Isidima Sabantu—Ilungelo Elisoloko Linyhashwa
“Suku ngalunye kwinkampu yokungcungcuthekisa kwakunyhashwa amalungelo abantu bengcikivwa.”—NGOKUBALISWA NGUMAGDALENA REUTER KUSSEROW IXHOBA ELASINDA KWINKAMPU YOKUNGCUNGCUTHEKISA YAMANAZI.
NAKUBA yayimanyumnyezi gqitha into yokungcungcuthekiswa kwabantu kwiinkampu zoxinaniso zamaNazi ebudeni beMfazwe Yehlabathi II oko kwakungaqali yaye kungagqibelisi. Enoba sithetha ngento yexesha elidluleyo okanye langoku, imiphumo icace nakuthathatha: “Ukunyhashwa kwamalungelo abantu” yinto ekudala ikho yaye ithwaxa abantu.
Noko ke, ukunyhashwa kwamalungelo abantu, akuzange kuphelele kwizenzo zobugewu zamandulo. Ubukhulu becala amalungelo abantu adla ngokunyhashwa mayana. Cinga ngomntwana ogculelwayo ngenxa yesiphene esithile anaso, okanye umphambukeli ogculelwayo ngenxa “yezithethe” zakhe ezingaqhelekanga. Okanye umntu ocalulwayo ngenxa nje yebala lakhe okanye uhlanga alulo. Abacaluli basenokugqala njengokuqhula lo nto, kodwa babe bephela bona abo beva intlungu nokuthotywa isidima.—IMizekeliso 26:18, 19.
Yintoni Isidima?
Esinye isichazi magama sithi isidima ‘kukuxatyiswa, ukuhlonelwa okanye ukugqalwa njengobalulekileyo.’ Ngoko ke, isidima sibandakanya indlela esizijonga ngayo thina nendlela abasijonga ngayo abanye. Ngoxa kukho izinto ezahlukeneyo ezinokuphembelela indlela esivakalelwa ngayo ngathi, indlela abasijonga ngayo abanye okanye abasiphatha ngayo inendima ebalulekileyo kwindlela esibujonga ngayo ubomi bemihla ngemihla.
Kulo naluphi na uluntu ahlala ekho amahlwempu, nabo bangenakuzikhusela. Noko ke, ukuphila kwiimeko ezilolo hlobo akusithobi isidima somntu. Sisimo sengqondo nendlela abamphatha ngayo abanye okuthoba isidima. Okubuhlungu kukuba abantu abahlelelekileyo ngabona badla ngokungaphathwa ngembeko okanye ngendlela enesidima. Kukangaphi sisiva abantu begculelwa ngamabinzana afana nelithi “ungantweni,” “isaphuselana,” “umgqutsuba” ukuphathwa kakubi abantu abalupheleyo, amahlwempu, abantu abaneziphene emzimbeni okanye abangqondo intemntem.
Kutheni abantu bebathoba isidima abanye? Ngaba liya kuze lihlonelwe ilungelo labantu lokuphathwa ngesidima? Inqaku elilandelayo liza kuphendula le mibuzo lisebenzisa iLizwi likaThixo, iBhayibhile.