Ukumkani Uhlambela Ingcwele KaYehova

“Ke bona abantu abamaziyo uThixo wabo babambelele kuwo [“baya koyisa,” NW].”—DANIYELI 11:32.

1, 2. Luluphi ungquzulwano olukhulu oluye lwaphawula imbali yabantu kangangeminyaka engaphezu kwama-2 000?

OOKUMKANI ababini abangevaniyo babambene ngazo besilwela ulongamo. Ekuqaleni iba ngomnye ozuza amandla, kuze ke kulandele omnye, njengoko idabi liqhubeka iminyaka engaphezu kwamawaka amabini. Kumhla wethu olu kruthakruthwano luye lwachaphazela inkoliso yabantu emhlabeni yaye luye lwayivavanya ingqibelelo yabantu bakaThixo. Lufikelela esiphelweni ngesiganeko esingabonwanga kwangaphambili nalelinye igunya. Le mbali iphawulekayo echazwe kusengaphambili yatyhilelwa umprofeti wamandulo uDaniyeli.—Daniyeli, isahluko 10 kuse kwese-12.

² Esi siprofeto sinento yokwenza nobutshaba obuqhubekayo obuphakathi kokumkani wasentla nokumkani wasezantsi yaye saxutyushwa ngokweenkcukacha kwincwadi ethi “Mayenziwe iNtando Yakho eMhlabeni.”a Kuloo ncwadi kwaboniswa ukuba ekuqaleni ukumkani wasentla yayiyiSiriya, ngasentla kwelakwaSirayeli. Kamva, yaba yiRoma. Ekuqaleni, ukumkani wasezantsi yayiyiYiputa.

Ungquzulwano Kwixesha Lokuphela

3. Ngokutsho kwesithunywa sezulu, isiprofeto esingokumkani wasentla nokumkani wasezantsi sasiya kuqondakala nini, yaye njani?

³ Isithunywa sezulu esasityhilela uDaniyeli ezi zinto sathi: “Wena ke, Daniyeli, wavalele amazwi la, uyitywine incwadi, kude kube lixesha lokuphela. Baninzi abaya kuyiphengulula, kwandiswe ukwazi.” (Daniyeli 12:4) Ewe, isiprofeto sinokuthanani nexesha lokuphela—xesha elo elaqalisa ngowe-1914. Ebudeni belo xesha liphawuliweyo, abaninzi babeya ‘kuziphengulula’ iZibhalo Ezingcwele, yaye ngoncedo lomoya oyingcwele, ulwazi lokwenyaniso, kuquka ukuqonda isiprofeto seBhayibhile, lwaluza kwandiswa. (IMizekeliso 4:18) Njengoko singena nzulu ngakumbi kwelo xesha, iinkcukacha ezingakumbi nangakumbi zeziprofeto zikaDaniyeli ziye zacaciswa. Ngoko, sifanele sisiqonde njani esi siprofeto singokumkani wasentla nokumkani wasezantsi ngowe-1993, ngoku kwiminyaka engama-35 emva kokupapashwa kwencwadi ethi “Mayenziwe iNtando Yakho eMhlabeni”?

4, 5. (a) Unyaka we-1914 ufumaneka phi kwisiprofeto sikaDaniyeli esingokumkani wasentla nokumkani wasezantsi? (b) Ngokutsho kwesithunywa sezulu, kwakuza kwenzeka ntoni ngowe-1914?

⁴ Ukuqalisa kwexesha lokuphela ngowe-1914 kwaphawulwa ngemfazwe yehlabathi yokuqala namanye amanzithinzithi ehlabathi uYesu awawaxela kwangaphambili. (Mateyu 24:3, 7, 8) Ngaba sinokuwufumana loo nyaka kwisiprofeto sikaDaniyeli? Ewe. Ukuqala kwexesha lokuphela ‘lixesha elimisiweyo’ ekuthethwe ngalo kuDaniyeli 11:29. (Bona ethi “Mayenziwe iNtando Yakho eMhlabeni,” iphepha 260-79.) Yayilixesha elalisele limisiwe nguYehova ngomhla kaDaniyeli, ekubeni lafika ekupheleni kweminyaka engama-2 520 eboniswe kwiziganeko ezinentsingiselo engokwesiprofeto kuDaniyeli isahluko 4.

⁵ Loo minyaka engama-2 520, ukususela ekutshatyalalisweni kweYerusalem ngowama-607 B.C.E. ebutsheni bukaDaniyeli kuse kowe-1914 C.E., yayibizwa ngokuba ‘ngamaxesha amisiweyo eentlanga.’ (Luka 21:24, NW) Ziziphi iziganeko zobupolitika ezaziya kuphawula ukuphela kwawo? Isithunywa sezulu samtyhilela oku uDaniyeli. Isithunywa sezulu sathi: “Ngexesha elimisiweyo [ukumkani wasentla] uya kubuya aye ngasezantsi; ekupheleni kungabi njengoko bekunjalo ekuqaleni.”—Daniyeli 11:29.

Ukumkani Uyoyiswa Emfazweni

6. Ngowe-1914, yayingubani ukumkani wasentla, ibe yayingubani ukumkani wasezantsi?

⁶ Ngowe-1914 indima yokumkani wasentla yayithatyathwe yiJamani, eyayikhokelwa nguKaiser Wilhelm. (“Kaiser,” ngokusuka kwisibizo saseRoma esithi “Kesare.”) Ukuqhambuka kweemfazwe zaseYurophu kwakuyinxalenye yongcelele longquzulwano olwaluphakathi kokumkani wasentla nokumkani wasezantsi. Indima yalo wamva, ukumkani wasezantsi, ngoku yayithatyathwe yiBritani, eyathi ngokukhawuleza yathimba iYiputa, ummandla wolawulo wokumkani wantlandlolo wasezantsi. Njengoko imfazwe yayiqhubeka, iBritani yathelelwa lithanga layo langaphambili, iUnited States of America. Ukumkani wasezantsi waba liGunya Lehlabathi lamaNgesi namaMerika, obona bukhosi bunamandla embalini.

7, 8. (a) Kwimfazwe yehlabathi yokuqala, yiyiphi indlela ezathi izinto azabi ‘njengasekuqaleni’ ngayo? (b) Waba yintoni umphumo wemfazwe yehlabathi yokuqala, kodwa ngokutsho kwesiprofeto, wasabela njani ukumkani wasentla?

⁷ Kungquzulwano lwangaphambili phakathi kwaba kumkani babini, uBukhosi baseRoma, njengokumkani wasentla, babusoloko busoyisa. Ngeli xesha, ‘izinto azibanga njengasekuqaleni.’ Kwakutheni ukuze zingabi njalo? Ngenxa yokuba ukumkani wasentla woyiswa emfazweni. Esinye isizathu sasikukuba “iinqanawa zamaKiti” zeza kulwa nokumkani wasentla. (Daniyeli 11:30) Yayiziziphi ke ezi nqanawa? Ngexesha likaDaniyeli, ilizwe lamaKiti yayiyiSipro, kwaye ekuqaleni kwemfazwe yokuqala yehlabathi, iSipro yahlonyelwa kwiBritani. Ngaphezu koko, ngokutsho kweThe Zondervan Pictorial Encyclopedia of the Bible, igama elithi Kiti “lisetyenziselwa ukuquka nelaseNtshona ngokubanzi, kodwa ngokukodwa elaseNtshona elihamba ngolwandle.” INew International Version iguqulela ibinzana elithi “iinqanawa zamaKiti” ngokuthi “iinqanawa zamazwe asentshona aselunxwemeni lolwandle.” Kwimfazwe yehlabathi yokuqala, iinqanawa zamaKiti zangqineka iziinqanawa zaseBritani, ekunxweme olungasentshona eYurophu. Kamva uMkhosi Waselwandle waseBritani waqiniswa ngeenqanawa ezazivela kwilizwekazi elingasentshona loMntla Merika.

⁸ Kolu hlaselo, ukumkani wasentla ‘wakhohlwa’ waza woyiswa ngowe-1918. Kodwa wayengekaphelelwa. “[Uya kubuya], awubhavumele umnqophiso ongcwele, afeze, abuye, abaqonde abashiya umnqophiso ongcwele.” (Daniyeli 11:30) Saprofeta ngolo hlobo isithunywa sezulu, ibe kwangqineka kunjalo.

Ukumkani Uyafeza

9. Yintoni eyakhokelela ekuveleni kuka-Adolf Hitler, yaye ‘wafeza’ njani?

⁹ Emva kwemfazwe, ngowe-1918, iMikhosi Emanyeneyo eyoyisayo yenza isivumelwano soxolo ngenjongo yokohlwaya iJamani, ekwabonakala ukuba sasicetyelwe ukugcina abantu baseJamani phantse belambile kangangexesha elizayo elalingasikelwe mda. Ngenxa yoko, emva kokutsala nzima kangangeminyaka ethile phantsi kwamanzithinzithi angathethekiyo, iJamani yayilungele ukuvela kuka-Adolf Hitler. Waba ngumakhonya ngokupheleleyo ngowe-1933 yaye ngoko nangoko waqalisa ukuwuhlasela ngolunya “umnqophiso ongcwele,” owawumelwa ngabazalwana abathanjisiweyo bakaYesu Kristu. Koku wafeza ekulweni nala maKristu athanjisiweyo, amaninzi awo ewatshutshisa ngenkohlakalo.

10. Efuna inkxaso, uHitler wazimanyanisa nabani, ibe yaba yintoni imiphumo?

¹⁰ UHitler waphumelela kwezoqoqosho nasekwakheni amaqhina oqhagamshelwano namazwe ngamazwe, nakuleyo inkalo efeza. Kwiminyaka embalwa, wayenza iJamani yaba ligunya elinamandla, kweli phulo encediswa ngabo “bashiya umnqophiso ongcwele.” Yayingoobani ke aba? Ngokobungqina, aba yayiziinkokeli zeNgqobhoko, ezazisithi zinolwalamano lomnqophiso noThixo kodwa ekwakusekukudala ziyekile ukuba ngabafundi bakaYesu Kristu. UHitler wahlab’ ikhwelo kwabo “bashiya umnqophiso ongcwele” ukuba bamxhase ibe waphumelela. Upopu waseRoma wenza umnqophiso naye, kwaye iCawa yamaRoma Katolika, kunye neecawa zamaProtestanti eJamani, zamxhasa uHitler kulo lonke ulawulo lwakhe oluneengcwangu lweminyaka eli-12.

11. Ukumkani wasentla ‘wayihlambela njani ingcwele’ waza ‘wayisusa njani inkonzo yamaxesha onke’?

¹¹ UHitler waba nempumelelo ngokokude aye emfazweni, njengoko isithunywa sezulu sasixele ngokuchanileyo kusengaphambili. “Iingalo zakwakhe zosuka zime, ziyihlambele ingcwele, kwainqaba, zisuse inkonzo yamaxesha onke.” (Daniyeli 11:31a) KuSirayeli wamandulo, ingcwele yayiyinxalenye yetempile eyayiseYerusalem. Noko ke, xa amaYuda engazange amamkele uYesu, uYehova akazange awamkele wona netempile yawo. (Mateyu 23:37–24:2) Ukususela kwinkulungwane yokuqala, okunene itempile kaYehova ibiyeyokomoya, nengcwele yayo yeengcwele isemazulwini yaye inentendelezo yayo yokomoya emhlabeni apho bakhonza kuyo abazalwana abathanjisiweyo bakaYesu, uMbingeleli Omkhulu. Ukususela kwiminyaka yee-1930, isihlwele esikhulu siye sanqula sinxulumene nentsalela ethanjisiweyo; kungoko, kusithiwa sikhonza ‘etempileni kaThixo.’ (ISityhilelo 7:9, 15; 11:1, 2; Hebhere 9:11, 12, 24) Intendelezo yasemhlabeni yetempile yahlanjelwa ngokutshutshiswa kanobom kwentsalela ethanjisiweyo namaqabane ayo kumazwe ekwakugquba kuwo ulawulo lokumkani wasentla. Le ntshutshiso yayiqatha kangangokuba inkonzo yamaxesha onke—umbingelelo owenziwa ekuhleni wokudumisa igama likaYehova—yasuswa. (Hebhere 13:15) Sekunjalo, imbali ibonisa ukuba phezu kwako nje ukubandezeleka kabuhlungu, amaKristu athanjisiweyo athembekileyo, ndawonye ‘nezinye izimvu,’ aqhubeka eshumayela ngokufihlakeleyo.—Yohane 10:16.

‘Into Enezothe’

12, 13. Yayiyintoni ‘into elizothe,’ yaye—njengoko kwabonwa kwangaphambili ngumkhonzi othembekileyo noqondayo—yamiselwa nini kwaye njani kwakhona?

¹² Xa imfazwe yesibini yehlabathi yayisondela ekupheleni, kwavela enye into. “[Ngokuqinisekileyo, NW] zimise izinto ezinezothe, eziphanzisayo.” (Daniyeli 11:31b) Le ‘nto inezothe,’ noYesu awayikhankanyayo, yayisele isaziwa ukuba yayiluManyano LweZizwe, irhamncwa elibomvu elatshona enzonzobileni ngokutsho kweSityhilelo. (Mateyu 24:15; ISityhilelo 17:8; bona ethi Light, iNcwadi yesiBini, iphepha 94.) Latshona enzonzobileni xa kwaqhambuka iMfazwe Yehlabathi II. Noko ke, kwiNdibano Yolawulo Lobuthixo Lwehlabathi Elitsha yamaNgqina kaYehova ngowe-1942, uNathan H. Knorr, umongameli wesithathu weWatch Tower Bible and Tract Society, waxubusha ngesiprofeto seSityhilelo 17 waza walumkisa ngelithi irhamncwa laliza kunyuka kwakhona liphume enzonzobileni.

¹³ Imbali yabuqinisekisa ubunyaniso bamazwi akhe. Phakathi kuka-Agasti no-Oktobha 1944, eDumbarton Oaks eUnited States, kwaqaliswa ukuqulunqwa komgaqo-siseko woko kwakuza kubizwa ngokuba ziZizwe Ezimanyeneyo. Lo mgaqo-siseko wamkelwa ngamazwe angama-51, kuquka elo lalisakuba yiSoviet Union, yaye xa waqalisa ukusebenza ngo-Oktobha 24, 1945, enyanisweni uManyano Lwezizwe olwalufile lwaphuma enzonzobileni.

14. Ukumkani wasentla waguquka nini kwaye njani?

¹⁴ Kuzo zombini iimfazwe zehlabathi iJamani yayilutshaba oluyintloko lukakumkani wasezantsi. Emva kweMfazwe Yehlabathi II, inxalenye yeJamani yahlengahlengiswa kwakhona ukuze imanyane nokumkani wasezantsi. Kodwa enye inxalenye yeJamani ngoku yazimanyanisa nobunye ubukhosi obabunamandla. Umanyano lwamazwe obuKomanisi, ngoku olwaluquka inxalenye yeJamani, lwema ngokuchasene ngokukrakra nomanyano lwamaNgesi namaMerika, yaye usukuzwano olwaluphakathi kwaba kumkani babini lwaba yiMfazwe Yomlomo.—Bona ethi “Mayenziwe iNtando Yakho eMhlabeni,” iphepha 260-79.

Ukumkani Nomnqophiso

15. Ngoobani ‘abo bawuphatha ngokungendawo umnqophiso,’ yaye luluphi ulwalamano ababenalo nokumkani wasentla?

¹⁵ Ngoku isithunywa sezulu sithi: “Abaphatha umnqophiso ngokungendawo wobahlambela [“uya kubakhokelela kuwexuko,” NW] ngamazwi agudileyo.” (Daniyeli 11:32a) Ngoobani aba baphatha umnqophiso ngokungendawo? Kwakhona, inokuba ziinkokeli zeNgqobhoko, zona zizibanga zingamaKristu kodwa ngezenzo zazo zihlambela lona kanye igama lobuKristu. Ebudeni bemfazwe yehlabathi yesibini, “uRhulumente weSoviet wenza umgudu wokufumana uncedo ngezinto eziphathekayo nangokhuthazo lweeCawa ukuze akhusele ilizwe lakhe lokuzalwa.” (Religion in the Soviet Union, nguWalter Kolarz) Emva kwemfazwe, iinkokeli zeecawa zazama ukulondoloza ubuhlobo phezu kwayo nje inkqubo yokungakholelwa kuThixo yegunya ngoku elalingukumkani wasentla.b Ngaloo ndlela, iNgqobhoko yathabath’ unyawo ekubeni yinxalenye yeli hlabathi—uwexuko olulizothe emehlweni kaYehova.—Yohane 17:14; Yakobi 4:4.

16, 17. Ngoobani “abanengqiqo,” yaye baye baqhuba njani phantsi kolawulo lokumkani wasentla?

¹⁶ Noko ke, kuthekani ngamaKristu okwenyaniso? “Ke bona abantu abamaziyo uThixo wabo babambelele kuwo [“baya koyisa,” NW], bafeze. Abanengqiqo ebantwini boluqondisa uninzi, ukanti baya kukhubeka, bawe likrele nalilangatye, kukuthinjwa nakukuphangwa, kube ziintsuku.” (Daniyeli 11:32b, 33) AmaKristu ahlala phantsi kokumkani wasentla, ngoxa ‘ewathobela ngokufanelekileyo amagunya awongamileyo,’ akakhange abe yinxalenye yeli hlabathi. (Roma 13:1; Yohane 18:36) Njengoko ngenyameko enikela izinto zikaKesare kuKesare, kanjalo anikela “neento zikaThixo kuThixo.” (Mateyu 22:21) Ngenxa yoku, ingqibelelo yawo yavavanywa.—2 Timoti 3:12.

¹⁷ Ube yintoni umphumo? Aye ‘oyisa’ aza kwangaxeshanye ‘akhubeka.’ Akhubeka ekubeni athi atshutshiswa yaye abandezeleka ngokunzulu, wambi ebulawa nokubulawa. Kodwa oyisa ekubeni, ubukhulu becala, ahlala ethembekile. Ewe, aloyisa ihlabathi, kanye njengoko noYesu waloyisayo ihlabathi. (Yohane 16:33) Ngaphezu koko, akazange ayeke ukushumayela, kwanokuba ayezibona sele esentolongweni okanye kwinkampu yoxinaniso. Ngokwenjenjalo, ‘abaqondisa abaninzi.’ Phezu kwayo nje intshutshiso, kwinkoliso yamazwe aphantsi kolawulo lukakumkani wasentla, amanani amaNgqina kaYehova andile. Ngenxa yokuthembeka ‘kwabo banengqiqo,’ indima eya isiba nkulu ngakumbi ‘yesihlwele esikhulu’ iye yabonakala kuloo mazwe.—ISityhilelo 7:9-14.

18. Luluphi ‘uncedo oluncinane’ eye yalufumana intsalela ethanjisiweyo ephila phantsi kolawulo lokumkani wasentla?

¹⁸ Sithetha ngokutshutshiswa kwabantu bakaThixo, isithunywa sezulu saxela kwangaphambili oku: “Ekukhubekeni kwabo, baya kuncedwa ngoncedo oluncinane.” (Daniyeli 11:34a) Kwenzeka njani oku? Phakathi kwezinye izinto, ukoyisa kokumkani wasezantsi kwimfazwe yesibini yehlabathi kwaphumela kwisiqabu esikhulu kumaKristu awayephila phantsi kolawulo lokumkani owayenobutshaba. (Thelekisa ISityhilelo 12:15, 16.) Ngoko, abo babetshutshiswa ngukumkani olilandela babefumana isiqabu ngamathuba athile, yaye njengoko iMfazwe Yomlomo yayisiya ngasekupheleni, iinkokeli ezininzi zaqonda ukuba amaKristu athembekileyo akasosisongelo zaza ngenxa yoko zawamkela ngokusemthethweni.c Uncedo olukhulu luye lwavela nakumanani awandayo esihlwele esikhulu, esasisabele ekushumayeleni ngokuthembeka kwabo bathanjisiweyo saza sabancedisa, njengoko kuchazwe kuMateyu 25:34-40.

Ukucocwa Kwabantu BakaThixo

19. (a) Bambi ‘bayithelela njani ngokunyhwalaza’? (b) Iyintoni intsingiselo yebinzana elithi “kude kube lixesha lokuphela”? (Bona umbhalo osemazantsi.)

¹⁹ Ebudeni beli xesha asingabo bonke ababeneentshukumisa ezintle kwabo babebonakalisa umdla ekukhonzeni uThixo. Isithunywa sezulu salumkisa ngelithi: “Bathelele kubo abaninzi, benyhwalaza. Yokhubeka inxenye yabanengqiqo, ukuze bacikidwe phakathi kwabo, bahlanjululwe, kwenziwe mhlophe, kude kube lixesha lokuphela; kuba kusaya kuba ngokwexesha elimisiweyo.”d (Daniyeli 11:34b, 35) Bambi babonakalisa ukuba nomdla enyanisweni kodwa babengakulungele ukuzahlulela ngokwenyaniso ukuze bakhonze uThixo. Abanye ababebonakala bezamkela iindaba ezilungileyo okunene babeziintlola ezisebenzela abasemagunyeni. Ingxelo evela kwelinye ilizwe ifundeka ngolu hlobo: “Wambi ala maqotha-qikili ayengamaKomanisi angazifihliyo awayenyebeleze angena kwintlangano yeNkosi, abonakalisa inzondelelo enkulu, yaye ayede amiselwa kwizikhundla eziphezulu zenkonzo.”

20. Kwakutheni ukuze uYehova avumele amanye amaKristu athembekileyo ukuba ‘akhubeke’ ngenxa yeentshaba ezihanahanisayo ezanyebelezayo?

²⁰ Iintshaba ezanyebelezelayo zabangela ukuba bambi ababethembekile babanjwe ngabasemagunyeni. Kwakutheni ukuze uYehova avumele izinto ezinjalo zenzeke? Ukwenzela ukucikidwa, ukuhlanjululwa. Kanye njengoko uYesu “wafunda ukululama ngobunzima awabuvayo,” ngoko nale miphefumlo ithembekileyo yafunda ukunyamezela ngokucikidwa kokholo lwayo. (Hebhere 5:8; Yakobi 1:2, 3; thelekisa uMalaki 3:3.) Ngaloo ndlela ‘bayacikidwa, bayahlanjululwa yaye benziwa mhlophe.’ Abo bathembekileyo banjalo balindelwe luvuyo olukhulu xa lifika ixesha elimisiweyo lokuba bavuzwe ngenxa yonyamezelo lwabo. Oku kuya kubonakala xa sixubusha ngakumbi isiprofeto sikaDaniyeli.

[Imibhalo esemazantsi]

Uyakhumbula Na?

◻ Kutheni namhlanje sifanele silindele ukusiqonda ngokucace ngakumbi isiprofeto sikaDaniyeli?

◻ Ukumkani wasentla ‘wabhavuma njani waza wafeza’?

◻ Ukuvela kwakhona ‘kwento enezothe’ kwabonwa njani kwangaphambili ludidi lomkhonzi?

◻ Intsalela ethanjisiweyo ‘yakhubeka, yoyisa yaza yalufumana njani uncedo oluncinane’?

[Umfanekiso okwiphepha 15]

Phantsi kukaHitler, ukumkani wasentla wavuka ngokupheleleyo kuloyiso lowe-1918 awalufumana ezandleni zokumkani wasezantsi

[Umfanekiso okwiphepha 16]

Iinkokeli zeNgqobhoko zazama ukuhlakulela ulwalamano nokumkani wasentla

[Inkcazelo]

Zoran/Sipa Press