EMpuma NaseNtshona, UYehova Uyabomeleza Abantu Bakhe
KWIMIMANDLA umsebenzi wokushumayela ovaliweyo kuyo, kumazwe adlavulwe lugonyamelo nakumazwe ukuvalwa komsebenzi okuye kwarhoxiswa kutshanje—ngokwenene, kuyo yonke intsimi yehlabathi—uYehova uyaqhubeka enika amaNgqina akhe “incamisa yamandla.”—2 Korinte 4:7.
Impumelelo Ngoxa Umsebenzi Uvaliwe
Kwiqela leziqithi ezikwiMpuma Ekude, ngoku yiminyaka eli-17 umsebenzi wokushumayela uvaliwe. Ngaba amaNgqina adimazekile ngenxa yoko? Akunjalo konke konke! Ebudeni benyanga kaMeyi edlulileyo, aye afikelela incopho entsha yabavakalisi abangama-10 756, abali-1 297 kubo bebekhonza njengabalungiseleli bexesha elizeleyo. Njengoko iimeko zehlabathi ziya zisiba mbi, abantu bezo ziqithi batyekele ngakumbi ekuyiphulaphuleni inyaniso. Ngoko aye anikel’ ingxelo yezifundo zeBhayibhile eziqhutywa kumakhaya abantu abanomdla ezili-15 654. Ngaphambilana, kwisikhumbuzo sokufa kukaYesu bekuze abantu abangama-25 397.
Xa bekuqhutywa iiNdibano zeSithili “Zemfundiso Yobuthixo”—kwakhona eziqhutywe ngobulumko ngokuvisisana neemeko zasekuhlaleni—abazalwana bachwayitiswa kukufumana, ngolwimi lwabo, imibhalo yabo yeencwadi ezintsha ezifanayo nezo zikhululwe eUnited States. Abaguquleli, abahloli zimpazamo, kunye nabanye baye basebenza ngokuzithandela iiyure ezongezelelekileyo ukuze bakwazi ukulungiselela eyona ncwadi iphambili ikhutshiweyo enamakhulu amaphepha, ngexesha elimisiweyo. Kwanomzi-mveliso wangaphandle wokushicilela onentsebenziswano wakuvuyela ukwenza lo msebenzi mhle wokushicilela nokudibanisa ezi ncwadi. Ababekho endibanweni bavuyiswa kukufumana le mpapasho, enemifanekiso emibala-bala engaphezu kwewaka. Amagosa amaninzi aseburhulumenteni ayawahlonela amaNgqina kaYehova, yaye ubukhulu becala inkcaso ibangelwa ngabefundisi beNgqobhoko. Sinethemba lokuba kungekudala ukuvalwa komsebenzi kuza kurhoxiswa.
Kuthekani Ngamazwe AseMerika?
Kula mazwe aseNtshona amaNgqina kaYehova amanyene nabazalwana bawo baseMpuma ekuzilweni ngenkalipho iingxaki zawo, ibe umoya oyingcwele kaYehova uyawanceda oyise iimeko ezinzima. Ngokomzekelo, khawukhangele le ngxelo ilandelayo yelizwe elikuMzantsi okanye kuMbindi Merika apho imibutho engekho mthethweni ethengisa iziyobisi ihla inyuka kumahlathi ashinyeneyo.
Iqela lamaNgqina landuluka ngoduladula lisiya kumhlaba okwanti. Njengoko lalisehla kuduladula lowo, laphawula ukuba kukho indledlana ephumela ngaphandle kwedolophana. Ngoko abazalwana abahlanu baya kukhangela apho le ndledlana yomhlaba iya khona, babela oodade nabantwana ukuba basebenze kuloo dolophana. Omnye waba bazalwana ubalisa oku:
“Kwiiyure ezimbini sisendleleni sahlangana nezindlu ezimbalwa gqitha. Ngoko, ngequbuliso kwavumbuluka amadoda asibhozo axhobileyo nafake izigqubuthelo entloko phakathi kwemithi. Amanye ayephethe oombayimbayi, yaye amanye enezinkempe ezikhulu. Kodwa yintoni le sasizifake kuyo? Saqalisa ukubabuza oko babekufuna, kodwa kwathiwa masithi tu—kuphela masibheke phambili. Senza oko! Sahamba ezinye iiyure ezimbini phakathi kwehlathi elishinyeneyo sada saphumela kwindawo engenamithi ngokucacileyo eyayiyinkampu enezixhobo. Kumacala onke kwakumi abalindi abaxhobe ngemipu. Embindini kwakukho indlu eyakhiwe kakuhle esasiwa kuyo.
“Ekubeni sihlalisiwe saxoxa nalowo kwakubonakala ukuba ngumphathi wale nkampu. Wayenxibe kakuhle, esisifundiswa, yaye enesidima. Walatha omnye weqela labazalwana bethu waza wathi makaphakame. Wandula ke wambuza: ‘Nicinga ntoni ngeli qela [lethu]?’ Eyiqonda kakuhle indawo esasikuyo, lo mzalwana waphendula wathi: ‘Manditsho ukuba, siyalazi eli qela lenu, kodwa asinamdla kulo okanye nakweliphi na elinye iqela lezobupolitika. Ekuphela kwento esibeka apha kukushumayela ngoBukumkani bukaYehova uThixo obungoKristu Yesu. Kungekudala buza kuphelisa bonke oorhulumente bezobupolitika bale nkqubo yezinto buze buzise iintsikelelo ezimangalisayo ebantwini kulo mhlaba phantsi kweemeko zeParadisi—nto leyo ekungekho mntu okanye qela labantu linokuyenza.’
“Isimo sengqondo sale ndoda saguquka. Yaqalisa ukubuza imibuzo. ‘Nikufunde phi konke oku? Nilungiselelwe njani ukuthetha ngolu hlobo?’ Kwisithuba esingangeyure enesiqingatha, sanikela ubungqina obuhle ngeemeko zehlabathi sikwabonisa nokuba iBhayibhile yalatha kokuphela kwethemba loluntu. Sacacisa namaRoma isahluko 13—ukuba siyawathobela amagunya alawulayo, kodwa xa kukho ukungqubana okuthile phakathi kweLizwi likaYehova nelawo, sithobela uThixo wethu, uYehova, kuqala. Ekuqukumbeleni, sambonisa iincwadi esasiziphethe. Wathabatha zantathu kuzo kunye neBhayibhile, yaye okona kwasimangalisa ngokwenene kukuba, wasinika umnikelo wazo. Wathi uza kuzifunda.
“Emva koko, inkokeli yaxelela enye yaloo madoda ukuba isikhuphe kuloo nkampu. Kungekudala sabuyela emva, simbulela uYehova ngoloyiso esibe nalo kwenye intsimi yokunikel’ ubungqina.”
KwiAfrika Edlavulwe Yimfazwe
Phakathi kweMpuma Ekude neNtshona ekude kumi ilizwekazi laseAfrika. Iimfazwe zobuhlanga ziwenze amanye amazwe alapho aziindawo ekukho kuzo iziphithiphithi ezinogonyamelo. ELiberia, kwakhona abantu bakaYehova baye bachaphazeleka ngokunzulu kukuqhambuka kwemfazwe yamakhaya. Kuqala ebudeni bukaOktobha noNovemba ngowe-1992 kwakusiliwa kwisixeko esilikomkhulu nakwiindawo ezisingqongileyo. Kwandula ke, njengoko imfazwe yayinabela kwimimandla esemantla kwelo lizwe, amabandla avalwa ngokupheleleyo njengoko abazalwana babesabela emahlathini kunye nabo bonke abantu abahlala apho. Noko ke, inzondelelo ababenayo ayithothanga. Njengoko babesaba, babeshumayela, yaye oku kuye kwaphumela ekubeni kunikelwe ubungqina obuzukileyo kwezona ndawo zikwanti zeli lizwe.
Elinye ibandla labazalwana ekwanyanzeleka ukuba bashiye amakhaya abo lakha iHolo yoBukumkani yokwethutyana phakathi kwihlathi lemithi ekwenziwa ngayo irabha. Kwidolophu ekufuphi nommandla kaf’ ayayo, ebudeni bethuba lasemini abantu abahlala apho babebalekela kweli hlathi likufuphi bephepha iziqhushumbisi ezilahlwa ziinqwelo-moya. Abazalwana basekuhlaleni (kuquka nabavakalisi abangenandawo yokuhlala abasuka kwikomkhulu, iMonrovia) benza amalungiselelo okuba kuyiwe kubulungiseleli basentsimini yaye ngokuthe rhoqo babeshumayela kumawaka abantu abahleli phantsi kwemithi! Nanini na xa kusiza inqwelo-moya, abazalwana noodade babetsibela kumsele okufuphi baze bathi yakudlula loo nqwelo-moya iyingozi kubo, baqhubeke benikela ubungqina.
Okumangalisayo kukuba, phezu kwazo nje ezi meko zemfazwe yamakhaya, abavakalisi bebandla abaliwaka nangaphezulu abanikela iingxelo kuMbutho, benza umlinganiselo weeyure ezili-18,1 kubulungiseleli basentsimini yaye nyanga nganye baqhuba izifundo zeBhayibhile ezingama-3 111.
EAfrika ebudeni beminyaka emine edluleyo, imiqathango eyayimiselwe umsebenzi wamaNgqina kaYehova iye yarhoxiswa kumazwe ali-18. Yaye hayi indlela okuvuyisa ngayo oku! NgoAgasti 12, ukuvalwa komsebenzi wamaNgqina eMalawi okwakumiselwe ngo-Oktobha, 1967, kwarhoxiswa. Umsebenzi wokushumayela iindaba ezilungileyo owawusenziwa ngokufihlakeleyo wawusoloko uphumelela, kodwa ngoku amaNgqina ayakwazi ukuqhubeka ewenza ngokukhululekileyo, nangona kuya kufuneka alindele uvuko ukuze kwakhona amkele abahlobo bawo abathandekayo ababulawa ngabo babewacinezela.
EMozambiki kwenziwa isivumelwano soxolo ngo-Oktobha 4, 1992. Imimandla ebekunzima ukuyifikelela ngenxa yemfazwe etshabalalisayo ebisiliwa kwiminyaka eli-16 edluleyo iyafikelelwa. Kummandla waseCarioco, kwaphinda kwanxityelelwana nabazalwana noodade abangama-375 ababengasenalunxibelelwano ngokupheleleyo nentlangano kangangeminyaka esixhenxe edluleyo. Kwaqhutywa indibano ekhethekileyo yosuku olunye eMilange, ikomkhulu lesithili esasisaziwa njengendawo yenkampu yoxinaniso kwaneziko “lokufundiswa kwakhona” kwamaNgqina kaYehova, uninzi lwawo olwaluziimbacu ezivela eMalawi. Kwakukho isimbuku esikhwankqisayo sabantu abangama-2 915, kuquka nomphathi wedolophu, owamkela amaNgqina kaYehova. Ngoko iziko ebelifudula ‘ilelokufundisa kwakhona’ laba liziko lemfundiso yobuthixo ngolo suku.
Omnye umvangeli wasemazweni ubhala oku: “Ngokuphathelele abazalwana bethu abazifumanisa bekwiinkampu zeembacu kwiPhondo laseTete, ummeli weUNHCR (United Nations High Commissioner for Refugees) waphawula okuthile okubangel’ umdla. Wathi amaNgqina kaYehova ayezenzele iinkampu zawo, ezahlukileyo kwezamanye amaqela. Wathi, ‘yinkampu yawo kuphela eyayinyanyekelwa kakuhle,’ waza wongezelela ngelithi, ‘amaNgqina kaYehova acocekile, alungelelene, yaye afundisiwe.’ Wandula ke wathi angandikhwelisa kwinqwelo-moya sinqumle ihlathi ukuze ndizibonele. Sihamba emoyeni, umqhubi wenqwelo-moya wandalathisa iinkampu ezimbini. Enye yayidlakadlaka yaye imdaka, inezindlu zodaka ezixineneyo ezakhiwe ngendlela engacwangciswanga. Enye inkampu yayakhiwe ngendlela ecwangcisiweyo, inezindlu ezenze imiqolo eyahlulwe yindlela. Ezi zindlu zazikhangeleka kakuhle, zinamabala atshayelweyo. Zimbi zazo zaziqatywe ipeyinti eyenziwa emakhaya. Lo mqhubi wathi, ‘Khawuthelekelele yeyiphi eyenu?’ Ndavuya kakhulu ndakubonana nabazalwana abahlala kule nkampu. Ngoku kule lali yamaNgqina kukho amabandla asibhozo.”
‘Kwilizwe Lokhozi’
Olu asilokhozi lwaseUnited States! Phakathi kweMpuma neNtshona kumi ilizwe laseYurophu, iAlbania, ngokwasemthethweni ebizwa ngokuthi, Shqipëria, gama elo elithetha “Ilizwe Lokhozi.” Kutshanje, ukuvalwa komsebenzi wamaNgqina kaYehova obekusenziwa ngenkohlakalo nokuthabathe iminyaka engama-50 kuye kwarhoxiswa kweli lizwe, yaye ayakwazi ukumanyana nabazalwana bawo abasuka eMpuma nabasuka eNtshona ekunandipheni inkululeko yawo yonqulo. Ngokwenene ‘azongela ixesha eli.’ (Efese 5:16) Indibano yokuqala kwimbali yaseAlbania, indibano yosuku olunye, yaqhutywa kwiNational Theater, kwikomkhulu, iTiranë, ngeCawa, ngoMatshi 21. Emva kwemini ngoMgqibelo iqela lamaNgqina angabasebenzi bokuzithandela angama-75 layiguqula indawo yokuhlanganisana eyayidlakadlaka yayiholo yendibano eqaqambileyo necocekileyo. Abaphathi bayo babeziinkuku ezisikwe imilomo. Yaye simele siphawule ukuba kwabo basebenzi bokuzithandela bangama-75, bangama-20 kuphela ababebhaptiziwe!
Lalizole nasebukhweni bezinja. Njengoko kwakufika iindwendwe ezisuka phesheya, imibuliso—eyayisenziwa kakhulu ngezimbo zomzimba nokwangana—yalwenza olo suku lwendibano ekhethekileyo lwalolukhetheke gqitha. Ejongise iintende zezandla ezulwini, uMzalwan’ uNasho Dori wavula ngomthandazo. Wabhaptizwa ngowe-1930 yaye ngoku akasaboni kakuhle. Ucwangciso lwaqhutywa ngolwimi lwaseAlbania, inxalenye enkulu yalo iqhutywa ngoovulindlela abakhethekileyo abasuka kumazwe asemzini. Abantu abangama-585 ababekho bavuma ingoma ethi “Ukuzahlulela KwamaKristu”—enye yeengoma ezintandathu ezaziguqulelwe ngolwimi lwesiAlbania ukwenzela isihlandlo eso—njengoko abazalwana noodade abatsha abangama-41 babenze ukrozo ukuya kwiqula elalimiswe kakuhle kwiHolo yoBukumkani yasekuhlaleni ngabazalwana abaziindwendwe ababethetha ulwimi lwesiGrike. Enjani yona inguqulelo! Ngaphambili, ukuba neBhayibhile kwakuthetha ukuthunyelwa kwiinkampu zokusebenza nzima, yaye iintlanganiso zazilinganiselwe kwiqela labantu ababini okanye abathathu.
Ngosuku olulandela olwendibano, iofisi yeWatch Tower yafumana umnxeba osuka kumalathisi wale holo yemidlalo yeqonga. Ngokuqhelekileyo akanamdla wokuba ngubani osebenzisa le holo. Lowo ngumsebenzi wesekela lakhe. Kodwa wathi: “Oku kukuthi maz’ enethole. Andizange ndiyibone icoceke ngolu hlobo le ndawo. Ukuba bekuya kufuneka ndiyichaze, bendiya kuthi izolo impepho evela ezulwini yehlele kule holo yethu. Nanina na nifuna ukusebenzisa esi sakhiwo sethu, ncedani nibuye, yaye isicelo senu siya kusiqwalasela kuqala. Niyazi, eneneni sifanele sinivumele nize rhoqo kwiinyanga ezintathu ngaphandle kokuhlawula imali yengqesho.”
AmaNgqina abuyela kwiidolophu zawo omeleziwe yaye enombulelo ongazenzisiyo aza aqalisa ukwenza amalungiselelo eSikhumbuzo sokufa kukaYesu. Kwiintsuku nje ezili-15 kamva, ngoLwesibini, ngoAprili 6, kwaqhutywa iSikhumbuzo esasisesokuqala ukuqhutywa ngokukhululekileyo kwiindawo ezisixhenxe.
Kwidolophu yaseBerat, inani labeza ezintlanganisweni lande laya kutsho malunga ne-170, yaye oku kuyamcaphukisa umfundisi wasekuhlaleni. Kubavakalisi boBukumkani abangama-33 baseBerat, abangama-21 babhaptizwa endibanweni. IBerat inikele ingxelo yabantu abangama-472 ababeze eSikhumbuzweni. Kwakhona nakwezinye iindawo uziwo lweSikhumbuzo belusemagqabini, ikakhulu ngenxa yokhokelo oluhle loovulindlela abakhethekileyo.
Kwidolophu enamaKatolika amaninzi yaseAlbania, iShkodër, ekukho kuyo indlu yecawa, icawa yaqalisa ukushicilela iphephancwadi eliphuma nyanga nganye, yaye nkupho nganye ibixubusha ngombandela othi “Indlela Yokuphepha AmaNgqina KaYehova.” Inkupho yokugqibela yathi: “AmaNgqina kaYehova ayibhukuqile iShkodër”! Umkhosi omkhulu wamaNgqina amabini apho wahlanganisa abantu abangama-74 abaziphethe kakuhle nabazimiseleyo kwiSikhumbuzo. Emva kokuphulaphula intetho yeSikhumbuzo, iintsapho ezili-15 zacela ukuqhutyelwa izifundo zeBhayibhile zamakhaya. Kwenye idolophu, iDurres, ekuhlala kuyo umkhosi wamaNgqina amane, kwakuze inani elikhulu labantu abangama-79.
Ngenxa yenkcaso yolutsha olungamaKatolika, olwalugrogrisa ngokuwagxotha ngokuwaxuluba ngamatye amaNgqina, iSikhumbuzo esasiza kuqhutyelwa kwidolophana emi entabeni iKalmeti i Vogel saya kuqhutyelwa kwikhaya lomzalwana wasekuhlaleni, apho abantu abangama-22 ababekho babehleli ngoxolo. Kweli qela kukho abavakalisi abahlanu, abathathu kubo ababhaptizwa endibanweni eTiranë.
EVlorë abafana ababini bafumana umbhalo weMboniselo, bawufunda, baza babhalela uMbutho: “Ngoku sizibiza ngokuba singamaNgqina kaYehova ngenxa yenyaniso esiyifunde kwiMboniselo. Ncedani nisithumelele uncedo.” Oovulindlela ababini abakhethekileyo babelwa ukuya apho, yaye ngokukhawuleza omnye waba bafana babini wafaneleka njengomvakalisi. Wakuvuyela ukuba phakathi kwabantu abangama-64 ababeze eSikhumbuzweni eVlorë.
Omnye umzalwana waseAlbania owafumana inyaniso eUnited States wabuyela kwidolophu awazalelwa kuyo eGjirokastër ngeminyaka yee-1950, apho wakhonza kangangoko wayenako de kwasa ekufeni kwakhe. Wahlwayela imbewu yenyaniso kwintliziyo yonyana wakhe. Xa kwarhoxiswayo ukuvalwa komsebenzi, unyana wakhe wacela uncedo kwiWatch Tower Society. Omnye umntu owayenomdla nowayehlala kwidolophana engasemantla naye wayebhalile ecela uncedo, ngoko kwathunyelwa oovulindlela abakhethekileyo abane apho. Ngentsasa yangoLwesithathu elandela usuku lweSikhumbuzo, omnye wabo watsalel’ umnxeba kwiofisi yoMbutho eseTiranë wathi: “Andikwazi ukuzibamba ndifuna ukunixelela ngendlela osebenze ngayo umoya kaYehova. Sonwabe ngokwenene. ISikhumbuzo sisiqhube ngempumelelo.” Ababekho babeli-106, kuquka neqela labo labavakalisi boBukumkani abasixhenxe.
Sasiyintoni isimbuku sababeze eSikhumbuzweni? Ngowe-1992, xa abavakalisi boBukumkani babengama-30 kuphela, ababekho babengama-325. Ngowe-1993, abavakalisi abali-131 baye bahlanganisa abantu abali-1 318 ababekho. Kule minyaka yomibini, ababekho baliphindaphinda kalishumi inani labavakalisi. Hayi indlela ekuchulumancisa ngayo ukubona ‘omncinane esiba liwaka’ ngexesha elifutshane ngolo hlobo!—Isaya 60:22.
“Yenze Banzi Indawo Yentente Yakho”
Njengoko umsebenzi wokushumayela wamaNgqina kaYehova usasazeka kwiimbombo zonke zomhlaba, kuphuma ilizwi lisithi: “Yenze banzi indawo yentente yakho, uwatwabulule amalengalenga eminquba yakho, ungathinteli; zolule izintya zakho, uziqinisele izikhonkwane zakho. Kuba uya kutyhobozela ekunene nasekhohlo.” (Isaya 54:2, 3) Oku kutyhobozela ‘kwiminquba’ kaThixo—okuboniswa kwibandla elisehlabathini lonke labanquli bakhe—kuye kwacaca ngokwenene kwiMpuma Yurophu, ngokukodwa kumazwe awayefudula ephantsi kweSoviet Union. Emva kokuzimasa abakhonzi bakhe ebudeni bamashumi eminyaka yengcinezelo, ngoku uYehova unika amaNgqina akhe amandla afunekayo okwandisa nokomeleza intlangano.
NgoJulayi 22-25, kungcelele lwendibano engenakulibaleka yonyaka ophelileyo “Yemfundiso Yobuthixo” ebiseMoscow, eRashiya, eLocomotive Stadium, kwakuze incopho yabantu abangama-23 743. Ngubani owayekhe wacinga ukuba kwakunokubakho abantu abangaka, kwanakwiminyaka nje emibini edlulileyo? Kodwa nabo ke babekho! Abantu abangaphezu kwe-10 000 babesuka eJapan naseKorea, phantse babe ngama-4 000 ababesuka eUnited States naseKhanada, nabanye abangamawaka ababesuka kumazwe angaphezu kwama-30 kuMzantsi Pasifiki, eAfrika, eYurophu, nakweminye imimandla—ngokwenene kwakudibene iMpuma neNtshona. Hayi indlela ekulukhuthazo ngayo kubo bonke aba ukuhlangana ngokukhululekileyo nabazalwana noodade wabo abasuka eRashiya abangaphezu kwama-15 000! Uvuyo lwabo lwaluphuphuma.
Kwabhaptizwa isimbuku esikhwankqisayo samaNgqina amatsha ali-1 489. Olo bhaptizo lwalusasazwa ngokubanzi kumajelo eendaba ehlabathini lonke, kuquka nomfanekiso omhle kwiphepha lokuqala leThe New York Times. Nangona kwatsho intswahla yezandla ebudeni bobhaptizo, yabalasela ebudeni bentetho yokuqukumbela, emva kokuba isithethi sibulele abasebenzi bokuzithandela abangama-4 752 kunye namagosa afak’ isandla ekwenzeni le ndibano iphumelele ngolo hlobo, sathi: “Ngaphezu kwako konke, sibulela uYehova!” Ewe, umoya kaYehova wawurhoxise inkcaso ekrakra yabanquli abangamaOthodoki waza wanika amandla afunekayo awabangela ukuba loo ndibano ibe yechulumancisa ngokwenene.
Phofu ke, ngoAgasti 5-8 kwakuseza kuqhubeka okungakumbi kwisixeko saseUkraine eKiev. Kwakhona, abasebenzi bokuzithandela ababesebenza ngomdla omkhulu balilungisa ngokupheleleyo ibala lezemidlalo, yaye kulo bhaza-bhaza weHolo yoBukumkani kwanela incopho yabantu ababezile abangama-64 714. Nangesi sihlandlo, amaNgqina ayephuma eMpuma naseNtshona nakuzo zonke iindawo zomhlaba. Iintetho eziphambili zazitolikwa ngeelwimi ezili-12. Iindwendwe ezimalunga nama-53 000, ezazifike ngezithuthi zikawonke wonke, zaziza kuhlangatyezwa kwizikhululo zoololiwe nezeenqwelo-moya zize zisiwe kwiihotele, ezikolweni, nakumakhaya abantu kwanakwiinqanawa ezaziza kuhlala kuzo. Konke oku kwafezwa ngeendleko ezincinane ngemvisiswano nangempumelelo yolungelelwaniso eyabangela ukuba amapolisa esixeko avakalise amazwi abonakalisa ukumangaliswa nokudumisa.
Incopho yocwangciso oluchulumancisayo lwendibano yaba lubhaptizo olwathabatha iiyure ezimbini ezinesiqingatha. Bebonke abazalwana noodade abatsha abafuzisela uzahlulelo lwabo kuYehova babengama-7 402, ngoxa kwakuhlokoma lonke ibala lezemidlalo kungayekwa ukuqhwatywa izandla. Eli nani lalingaphezu kwencopho yobhaptizo eyayifikelelwe kwixa elidluleyo yabangama-7 136 elabhaptizwa xa ababengama-253 922 ababeye endibanweni babehlanganisene kwisiXeko saseNew York ngowe-1958.
Ngoku njengoko eli xesha lomgwebo lisiya ekupheleni kwalo, abantu ababumvu abasuka eMpuma, eNtshona, ‘kwanaseziphelweni zomhlaba’ bahlanganiswa kumanyano olungenakulinganiswa nanto kuyo yonke imbali yoluntu. Ngokwenene, “isihlwele esikhulu . . . siphuma kuzo zonke iintlanga, nezizwe, nabantu, neelwimi” sithelela uSirayeli wokomoya ekuvakaliseni ukholo lwaso kwidini lentlawulelo likaYesu elixabisekileyo, isiseko sako konke oko kuphunyezwa ukuze kuthethelelwe ulawulo lolongamo lukaYehova.—IZenzo 1:8; ISityhilelo 7:4, 9, 10.
[Imifanekiso ekwiphepha 8, 9]
IMpuma ihlangana neNtshona eMoscow naseKiev