IBhayibhile—Isikhokelo Esisebenzisekayo Kumntu Wanamhlanje
“Sonke isibhalo siphefumlelwe nguThixo yaye sinokusetyenziswa ngokuyingenelo . . . ukwenzela ukukhokela ubomi babantu.”—2 Timoti 3:16, “The Jerusalem Bible.”
ESI sibhalo sicacisa isizathu esiyintloko sokuba iBhayibhile ibe yesebenzisekayo kumhla wethu. Iphefumlelwe nguThixo. Ekubeni sadalwa nguThixo, akakho umntu owazi ngakumbi ngemizimba, iingqondo, iimvakalelo neentswelo zethu ngaphezu kwakhe. Ukumkani wakwaSirayeli uDavide wakha wathi ngoYehova uThixo: “Amehlo akho andibona ndiseyimbumba, zazibhalwe encwadini yakho iimini zonke ziphela.” (INdumiso 139:16) Ukuba uMdali wethu usazi kangako, ngoko ngokusengqiqweni isiluleko necebiso lakhe ngendlela esinokonwaba size siphumelele ngayo ebomini ngokuqinisekileyo limele libe yinto ekufaneleyo ukuhlolisiswa.
Amava abonisa ukuba imigaqo yeBhayibhile iyasebenziseka yaye iyeyokwenene kumhla wethu. Kwakhona ingqalile. Imizekelo emine elandelayo ibonisa indlela iBhayibhile esebenziseka ngayo mhla ngamnye.
Ulwalamano Lwabantu Nendlela Yokuziphatha: IBhayibhile ikhuthaza imilinganiselo elungileyo yokuziphatha enokukhokelela kulwalamano oluhle noluphumelelayo nabanye. Ngokomzekelo, uhlanga lwamaSirayeli lwayalelwa oku: “Uze ungaphindezeli; uze ungabi nanqala . . . uze umthande ummelwane wakho ngoko uzithanda ngako.” (Levitikus 19:18) Nangona singekho phantsi komthetho wamaSirayeli, ukulandela imigaqo yawo eseBhayibhileni kunokusinceda sibe noxolo nabammelwane bethu. Ngokomzekelo, khawucinge ukuba, zingaphi iingxaki ebezinokuconjululwa ukuba wonk’ ubani ebezama ukuhlakulela iziqhamo zomoya ezifunyanwa kumaGalati 5:22, 23: “EsoMoya isiqhamo luthando, uvuyo, uxolo, ukuzeka kade umsindo, ububele, ukulunga, intembeko, ubulali, ukuzeyisa; akukho mthetho uchasene nezinto ezinjalo.”—Thelekisa amaRoma 8:5, 6.
Ngelishwa, xa iingcinezelo zobomi zisanda, ngokufuthi kubakho ukungavisisani nongquzulwano. Kwiimeko ezinjalo, ukusebenzisa amazwi obulumko afumaneka kwiMizekeliso 29:11 kunokusinceda siphephe iingxaki ezininzi. “Isinyabi siya kukhupha konke ukufutha kwaso, ke sona isilumko sikudambisela embilinini yaso.”—Thelekisa IMizekeliso 15:1; Mateyu 7:12; Kolose 3:12-14.
Eli licebiso elilungileyo—kodwa ngaba liyasebenza kubomi bokwenene? Khawucinge ngemeko yendoda yaseFransi eyayinengxaki enzulu yomsindo. Izihlandlo ezininzi yayiba sengxakini, ide ivalelwe entolongweni, ngenxa yokubandakanyeka kwayo kwimilo. Ukuba yincutshe yembethi-manqindi kwayenza mbi ngakumbi imeko yayo. Ngesinye isihlandlo kwavuka ingxabano phakathi kwale ndoda noyise. Ngephanyazo ingaqondanga, yabetha uyise yamlalisa ngophotho ngenqindi elinye. Ngenxa yoko kwavuleka umsantsa omkhulu kulwalamano lwabo.
Ngeli thuba, le ndoda yadibana namaNgqina kaYehova yaza yaqalisa ukufunda imigaqo yeBhayibhile. Oku kwayibangela ukuba iyihlolisise ngokunzulu indlela eyayiziphatha ngayo xa iphakathi kwabanye abantu. Ebunzimeni yaqalisa ukuguqula indlela ayayiziphethe ngayo, yaye yaba noxolo ngakumbi. Ngoko ngenye imini, le ndoda yabuyela kuyise ukuze iyokucela uxolo. Uyise wayechukumiseke gqitha ziinguqulelo ezazenziwe ngunyana wakhe kangangokuba ulwalamano lwabo lwaphinda lwalunga.
Lo ngomnye wemizekelo emininzi ebonisa ubungqina bokuba amazwi kampostile uPawulos ayinyaniso: “Kuba iLizwi likaThixo liphilile, lisebenza, libukhali ngaphezu kwamakrele onke antlangothi mbini; . . . linokugweba iingcingane nezicamango zentliziyo.”—Hebhere 4:12.
Ubomi bentsapho: Ngaba intsapho yakho yonwabile? Iintsapho ezininzi azonwabanga. IThe Natal Witness, iphephandaba laseMzantsi Afrika, lithi, “Elokuba ubomi bentsapho njengomanyano buyasongelwa ngoku liyinyaniso engenakuphikiswa, abantwana banamhlanje bazalelwa kwixesha leenguqu entlalweni.”
Noko ke, iBhayibhile izele ngamacebiso asebenzisekayo nawenzelwe ukunceda iintsapho ziphumelele kwanaxa kuvela iingxaki. Ngokomzekelo, ngokuphathelele indima yamadoda, iBhayibhile ithi: “Amelwe amadoda ukubathanda abawo abafazi, njengokuba beyimizimba yawo.” Xa indoda iyiphumeza le mfuneko, kuluvuyo ngomfazi ukuba akubuyekeze oko ngokuba ‘nentlonelo enzulu ngendoda yakhe.’ (Efese 5:25-29, 33, NW) Ulwalamano phakathi kwabazali nabantwana kuthethwe ngalo kwabase-Efese 6:4: “Nani boyise, musani ukubacaphukisa abantwana benu; bondleleni ekuqeqesheni nasekululekeni kweNkosi.” Oku kubangela umoya wentsapho owenza kube lula ngabantwana ukuba balandele umyalelo weBhayibhile baze bathobele abazali babo.—Efese 6:1.
Lo ungasentla ngumzekelo nje wezinto ezithethwa yiBhayibhile ngobomi bentsapho. Ngokusabela kukhokelo lukaThixo, abaninzi baye baphumelela baza banandipha ulonwabo ekhaya. UEdward, ubawo wabantwana ababini, uchaza iingenelo awazinandiphayo ngokusebenzisa imigaqo yeBhayibhile. Ukhumbula oku, “Umtshato wam wawuwohloka. Ndandingenalo ixesha lokuba nolwalamano olusenyongweni nabantwana bam. Ekuphela kwento eyenza ukuba sisondelelane yayikukusebenzisa kwethu oko iBhayibhile ikuthethayo ngobomi bentsapho.”—IMizekeliso 13:24; 24:3; Kolose 3:18-21; 1 Petros 3:1-7.
Impilo Engqondweni, Emzimbeni Nangokweemvakalelo: Uhlolisiso luye lwabonisa ukuba ukusa kumlinganiselo othile, impilo yomntu yasemzimbeni inxulumene nobume bempilo yakhe yasengqondweni nengokweemvakalelo. IThe World Book Encyclopedia ithi, “Imiqondiso eqhelekileyo yoxinezeleko iquka ukubetha ngamandla kwentliziyo, ukunyuka koxinezeleko lwegazi, ukuqina kwezihlunu, udandatheko lwasengqondweni, nokungakwazi ukuzikis’ ingqondo.” Noko ke, bambi bakholelwa kwelokuba ukulinganisa izenzo zogonyamelo kuyindlela yokunciphisa uxinezeleko. Iphephandaba laseMzantsi Afrika iThe Star lithi, “Umdlalo wamanqindi usenokulunciphisa uxinezeleko.” Icaphula amazwi engcali yezomthambo uJannie Claasens athi: “Ukuba ibhinqa belinemini edandathekisa ngomlinganiselo ophakamileyo, linokunciphisa uxinezeleko lwalo ngokubetha ingxowa yokuqhelisela ukudlala amanqindi.”
Noko ke, ngaba bekungayi kuba kokulunge ngakumbi ukufunda ukulawula unobangela oyintloko wonxunguphalo? Kulindixesha othi Stress—The Modern Scourge, uGqr. Michael Slutzkin uthi “ukuqonda uxinezeleko . . . kubalulekile, kuba oonobangela abaninzi bayanyangeka.” Wongezelela ngelithi “ukulawula uxinezeleko . . . kusenokuba luncedo kwinkqubo yokunyanga kwiimeko ezahlukeneyo.”
IBhayibhile ibonisa eyona ndlela isebenzayo olunokuthi uxinezeleko lulawulwe ngayo: “Ningaxhaleli nto; mazithi iingcelo zenu ezintweni zonke, . . . zaziswe kuye uThixo. Lwaye uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.” (Filipi 4:6, 7) Ukulawula uxinezeleko ngale ndlela kuneengenelo ezininzi—kwanasemzimbeni. Omnye umzekeliso weBhayibhile ukubeka ngolu hlobo oku: “Bubomi benyama intliziyo epholileyo.” (IMizekeliso 14:30) Omnye umzekeliso uthi: “Intliziyo evuyileyo iyalungisa, ichachise; umoya odakumbileyo uyawomisa amathambo.”—IMizekeliso 17:22.
Kumgudu wokuphepha uxinezeleko nengcinezelo, abaninzi babhenela ecubeni, kwiziselo ezinxilisayo nakwiziyobisi. Kukho ubungqina obubhaliweyo obuchaza umonakalo obangelwa koko kukhotyokiswa. Kanti, iBhayibhile ibisoloko icebisa ukuba sizigcine sicocekile ‘ekudyobhekeni kwenyama.’ (2 Korinte 7:1; thelekisa IMizekeliso 23:29-35.) Ngokuqinisekileyo, ukuphepha izinto ezenzakalisa ngolo hlobo kulicebiso elisebenzisekayo kwihlabathi lanamhlanje.
Umsebenzi, Imali Nokunyaniseka: Ubuvila abuzange bube nomvuzo. IMizekeliso 20:4 ithi, “Ebusika ivila alilimi; liyafuna ngexa lokuvuna, kungabikho nto.” Kwelinye icala, ukusebenza nzima kunomvuzo. Eyabase-Efese 4:28 ithi, “Lowo ubayo makangabi seba.” Esi sibhalo songezelela ngelithi kulunge ngakumbi ngomntu ukuba axakeke ‘ebulaleka esebenza okulungileyo ngezandla zakhe, ukuze abe nako ukwabela osweleyo.’—Thelekisa IMizekeliso 13:4.
Ngaba ubusazi ukuba imigaqo yeBhayibhile inokusetyenziswa kwanakulwalamano lwasemsebenzini? Abasebenzi, ‘abanjengezicaka’ zamaxesha okubhalwa kweBhayibhile, benza kakuhle ‘ngokululamela ezintweni zonke abaziinkosi zabo ngokwenyama.’ Kwelinye icala, abaphathi okanye ‘iinkosi,’ bafanele ‘babaphathe ngokufanelekileyo nangokulungeleleneyo’ abaqeshwa babo.—Kolose 3:22-24; 4:1; thelekisa eyoku-1 kaPetros 2:18-20.
IBhayibhile ithetha okuninzi ngokunyaniseka kwiinkqubano zoshishino. Nangona ngokulusizi kunqabile namhlanje, ngokufuthi ukunyaniseka kuqondwa yaye kujongwa njengophawu olunqwenelekayo. Oku koko kubethelelwa yiBhayibhile. UYesu wakha wathi: “Othembekileyo kokuncinane, uthembekile nakokukhulu; nongalungisiyo kokuncinane, akalungisi nakokukhulu.”—Luka 16:10; thelekisa IMizekeliso 20:10; 22:22, 23; Luka 6:31.
Kwelinye ilizwe laseAfrika, kumzi-mveliso wedayimani kwakukho ubusela nokunganyaniseki okukhulu. Kwagqitywa kwelokuba kumiselwe omnye umntu ukuze aphathe. Abaphathiswa baseburhulumenteni bacelwa ukuba babhalise amagama abo babecinga ukuba babeya kufaneleka kweso sikhundla. Xa isigqeba saseburhulumenteni sadibanayo ukuze senze isigqibo, loo magama ayebhaliswe ngabaphathiswa asuswa ngalinye ngalinye, ngokuyintoko ngenxa yokunganyaniseki. Ekugqibeleni, safika kwigama lokugqibela kolo ludwe—elikhethwe ngumongameli.
Omnye umphathiswa wabhebhetha ngelithi, “Kodwa akalolungu lombutho!”
Umongameli waphendula ngelokuba eso yayingesosikhundla sezopolitiko.
Omnye wathi, “Ungomnye wamaNgqina kaYehova.”
Umongameli wathi, “Yiyo loo nto ewufumana lo msebenzi.” Wongezelela ngelithi: “Siyawazi anyanisekile, yaye olu luhlobo lomntu esilufunayo. Siyazi ukuba sinokumthemba.”
Ewe, abo basebenzisa imigaqo yeBhayibhile ngokufuthi bafumanisa ukuba oku kuyingenelo kubo kwanakweli hlabathi lanamhlanje.
Ziqwebele Ubulumko Obusebenzisekayo
Siye saqwalasela nje imizekelo embalwa ebonisa oko kuthethwa ‘kukufumana ukumazi uThixo.’ (IMizekeliso 2:1-9) Ubutyebi bamacebiso ahlab’ emxholweni nasebenzisekayo afumaneka eBhayibhileni. Imigaqo enxulumene nococeko, inkuthalo, unxibelelwano, isini, uqhawulo-mtshato, ukuhlawulwa kweerhafu, ukuqhubana nokwahluka kobuntu nokuhlangabezana nobuhlwempu zezinye zeenkalo zobomi ekuthethwa ngazo eBhayibhileni. Izigidi ziya kungqina ukuba ukuphumelela nokusilela ebomini bazo kuye kwaxhomekeka kwindlela eziye zayisebenzisa ngayo imigaqo yeBhayibhile.
Nakubeni kuqinisekiswa ukuba iBhayibhile iluncedo kwanangoku, kwakhona inikela ithemba ngeengenelo ezininzi ezihlala ithuba elide. Ngokomzekelo, iBhayibhile ithembisa ukuba unozala weentlungu nokubandezeleka kwihlabathi lanamhlanje kungekudala uya kulungiswa kukungenelela kukaThixo.—Daniyeli 2:44; 2 Petros 3:11-13; ISityhilelo 21:1-5.
Ngoko ke, siyakukhuthaza ukuba uyifunde kangangoko unako iBhayibhile. Ukuba awunayo, qiniseka ukuba uyayifumana. Ngovuyo abapapashi beli phephancwadi baya kukunceda. Kanye njengokuba abanye beye bangenelwa ngokusebenzisa amacebiso aluncedo eBhayibhile, nawe unokuncedwa ukuze uqonde ukuxabiseka kweLizwi likaThixo, ngoku nakwixesha elizayo.
[Umfanekiso okwiphepha 7]
IBhayibhile isisikhokelo esisebenzisekayo sokwenza ubomi bentsapho bonwabe