Abavakalisi BoBukumkani Bayabalisa
UThixo Akamkhethi Wabuso Bamntu
NGAPHEZU kweminyaka eli-1 900 eyadlulayo, umpostile uPetros wanikel’ ubungqina kwigosa lasemkhosini uKorneli, esithi: “Ndiyaqiqa okwenyaniso ukuba uThixo akamkhethi wabuso bamntu; kwiintlanga zonke, lowo umoyikayo, asebenze ubulungisa, wamkelekile kuye.” (IZenzo 10:34, 35) UKorneli wabonakalisa ukumoyika uThixo nokuthanda ubulungisa. Wabamkela ubungqina obabunikelwa nguPetros waza waba ngumKristu.
Lo mgaqo ufanayo usasebenza namhlanje—uThixo akamkhethi wabuso bamntu. Oku sikuphawula kumava avela eJamani. Ingxelo ithi:
“Kummandla webandla lethu, kukho izindlu ezihlala amajoni aseRashiya. Ngowe-1989, kungekudala emva kokudilika koDonga lwaseBerlin, abadala babuza enoba ukho na umvakalisi olwaziyo ulwimi lwaseRashiya. Abathile kuthi babelwazi, yaye saya kusebenza kulo mmandla, nto leyo eyaba mnandi ngokwenene. La alandelayo ngamanye amava amaninzi.
“Ndandihamba nomnye umvakalisi ongabhaptizwanga (obhaptiziweyo kodwa ngoku) xa sathetha nomphathi-mkhosi othile. Lo mphathi-mkhosi wakuphulaphula oko sasikuthetha waza wasimema ukuba sithethe namajoni akhe. Wathi amele eve ngoThixo nangeBhayibhile, ngoko senza amalungiselelo okubuyela.
“Sacela omnye udade othetha ulwimi lwaseRashiya ngokutyibilikayo ukuba ahambe nathi ukuze atolike. Kwindawo ahlanganela kuyo loo majoni kwezo zindlu zawo, samisa itafile enoncwadi ibe sakwazi ukuthetha namajoni angama-68 siphendula imibuzo yawo. Emva koko ngovuyo amkela iincwadi ezingama-35 kunye namaphephancwadi aphantse afikelele kwi-100. Njengoko sasihamba kuloo ndlu, ayeziziqhu exubusha ngolo ncwadi.
“Senza amalungiselelo okubuyela ngoJulayi 4, 1992. Ekufikeni kwethu nge-10:50 kusasa, umlindi owayekwisango lezo zindlu wasixelela ukuba amajoni ayesilindele. Ingqonyela yawo yasingenisa kwindlu ahlanganisana kuyo, ibe safumanisa ukuba elinye inenekazi, ngaphambili elalithabathe kuthi uncwadi ukwenzela ithala leencwadi, lalibhengeze ukuba siyeza ngokubeka iiplacard kwezo zindlu zamajoni. Abazalwana abathathu banikela iintetho ezimfutshane ngomsebenzi wethu ehlabathini lonke baza babonisa nesizathu sokuba sinokuyithemba iBhayibhile. Sandula ke samkela imibuzo yabaphulaphuli, sibaphendula ngeBhayibhile. Phakathi kwaloo mibuzo yayingulo, Ami phi amaNgqina kaYehova kumba wenkonzo yasemkhosini, yaye ngaba kukho nawaphi na kuwo angamajoni? Oku kwavulel’ ithuba laa mvakalisi ungabhaptizwanga wayendiphelekile kwixa elidluleyo ukuba acacise ngomsebenzi wakhe weminyaka engama-25 kumkhosi waseMpuma Jamani, iminyaka yakhe yokugqibela njengomphathi womkhosi womoya. Wabalisa indlela awafunda ngayo ngoThixo nangeBhayibhile nokuba ngoku wayefuna ukuba ngomnye wamaNgqina kaYehova. Loo majoni achukumiseka koko ayekuva. Kwisithuba semizuzu esixhenxe nje kuphela lonke olo ncwadi sasiluphethe lwalusezandleni zamajoni, ibe amaninzi ayefuna iiBhayibhile. Safumana iiBhayibhile zesiRashiya ezisixhenxe kwivenkile ethengisa iincwadi, ibe akuxabisa ukuzifumana. Kwakuvuyisa ngokwenene ukunika aba babelambile ngokomoya inkcazelo yeBhayibhile, ibe sithemba ukuba baya kuyisebenzisa.”
Ngokwenene, uThixo akamkhethi wabuso bamntu. NgeLizwi lakhe ubongoza abantu abaneentliziyo ezinyanisekileyo enoba bangoobani na yaye baphi na. Uyabamema ukuba bafunde ngaye noNyana wakhe, uYesu Kristu, yaye abaninzi abasuka kwiinkalo zonke zobomi benza oko.—Yohane 17:3.