Ukushicilela Uncwadi LweBhayibhile Ngoxa Umsebenzi Uvaliwe

NGOKUBALISWA NGUMALCOLM G. VALE

“Shicilela incwadi ethi Children.” Ndafumana lo myalelo wothusayo uvela kumveleli wesebe lamaNgqina kaYehova eliseOstreliya ebudeni beMfazwe Yehlabathi II, kungekudala emva kokukhululwa kwale ncwadi eSt. Louis, eMissouri, eUnited States, kwindibano eyayingoAgasti 10, ngowe-1941. Yintoni eyayibangela ukuba lo ibe ngumyalelo owothusayo?

KALOKU, umsebenzi wethu wokushumayela wawuvaliwe ngoJanuwari wowe-1941, ngoko ukuqhubeka sishicilela nokuba kungomlinganiselo omncinane kwakuya kuba lucelomngeni. Ngapha koko, incwadi ethi Children yayiyincwadi enamaphepha angama-384 enemifanekiso emibalabala. Izixhobo zethu zokushicilela zazifuna ukuphuculwa, iphepha lalinqongophele, yaye abasebenzi babengaqeqeshelwanga ukuvelisa iincwadi ezinkulu.

Ngaphambi kokuba ndichaze indlela esaphumelela ngayo ekushicileleni ngoxa umsebenzi wethu wawuvaliwe, mandikuxelele indlela ekwenzeka ngayo ukuba ndisebenze kwiofisi yesebe yaseOstreliya njengomveleli womsebenzi wokushicilela.

Ukukhula Kwam

Utata wayeneshishini lokushicilela kwisixeko esinenkqubela saseBallarat, eVictoria, apho ndazalelwa khona ngowe-1914. Ngoko ndafunda umsebenzi wokushicilela ndisebenza kumzi-mveliso kaTata wokushicilela. Ndandikwabandakanyekile nakwimisebenzi yeCawa yaseTshetshi, ndicula kwikwayala yecawa yaye ndibetha neentsimbi zecawa. Kwakha kwangathi ndiza kufundisa nakwisikolo sangeCawa, kodwa loo nto ayizange ingene kakuhle kum.

Isizathu yayikukuba ndandizithandabuza ngokunzulu ezinye zeemfundiso zecawa. Ezi zaziquka uBathathu Emnye, isihogo somlilo, nokungafi komphefumlo womntu, yaye akukho mntu wandinika iimpendulo ezanelisayo. Ndakwaphazanyiswa nakukuba ngamathuba athile, umfundisi wethu wayeba nomsindo xa ethetha ngeqela elincinane lonqulo elalizibiza ngokuba ngamaNgqina kaYehova. Kwakundimangalisa ukuba iqela elincinane ngolo hlobo lixhalatyelwe kangako kwisixeko esasinabantu abangama-40-000.

Ngenye iCawa, ndandimi ngaphandle kwendlu yecawa emva kwenkonzo yangokuhlwa xa kwadlula iqela lamantombazana elalisuka kwiCawa yaseWesile. Ndaqalisa ukuba nobuhlobo nenye yawo. Igama layo yayinguLucy, yaye ekugqibeleni yandimemela ekhayeni layo ukuze ndibonane nabazali bayo. Khawucinge indlela endothuka ngayo xa ndafumanisa ukuba unina, uVera Clogan, wayengomnye wamaNgqina kaYehova. Saba neengxubusho zeBhayibhile ezininzi ezibangela umdla, yaye oko wayekuthetha ngokwenene kwakuvakala kusengqiqweni.

Kungekudala, mna noLucy satshata, yaye ngowe-1939 sasihlala eMelbourne, ikomkhulu laseVictoria. Nangona uLucy wayengomnye wamaNgqina kaYehova, mna ndandingekenzi sigqibo. Noko ke, xa kwaqhambuka iMfazwe Yehlabathi II ngoSeptemba waloo nyaka, ndaqalisa ukucinga nzulu ngoko ndandikufunde eZibhalweni. Ukuvalwa komsebenzi wamaNgqina kaYehova ngoJanuwari 1941 kwandinceda ngenene ukuba ndenze isigqibo. Ndahlulela ubomi bam kuYehova uThixo ndaza ndabhaptizwa kungekudala emva koko.

Iinguqulelo Eziphawulekayo Ebomini bethu

Ngelo xesha, sasihlala kwisakhiwo esinamagumbi aqeshisayo eMelbourne. Noko ke, kungekudala samenyelwa ukuba sifudukele kwindlu eyayinamanye amaNgqina aliqela. Sathengisa yonke impahla yendlu yethu ngaphandle kwempahla yegumbi lokulala saza safudukela kuloo ndawo yayibizwa ngokuba likhaya loovulindlela. Ndaqhubeka ndisebenza njengomshicileli yaye ngaloo ndlela ndandikwazi ukunikela kwiindleko zokugcina ikhaya. Nabanye abayeni babesenza okufanayo. Ngokomphumo, abafazi bethu babekwazi ukuba nesabelo ixesha elizeleyo kumsebenzi wokushumayela, yaye thina madoda sasibathelela kumsebenzi wokushumayela nakwiintlanganiso zamaKristu ngamarhatya nangeempela-veki.

Kungekudala emva koko, mna nomfazi wam safumana ileta evela kwiofisi yesebe yeWatch Tower Society isimemela ukuba siye eSydney. Sathengisa impahla yethu yegumbi lokulala saza sahlawula amatyala ambalwa esasinawo, kodwa ukuze sifumane imali yokuhlawulela uhambo oluya eSydney ngololiwe, kwafuneka sithengise umsesane kaLucy wokuganwa!

Ngenxa yemiqathango eyayikho ngexesha lemfazwe nomsebenzi owawusandul’ ukuvalwa, kwakungekho ziBhayibhile okanye luncwadi lweBhayibhile olwalunokuthunyelwa luvela phesheya. Ngenxa yesi sizathu iofisi yesebe yaseOstreliya yagqiba ekubeni imisele umsebenzi wokushicilela ngokufihlakeleyo ukuze kuqhubeke kufumaneka ukutya kokomoya, yaye ndamenyelwa ukuba ndivelele lo msebenzi. Ndaba nelungelo lokusebenza nendoda yaseSkotlani, uGeorge Gibb, owakhonza kumzi-mveliso wokushicilela kwisebe laseOstreliya kangangeminyaka engama-60.a Kungoko ke endathi ndafumana umyalelo othi: “Shicilela incwadi ethi Children.”

Ukulanda Izixhobo Zokushicilela

Maninzi amava awayebangela imincili, maxa wambi awayesoyikisa, esaba nawo kuloo minyaka yemfazwe. Ngokomzekelo, ukuze siqalise umsebenzi wethu wokushicilela, sasifuna izixhobo. Oko sasikusebenzisa ukwenza umsebenzi wokushichilela ongephi kwiminyaka engaphambi kwemfazwe kwakohluthiwe ngamagosa karhulumente, yaye ngoku indawo yoMbutho encinane yokushicilela yayitshixiwe yaye ilindiwe. Sasinokuzifumana njani ezo zixhobo ukuze sizise kwiindawo efanelekileyo esasiza kuqhubeka nomsebenzi wokushicilela ngokufihlakeleyo kuzo?

Abalindi abaxhobileyo, ababetshintshisana, babesilinda isakhiwo soMbutho iiyure ezingama-24 ngosuku. Noko ke, olunye lweendonga ezingasemva lwalusahlula esi sakhiwo nesikhululo esincinane esingasetyenziswa kangako sikaloliwe. Ngoko ebusuku, besebenzisa iindlela ezifana nezo zikuHezekile 12:5-7, bambi babasebenzi baseBheteli abakhaliphileyo babengena ngodonga ngokususa ezinye izitena. Besakuba bengaphakathi, babezibuyisela izitena eludongeni ukuze bangabhaqwa. Ngokusoloko bengena apha ebusuku isithuba esimalunga neeveki ezimbini, bakhulula ngocoselelo umatshini wokushicilela omncinane, weLinotype, nabanye oomatshini abambalwa. Baza bazikhupha ezo ntsimbi ngaphandle kokwenza ingxolo bengayanga ndawo abo balindi babesemsebenzini!

Ekuhambeni kwexesha safumana izixhobo ezingakumbi kweminye imithombo, yaye ngokukhawuleza umsebenzi wokushicilela owawusenziwa ngokufihlakeleyo wawuqhubeka ngamandla kwiindawo ezahlukahlukeneyo kuyo yonke iSydney. Ngaloo ndlela, sakwazi ukushicilela nokudibanisa kungekuphela nje incwadi ethi Children, kodwa kwaneencwadi ezinkulu iThe New World ethi “The Truth Shall Make You Free,” nethi The Kingdom Is At Hand, kunye neeYearbooks of Jehovah’s Witnesses eyowe-1942, 1943, 1944, neyowe-1945. Ukongezelela, ebudeni baloo minyaka yemfazwe umsebenzi owawuvaliwe ngayo, amaNgqina kaYehova kulo lonke elaseOstreliya awazange aphoswe nayenye inkupho yeMboniselo. Oku kwasiqinisekisa ngokobuqu ukuba isandla sikaYehova asize sibe sifutshane.—Isaya 59:1.

Ukuhlangabezana Namatyelelo Angalindelekanga

Ebudeni bexesha lokuhlolwa ngamandla kweencwadi ezishicilelwayo, ngokufuthi iindawo zokushicilela zazityelelwa ngokungalindelekanga ngamagosa aseburhulumenteni awayehlola oko kwakushicilelwa. Ngoko ke, enye yeendawo zethu zokushicilela ezifihlakeleyo yayenzelwe isixhobo sokulumkisa, iqhosha elalisemgangathweni umamkeli zindwendwe awayenokufikelela lula kulo. Nanini na xa kukho ubani onyuka ngezinyuko awayengamqondi kakuhle okanye awayecingela ukuba ngumhloli, wayecofa iqhosha.

Xa iqhosha licofiwe, kwakuba ngumbono ukubona abantu betaka ngeefestile kuwo onke amacala! Abasebenzi ababebhaliswe njangabaqeshwa babesala ngasemva ukuze bagqume ngokukhawuleza nawaphi na amaphepha asele eshicilelwe amaphephancwadi iiMboniselo, kunye nolunye uncwadi lweBhayibhile olwalusenziwa. Ukuze benze oku, babesebenzisa amaphepha okushicilela alinganayo nawezinye iimpapasho ababezenzela ukuthengisela abathengi.

Ngolunye lwamatyelelo anjalo, abahloli ababini babehlola iicomics ezazisesemaphepheni amakhulu, kodwa ngaphantsi kwakukho amaphepha amaphephancwadi eMboniselo awayeshicilelwe ngobusuku obudluleyo. Kwenye indawo yokushicilela ekwelinye icala lesixeko, sasishicilela uncwadi oluthengiswayo emini size sishicilele iimpapasho zeMboniselo ebusuku nangeempela-veki.

Ukufumana Amaphepha

Ukufumana amaphepha okushicilela kwakuyingxaki enkulu. Noko ke, eminye imizi yokushicilela emikhulu eyayingasalifuni kangako iphepha ngenxa yokuncitshiswa kwamashishini ebudeni bemfazwe yayikulungele ukuthengisa isixa eyayingasasisebenzisi—kakade ke, yayisoloko isithengisela ngamaxabiso aphakamileyo. Noko ke, ngesinye isihlandlo safumana iphepha komnye umthombo.

Inqanawa eyayithwele imithwalo isiza eOstreliya yayithwele isixa esikhulu sephepha elimdaka ngebala, kodwa inqanawa yonakala elwandle yaye amanzi angena kwelo phepha. Lonke elo phepha lanikelwa ebantwini ukuba bachaze imali ababenokulithenga ngayo, kodwa samangaliswa kukuba mayibe sithi kuphela abantu abachaza imali ababenokulithenga ngayo. Oku kwasinceda ukuba silithenge ngexabiso eliphantsi gqitha. Eli phepha salomisa elangeni, ngaloo ndlela sizama ukufumana uninzi lwalo, sandula ke salisika langamaphepha alingene umatshini wethu wokushicilela.

Sasiza kulisebenzisa njani iphepha elimdaka ngebala? Sichanile, sacinga ukuba abafundi beencwadi ezizicomic babeya kuzinandipha nokuba zikwiphepha elimibalabala. Ngaloo ndlela, sasebenzisa iphepha elimhlophe esasilibekele iicomic ukuze sishicilele IMboniselo kunye nolunye uncwadi loMbutho.

Indima Ebalulekileyo Yamabhinqa

Ebudeni beminyaka yemfazwe, amabhinqa amaninzi angamaKristu aseOstreliya afunda umsebenzi wokudibanisa iincwadi. Ngenye imvakwemini eyayitshisa gqitha, wambi ayesebenza odwa kwindawo esasiyiqeshile encinane yokukhandela iinqwelo-mafutha kwisitrato esincinane kwindawo ekufuphi naseSydney. Ukuze ahlale ekhuselekile, ayesoloko evale zonke iifestile kunye neengcango. Iimbiza ezazinesinamathelisi zazikhupha umsi oshushu onukayo, yaye ubushushu phantse babunganyamezeleki. Ngoko akhulula asala ngempahla yangaphantsi.

Ngequbuliso, kwankqonkqozwa emnyango. Oodade abangamaKristu bakhwaza befuna ukwazi ukuba ngubani na lowo, kwaphendula igosa laseburhulumenteni. Lalisuka kwisebe elalinamagunya okuyalela abantu ukuba baye naphi na apho kukho umsebenzi omninzi khona. Oodade baphendula bekhwaza ukuba babengenakukwazi ukulingenisa kwangoko kuba babesebenza benxibe impahla yangaphantsi kuphela ngenxa yobushushu.

Igosa lathi cwaka okomzuzwana; laza lakhwaza lathi kwakukho nenye indawo ekwakufuneka liye kuyo kuloo mmandla. Lathi laliya kubuya lize kuhlola ngemini elandelayo. Ngokukhawuleza la mabhinqa angamaKristu asitsalela umnxeba, yaye sathumela ilori ngobo busuku ukuze iye kuthabatha zonke iincwadi ezazidityaniswa apho kuloo ndawo izise kwenye indawo.

Uninzi lwabo babebandakanyekile kuloo msebenzi wokushicilela wawusenziwa ngokufihlakeleyo lwalungenawo amava kuloo msebenzi wokushicilela, ngoko oko kwakufezwa kwakundishiya ndingenamathandabuzo engqondweni yam ngokuba umoya kaYehova wawunikela uncedo nolwalathiso olwalufuneka. Kwakulilungelo elikhulu kum nomfazi wam, uLucy owayesebenza kwindawo yokudibanisa iincwadi ukuba sibe yinxalenye yako konke oku.

Wawusalathiswa njani umsebenzi wethu kuloo maxesha anzima? Umveleli wesebe wamaNgqina kaYehova owayebambele wayefumene imiqathango evela kurhulumente, eyayifuna ukuba ahlale kwidolophu emalunga neekhilomitha ezili-100 ukusuka eSydney. Lo myalelo wawungamvumeli ukuba aphume aye kumgama ongaphezu kweekhilomitha ezisibhozo ukusuka kummandla wedolophu. Inqwelo-mafutha nganye yayivunyelwa ukutha iilitha ezine zepetroli nyanga nganye. Kodwa abazalwana bavelisa esinye isixhobo esichuliweyo esasisaziwa ngokuba sivelisa igesi—isilinda eyenziwe ngecangci eyayinobunzima obumalunga nesiqingatha setoni, eyayibekwa ngasemva kwinqwelo-mafutha. Kwakutshiselwa icharcoal kuyo ivelise ikharbon monokside njengeoyile. Iintsuku eziliqela ebudeni beveki nganye, mna nabanye abazalwana abanembopheleleko sasihamba ngayo ukuze siye kudibana nomveleli komnye umlanjana owomileyo owawukufuphi nedolophu awayegxothelwe kuyo. Ngaloo ndlela, sasidla ngokuxubusha imibandela emininzi ngaphambi kokuba sibase isixhobo sokwenza igesi size siphindele eSydney kwangentseni.

Ekugqibeleni, ukuvalwa komsebenzi wamaNgqina kaYehova kwaqwalaselwa kwiNkundla Ephakamileyo yaseOstreliya. Umgwebi wathi oku kuvalwa komsebenzi “kwakungamkelekanga, kungenasizinzi, yaye ikokwengcinezelo” yaye wathi awanatyala ngokupheleleyo amaNgqina kaYehova ngawo nawuphi na umsebenzi ochasene nomthetho. INkundla Ephakamileyo iphela yasixhasa esi sigqibo, ukuze sibe nako ukuza ekuhleni size siqhubeke nemisebenzi yethu yoBukumkani esemthethweni.

Izabelo Ezingakumbi Kunye Neentsikelelo

Emva kwemfazwe abaninzi ababesebenza kumsebenzi wethu wokushicilela owawusenziwa ngokufihlakeleyo bangenela ubulungiseleli bobuvulindlela. Abanye babo kamva baya kwiSikolo seBhayibhile seWatchtower saseGiliyadi eNew York. Nam noLucy sasinolo sukelo engqondweni, kodwa ngoko sabanomntwana oyintombazana yaye ndagqiba kwelokuba ndibuyele kumsebenzi wokushicilela. Sathandazela ukuba uYehova asincede sisoloko sibeka izilangazelelo zoBukumkani kuqala, yaye uye wenjenjalo. Ndabandakanyeka kwesinye isabelo sokulungiselela ngale ndlela ilandelayo.

Ndatsalelwa umnxeba nguLloyd Barry, ngoku okhonza njengelungu leQumrhu Elilawulayo lamaNgqina kaYehova eBrooklyn, eNew York. Ngelo xesha wayengumveleli ohambahambayo eSydney. Wandibuza ukuba ndandiwazi na umhla wendibano yethu elandelayo. Xa ndaphendula ndathi ewe, wathi: “Sifuna unyamekele amalungiselelo okutya.”

Ndothukile, ndibutyhafa ndathi: “Kodwa andizanga ndikhe ndenze nto injalo ebomini bam.”

Waphendula ebundiqhularha, “Ukuba kunjalo Mzalwana, lixesha elifanelekileyo lokuba ufunde!” Ndafunda ndaza ndaqhubeka ndifumana ilungelo lokuvelela isebe lokutya, kwanakwiindibano ezinkulu, ngaphezu kweminyaka engama-40.

Ebudeni beminyaka, umzi-mveliso wethu wokushicilela wanda, yaye oku kuye kwabangela ukuba ndisoloko ndisiya phesheya ngezomsebenzi. Oku bendisoloko ndikungqamanisa neendibano zezizwe ngezizwe ezaziqhutyelwa kwisiXeko saseNew York nakwezinye iindawo eUnited States. Oku bekundinika ithuba lokuba ndibe kunye nabo babevelela amasebe awahlukahlukeneyo kwiindibano, ingakumbi isebe lokutya. Ngaloo ndlela, eOstreliya, bendikwazi ngakumbi ukuhlangabezana neentswelo kwiindibano zethu.

Njengoko sisiya sisaluphala, maxa wambi mna noLucy siye sizibuze enoba ngesifeze okungakumbi na ukuba sasizalwe mva kunexesha esazalwa ngalo. Kwelinye icala, ekubeni yena wazalwa ngowe-1916 mna ngowe-1914, sikugqala njengelungelo elikhethekileyo ukuba siye sabona iziprofeto zeBhayibhile zizaliseka phambi kwethu. Yaye siyambulela uYehova ngentsikelelo esiye sanayo ekufundisiseni abantu abaninzi nasekubancedeni ukuba bafunde inyaniso size sibabone ngoku bemkhonza njengabalungiseleli ababhaptiziweyo. Umthandazo wethu ngowokuba siqhubeke simkhonza kude kube ngonaphakade, simgqale njengoMlawuli onguMongami omkhulu wendalo iphela ngonaphakade.

[Umbhalo osemazantsi]

[Imifanekiso ekwiphepha 29]

Umzi-mveliso wokushicilela kwiBheteli yaseStrathfield, ngowe-1929-73

UGeorge Gibb emi ecaleni komnye woomatshini abathatyathwa kwindawo yokushicilela ngokungena ngodonga olungasemava