Ibali Lobomi
Ukulindela UBukumkani ‘Obungeyiyo Inxalenye Yeli Hlabathi’
Kubalisa uNikolai Gutsulyak
Kangangeentsuku ezingama-41, nobusuku bazo ndazifumana ndiphakathi kwimvukelo eyayisentolongweni. Ngequbuliso ndavuswa sisithonga senkanunu ebuthongweni. Kuloo nkampu yentolongo kwagaleleka amajoni neenkanunu, ehlasela amabanjwa. Ubomi bam babuphakathi kwenyama nozipho.
NDANGENA njani kulo mbhodamo? Makhe ndikuchazele. Esi siganeko senzeka ngowe-1954. Ndandineminyaka engama-30 ubudala ngoko. Njengamanye amaNgqina kaYehova awayephila kwilizwe elalisakuba yiSoviet, ndandibanjelwe ukungabi nanxaxheba kwezopolitiko nokushumayela kwabanye ngoBukumkani bukaThixo. Kwelo qela lethu lamaNgqina awayebanjiwe sasingamadoda angama-46 namabhinqa angama-34. Sasivalelwe kwinkampu eyayikufuphi kwidolophana yaseKengir kumbindi weKazakhstan. Kuloo nkampu sasivalelwe namawaka amanye amabanjwa.
UJoseph Stalin, inkokeli yeSoviet Union, wayefe kunyaka ongaphambi kwalowo. Amabanjwa amaninzi ayenethemba lokuba urhulumente omtsha eMoscow wayeza kuziphulaphula izikhalazo zawo ngaloo meko yentolongo eyayingaginyisi mathe. Ekugqibeni izikhalazo zaloo mabanjwa zaphumela kwimvukelo. Ebudeni balo mbhodamo thina maNgqina kwafuneka sichazele abo bavukeli namagosa omkhosi ngokuma kwethu. Kwakufuneka sibe nokholo kuThixo ukuze sikwazi ukumela oko.
Imvukelo!
Ngomhla kaMeyi 16, kwaqaliswa imvukelo kuloo nkampu. Emva kweentsuku ezimbini, amabanjwa angaphezu kwama-3 200 akazange avume ukuya enkomeni, efuna kuphuculwe iimeko zentolongo aze amabanjwa ezopolitiko afumane amalungelo athile. Izinto zenzeka ngesiquphe. Okokuqala abavukeli bagxotha abalindi. Emva koko bavula izikroba kucingo olubiyele inkampu. Baqala ukudiliza udonga olwahlula izisele zamadoda kwezabafazi, ngenjongo yokuba amabanjwa ahlale kunye. Kwezo ntsuku zemigcobo, amanye amabanjwa ade atshata nokutshata, betshatiswa ngabefundisi ababengamabanjwa nabo. Kumacandelo amathathu entolongo apho wawusenzeka khona lo mbhodamo, inkoliso yamabanjwa angama-14 000 aba nenxaxheba kule mvukelo.
Abavukeli bamisela ikomiti eyayiza kuthethathethana namagosa omkhosi. Akuzange kube kudala, amalungu aloo komiti akabona ngasonye, yaza loo nkampu yawela ezandleni zoophuma-silwe. Kwakubonakala ukuba lingatsh’ ibhayi nangawuphi na umzuzu. Iinkokeli zabavukeli, zalungiselela isebe lokhuseleko, elomkhosi, nejelo losasazo ukuze agcine “ucwangco.” Zaba sele zisebenzisa izandisi-lizwi ezazixhonywe ezibondeni, ukuze ungethi umoya wemvukelo. Zathintela amanye amabanjwa ukuze angabaleki, zawohlwaya qatha angavumelaniyo nazo, zaza zasongela ngokubulala nabani na ezingamginyiyo. Kwakukho amarhe okuba kukho amabanjwa asele ebulewe.
Ekubeni abavukeli babelindele ukuhlaselwa ngumkhosi, benza amalungiselelo okuzikhusela. Ukuqinisekisa ukuba maninzi amabanjwa aza kukwazi ukukhusela loo nkampu, iinkokeli zayalela onke amabanjwa ukuba axhobe. Ukuze enjenjalo, amabanjwa azenzela izinkempe nezinye izixhobo ngeentsimbi zokuvala iifestile. Ade afumana imipu neziqhushumbisi.
AmaNgqina Ayanyanzelwa Ukuba Athelele
Ngelo xesha kanye, kweza abanye abavukeli ababini kum. Omnye wayephethe isinkempe esigqityw’ ukulolwa. Wathi: “Ina nasi esakho! Kuza kufuneka uzikhusele ngaso.” Ndathandazela ngaphakathi ndacela uYehova ukuba andincede ndizole. Ndathi: “NdingumKristu, iNgqina likaYehova. Mna namanye amaNgqina sivalelwe kule ntolongo ngenxa yokuba asilwi nabantu kodwa silwa nemimoya engabonakaliyo. Ezethu izixhobo lukholo nethemba esinalo kuBukumkani bukaThixo.”—Efese 6:12.
Ndothuka, xa le ndoda inqwala isithi iyaqonda. Noko ke, enye yandibetha kabuhlungu. Emva koko emka. Abavukeli bagqogqa izisele bezama ukunyanzela amaNgqina ukuba abathelele. Kodwa bonke abazalwana noodade bakhaba ngawo omane.
Ukungabi nanxaxheba kwamaNgqina kaYehova kwaxutyushwa kwintlanganiso yekomiti yabavukeli. Bathi onke “amarhamente ezinye iinkonzo—amaPentekoste, iSabatha, amaBhaptizi, nezinye inkonzo—anenxaxheba kule mvukelo. NgamaNgqina kaYehova kuphela angakhange abe nanxaxheba. Senze ntoni ngawo?” Elinye lacebisa ukuba kufakwe iNgqina libe linye esitovini ukuze oyike. Kodwa elinye ibanjwa elalihlonelwa ngamanye amabanjwa nelalisakufudula liligosa lomkhosi, laphakama lathi: “Asibobulumko obo. Kufuneka siwavalele ndawonye kanye apho iphela khona le nkampu, ngasesangweni. Uya kuthi ke, ukuba umkhosi usihlasela ngeenkanunu, amaNgqina afe kuqala. Asiyi kubekek’ ityala ngokufa kwawo.” Nabanye balamkela icebiso lakhe.
Ubomi Busemngciphekweni
Akuzange kube kudala, amabanjwa ajikeleza inkampu ekhwaza esithi, “AmaNgqina kaYehova, makaphume!” Asisa sonke, ama-80 kwisisele esisekupheleni kwenkampu. Bakhuphela ngaphandle iibhedi ukuze singene sibaninzi baza basiyalela ukuba singene. Eso sisele saba yintolongo yethu kwalapho entolongweni.
Ukuze bakwazi ukuzonwaya, oodade badibanisa amashiti, baza basahlula phakathi isisele sangamagumbi amabini—elinye yalelamadoda elinye ilelamabhinqa. (Kamva, omnye umzalwana eRashiya wasizoba esi sisele, loo mfanekiso uboniswe apha ngezantsi.) Ngoxa sasihlala kweso sisele sixineneyo, sasidla ngokuthandaza kunye, sibongoza uYehova ukuba asinike ubulumko ‘namandla angaphaya koko kuqhelekileyo.’—2 Korinte 4:7.
Lonke elo xesha, ubomi bethu babusemngciphekweni kuba sasiphakathi kwabavukeli nomkhosi. Akakho owayesazi ukuba omabini loo macala acinga ntoni na. Omnye umzalwana owayesele ekhulile wasibongoza wathi: “Musani ukuqashela. UYehova soze asilahle.”
Oodadewethu abangamaKristu—abaselula nabadala—banyamezela ngendlela ekhethekileyo. Omnye wayeneminyaka emalunga nama-80 ubudala efuna ukuthantanyiswa. Abanye babegula befuna unyango. Lonke ixesha, kwakufuneka iingcango zivuleke genge ukuze sihlale sisemehlweni abavukeli. Ebusuku, amabanjwa axhobileyo ayesiza esiseleni zethu. Maxa wambi sasidla ngokuweva esithi, “UBukumkani bukaThixo bulele.” Emini, xa siye kutya eholweni, sasihlala kunye sithandazele ukuba uYehova asikhusele kula madoda anogonyamelo.
Esiseleni, sasizama ukomelezana ngokomoya. Ngokomzekelo, umzalwana wayedla ngokubalisa ibali elithile eliseBhayibhileni, athethele phezulu ukuze sive sonke. Emva koko wayebonisa ukuba isebenza njani lo ngxelo kwimeko yethu. Omnye umzalwana owayesele ekhulile wayekuthanda kakhulu ukubalisa ngomkhosi kaGidiyon. Wayedla ngokuqukumbela ngamazwi athi: “Egameni likaYehova, amadoda angama-300 anezixhobo zomculo kuphela alwa namajoni ali-135 000 axhobileyo. Onke loo ma-300 abuya engenawo nomkrwelo.” (ABagwebi 7:16, 22; 8:10) Lo mzekelo neminye eseBhayibhileni yayisomeleza ngokomoya. Ndandisandula ukuba liNgqina, kodwa ukubona ukholo olomeleleyo lwabazalwana noodade abanamava kwandikhuthaza kakhulu. Ndandivakalelwa kukuba uYehova unathi ngokwenene.
Idabi Liyaqala
Kwaqengqeleka iiveki, kwabe kukhula nokujongana ngezikhondo zamehlo. Uthethathethwano phakathi kwabavukeli nabasemagunyeni aluzange lube naziqhamo. Iinkokeli zabavukeli zema kwelokuba urhulumente umele athumele ummeli wakhe aze kuthetha nabo. Abasemagunyeni banyanzelisa ukuba abavukeli banikezele, babeke phantsi nezixhobo zabo, ukuze babuyele emsebenzini. Kuwo omabini la macala kwakungekho ligob’ uphondo. Kulapho ke loo nkampu yangqongwa ngumkhosi wamajoni, ulindele nje umyalelo wokuhlasela. Nabavukeli babelungele ukulwa, bexhobe bef’ amacala. Wonk’ ubani wayelindele ukuba zinqoze phakathi kwamajoni nabavukeli nangawuphi na umzuzu.
NgoJuni 26, savuswa sisithonga senkanunu. Iinkanunu zatyhoboza ecingweni zangena zimbonzeleka enkampini. Zazilandelwa ngamajoni ahamba ngeenyawo edubula ngeengadla-ngadla zemipu. Amabanjwa—amadoda nabafazi—akazange aphozise maseko akhawulela ezo nkanunu, ekhwaza esithi, “Kubo-o-o!” egibisela ngamatye, ngoozenzele beziqhushumbisi nangayo nantoni na ekufutshane. Kwathi kant’ isukile, ibe thina maNgqina sasiphakathi emsini. Wayeza kuyiphendula njani uYehova imithandazo yethu?
Ngequbuliso, amajoni angena kwisisele esasivalelwe kuso. Akhwaza athi “Phumani apha, nina bangcwele! Phumelani ngaphaya kocingo!” Igosa elaliphethe loo mkhosi lawayalela ukuba angasidubuli kunoko ahlale nathi ukuze asikhusele. Njengoko laliqhubeka idabi, sahlala phantsi engceni ngaphandle kwenkampu. Kangangeeyure ezine kwakuvakala izithonga zokudubula kweziqhushumbisi, zemipu, izikhalo neencwina zabantu ngaphakathi enkampini. Emva kwexesha, kwathi cwaka. Xa kuthi qheke ukusa, sabona amajoni ethwele izidumbu zabafileyo bezikhuphela ngaphandle kwenkampu. Seva ukuba kungxwelerheke amakhulu abantu abanye bafa.
Emva kwemini, igosa endandilazi leza kuthi. Labuza ngokukhulu ukuzingca, “Nikolai, nisindiswe ngubani? Nisindiswe sithi okanye nguYehova?” Sambulela ngokunyanisekileyo ngokusindisa ubomi bethu, saza soleka sathi, “Sikholelwa ukuba uYehova, uThixo usomandla, usebenzise wena ukuze usisindise, njengokuba wasebenzisa nabanye ukhusela abakhonzi bakhe nakumaxesha okubhalwa kweBhayibhile.”—Ezra 1:1, 2.
Elo gosa lasichazela nendlela amajoni asazi ngayo ukuba singoobani nalapho besivalelwe khona. Lathi xa umkhosi ubuthethathethana nabavukeli, umkhosi watyhola abavukeli ngokubulala amabanjwa angabaxhasiyo. Bezithethelela abavukeli bathi, amaNgqina kaYehova akazange abe nanxaxheba kwimvukelo kodwa abawabulalanga. Kunoko, aye ohlwaywa ngokuvalelwa kwisisele esinye. Amagosa omkhosi akubhala edolweni oko.
Sabumela Ngokuqinileyo UBukumkani
Kwincwadi yakhe ethi The Gulag Archipelago, umbhali owaziwaya waseRashiya uAleksandr Solzhenitsyn uyathetha ngaloo mvukelo. Ngesi siganeko, uthi le mvukelo yabangelwa kukuba “sifuna inkululeko, . . . kodwa ngubani oya kusinika?” Nathi njengamaNgqina kaYehova awayevalelwe entolongweni, sasiyifuna inkululeko. Noko ke, sasingafuni ukukhululeka entolongweni nje kuphela kodwa sasifuna inkululeko enokuziswa buBukumkani bukaThixo kuphela. Entolongweni sasisazi ukuba sifuna amandla avela kuThixo ukuze sime kwicala loBukumkani bakhe. Kwaye uYehova wasinika yonke into esasiyifuna. Wasinika uloyiso ngaphandle kokusebenzisa izigalo.—2 Korinte 10:3.
UYesu Kristu waxelela uPilato oku: “Ubukumkani bam abuyonxalenye yeli hlabathi. Ukuba ubukumkani bam bebuyinxalenye yeli hlabathi, abalindi bam bebeya kulwa.” (Yohane 18:36) Njengabalandeli bakaKristu, nathi asinanxaxheba kwezopolitiko. Yasonwabisa gqitha into yokuba ngexesha lemvukelo nasemva kwayo, ukunyaniseka kwethu kuBukumkani bukaThixo kwakubonakala nakwabanye. Mayela nendlela esasiziphethe ngayo ngelo xesha, uSolzhenitsyn wabhala wathi: “AmaNgqina kaYehova abambelela ngokungqongqo kwimithetho yonqulo lwawo akavuma ukwakha iinqaba zokuzikhusela okanye abe ngabalindi.”
Sele kudlule iminyaka engama-50 ukususela ngeloo xesha. Xa ndikhangele ngasemva kulo maxesha ndiba nombulelo kuba ndafunda izinto ezibalulekileyo, ezinjengokulindela kuYehova nokuthembela kumandla akhe ngokupheleleyo. Ewe, njengamanye amaNgqina athandekayo kwelo lalisakuba yiSoviet Union, ndiye ndafumanisa ukuba uYehova uyakhulula ngokwenene, uyabakhusela aze abahlangule abo balindele uBukumkani ‘obungeyonxalenye yeli hlabathi.’
[Imifanekiso ekwiphepha 8, 9]
Intolongo yaseKazakhstan esasivalelwe kuyo
[Umfanekiso okwiphepha 10]
Umzobo wesisele samaNgqina, wecandelo lamabhinqa
[Umfanekiso okwiphepha 11]
Sikunye nabazalwana bethu ngemini yokukhululwa kwethu