AmaNgqina KaYehova Ehlabathini Lonke—IiBahamas

UMANYANO lweziqithi zeeBahamas—iqela leziqithi neziqithana ezingama-3 000—lumi ngokwesacholo sekorale ukunqumla iikhilomitha ezingama-900 zolwandle oluluhlaza oluphakathi kweFlorida neCuba. Phakathi kwabemi bazo abangama-267 000 kukho ikwayara eyandayo yabavakalisi boBukumkani. Ingoma yabo yendumiso isikhumbuza uIsaya 42:10-12: “Vumani kuYehova ingoma entsha, indumiso yakhe kwaseziphelweni zehlabathi, nina bahla baye elwandle, nenzaliseko yalo, nina ziqithi nabemi bazo. . . . Batsholoze ezincotsheni zeentaba. Mabamzukise uYehova, baxele indumiso yakhe eziqithini.”

Ukholo Olutsha Luyavavanywa

NgoJulayi 1992, uvulindlela othe ngxi (umshumayeli woBukumkani wexesha elizeleyo) wahambisa incwadi eluncedo ekufundisiseni iBhayibhile ethi Unokuphila Ngonaphakade KwiParadisi Esemhlabeni kusomashishini othile amaziyo. Emva kokuba le ndoda iyifundile le ncwadi, yazixelela oku, ‘Olu nqulo ndimele khe ndiluhlolisise.’ Kwiintsuku ezimbini zangeCawa ezalandelayo, yaya kwiintlanganiso kwiiHolo zoBukumkani zamaNgqina kaYehova ezimbini ezahlukeneyo. Emva koko, kwaqaliswa isifundo seBhayibhile kunye nayo. Noko ke, kwiinyanga ezintandathu emva kokuba iqalise izifundo zayo zeBhayibhile, kwabakho ucelomngeni olwaluza kuvavanya ukholo lwayo olutsha—imibhiyozo yomhla wokuzalwa.

Intsapho yalo somashishini yayizinikele kakhulu kwimibhiyozo enjalo, kodwa ukuthanda kwakhe iLizwi likaThixo kwamshukumisela ekubeni aqhubeke nezifundo zakhe zeBhayibhile. Njengoko ulwazi lwakhe ngenyaniso yeZibhalo lwalusiya lukhula, nolwazi lwakhe ngemibhiyozo yomhla wokuzalwa neeholide zehlabathi nendlela uYehova azijonga ngayo lwakhula.

Xa umfazi wale ndoda wenza amalungiselelo embutho yokuzonwabisa ngomhla weFather’s Day, ngobuchule ayizange ivume ukubakho apho. Ngoko, lo mfazi wacinga ukuba umyeni wakhe akasamthandi yaye wayekhokelisa icawa yakhe kunaye nentsapho yakhe. Ngobubele wamcacisela ukuba ukusebenzisa kwakhe oko wayekufunda eBhayibhileni kwakumxonxela ukuba abe ngumyeni kwanobawo olunge ngakumbi. Ekugqibeleni, umfazi wayo waba noxabiso ngokuthanda kwayo inyaniso yeZibhalo waza wavuma ukufundisisa iBhayibhile. Ngoku le ndoda iqhuba isifundo seBhayibhile kunye nentsapho yayo. Yaye hayi indlela eyayichulumance ngayo kwiNdibano YeSithili “Yemfundiso Yobuthixo” kulo nyaka uphelileyo! Umfazi kunye nentombi yayo bebekho baza bayibona xa ibhaptizwa.

Abaphambukeli Beva Ingoma Entsha

Amawaka abaphambukeli baseHaiti amanyana nebutho elikwiiBahamas. Nabo kufuneka bayive ingoma entsha yenyaniso yoBukumkani. AmaNgqina ahlala kwiiBahamas anombulelo ngezibini zaseMerika ezingamaHaiti ezibini eziye zafika apho. Aba bantu baye banceda ekomelezeni amaqela asandul’ ukumiselwa abantu abasuka eHaiti kwisiqithi iGrand Bahama neAbaco.

Ukuze abantu abasuka eHaiti abanomdla kwisigidimi soBukumkani bafumane uncedo olungakumbi, ngoJulayi 31 ukuya kuAgasti 1, 1993, kwaqhutywa indibano yesithili yokuqala kwiBahamas ngesiCreole. Ababezile bafikelela kuma-214, kwaza kwabhaptizwa abantu abasandul’ ukuzahlulela abathathu. Abantu abasuka eHaiti abaninzi abafunde inyaniso kwiiBahamas ukususela ngoko babuyela kwisiqithi abazalelwa kuso okanye bayokwakha kwenye indawo ukuze bongezelele amazwi abo kulawo amaNgqina asekuhlaleni ekuvumeleni uYehova indumiso.

[Ibhokisi ekwiphepha 8]

IINKCUKACHA ZELIZWE

Unyaka Wenkonzo We-1993a

INANI ELIYINCOPHO LABANIKELA UBUNGQINA: 1 294

ISILINGANISO: INgqina elinye kubemi 197

ABEBEKHO ESIKHUMBUZWENI: 3 794

UMLINGANISELO WABAVAKALISI ABANGOOVULINDLELA: 186

UMLINGANISELO WEZIFUNDO ZEBHAYIBHILE: 1 715

INANI LABABHAPTIZIWEYO: 79

INANI LAMABANDLA: 22

IOFISI YESEBE: ENASSAU

[Umbhalo osemazantsi]

[Umfanekiso okwiphepha 9]

IHolo yoBukumkani yokuqala, neofisi yesebe kunye nekhaya labavangeli basemazweni

[Umfanekiso okwiphepha 9]

AmaNgqina avakalisa iindaba ezilungileyo ngenzondelelo

[Umfanekiso okwiphepha 9]

UMilton G. Henschel noNathan H. Knorr bekunye nabavangeli basemazweni eNassau kwiminyaka engama-45 eyadlulayo

[Umfanekiso okwiphepha 9]

Iofisi yesebe entsha, eyanikezelwa ngoFebruwari 8, 1992