Ukutyelela Indawo Yokushicilela Ebalaseleyo
KUNGENZEKA ukuba awuqali ukufunda iphephancwadi elinje ngeli. Kusenokwenzeka ukuba ukhe watyelelwa ngamaNgqina kaYehova aze akushiyela iphephancwadi IMboniselo noVukani! ukuze akuncede uyiqonde bhetele iBhayibhile. Mhlawumbi ukhe wawabona esitratweni okanye kwiindawo ezineevenkile enika abantu la maphephancwadi acacisa iBhayibhile. Ngenyanga kusasazwa ngaphezu kwezigidi ezingama-35 zeli phephancwadi, nto leyo elenza libe lelona phephancwadi lonqulo lipapashwa kakhulu ehlabathini.
Kodwa ngaba wakha wazibuza ukuba zenziwa kanjani ezi ncwadi? Ukuze sikuphendule makhe sikuchazele ngenye indawo ekushicilelwa kuyo ngamaNgqina kaYehova—iWallkill, eseNew York, eUnited States. Kusenokungabi lula kubafundi bamaphephancwadi ethu abaninzi ukutyelela indawo yokushicilela yamaNgqina kaYehova eseUnited States, ngoko ke khawukhe uhambe nathi ngeliso lengqondo njengoko sikusa kuyo.
Ngaphambi kokuba kushicilelwe kuqale kubhalwe. Isebe leGraphics lifumana izinto eziza kushicilelwa ngekhompyutha zivela kwiSebe Lokubhala eBrooklyn, eNew York. Emva koko ezo zinto zikhutshelwa kwiipleyiti zokushicilela. Nyanga nganye eWallkill, kufika imiqulu yephepha eli-1 400, kuze kusetyenziswe iitoni zephepha ezingama-80 ukuya kwezili-100 ngemini. Le miqulu—eminye yayo enobunzima obungaphezu kweekhilogram ezili-1 300—ifakwa koomtshini bokushicilela. Emva kokushicilelwa kweli phepha, kuphuma amaphephancwadi ngalinye lisongwe laba ngamaphepha angama-32. Zenziwa njani zona iincwadi? Kukho oomatshini ababini abadibanisa amaphepha ngokulandelelana kwawo ukuze kwenziwe incwadi. Omnye kwaba matshini unokwenza iincwadi ezinoqweqwe oluqinileyo ezingama-50 000 okanye ezinoqweqwe oluthambileyo ezingama-75 000 ngosuku. Omnye wona wenza malunga ne-100 000 eencwadi ezinoqweqwe oluthambileyo ngosuku.
Ngowama-2008, kuye kwashicilelwa iincwadi ezingaphezu kwezigidi ezingama-28, yaye kwezo ncwadi ezingaphezu kwe-2.6 lezigidi ibiyiBhayibhile. Kwangaxeshanye kuye kwashicilelwa amaphephancwadi angama-243 317 564. Le ndawo yokushicilela igcina uncwadi ngeelwimi ezingaphezu kwama-380. Kwenzeka ntoni emva kokuba lushicilelwe uncwadi?
Indawo yokushicilela ifumana iiodolo ezivela kumabandla amaNgqina kaYehova ali-12 754 aseUnited States, nakwamanye ali-1 369 akwiziqithi zeCaribbean nezaseHawaii. ISebe Lokuthumela lipakisha zonke izinto eziodwe ngamabandla lize lizithumele. Nyanga nganye, kuthunyelwa uncwadi oluziikhilogram ezingama-30 ezigidi kumabandla aseUnited States.
Eyona nto ibalulekileyo ngaphezu kwaba matshini ngabantu abasebenza apha. Bangaphezu kwama-300 abantu abasebenza kumacandelo okushicilela njengakwiiGraphics, kwiScheduling, kwiPressroom, kwiBindery nakwiSebe Lokuthumela. Abantu abasebenza apha—ngamatshantliziyo angahlawulwayo—aphakathi kweminyaka eli-19 ukusa kwengama-92 ubudala.
Anomdla ongazenzisiyo ebantwini—kubantu abaza kufumana ezi ncwadi nabaza kufundiswa baze bakhuthazwe yimigaqo ekuzo. Sinethemba lokuba ungomnye wabo bantu yaye iincwadi ezishicilelwa apha ziya kukunceda uqhubeke ungenisa ulwazi ngoYehova uThixo noYesu Kristu, nto leyo ethetha ubomi obungunaphakade.—Yohane 17:3.
[Imifanekiso ekwiphepha 16]
[Umfanekiso okwiphepha 17]