“Ixesha Elimiselweyo” Likufuphi

NJENGOMPROFETI uHabhakuki, abafundi bakaYesu babelangazelela ukubona ukubandezeleka kwabantu kuphela. Emva kokuba beve ngendlela obabuza kuwulungisa ngayo umhlaba uBukumkani bukaThixo, babuza uYesu besithi: “Ziya kubakho nini na ezi zinto, kwaye uya kuba yintoni na umqondiso wobukho bakho [enguKumkani onamandla] nowokupheliswa kwenkqubo yezinto?” (Mateyu 24:3) UYesu wabaphendula wathi nguYehova uThixo kuphela olaziyo ixesha obuya kuwulawula ngalo wonke umhlaba uBukumkani. (Mateyu 24:36; Marko 13:32) Noko ke, uYesu nabanye abantu bazichaza izinto esasiya kubona ngazo xa busondele uBukumkani.—Funda ibhokisi engasekunene.

Ngaba akuvumi ukuba ezi zinto zixhaphakile namhlanje? Kwakhona uYesu waxela kwangaphambili ukuba umsebenzi wokufundisa uza kwenziwa emhlabeni wonke namhlanje. Wathi: “Kwaye ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.”—Mateyu 24:14.

Yiloo nto kanye eyenzekayo namhlanje. AmaNgqina kaYehova enza loo msebenzi. Kumazwe angama-236, amaNgqina kaYehova azizigidi ezisixhenxe axelela abantu izinto eziza kwenziwa buBukumkani, yaye ayabanceda ukuba baphile ngokuvisisana nemilinganiselo kaThixo, ofuna kupheliswe iintlungu neembandezelo. Qhubeka ufunda ngoBukumkani bukaThixo, uya kuba nethemba lokuphila kwihlabathi elingenazimbandezelo ngonaphakade.

[Ibhokisi ekwiphepha 8]

IZibhalo Ezalatha Kwimihla Yokugqibela

MATEYU 24:6, 7; ISITYHILELO 6:4

• Imfazwe ezingazange zibonwe ngaphambili.

MATEYU 24:7; MARKO 13:8

• Iinyikima zomhlaba ezinkulu.

• Ukunqongophala kokutya.

LUKA 21:11; ISITYHILELO 6:8

• Izifo.

MATEYU 24:12

• Ukwanda kolwaphulo mthetho.

• Ukuphela kothando.

ISITYHILELO 11:18

• Ukonakaliswa komhlaba.

2 TIMOTI 3:2

• Ukunyolukela imali.

• Ukuvukelwa kwabazali.

• Ukuzithanda ngokugqithiseleyo.

2 TIMOTI 3:3

• Ukuphela komsa wemvelo.

• Abantu abangayithandiyo imvisiswano.

• Abantu abangakwaziyo ukuzeyisa.

• Ukungathandi kulunga.

2 TIMOTI 3:4

• Abantu abathanda ukuzonwabisa ngaphezu kukaThixo.

2 TIMOTI 3:5

• Abahanahanisi abaninzi abathi bangamaKristu.

MATEYU 24:5, 11; MARKO 13:6

• Kwakuya kubakho abaprofeti abaninzi bobuxoki.

MATEYU 24:9; LUKA 21:12

• Ukutshutshiswa kwamaKristu okwenyaniso.

MATEYU 24:39

• Abantu abangazinanzanga izilumkiso zeBhayibhile.

[Umfanekiso okwiphepha 8]

AmaNgqina kaYehova afundisa abantu ehlabathini lonke ngoBukumkani bukaThixo