYehova ali-1 500 achitha iiyure ezingama-65 000 elihlaziya yaye elipeyinta ngokutsha. Lathi lifika ixesha lendibano labe eli qela labacoci lilenze eli bala lezemidlalo indawo efanelekele ukunqula uThixo oyinyaniso, uYehova.

Yintoni eshukumisela amaNgqina kaYehova ukuba ahluke, ngoxa ihlabathi ngokubanzi libonisa ukungabi naluxabiso ngolo hlobo ngococeko nangolungelelwano? Kukuqonda isiluleko seBhayibhile esithi amaKristu amele ashenxise yonke imikhwa ephosakeleyo, efana nokuzingca, ukungabi nalwazelelelo, ukubawa, nokungabi naluthando. IBhayibhile ithi, ‘Hlubani umntu omdala, kunye nezenzo zakhe, nambathe lowo umtsha, uhlaziyelwa ekwazini okuhle ngokomfanekiselo walowo wamdalayo.’ Umntu othanda ucoceko, ulungelelwano, nobuhle akanakuba nalo utyekelo lokungcolisa.—Kolose 3:9, 10; 2 Korinte 7:1; Filipi 4:8; Tito 2:14.

Ubuntu obutsha bubangela amaKristu aluphaphele ungcoliso, angabi ngangenankathalo ngongcoliso okanye aphule umthetho ngokutyeshela imithetho echasene nongcoliso emiselwa ngoorhulumente. Buwanceda aphephe ukuba nesimo sengqondo sokuba nenkcitho, ukuzingca, nesimo sengqondo sokunqena esikhokelela ekungcoliseni. Ngokuhlonela izinto zabanye, ayakuphepha ukudlulisela iimvakalelo neengcamango zawo ngokubhala ezindongeni, njengokuzonwabisa okungenabungozi, okanye njengenye indlela yokubonakalisa ubugcisa. Bubangela ukuba amakhaya, iinqwelo-mafutha, iimpahla, nemizimba igcinwe icocekile.—Thelekisa uYakobi 1:21.

Ngokubhekisele kubantu abangafuniyo ukwambatha obu buntu butsha, ngaba uThixo unokubekek’ ityala ngokubathintela ukuba bangafumani ubomi kwiparadisi yakhe ezayo? Akunjalo konke konke. Nabani na oya kube esenotyekelo lokungcolisa entliziyweni okanye engqondweni uya kusongela ubuhle beparadisi ebuyiselweyo yesijikelezi-langa esinguMhlaba, nto leyo eya kuba buhlungu kwabo bazimisele ukuyigcina icocekile. Isigqibo sikaThixo ‘sokonakalisa abo bawonakalisayo umhlaba’ sesobulungisa yaye sesothando.—ISityhilelo 11:18; 21:8.

Ngaba Sifanele Sifake Isandla Ngenkuthalo?

Noko ke, ngaba oku kuthetha ukuba amaKristu kulindelwe ukuba akhuthaze imilinganiselo echasene nongcoliso okanye eyokucoca?

Ngokucacileyo ungcoliso luyayonakalisa impilo nokhuseleko lukawonke-wonke. Ngokufanelekileyo uYehova uyixhalabele imicimbi enjalo, njengoko sinokubona kwimithetho awayinika amaSirayeli. (Eksodus 21:28-34; Duteronomi 22:8; 23:12-14) Kodwa akukho xesha wakha wawalathisela ukuba aguqulele abanye abantu kwimicimbi yokhuseleko lukawonke-wonke; engazange namaKristu enkulungwane yokuqala akhe axelelwe ukuba enjenjalo.

Namhlanje, ngokulula imicimbi yemeko-bume inokuguqukela ekubeni yimbambano yezobupolitika. Eneneni, wambi amaqela ezopolitiko aye asekwa ngokukhethekileyo ngenjongo yokucombulula iingxaki zasekuhlaleni. UmKristu ozivumela ukuba aphenjelelwe ukuthabatha icala kwezobupolitika akasenguye undilele kwezopolitiko. UYesu wamisela lo mgaqo kubafundi bakhe: “Abangabo abehlabathi, njengokuba nam ndingenguye owehlabathi.” UmKristu okutyeshelayo oko kufunekayo uzibeka engozini yokuzifanisa ‘nabaphathi beli phakade ababhangayo.’—Yohane 17:16; 1 Korinte 2:6.

UYesu akazange azame ukucombulula zonke iingxaki zasentlalweni ngomhla wakhe; engazange axelele nabafundi bakhe ukuba benjenjalo. Umyalelo wakhe kubo yayingulo: ‘Hambani ngoko niye kuzenza abafundi zonke iintlanga, nibabhaptize, nibafundisa ukuba bazigcine zonke izinto endiniwisele umthetho ngazo.’ Akazange abayalele ngeendlela zokusingatha imicimbi yemeko-bume.—Mateyu 28:19, 20.

Echaza oko kufanele kuze kuqala ebomini bomKristu, uKristu wathi: “Funani ke tanci ubukumkani bukaThixo nobulungisa bakhe.” (Mateyu 6:33) Xa uYehova, ngoBukumkani obungoMesiya, enyanzelisa imigaqo yakhe yobulungisa ehlabathini lonke, iingxaki zemeko-bume ziya kuconjululwa ngokusisigxina yaye wonk’ ubani uya kwaneliseka.

Ngaloo ndlela, amaNgqina kaYehova anokuma okulungeleleneyo. Ngokuvisisana namaRoma 13:1-7, kunyanzelekile ukuba akuphaphele ukuthobela imithetho karhulumente elawula imeko-bume. Ukongezelela, uthando lobuthixo ngommelwane luwashukumisela ukuba abonakalise intlonelo ngezinto zabanye—zikawonke-wonke okanye ezobuqu—ngokungazonakalisi nangokungalahli inkunkuma naphi na. Kodwa ngokucacileyo akalathiselwa ukuba akhokele kwimilinganiselo yokucoca yehlabathi. Ngokufanelekileyo abeka ukushumayela isigidimi soBukumkani bukaThixo kwindawo yokuqala, eqonda ukuba le yindlela yokwenza okulungileyo ngokusisigxina.

Ukucoca Kokomoya

AmaSirayeli amandulo ayelunyukiswa rhoqo ngemiphumo eyayinokubakho ukuba ayengcolise umhlaba ngokuphalaza igazi, ngokuziphatha kakubi, okanye ngokungabonakalisi ntlonelo ngezinto ezingcwele. (Numeri 35:33; Yeremiya 3:1, 2; Malaki 1:7, 8) Kuyabonakala ukuba, ayebekek’ ityala ngongcoliso lokomoya, kungekhona ngongcoliso lokwenyama ekusenokwenzeka ukuba ayenetyala nangako.b

Ngoko ke, namhlanje umKristu umele ngokuyintloko azabalazele ukuphepha ungcoliso okanye ukungacoceki ngokomoya. Oku ukwenza ngokwambatha “umntu omtsha,” oshenxisa lonke utyekelo lokungcolisa entliziyweni nasengqondweni. AmaNgqina kaYehova angaphezu kwezigidi ezine ayangenelwa koku kucoca kokomoya, ezuza ukucoceka ngokonqulo nangokomoya, kwanokucoceka okuphawulekayo emzimbeni.—Efese 4:22-24.

Namhlanje kulixesha lephulo lokucoca ngokomoya. Iphulo lokucoca umhlaba wonke ngokoqobo liya kulandela ngexesha elifanelekileyo yaye liya kusindisa ikhaya lethu ekubeni yindawo yokulahla inkunkuma ngokulenzela imeko-bume engenalungcoliso nelifaneleyo.—INtshumayeli 3:1.

[Imibhalo esemazantsi]