Ukuhlangabezana Nokukhumbula Ikhaya Enkonzweni KaThixo

UYESU KRISTU wayalela abalandeli bakhe wathi: “Hambani . . . niye kuzenza abafundi zonke iintlanga.” (Mateyu 28:19) KumaKristu amaninzi, ukwenza olo thumo kuye kwathetha ukwamkela iimeko ezinzima kude namakhaya awo. Abaveleli abahambahambayo, abafazi babo nabanye bashiye izinto ezininzi ngenxa yenkonzo kaThixo. Ukukhumbula ikhaya kunokuba lucelomngeni ngokwenene kuwo onke la maNgqina kaYehova.

Ukukhumbula ikhaya kubakho xa ukhumbula unqabiseko nothando lwexesha elimnandi elidlulileyo. Oku kunokubangela iimvakalelo ezinzulu kangangokuba uzive udandathekile uze ungakwazi ukuqhubeka. Eneneni, emva kokuba bethengise konke ababenako baza bathabatha uhambo olufuna imali eninzi oluya kwilizwe lasemzini, abathile baye baziyeka izinto abebezicebile baza babuyela emakhaya. Baye boyisakala kukukhumbula ikhaya.

Iimvakalelo ezinjalo ngokuqhelekileyo zibakho emva kokuba ubani eqala ukumka kowabo, kodwa kwabanye ziqhubeka ubomi babo bonke. Emva kokuba wayemke kangangeminyaka engaphezu kwama-20, uYakobi ‘walangazelela kakhulu indlu kayise.’ (Genesis 31:30) Ngoobani abanokulindela ukukhumbula ikhaya? Kubangelwa yintoni? Umntu unokuhlangabezana njani neemvakalelo ezinjalo?

Yintoni Ebangela Ukukhathazeka?

Ukukhumbula ikhaya kunokuchaphazela nabani na. UAmytis, intombi yokumkani wamaMedi uAstyages, kubonakala ukuba wayenazo zonke izizathu zokonwaba: ubutyebi, ukubaluleka, ikhaya elihle. Sekunjalo, wayezikhumbula kakhulu iintaba zelizwe lamaMedi kangangokuba umyeni wakhe, uKumkani uNebhukadenetsare, wenza imiyezo ejingayo yaseBhabhiloni ngelokuzama ukumthuthuzela.

Ukukhumbula ikhaya kunokuba luvavanyo ngokukhethekileyo xa ubomi bubonakala bunzima ngakumbi kunokuba babunjalo ngaphambi kokuba umntu afuduke. Xa abantu bakwaYuda babesekuthinjweni, bakhala besithi: “NgaseMilanjeni yaseBhabheli sahlala phantsi khona, salila, sakuyikhumbula iZiyon. Singathini na ukuvuma ingoma kaYehova emhlabeni wolunye uhlanga?”—INdumiso 137:1, 4.

Zininzi izinto ezisenokubangela ukudandatheka ngenxa yokukhumbula ikhaya. UTerri, owashiya iKhanada, uthi: “Ngenye imini kwawa umfanekiso wentsapho yakowethu encwadini. Xa ndandiwuchola, ndasuka ndakhumbula kakhulu ekhaya ndaza ndakhala kakhulu.” UChris, owafudukela kwilizwe elihlwempuzekileyo esuka eNgilani, uyavuma: “Ukuva uze uyazi ingoma owayigqibela kudala okanye ivumba elithozamisayo lokutya okuqhelekileyo kwakunokundenza ndinqwenele izinto endazishiya ngasemva.”—Thelekisa iNumeri 11:5.

Amaqhina asondeleleneyo entsapho ngokufuthi afak’ isandla. URoseli, ongummi waseBrazil ngoku ohlala kwilizwe elingummelwane, uthi: “Ndiyadakumba xa ndifumana iindaba ezimbi ezivela ekhaya ndibe ndingakwazi ukuya kunceda. Maxa wambi kuba kubi ngakumbi xa ndingafumani zindaba ndize ndiqalise ukuthelekelela izinto.” UJanice wafudukela kwidolophu encinane ekweleenjiko eAmazon esuka eMntla Merika. Uthi: “Ndiye ndikhumbule ekhaya xa ndisiva iindaba ezimnandi ezivela ekhaya. Ndiva indlela abonwabe ngayo kunye, ndize ndinqwenele ukuba ndingakunye nabo.”

Asikokushiya abantu nje kuphela okubangela ukuba ukhumbule ikhaya. ULinda uyacacisa: “Ndandikhathazeka xa ndingayazi indawo endingathenga kuyo izinto endizifunayo. Ndingawazi amaxabiso okanye indlela yokuthengisa. Ukuba nemoto kwakuxhome kakhulu ngexabiso, yaye ndandisoloko ndityhalwa njengoko ndandizama ukukhwela kwisithuthi sikawonke wonke. Oku kwakusuke kundenze ndikhumbule ekhaya.” Ethetha ngokwahluka kwezithethe nezoqoqosho, uJanet uphawula oku: “Ndandikhathazwa kukuhlwempuzeka. Ngaphambili ndandingazange ndibone abantu becela isonka, okanye iintsapho ezinkulu zihlala egumbini elinye kungekho manzi. . . . Izinto ezinjalo zazindikhathaza kakhulu kangangokuba ndandivakalelwa kukuba ndandingenakuqhubeka ndihlala apho.”

Ukuhlangabezana Neemvakalelo Zakho

Asifanele sibe nantloni ngokuba neemvakalelo ezibukhali ngabantu esibathandayo okanye ngeendawo esiziqhelileyo esakhulela kuzo. UYehova uThixo wasinika iimvakalelo ukuze sinandiphe ulwalamano olufudumeleyo lobuqu nabanye. Abaveleli abangamaKristu bebandla lase-Efese yayingamadoda aqolileyo ngokweemvakalelo. Kodwa kwenzeka ntoni xa umpostile uPawulos wayequkumbela utyelelo lwakhe apho? Kaloku, “basitsho ke isililo esikhulu bonke, bawa phezu kwentamo kaPawulos, bamanga kakhulu”! (IZenzo 20:37) Kakade ke, eso siganeko sasingabandakanyi ukukhumbula ikhaya. Sekunjalo, sisenza sibe nokuthile ezingqondweni. Yinto eqhelekileyo ukuba neemvakalelo, kodwa asimele sizivumele ukuba zisilawule. Ngoko ke, unokuhlangabezana njani ngokunempumelelo nokukhumbula ikhaya?

Ukufunda ukuthetha ulwimi lwasekuhlaleni ngundoqo ukuba uza kuziva usekhaya. Iimvakalelo zokukhumbula ikhaya zisenokuphakama xa unxibelelwano lunzima kuba kufuneka uhlangabezane nolwimi lwasemzini. Ngoko, ukuba kunokwenzeka funda ukulufunda nokuluthetha ulwimi lwaloo ndawo ngaphambi kokuba ufudukele kuyo. Kungenjalo, nikel’ ingqalelo kwizifundo zolo lwimi ebudeni beeveki zokuqala emva kokuba ufikile. Ngelo xesha uba nentshukumisa ebukhali yaye yeyona ndlela ilungileyo yokulufunda. Ukuba ngokuyintloko ezi veki uzinikela ekufundeni olo lwimi, kungekudala uya kukunandipha ukuncokola, yaye oko kunokukunceda uthomalalise iimvakalelo zokukhumbula ikhaya.

Zenzele abahlobo abatsha ngokukhawuleza kangangoko kunokwenzeka, kuba oku kuya kukunceda uzive usekhaya. Ibandla lamaNgqina kaYehova yeyona ndawo ilunge ngokwenene yokuzenzela abahlobo bokwenene. Yiba ngowokuqala ukuncokola nabanye uze ube nomdla kubo. Yenza umgudu wokwazi iimvelaphi zabo, iintsapho zabo, iingxaki abanazo nezinto abanomdla kuzo. Mema abo ukhonza nabo endlwini yakho. Ngenxa yoko, uya kufumanisa ukuba abanye baya kuba nomdla kuwe.

Phakathi kwabantu bakaThixo, ubuhlobo bunokusondelelana njengamaqhina entsapho. UYesu wathi: “Kuba othe wakwenza ukuthanda kukaThixo, lowo ngumzalwana wam, nodade wethu, noma.” (Marko 3:35) Kwakhona uKristu waqinisekisa abalandeli bakhe esithi: “Akukho namnye ushiye indlu, nokuba ngabazalwana, nokuba ngoodade, nokuba nguyise, nokuba ngunina, nokuba ngumfazi, nokuba ngabantwana, nokuba ngamasimi, ngenxa yam nangenxa yeendaba ezilungileyo ezi, ongayi kuthi amkeliswe kalikhulu: ngoku ngeli xesha, izindlu, nabazalwana, noodade, noonina, nabantwana, namasimi, ndawonye neentshutshiso; nakwelizayo iphakade, ubomi obungunaphakade.” (Marko 10:29, 30) Ngenxa yobo buzalwana bokomoya bumangalisa ngolo hlobo, asisedwa, kwanakwilizwe esiqalayo ukuba kulo.

Ukugcina ubuhlobo nabo ubashiye ekhaya kukwanokukunceda uhlangabezane nokukhumbula ikhaya. Usenokumangaliswa kukufumanisa ukuba ngoku ufudukileyo, unxibelelwano ngeeleta lunentsingiselo ekhethekileyo, ekubeni mhlawumbi uya kuwacingisisa nzulu amazwi oza kuwathetha. Uya kuba nezinto ezibangela umdla onokuzithetha. UJanet, okhankanywe ngaphambilana, ucebisa oku: “Ukutsalela umnxeba kwindawo ekude kubiza imali eninzi, kodwa ukuthumela ikhasethi erekhodiweyo ngeposi kunexabiso eliphantsi noko. Ukuthetha ematshinini kuvakala kuyinto engaqhelekanga ekuqaleni. Sekunjalo, ukuba uncokola nothile ngesandisi-lizwi esiphakathi kwenu, kulula yaye kubangel’ umdla.” Nawe usenokucela ukuphendulwa ngekhasethi erekhodiweyo.

UShirley, owafudukela kuMzantsi Merika esuka eUnited States kwiminyaka engama-25 edluleyo, uthi: “Ndisoloko ndibhala ngamava awakhayo kunokuba ndibhale ngeengxaki. Oku kuyabakhuthaza abanye ukuba baqhubeke bendibhalela.” Noko ke, lumka. Ukubhala kakhulu iileta kunokukubambezela ekuzenzeleni abahlobo abatsha. UDel owafudukela kwelinye ilizwe esuka eKhanada, uthi: “Kuphephe ukuhlala endlwini uze ucamngce ngezinto ezikulahlekeleyo. Kunoko, phuma uze unandiphe indawo entsha okuyo.”

Zama ukwazi amasiko, imbali, izinto ezihlekisayo kunye neendawo ezibangela umdla nezintle zelo lizwe uqalayo ukuba kulo. Oku kuya kukunceda ungahlali ucinga ngezinto ezingakhiyo. Yaye ukuba uzimisele ukuhlala kwindawo ofudukele kuyo, kulunge ngakumbi ukuba ungatyeleli ngokukhawuleza okanye ngokufuthi kwilizwe lakowenu. Kuthabatha ixesha ukwenza abahlobo abatsha nokuqhela iindawo ezintsha. Ukutyelela kakhulu ekhaya kuyayiphazamisa loo nkqubo. Wakuba uzinzile kwindawo entsha, unokukunandipha ukutyelela ekhaya—uphinde ubuye. Okweli thuba, zigcine uxakekile ekuziqhelaniseni nekhaya lakho elitsha.

Hlala Ukhangele Phambili

UYehova wasinika wonke umhlaba ukuba ube likhaya lethu. (INdumiso 115:16) Ngomoya ovuyisayo wobuKristu, ubomi bunokuba mnandi nakweliphi ilizwe. Ukuba ufuduke ngenjongo yokuhambisela phambili izilangazelelo zoBukumkani uze ushumayele iindaba ezilungileyo kwelinye ilizwe okanye kwenye indawo kwilizwe lakowenu, kwenze oko ngethemba elonwabisayo. Khangela phambili ekwenzeni abahlobo abatsha, ekufundeni ngamasiko ahlukeneyo, ekwenzeni abafundi, okanye ekwenzeni izinto ezinomvuzo enkonzweni kaThixo.

UYehova uThixo ngomnye uMhlobo oya kusoloko enawe, enokuba uphi na. (INdumiso 94:14; 145:14, 18) Ngoko sondela kuye ngomthandazo. (Roma 12:12) Oku kuya kukunceda uhlale uyikhumbula injongo yakho ebomini njengomkhonzi kaThixo. UAbraham noSara bahlala beyikhumbula injongo yabo xa bashiya ikhaya labo elitofo-tofo kwisixeko saseUre. Bethobela umyalelo kaYehova, bashiya abahlobo nezalamane zabo. (IZenzo 7:2-4) Ukuba babehleli bekhumbula yaye belangazelela loo ndawo babeyishiyile, ngebabelifumene ithuba lokubuyela. Kodwa babekhangele phambili kwindawo elunge ngakumbi—ubomi bokwenene kumhlaba oyiparadisi phantsi koBukumkani bukaThixo basezulwini.—Hebhere 11:15, 16.

Ukushumayela kwiindawo zasemzini okanye kwilizwe lakho apho imfuneko yabavakalisi boBukumkani inkulu khona kunokuba lucelomngeni ngokwenene. Kodwa kwakhona kungumsebenzi oneziqhamo nowona unomvuzo. (Yohane 15:8) Yaye ukuba ngamathub’ athile woyiswa ziingcinga ezingakhiyo, unokuzoyisa ngokuhlala ucinga ngosukelo lwakho uze ukhangele phambili. Udade ongatshatanga ongumvangeli wasemazweni wathi: “Xa ndiziva ndifikelwa ludandatheko, ndizama ukucinga ngelizwe elitsha nendlela lonke uluntu oluya kuba yintsapho enye ngayo.” Iingcinga ezonwabisayo ezifana nezi zinokukunceda ulondoloze uvuyo lwakho uze ungeyeli ekukhumbuleni ikhaya.

[Umfanekiso okwiphepha 29]

Ukukhumbula ikhaya akuyomfuneko ukuba kuphazamisane nobulungiseleli bamaKristu