Indlela Olwandinceda Ngayo Ukholo Lwam Ndakwazi Ukuhlangabezana Neentlekele

Kubalisa uSoledad Castillo

Izihlandlo ezibini ebomini bam ndaphantse ndalilolo. Umyeni wam endimthandayo wafa xa ndandineminyaka engama-34 ubudala. Emva kweminyaka emithandathu notata wafa. Kwiinyanga ezisibhozo emva kokufa kukatata, ndafumanisa ukuba unyana wam unesifo esinganyangekiyo.

IGAMA lam ndinguSoledad, yaye lithetha “ukuba lilolo.” Nangona oku kusenokubonakala kungumnqa, andizange ndide ndizive ndililolo. Xa ndandisehlelwa zezi ntlekele, uYehova uThixo wayesiba nam, ‘andibambe ngesandla sakhe sasekunene ukuze ndingoyiki.’ (Isaya 41:13) Makhe ndikubalisele ngendlela endaphumelela ngayo kwezi ntlekele nendlela endasondela ngayo kuYehova.

Ubomi Obumnandi Obuneengxaki Ezingephi

Ndazalelwa eBarcelona, eSpeyin, ngoMeyi 3, 1961, yaye yayindim kuphela umntwana ababenaye abazali bam, uJosé noSoledad. Xa ndandineminyaka esithoba ubudala, umama wafunda inyaniso yeLizwi likaThixo. Wayefuna iimpendulo kwimibuzo ephathelele unqulo, kodwa ayizange ikwazi ukumphendula icawa yakhe. Ngenye imini watyelelwa ngamaNgqina kaYehova amabini yaye ayiphendula yonke loo mibuzo wayenayo ngokusuka kwiZibhalo. Wasamkela ngoko nangoko isifundo seBhayibhile.

Kwixesha elingephi umama waba liNgqina likaYehova elibhaptiziweyo, yaye kwiminyaka embalwa kamva notata waba liNgqina. UEliana, owayeqhubela umama isifundo, waphawula ukuba nam ndinomdla kwiLizwi likaThixo. Nangona ndandiselula kakhulu, uEliana wathi uza kundiqhubela esam isifundo. Ndibamba ngazibini ngokundinceda kwakhe nangokhuthazo lukamama, ndabhaptizwa xa ndandineminyaka eli-13 ubudala.

Xa ndandikwishumi elivisayo ndandisoloko ndithandaza kuYehova—ingakumbi xa kufuneka ndenze izigqibo. Zazimbalwa kakhulu iingxaki endandinazo xa ndandifikisa. Ebandleni ndandinabahlobo abaninzi, yaye ndandisondelelene kakhulu nabazali bam. Ngowe-1982 ndatshata noFelipe owayenosukelo olufanayo nolwam.

Ukukhulisa Umntwana Wethu Ukuba Athande UYehova

Emva kweminyaka emihlanu ndazala inkwenkwe entle esayithiya igama elinguSaul. Mna noFelipe savuya kakhulu sakufumana lo mntwana. Sasinethemba lokuba uSaul wayeza kukhula esempilweni yaye ethanda uThixo. Mna noFelipe sasisoloko sikunye noSaul, sithetha naye ngoYehova, sisitya sonke, siye naye epakini, yaye sidlala kunye naye. UFelipe wayethanda ukuhamba noSaul xa esiya kushumayela, emfundisa ukunkqonkqoza nokuhambisela abantu amaphecana.

USaul wasabela kakuhle kuthando noqeqesho lwethu. Xa wayeneminyaka emithandathu ubudala, sasisoloko sihamba naye xa sisiya entsimini. Wayethanda ukuphulaphula amabali eBhayibhile, yaye wayesoloko ekhangele phambili kwisifundo seBhayibhile sentsapho. Ngokukhawuleza emva kokuba eqalise isikolo, wayekwazi ukwenza izigqibo ezincinane esebenzisa ulwazi lweBhayibhile awayenalo.

Noko ke, xa uSaul wayeneminyaka esixhenxe ubudala, ubomi bentsapho yethu batshintsha ngesiquphe. UFelipe waba nesifo semiphunga. Esi sifo samhlupha kangangeenyanga ezili-11, engasebenzi yaye elele ebhedini. Xa waneminyaka eli-36 ubudala, umyeni wam wafa.

Zisehla iinyembezi nanamhlanje xa ndicinga ngaloo nyaka. Ndandibukele nje ndingenanto ndinokuyenza njengoko umyeni wam wayesiya esiba buthathaka. Ndandisoloko ndimkhuthaza nangona ndandibona ukuba ubomi bentsapho endandibucebile namathemba endandinawo ayefadalala. Ndandimfundela uncwadi olusekelwe kwiZibhalo, yaye lwalusomeleza ekubeni sasingakwazi ukuya kwiintlanganiso zamaKristu. Ekufeni kwakhe, ndaziva ndingento yanto.

Sekunjalo, uYehova wandomeleza. Ndandisoloko ndimbongoza ukuba andiphe umoya wakhe. Ndandimbulela ngeminyaka emyoli endayiphila noFelipe nangethemba endandinalo lokuba ndandiza kumbona kwakhona eluvukweni. Ndamcela ukuba andenze zindonwabise izinto ezintle endandizenza nomyeni wam nokuba andiphe ubulumko bokuba ndikwazi ukukhulisa umntwana wethu abe ngumKristu wokwenene. Nangona intliziyo yayilihlwili, kodwa ndathuthuzeleka.

Abazali bam kunye nebandla bandixhasa. Sekunjalo, kwakufuneka ndiqiniseke ukuba ndifunda iBhayibhile noSaul yaye ndimfundisa indlela yokukhonza uYehova. Umqeshi wam wangaphambili wandinika umsebenzi waseofisini, kodwa ndakhetha umsebenzi wokucoca ukuze ndibekho xa uSaul ebuya esikolweni yaye ndibe nexesha elaneleyo naye.

Esinye isibhalo sabethelela ukubaluleka kokuba ndifundise uSaul iindlela zikaYehova: “Yiqeqeshe inkwenkwe ngokwendlela yayo; naxa indala ayisayi kuphambuka kuyo.” (IMizekeliso 22:6) Esi sibhalo sandinika ithemba lokuba, ukuba ndenza konke okusemandleni am ndifundise uSaul iindlela zikaYehova, uya kundisikelela. Enyanisweni kwakufuneka ndincame izinto ezithile ukuze ndibe nexesha elaneleyo nonyana wam, yaye oku kwakubaluleke ngaphezu kwezinto eziphathekayo.

Xa uSaul wayeneminyaka eli-14 ubudala, utata wafa. USaul waxheleka emphefumlweni, kuba ukufa kukayisemkhulu kwavuselela intlungu yokufa kukayise. Utata wamisela umzekelo omhle wokuthanda uYehova. Emva kokufelwa nguyisemkhulu, uSaul waqonda ukuba wayekuphela “kwendoda” eyayikho entsatsheni, ngoko kwakuza kufuneka anyamekele unina noninakhulu.

Ukugula Yileukemia

Emva kweenyanga ezisibhozo efile utata, ugqirha wethu wathi uSaul mandimse esibhedlele kuba wayedinwa ngokugqithiseleyo. Emva kokumxilonga izihlandlo eziliqela, oogqirha bandixelela ukuba uneleukemia.a

Kwiminyaka emibini enesiqingatha elandelayo uSaul wayephum’ engena esibhedlele enyangwa ngoogqirha. Ichemotherapy eyenziwa iinyanga ezintandathu zokuqala yamnika umnyinyiva weenyanga ezili-18. Kodwa umhlaza waphinda wabuya, yaye kwenziwa enye ichemotherapy eyamshiya ebuthathaka gqitha. Waphinda wafumana umnyinyiva ongephi, kodwa kwisihlandlo sesithathu akazange akwazi ukumelana nechemotherapy. USaul wahlulela ubomi bakhe kuThixo yaye wayefuna ukubhaptizwa njengeNgqina likaYehova, kodwa wasutywa kukufa emva nje kokuba egqibe iminyaka eli-17.

Oogqirha babedla ngokukhuthaza ukuba atofelwe igazi ngenxa yolu hlobo lonyango. Kakade ke, utofelo-gazi alunakusinyanga esi sifo. Xa oogqirha bafumanisa ukuba uSaul uneleukemia, sabachazela ukuba asizukulwamkela olu hlobo lonyango, kuba sifuna ukuthobela umthetho kaYehova ‘wokuzikhwebula egazini.’ (IZenzo 15:19, 20) Izihlandlo ezininzi xa ndingekho, uSaul kwakufuneka achazele oogqirha ukuba esi sisigqibo sakhe. (Funda ibhokisi ekwiphepha 31.)

Ekugqibeleni oogqirha bafikelela kwisigqibo sokuba ekubeni uSaul wayengumntwana oqolileyo, wayeyazi ngokupheleleyo into eyayinokwenziwa sesi sifo kuye. Ngoko basihlonela isigqibo sethu baza bamnyanga ngaphandle kwegazi, nangona babesoloko befuna sitshintshe izigqibo. Ndaziva ndinelunda ngoSaul xa wayechazela oogqirha ngesigqibo sakhe sokungafuni ukutofelwa igazi. Kucacile ukuba wayenolwalamano olusondeleyo noYehova.

Sathi xa sasisandul’ ukufumanisa ukuba uSaul unesi sifo, kwindibano yesithili eyayiseBarcelona kwakhululwa incwadi enomxholo othi Sondela KuYehova. Loo ncwadi yaba luncedo kakhulu njengoko sasijongene nekamva elimfiliba. Kwezo yure sasizichitha kunye esibhedlele sasifunda inxalenye ethile yayo. Kumaxesha anzima esatyhubela kuwo emva koko, sasidla ngokukhumbula izicatshulwa zayo. Ngelo xesha intshayelelo yale ncwadi esekelwe kuIsaya 41:13 yaba nentsingiselo ekhethekileyo kuthi. Ithi: “Mna, Yehova uThixo wakho, ndibamba isandla sakho sasekunene, ndithi kuwe, ‘Musa ukoyika. Mna ngokwam ndiza kukunceda.’”

Ukholo LukaSaul Lwabachukumisa Abanye

Ukuqola nethemba awayenalo uSaul kwabachukumisa oogqirha nabongikazi beSibhedlele saseVall d’Hebrón. Bonke abo babemnyamekela babemthanda ngokwenene. Ukususela ngoko ugqirha ophetheyo osebenza ngegazi nonyanga izigulana ezinomhlaza uye wanyanga abanye abantwana bamaNgqina abaneleukemia, yaye ubahlonela ngokwenene. Ukhumbula isigqibo sikaSaul esingagungqiyo sokungahexi kwiinkolelo zakhe, inkalipho awayenayo nangona wayeza kufa, nendlela awayonwabe ngayo. Abongikazi bamxelela ukuba sesona sigulana singakhathaziyo kwezakha zongiwa kwelo gumbi wayelele kulo. Bathi akazange akhalaze yaye wayesoloko enoburharha—nangona wayeza kufa.

Esinye isazi ngengqondo sandixelela ukuba abantwana abaninzi abangangaye abagulel’ ukufa badla ngokuvukela oogqirha nabazali ngenxa yokuba bengonwabanga yaye bexinezelekile. Sithi kodwa uSaul wayengenjalo. Kwakusimangalisa ukubona uSaul ezole kangaka. Oku kwasinika ithuba lokuba sisixelele ngokholo lwethu.

Kwakhona ndikhumbula indlela uSaul awalinceda ngayo elinye iNgqina elisebandleni lethu. Lalidandathekile iminyaka emithandathu yaye amayeza ayengalincedi. Izihlandlo ezininzi lalinyamekela uSaul esibhedlele ubusuku bonke. Lithi lachukunyiswa kakhulu sisimo sengqondo sikaSaul nakubeni wayeneleukemia. Laphawula ukuba nangona wayesoloko ediniwe, kodwa wayezama ukukhuthaza wonke umntu omtyelelayo. Eli Ngqina lithi: “Umzekelo kaSaul wandikhuthazela ukuba ndilwe nokudandatheka.”

Sekudlule iminyaka emithathu uSaul wafayo. Ndisebuhlungu nangoku. Andomelelanga, kodwa uThixo undinike “amandla angaphaya koko kuqhelekileyo.” (2 Korinte 4:7) Ndiye ndafunda ukuba nezona zinto zinzima zinokuba nemiphumo emihle. Indlela endiye ndahlangabezana ngayo nokufa komyeni wam, utata, nonyana wam iye yandinceda ndabaqonda ngakumbi abantu ababandezelekileyo. Ngaphezu kwako konke, iye yandisondeza ngakumbi kuYehova. Ndinokukhangela kwikamva ngaphandle kokoyika kuba uBawo wam wasemazulwini usandinceda. Usandibamba ngesandla sakhe.

[Umbhalo osemazantsi]

[Ibhokisi/Umfanekiso okwiphepha 31]

NGABA WAKHA WAZIBUZA?

Kusenokwenzeka ukuba wakha weva ukuba amaNgqina kaYehova akalamkeli igazi. Ngaba wakha wazibuza isizathu?

Esi sigqibo sisekelwe eZibhalweni sidla ngokungaqondwa. Maxa wambi abantu bacinga ukuba amaNgqina kaYehova awafuni ukunyangwa okanye awabuxabisi ubomi. Le asiyonyaniso. AmaNgqina kaYehova azifunela olona nyango lukumgangatho ophezulu iintsapho zawo. Sekunjalo, afuna ukunyangwa ngaphandle kwegazi. Ngoba?

Esi sigqibo sisekelwe kumthetho osisiseko uThixo awawunika uluntu. Emva koMkhukula kaNowa, uThixo wanika uNowa nentsapho yakhe imvume yokutya inyama yezilwanyana. Wayinika lo myalelo: Yayingamele ilitye igazi. (Genesis 9:3, 4) Ekubeni bonke abantu bevela kuNowa, lo mthetho usebenza kubo bonke. Awuzange ubhangiswe. Emva kweenkulungwane ezisibhozo, uThixo wawuphinda kuhlanga lwakwaSirayeli, esithi igazi lingcwele, lingumphefumlo okanye ubomi. (Levitikus 17:14) Kwiminyaka engaphezu kwe-1 500 kamva, abapostile abangamaKristu bayalela onke amaKristu ukuba ‘azikhwebule egazini.’—IZenzo 15:29.

Ukuba amaNgqina kaYehova ayalitofela igazi, aya kuba akakhwebukanga kulo. Ngenxa yoko akhetha ezinye iindlela zonyango. Ngenxa yesi sigqibo sawo sisekelwe eZibhalweni, adla ngokufumana unyango olusemagqabini. Ngokuqinisekileyo seso sizathu esibangela ukuba nabanye abantu abangengawo amaNgqina kaYehova bacele ukunyangwa ngaphandle kwegazi.

[Umfanekiso okwiphepha 29]

Ndikunye nomyeni wam uFelipe nonyana wethu uSaul

[Umfanekiso okwiphepha 29]

Abazali bam uJosé and Soledad

[Umfanekiso okwiphepha 30]

USaul kwisithuba esingangenyanga ngaphambi kokuba afe