Ngaba Ukhuphiswano Lusisikhokelo Sempumelelo?
“UKUPHUMELELA yeyona nto ibalulekileyo.” Namhlanje abantu abaninzi baphila ngokuvisisana nala mazwi, ngokufuthi ekuthiwa athethwa ngumqeqeshi webhola ekhatywayo waseMerika, uVince Lombardi. Ngoku, amazwe awayefudula ephantsi kobuKomanisi aye athelela ekuxhaseni umthetho wokhuphiswano. Kuthiwa ukukhuphisana kwiindawo zawo zentengiso kuya kuwanceda azuze ubutyebi. Kumazwe aseMpuma abazali abaninzi babathelekisa nabanye abantwana babo baze babathumele kwizikolo ezifundisa izinto ezahlukahlukeneyo ngexesha elifutshane ezibahlohla ngobuchule bokuphumelela kwiimviwo zokungenelela kwizikolo zemfundo enomsila. Aba bazali bakuxhalabele ngokugqithiseleyo oku beyisekile kukuba ukwamkelwa kwisikolo esidumileyo kusisikhokelo sempumelelo kwixa elizayo.
Abaninzi baqinisekile ukuba ukhuphiswano lusisikhokelo sempumelelo. Ngokwendlela abakholelwa ngayo, abantu baye benza inkqubela ngenxa yokukhuphisana. Kuhlolisiso olwenziwa luManyano lweeNtlangano Zezoqoqosho lwaseJapan (Japan’s Federation of Economic Organizations) abaphathi beenkampani ezinkulu abangama-65,9 ekhulwini bathi, “lukhuphiswano lokufuna ukunyuselwa olungunobangela wempumelelo yeenkampani ezinkulu zaseJapan.” Yaye kubonakala ngathi sekulithuba iinkampani zaseJapan ziphumelela. Noko ke, ngaba ngokwenene ukhuphiswano lusisikhokelo sempumelelo?
Ngaba Ngokwenene Lunomvuzo?
Abantu abakhuphisanayo babonakalisa isimo sengqondo sokuzingca, sokuba ndim kuqala. Baqhwab’ izandla xa izinto zingabahambeli kakuhle abanye, becinga ukuba oko kuya kubabeka kumanqwanqwa aphezulu. Ngenxa yokuba befuna inzuzo ngokuzingca, basenokude basebenzise iindlela ezisenokubenzakalisa abanye. Ngaba oko kufuna impumelelo ngokukhuphisana kuya kukhokelela phi? UYasuo, owazifaka kugqatso lokuba ngumntu obalulekileyo kwinkampani awayekuyo, ekhumbula ikhondo lakhe langaphambili uthi: “Ndizaliswe ngumoya wokhuphiswano neengcinga zokufuna ukunyuselwa, ndandizithelekisa nabanye ndize ndizibone ndimkhulu kunabo. Xa abo bantu bebekwa kwisikhundla esingasentla kwesam, umhla nezolo ndandikhalazela indlela inkampani ebaphatha ngayo abasebenzi. Xa ndithetha inyaniso ndandingenabo abahlobo.”
Kwakhona umoya wokhuphiswano unokukhokelela ekufeni ngaphambi kwexesha. Njani? IMainichi Daily News yaseJapan inxulumanisa ikaroshi, okanye ukufa ngenxa yokusebenza ngokugqithiseleyo, nendlela yokwenza izinto yodidi luka-A. Udidi luka-A luchaza indlela yokwenza izinto emelanayo nokuxinezeleka ngokuzimisela ukusebenzisa mzuzu ngamnye onawo ngokuyingenelo, ngokukhuphisana nangokukhohlakala. Iingcali ngezifo zentliziyo zaseMerika uFriedman noRosenman banxulumanisa indlela yokuziphatha yohlobo luka-A nesifo sentliziyo. Ewe, umoya wokhuphiswano usenokuba ngobulalayo.
Ukhuphiswano emsebenzini lunokukhokelela nakwezinye iindlela zokuphazamiseka emzimbeni nasengqondweni. Omnye umzekelo ngokaKeinosuke, owayengumthengisi ophambili komnye wemizi-mveliso yeenqwelo-mafutha ephambili yaseJapan. Wazizisela udumo ngokuthengisa iinqwelo-mafutha ezili-1 250. Umfanekiso wakhe wafremishwa waza waxhonywa kwigumbi elalisetyenziswa liqumrhu labalathisi kwikomkhulu laloo nkampani. Nangona wayekucekisa ukwenza abo wayesebenza nabo umchankcatho ukuze anyuselwe, inkampani yamnyanzelela ekubeni ngokhuphisanayo. Ngokomphumo, kunyaka nje omnye wagula zizilonda (ulcers) ezisesiswini nasemathunjini. Kwangaloo nyaka, abaphathi abali-15 benkampani awayesebenza kuyo balaliswa esibhedlele, yaye omnye wazibulala.
Ekhaya, isimo sengqondo sokufuna ukuba nayo yonke into abamelwane abanayo siqhubela abantu ekubeni baqhayise ngobutyebi abanabo ebomini phantsi kosukuzwano olungaphele ndawo. (1 Yohane 2:16) Oku kuyingenelo kwezorhwebo kuphela, kuzisa imali kubarhwebi behlabathi.—Thelekisa ISityhilelo 18:11.
Nangona usukuzwano kunye nomoya wokhuphiswano zisenokuvelisa impumelelo emsebenzini, akumangalisi ukuba uKumkani uSolomon wathi: “Kananjalo ndayiqonda ke mna yonke imigudu, nayo yonke impumelelo yomsebenzi, ukuba ingumona wokwanyelana. Kwanaloo nto ingamampunge, nokusukelana nomoya.” (INtshumayeli 4:4) Ngoko sinokululondoloza njani uxolo lwengqondo ngoxa siphila kweli butho labantu likhuphisanayo? Ukuze sikuqonde oku, okokuqala makhe sibone apho yaqala khona le ngcamango yokhuphiswano.