Ingxaki Yokufunda Ukulinda
MHLAWUMBI ukufunda ukulinda kwizinto esizifunayo sesinye sezona zifundo zakhe zanzima ekufuneka thina njengabantu sizamkele. Ngokwemvelo abantwana abancinane abanamonde. Nantoni na abayibonayo, bayayifuna, yaye bayifuna ngoku! Kodwa njengoko usenokuba uyazi ngokusuka kumava, liyinyaniso elokuba asinto yonke efunyanwa kuba ifunwa. Kwanaxa sineminqweno esengqiqweni, simele sifunde ukulinda ukuze yaneliswe ngexesha elifanelekileyo. Abaninzi bayasifunda esi sifundo; kodwa abanye abazikhathazi ngaso.
Abantu abafuna ukwamkeleka kuThixo banezizathu ezikhethekileyo zokufunda ukulinda. UYeremiya, owayesakuba ngumkhonzi kaYehova ngaphambi kwexesha lobuKristu, wakugxininisa ngale ndlela oku: “Kulungile ukuba umntu alulindele, ethe cwaka, usindiso lukaYehova.” Kamva, umfundi ongumKristu uYakobi wathi: “Nyamezelani ngoko, bazalwana, ide ifike iNkosi.”—IZililo 3:26; Yakobi 5:7.
UYehova ucwangcise ixesha lakhe lokuzalisekisa iinjongo ezingokobuthixo. Ukuba asinakulinda de kube lixesha lakhe elifanelekileyo lokwenza izinto ezithile, asisayi kufumana lwaneliseko nalonwabo, nto leyo eya kuluphelisa uvuyo esinalo. Ngaphandle kovuyo umkhonzi kaYehova uya kuba buthathaka ngokomoya, kanye njengokuba uNehemiya waxelela abantu belizwe lakowabo oku: “Uvuyo lukaYehova ligwiba lenu.”—Nehemiya 8:10.
Ubulumko Bokufunda Ukulinda
Ngumnqweno wokwemvelo kubantu abangekatshati ukufuna ukutshata okanye kwizibini ezingenabantwana ukufuna ukuba nabantwana. Ngaphezu koko, akukho nto iphosakeleyo ekubeni iliso lethu silimilisele ekwaneliseni iimfuno okanye iminqweno yezinto eziphathekayo nezifanelekileyo. Sekunjalo, ngenxa yokuba bekholelwa ekubeni isiphelo semihla yale nkqubo indala yezinto sisemnyango nokuba kwinkqubo entsha ezayo uThixo uya ‘kusivula isandla sakhe aze azihluthise iinto zonke eziphilileyo ngeento ezikholekileyo,’ amaKristu amaninzi agqibe kwelokuba alindele ukuyanelisa eminye yale minqweno ngexesha elifaneleke ngakumbi.—INdumiso 145:16.
Noko ke, abantu abangenaso esi siseko someleleyo sethemba analo amaKristu, abayi kubona sizathu sakuzibekel’ amangomso izinto. Bengenalo ukholo kuYehova, lowo sivela kuye “sonke isipho esilungileyo, naso sonke isipho esigqibeleleyo,” bayabuthandabuza ubulumko bokubekela izinto kwikamva abangaqinisekanga nokuba liya kuze lifike. Baphila ngesi saci sithi: “Masesisidla, sisela, kuba ngomso siya kufa.”—Yakobi 1:17; 1 Korinte 15:32; Isaya 22:13.
Kumazwe ahambele phambili kwezoshishino ukubhengezwa kwezentengiso kusebenzisa eli thuba lekhondo lokuzanelisa nelokufuna ulonwabo lwangephanyazo. Abantu bakhuthazwa ukuba bazanelise. Ezorhwebo zifuna sikholelwe kwelokuba iindlela zangoku zokuzonwabisa kunye nobunewu-newu zifuneka ngokwenene. Zibanga ngelithi, kutheni ungenakuba nayo nje ingakumbi xa amalungiselelo okufumana amaqweqwe okuthenga ngetyala (credit card), okuhlawula ngezavenge “nawokuthenga ngoku—uhlawule kamva” enokukubangela ube nayo yonke into ngoku? Ngapha koko, ‘Kufanelekile ukuba ufumane okona kulungileyo; musa ukuzitsalisa nzima! Khumbula, ukuba akunakukufumana ngoku oku kusenokwenzeka ukuba ungaze ukufumane!’ Zitsho njalo izibhengezo ezidumileyo.
Kwangaxeshanye, abantu abangamashumi ezigidi abakumazwe asakhasayo bafumana nje izinto ezaneleyo zokuba balale betyile—okanye kwanokungaphantsi kunoko. Ngaba kukho nantoni na enokukugxininisa ngokucace ngakumbi ukungafezeki nokungabikho sesikweni kweenkqubo zoluntu zezobupolitika nezoqoqosho?
Ubulumko bokufunda ukulinda bubonakala kwisibakala sokuba izigidi zabantu abangenamdla wakulinda—okanye ubuncinane abangaboni sizathu sakwenjenjalo—batshone abavela nangonwele ematyaleni kuba befuna ukwanelisa iminqweno yabo ekhawulezileyo. Iimeko ezingalindelekanga, ezinjengokugula okanye ukungaqeshwa, zisenokuthetha intlekele. Iphephandaba laseJamani iFrankfurter Allgemeine Zeitung lachaza isizathu sokuba eJamani kukho abantu abasisigidi abangenamakhaya: “Ngokuqhelekileyo, ngokufuthi ukungabi nakhaya kwandulelwa kukungaqeshwa okanye kukuba namatyala agqithiseleyo.”
Lungakwazi ukuhlawula amatyala alo, ngokulusizi uninzi lwabantu abahlelelekileyo lulahlekelwa yimizi nazizinto olunazo. Izihlandlo ezininzi, uxinezeleko olwandayo lubangela ingxaki entsatsheni. Imitshato egungqayo iqalisa ukuqhawuka. Ukudandatheka ngamaxesha athile nezinye iingxaki zempilo kuba zizinto zemihla ngemihla. AmaKristu asenokugula ngokomoya, nto leyo enokuwakhokelela kwingcinga ephosakeleyo nehambo engafanelekanga. Abantu abathe ngobuyatha baqalisa ngokufuna konke okuphambi kwabo bagqibela ngokuba yimipha echutywe yalahlwa.
Kwabaninzi Lucelomngeni Olutsha
UYesu wakwenza kwacaca ukuba sifanele silumke hleze “amaxhala eli phakade, nokulukuhla kobutyebi, neenkanuko zezinye izinto, zingene ziliminxe ilizwi.” (Marko 4:19) Masikhumbule ukuba ayikho inkqubo yezobupolitika eye yaphumelela ekuwapheliseni ngempumelelo amaxhala kuquka nawezoqoqosho, awathetha ngawo uYesu.
UbuKomanisi obuchasiweyo ngoku kumazwe aseMpuma Yurophu buzama ukwenza ukuba abantu bafumane izinto ngokulinganayo ngokusebenzisa inkqubo yezoqoqosho elawulwa nguRhulumente. Ngokwahlukileyo kwinkqubo yezoshishino ekhululekileyo, inkqubo yangaphambili ilungiselele abantu abakuloo mazwe umlinganiselo othile wonqabiseko oluqinisekileyo kwezoqoqosho olo ubukapitali bebusilela ngokufuthi ukulunikela. Sekunjalo, amaxhala athetha ngawo uYesu asekho ngenxa yokunqongophala kwezinto ezinokwanelisa iimfuno zoluntu nokuncipha kwenkululeko yobuqu.
Ngoku, uninzi lwaloo mazwe luqalisa inkqubo yezoqoqosho apho abantu banelungelo lokuthenga nelokuthengisa imveliso yabo (market economy) ngaloo ndlela evelisa ucelomngeni olutsha kubemi bawo. Ingxelo yakutshanje ithi: “Imbonakaliso yokungabi namava inxulunyaniswa nomnqweno wokufikelela ngokukhawuleza kumgangatho wendlela yokuthenga yasentshona.” Ukuze lukufikelele oku “inani elandayo labantu abakwiLänder esempuma Jamani lizifaka ematyaleni elingenakukwazi ukuphuma kuwo.” Ingxelo yongezelela ngelithi: “Emva kolonwabo lokuqala olubangelwa yinkululeko entsha kwezoqoqosho ngoku kusasazeka uloyiko nokuphelelwa lithemba.” Ngoku le nkqubo sele ithatyathelw’ indawo bubukapitali, kodwa amaxhala asekho.
Inkululeko engakumbi yezobupolitika neyezoqoqosho ivulele amathuba amatsha okulungiswa kwemeko yezoqoqosho. Ngenxa yoko, uninzi lwabantu lusenokulingelwa ekucingeni nzulu ngembono yokuzivulela ishishini okanye ukufudukela kwelinye ilizwe elinamalungelo engqesho alunge ngakumbi.
Izigqibo ezifana nezi yimicimbi yobuqu. Akukho nto iphosakeleyo ngomKristu xa efuna ukuphucula iimeko zakhe zezoqoqosho. Usenokuba ushukunyiswa ngumnqweno wokunyamekela intsapho yakhe, esazi ukuba “ukuba ke umntu akabakhathalele abakhe, ngokukodwa abendlu yakhe, ulukhanyele ukholo, unobubi ngaphezu kongakholwayo.”—1 Timoti 5:8.
Ngoko ke, akunto ifanelekileyo ukugxeka izigqibo ezenziwa ngabanye. Kwangaxeshanye, amaKristu afanele akhumbule ukuba bubuyatha ukufuna ukukhululeka kwezoqoqosho ngokuzenzela amatyala agqithiseleyo anokuwarhintyela. Ngokufanayo kuphosakele ukufuna ukukhululeka kwezoqoqosho ngendlela ebandakanya ukutyeshela iimbopheleleko nezilangazelelo zokomoya.
Ukufunda Kwabanye
Kwiminyaka elandela iMfazwe Yehlabathi II, amawaka amaJamani afuduka kwiYurophu eyayidlakazwe yimfazwe esiya kwamanye amazwe, ingakumbi eOstreliya naseKhanada. Ngoko uninzi lwakwazi ukuphucula imeko yalo yezoqoqosho, kodwa akukho namnye kulo owawaphepha ngokupheleleyo amaxhala ezoqoqosho awathetha ngawo uYesu. Maxa wambi ukucombulula iingxaki zezoqoqosho kwavelisa iingxaki ezintsha—ukukhumbula ikhaya, ulwimi olungaqhelekanga, ukuziqhelanisa nokutya okungaqhelekanga, amasiko ahlukileyo, ukuzilungelelanisa nabahlobo abatsha, okanye ukuhlangabezana nezimo zengqondo ezahlukeneyo.
Abathile kwaba baphambukeli yayingamaNgqina kaYehova. Okuncomekayo kukuba, inkoliso yawo ayizange izivumele iingxaki ezingaqhelekanga zemfuduko ziminxe imeko yawo yokomoya. Kodwa babakho abaphuma ecaleni. Bambi baba ngamaxhoba empembelelo yenkohliso yobutyebi. Inkqubela yabo yobuthixo ayizange ihambisane nobuncwane babo bezoqoqosho.
Ngokuqinisekileyo oku kubonisa ubulumko bokuyihlolisisa ngenyameko imeko yethu ngaphambi kokuba mhlawumbi senze izigqibo zobuyatha. Utyekelo lokuthanda izinto eziphathekayo luya kusenza sirhoxobise kumsebenzi ongasayi kuze uphindwe wokwenza abafundi owabelwe amaKristu. Oku kuyinyaniso kungakhathaliseki indawo esihlala kuyo, ekubeni kungekho lizwe linabemi abakhululekileyo kumaxhala ezoqoqosho.
Ukuzama Umzamo Omhle
UPawulos walumkisa uTimoti wenjenje: “Phuthuma ke ubulungisa, ukuhlonela uThixo, ukholo, uthando, unyamezelo, ubulali. Wuzame umzamo omhle wokholo; bubambe ubomi obungunaphakade, owabizelwa nokubizelwa kubo.” KumaKristu aseKorinte wathi: “Qinani, ningabi nakushukuma, nihlale niphuphuma umsebenzi weNkosi.”—1 Timoti 6:11, 12; 1 Korinte 15:58.
Ukuthobela esi siluleko sihle yeyona ndlela ilungileyo yokulwa nokuthanda izinto eziphathekayo ngempumelelo, yaye ngokuqinisekileyo kuninzi ekufuneka kwenziwe ngumKristu! Kumazwe athile apho kukho iqaqobana labavakalisi boBukumkani, izihlwele zabantu ziye zafikelelwa kancinane kakhulu ngenyaniso. Ngokuchanileyo uYesu wakuxela kwangaphambili oku: “Ukuvuna okunene kuninzi, kodwa bona abasebenzi bambalwa.”—Mateyu 9:37.
Kunokuba avumele amaxhala ezoqoqosho akula mazwe awatyekise kumsebenzi wokomoya ekuxakekwe nguwo ngoku, amaNgqina kaYehova ayisebenzisa ngokuyingenelo le meko ngokuwasebenzisa ngokuzeleyo amathuba avelayo. Xa lungasebenzi okwethutyana, uninzi lwawo lwandisa umsebenzi walo wokushumayela. Inkonzo yawo, ngaphandle kokuba yandiswe yintswahla yokudumisa uYehova, iwanika ulonwabo olufunekayo ukuze ahlangabezane neengxaki anazo zoqoqosho.
La maNgqina abeka tanci umsebenzi wokushumayela buze ubunzima bemeko yezoqoqosho bube kwindawo yesibini, nto leyo ebubungqina bobuzalwana bazwenibanzi bokuba ngokungathandabuzekiyo athembele kuYehova ukuze awanyamekele. Uthembisa oku: “Funani ke tanci ubukumkani bukaThixo nobulungisa bakhe, zaye zonke ezo zinto ziya kongezelelwa kuni.”—Mateyu 6:33.
Ukususela ekubuyiselweni konqulo lokwenyaniso ngowe-1919, uYehova akakhange abayekele abantu bakhe bashukunyiswe. Uye wabakhusela kwiintshutshiso eziqatha kwanakwiindawo ezithile apho umsebenzi ubusenziwa ngokufihlakeleyo kangangamashumi eminyaka. AmaNgqina kaYehova azimisele kwelokuba oko uMtyholi angakwazanga ukukuphumeza ngentshutshiso, akayi kuphumelela kuko ngokusebenzisa amaqhinga angakumbi omgibe wokuthanda izinto eziphathekayo!
Ukufunda Ukulinda Kwiinkalo Zonke
IiHolo zoBukumkani eziphangaleleyo, izixhobo zesandisi lizwi ezixhomileyo ngamaxabiso, iiHolo zeNdibano kunye namakhaya aseBheteli amahle ezo zinto zizukisa uThixo yaye ngokuzolileyo zinikela ubungqina bokuba uyabasikelela abantu bakhe. Kumazwe apho umsebenzi wawuvalwe kangangethuba elide amaNgqina kaYehova asenokuba noluvo lokuba kuninzi ekufuneka ekwenzile ukuze afikelele kumgangatho wamanye amazwe. Kodwa eyona nto ibaluleke ngakumbi kukuba aqhubeke esenza inkqubela ngokomoya. Ubungqina obubonakalayo beentsikelelo zikaThixo ngezinto eziphathekayo buya kulandela ngexesha elifanelekileyo.
Abakhonzi bakaYehova abazahluleleyo kufuneka baphaphe hleze, ekusukeleni kwabo izilangazelelo zobuqu, baqalise ukuba noluvo lokuba noko bazibandeze ngokwaneleyo ekubeni nezinto eziphathekayo. Ukulangazelela ukukhululeka kwimeko yokungalingani kwezoqoqosho nakwezentlalo kuyaqondakala, kodwa abantu bakaYehova abasityesheli isibakala sokuba bonke abakhonzi bakaThixo balangazelela ukukhululeka. Abaziimfama balangazelela ukubona kwakhona, abanezigulo ezingapheliyo balangazelela ukubuyiselwa empilweni, ababandezelekileyo balangazelela isithembiso esiqaqambileyo, yaye abo bafelweyo balangazelela ukubabona abafileyo babo abathandekayo kwakhona.
Ngenxa yeemeko, kwiinkalo ezithile umKristu ngamnye unyanzelekile ukuba alindele ihlabathi elitsha likaYehova ukuze licombulule iingxaki anazo. Oku kufanele kusenze sizibuze oku, ‘Ukuba ndinento edliwayo neyambathwayo, ngaba andifanele ndanele zezi zinto ndize ndilindele ukukhululwa kwiingxaki zoqoqosho?’—1 Timoti 6:8.
AmaKristu athembele kuYehova ngokupheleleyo anokuqinisekiswa lelokuba ukuba nje akulungele ukulinda, yonke iminqweno neemfuno zawo ezifanelekileyo kungekudala ziya kwaneliswa. Akukho namnye oya kulindela ilize. Kwakhona siphinda amazwi kaPawulos athi: “Qinani, ningabi nakushukuma; nihlale niphuphuma umsebenzi weNkosi, nisazi nje ukuba ukubulaleka kwenu akulambathi eNkosini.”—1 Korinte 15:58.
Ngoko ngaba ngokwenene ukufunda ukulinda kumele kube yingxaki enkulu ngolo hlobo?
[Umfanekiso okwiphepha 10]
Ukufunda ukulinda kunokubusindisa ubomi bakho