Ngaba Unokuwelela EMakedoni?
UMPOSTILE UPAWULOS wabona umbono xa wayekwizibuko elikwisixeko saseTrowa eAsia Minor. Enye indoda yaseMakedoni yathi kuye: “Welela ngapha eMakedoni uze usincede.” Akubona lo mbono, uPawulos nabo wayehamba nabo ‘bazenzela isigqibo sokuba uThixo wayebabizele ukuvakalisa iindaba ezilungileyo’ kubantu baseMakedoni. Waba yintoni umphumo? ULidiya nentsapho yakhe ababehlala kwisixeko esikhulu saseMakedoni esibizwa ngokuba yiFilipi, baba ngamakholwa. Nabanye ababehlala kwelo phondo laseRoma elibizwa ngokuba yiMakedoni bazamkela iindaba ezilungileyo.—IZe. 16:9-15.
AmaNgqina kaYehova namhlanje anenzondelelo efanayo. Amaninzi aye afudukela kwimimandla ekufuneka abavakalisi boBukumkani abangakumbi kuyo yaye aye azihlawula ngokwawo iindleko zokufuduka. ULisa ngokomzekelo, wayefuna ukunikela ingqalelo engakumbi kubulungiseleli bakhe. Wafudukela eKenya esuka eKhanada. UTrevor noEmily baseKhanada baya eMalawi ngenjongo yokwandisa ubulungiseleli babo. UPaul noMaggie, abasuka eNgilani bajonga ixesha labo lomhlala-phantsi njengethuba elihle lokwandisa inkonzo yabo kuYehova yaye bafudukela eMpuma Afrika. Ngaba unawo umoya wokuzincama? Ngaba nawe unokufuduka? Ukuba kunjalo, yiyiphi imigaqo yeBhayibhile namacebiso anokukunceda?
Zihlole
Enye yezinto omele uzihlole, sisizathu sokuba ufune ukwenza oko. UYesu wathi owona mthetho mkhulu ngulo: “Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela.” Ngoko umntu ufanele aye kukhonza kwelinye ilizwe kuba ethanda uThixo yaye efuna ukuphumeza uthumo lokwenza abafundi. UYesu wongezelela wathi: “Owesibini, njengawo, ngulo, ‘Uze umthande ummelwane wakho njengawe siqu.’” Xa sibathanda abamelwane siya kuba nomnqweno wokubanceda. (Mat. 22:36-39; 28:19, 20) Ukuya kukhonza kwelinye ilizwe kudla ngokufuna umgudu omkhulu nomoya wokuzincama. Akufani nokuya ngenjongo yokubethwa ngumoya. Kufuneka uqhutywe luthando. URemco noSuzanne baseNetherlands abakhonza eNamibia, bakuchaza ngale ndlela oku, “Into ebangela ukuba sibe lapha, luthando.”
UWillie ongumveleli wesiphaluka eNamibia uthi: “Abantu abaye baqhubeka bekhonza kwamanye amazwe ngabantu abangazange bafike belindele ukunyanyekelwa ngabazalwana. Beza ngenjongo yokukhonza kunye nabazalwana abahlala kuloo mimandla ukuze bancedisane nabo kumsebenzi wokushumayela.”
Emva kokuba uzihlolile, zibuze: ‘Ngawaphi amava endinawo anokuba luncedo kwintsimi ekwelinye ilizwe? Ngaba ndingumlungiseleli ophumelelayo? Ziziphi iilwimi endikwaziyo ukuzithetha? Ngaba ndikulungele ukufunda olunye ulwimi?’ Thetha nentsapho yakho ngalo mbandela. Dibana nabadala bebandla lakho. Ungalibali ukuthandaza kuYehova. Ukuzihlola ngale ndlela kuya kukunceda ubone enoba unokukwazi kusini na ukukhonza kwintsimi ekwelinye ilizwe.—Funda ibhokisi ethi “Zazi.”
Indawo Onokukhonza Kuyo
Embonweni, uPawulos kwathiwa makawelele eMakedoni. Namhlanje, uYehova akasalathisi ngeendlela ezimangalisayo. Kunoko, abantu bakaThixo abafunda eli phephancwadi nezinye iincwadi baye babone imimandla emininzi ekufuneka abavakalisi kuyo. Ngoko ke, qala ngokwenza uludwe lwaloo mimandla. Ukuba akukulungelanga ukufunda olunye ulwimi okanye akuzimiselanga ukufudukela kwelinye ilizwe, mhlawumbi unokuya kwilizwe ekuthethwa ulwimi olwaziyo kulo. Zama ukuqonda ngendlela yokufumana amaphepha okundwendwela, iindlela zothutho ezisetyenziswa apho, ukhuseleko, iindleko zokuphila nemozulu. Kunokuba luncedo ukubuza abantu abasele bekhonza kwamanye amazwe. Thandaza ukuze ukwazi ukwenza isigqibo esifanelekileyo. Khumbula ukuba uPawulos namaqabane akhe “balelwa ngumoya oyingcwele ukulithetha ilizwi kuso isithili saseAsiya.” Nangona bazama ukuya eBhithiniya, “umoya kaYesu awubavumelanga” ukuba benjenjalo. Ngokufanayo, izinto zakho zisenokungalungi ngokukhawuleza.—IZe. 16:6-10.
Mhlawumbi sele ikho imimandla ocinga ukuba ungakwazi ukuya kukhonza kuyo. Ukuba ucinga ngokuya kukhonza kwelinye ilizwe, bhalela kwiofisi yesebe yamaNgqina kaYehova yelo lizwe ufuna ukuya kulo. Chaza amalungelo enkonzo oye wawaxhamla kwixa elidluleyo okanye owaxhamlayo ngoku uze ubuze nangezinye izinto ongathanda ukuzazi, njengeendleko zokuphila, iindawo zokuhlala, iindawo zonyango namathuba okufumana umsebenzi wempangelo. Emva koko dlulisela ileta yakho kwikomiti yenkonzo kwibandla okulo. Yona iza kubhala amagqabaza ayo ikuncome ize ithumele ileta yakho kwiofisi yesebe yelizwe ofuna ukuya kulo. Impendulo oya kuyifumana iya kukunceda ubone ukuba ungaluncedo phi na.
UWillie ekuthethwe ngaye ekuqaleni uthi: “Abantu abaphumelelayo ngabo badla ngokutyelela kwelo lizwe kuqala baze bakhangele iindawo abanokukwazi ukuhlala kuzo. Esinye isibini saphawula ukuba asinakukwazi ukuhlala emagqagaleni. Ngoko ke saya kuhlala kwidolophu encinane ekwakufuneka abavakalisi kuyo nalapho sasinokukwazi ukuhlala sonwabile.”
Iingxaki Onokujamelana Nazo
Ukufudukela kwindawo ongayaziyo ngokuqinisekileyo kusenokubangela iingxaki. ULisa ekuthethwe ngaye ekuqaleni uthi: “Into enzima kakhulu kukuziva ulilolo.” Uye wancedwa yintoni? Uhlala ekunye nabantu bebandla akhonza kulo. Uye wazama ukwazi amagama abo bonke abantu. Ukuze awazi, ufika kwangoko ezintlanganisweni aze aphinde ahlale ixesha elide ukuphuma kwazo ukuze ancokole nabazalwana noodade. ULisa usebenza nabanye entsimini, abamemele ekhayeni lakhe yaye ngenxa yoko uye wafumana abahlobo. Uthi: “Andizisoli. UYehova undisikelele kakhulu.”
Emva kokuba abantwana babo bekhulile, uPaul noMaggie balinikel’ umva ikhaya labo ababehleli kulo iminyaka engama-30. UPaul uthi: “Akuzange kube nzima ukunikisa ngezinto zethu. Eyona nto yayibuhlungu kukushiya intsapho yethu. Sasintywizisa kwinqwelo-moya. Kwakunokuba lula ukuvele sihle nomcinga. Kodwa sathembela ngoYehova. Enye into eyasincedayo kukuzenzela abahlobo.”
UGreg noCrystal baseKhanada bafudukela eNamibia kuba apho kusetyenziswa isiNgesi, ulwimi nabo abaluthethayo. Noko ke, baphawula ukuba kunokuba yingenelo ngakumbi ukufunda olunye lweelwimi zalapho. Bathi: “Maxa wambi sasiye sityhafe. Noko ke, emva kokufunda ulwimi lwalapho, satsho sabaqonda bhetele abantu balapho. Ukuhlala sikunye nabazalwana kwasinceda saqhela ukuhlala kule ndawo.”
Ukuthobeka nokuzincama kwaba bazalwana kunokubakhuthaza nabazalwana basekuhlaleni. UJenny ucinga ngeentsapho ezafudukela eIreland, indawo awakhulela kuyo. Uthi: “Babenobubele aba bazalwana. Babezele ukuza kukhonza, kungekhona ukukhonzwa. Babekhuthele yaye babehleli bonwabile kangangokuba nam ndaba nomdla kule nkonzo.” Ngoku uJenny kunye nomyeni wakhe bangabathunywa bevangeli eGambia.
Intsikelelo KaYehova ‘Iyatyebisa’
Alukhuthazo ngokwenene amava kaPawulos aseMakedoni! Emva kweminyaka emalunga neshumi wabhalela abazalwana baseFilipi wathi: “Ndisoloko ndimbulela uThixo wam ngalo lonke ixesha ndinikhumbula.”—Fil. 1:3.
UTrevor noEmily ababekhonza eMalawi ngaphambi kokuba baye kwiSikolo seBhayibhile seWatchtower saseGiliyadi, nabo bavakalelwa ngendlela efanayo. “Maxa wambi sasizibuza enoba senze ukhetho oluhle kusini na, kodwa sasonwabile. Sasondelelana ngakumbi yaye uYehova wasisikelela.” UGreg noCrystal ekuthethwe ngabo ngaphambili bathi: “Ayikho enye into ebesiya kukhetha ukuyenza.”
Kakade ke, asingabo bonke abantu abaya kukwazi ukuya kukhonza kwelinye ilizwe. Abanye banokufudukela kwindawo ekufuneka abavakalisi abangakumbi kuyo, kwakwilizwe labo. Kanti abanye banokuncedisa kumabandla akufuphi namakhaya abo. Eyona nto ibalulekileyo kukhonza uYehova ngomphefumlo uphela. (Kol. 3:23) Ngoko ke,la mazwi aphefumlelweyo aya kuzaliseka kuwe: “Intsikelelo kaYehova—yiyo etyebisayo, yaye akongezi ntlungu kuyo.”—IMize. 10:22.
[Ibhokisi/Umfanekiso okwiphepha 5]
Zazi
Ukuze ukwazi ukuzihlola enoba ungakwazi ukuya kukhonza kwelinye ilizwe kusini na, qwalasela le mibuzo ilandelayo ngokunyaniseka nangomthandazo. Inkcazelo ekwiiMboniselo zangaphambili inokukunceda.
• Ngaba ndiqolile ngokomoya?—“Amanyathelo Okufumana Ulonwabo” (Oktobha 15, 1997, iphepha 6)
• Ngaba ndingumlungiseleli ophumelelayo?—“Indlela Yokuphumelela Kubulungiseleli Bobuvulindlela” (Meyi 15, 1989, iphepha 21)
• Ngaba ndingakwazi ukuhlala kude nentsapho yam nabahlobo bam?—“Ukuhlangabezana Nokukhumbula Ikhaya Enkonzweni KaThixo” (Meyi 15, 1994, iphepha 28)
• Ngaba ndikulungele ukufunda olunye ulwimi?—“Ukukhonza Kwibandla Elisebenzisa Lwimi Lumbi” (Matshi 15, 2006, iphepha 17)
• Ngaba ndiza kuba nayo imali yokuzixhasa?—“Ngaba Unokukhonza Kwintsimi Yasemzini?” (Oktobha 15, 1999, iphepha 23)
[Umfanekiso okwiphepha 6]
Ukuthobeka nokuzincama kwaba bazalwana kunokubakhuthaza nabazalwana basekuhlaleni
[Umfanekiso okwiphepha 7]
Abona baphumelelayo ngabo beze ngenjongo yokukhonza