Ileta Evela KwiRiphabliki YaseDominican
“Andizange Ndithandwe Kangaka”
UNIURKA ebenikela intetho yakhe yokuqala ebandleni lethu kule veki. Uye walungiselela ngokubhala ngeBraille yonke into ebeza kuyithetha waza wayinkqaya. Ebeyinikela kunye nam le ntetho ndingumntu ofuna ukufunda iinyaniso zeBhayibhile. Umboko wesandisi-lizwi ubuxokonyezelelwe kwizixhobo zokuphulaphula ebezisezindlebeni zakhe ukuze andive. Emva kwalo ntetho abaphulaphuli batsho ngentswahla yezandla kangangokuba naye wayiva. Uncumo lwakhe lwalubonisa ulwaneliseko awayenalo. Nam ndandonwabile. Hayi indlela okuyintsikelelo ngayo ukuba ngumvangeli wasemazweni!
Andinakuze ndisilibale isihlandlo sokuqala endadibana ngaso noNiurka. Kwakuyiminyaka emibini edluleyo. Kwakusemva kokuhamba isiqingatha seyure kwiindlela zomhlaba zasemaphandleni. Wayehleli ngaphandle kwindlu ekumgangatho ophantsi—eyenziwe ngezinti yaza yafulelwa ngezinki eligqolileyo. Lalibophile ivumba leebhokhwe, imivundla nezinja yaye zixokozela. UNiurka wayethe nxokotho ebonakala edimazekile yaye enomvandedwa. Ekubeni wayeneminyaka engama-34 ubudala wayekhangeleka emdala kunoko.
Ndamchukumisa egxalabeni yaye wasijonga ngamehlo awayengasaboni kangangeminyaka eli-11. Ndithethela phezu endlebeni yakhe ndazazisa mna nomnye endandihamba naye. Kamva safumanisa ukuba uNiurka wayenesifo esibizwa ngokuba yiMarfan syndrome, isifo esibangelwa yimfuza. UNiurka wayenesifo seswekile esasifuna ukuba awuphaphele umlinganiselo weswekile esegazini lakhe.
Wayazi iBhayibhile ndakumnika yona yaye wathi wayekuthanda ukuyifunda esabona. Ndandiza kumfundisa njani lo mntu ulilolo, uthobekileyo nobuthathaka iinyaniso ezihlaziyayo zeLizwi likaThixo? Kuba wayebazi oonobumba ndenza oonobumba beplastiki ndaza ndababeka ezandleni zakhe. Akuzange kuthabathe ixesha elide waqhelana nabo. Kamva emva kokuchukumisa iizandla zam, wanxulumanisa unobumba ngamnye neNtetho Yezandla YaseMerika. Ngokuthe ngcembe, wafunda intetho yezandla. Nam ndandisandul’ ukufunda olu lwimi ngoko ukulungiselela isifundo kwakuthabatha ixesha elide. Noko ke, sobabini sasinomdla ngenxa yoko sakhawuleza sayifunda intetho yezandla.
Eyona nto eyakhawulezisa inkqubela kaNiurka kuxa umbutho wamalizo wampha isixhobo sokuphulaphula. Nakuba sasingekho mgangathweni samnceda kakhulu. Emva kweminyaka elishumi engeva engaboni wayelilolo. Kodwa umoya kaYehova wachukumisa ingqondo nentliziyo yakhe yaye waba nolwazi, ithemba nothando. Kungentsuku zingephi uNiurka wabelana nabamelwane bakhe ngeendaba ezilungileyo ehamba esimelela.
UNiurka uqhuba isifunda seBhayibhile nomakazi wakhe nookanina bakhe ababini. Ulungiselela kakuhle yaye unkqaya isifundo ngasinye kusengaphambili. Izifundo zakhe zifunda isiqendu yena afunde umbuzo kwincwadi yakhe yeBraille. Umntu ohamba naye umxelela impendulo esondele endlebeni yakhe okanye asebenzise intetho yezandla esandleni sakhe.
Uncedwa libandla yaye lisoloko limkhuthaza. Abazalwana bebandla bayamnceda ukuba aye kwiintlanganiso zebandla nasezindibanweni. Abanye bahamba naye entsimini. UNiurka usandul’ ukuthi kum: “Andizange ndithandwe kangaka.” Unethemba lokuba uza kubhaptizwa kwindibano yethu elandelayo yesithili.
Xa sisiya apho uNiurka ahlala khona simbona ehleli ngasendlwini egcakamele ilanga enoncumo lukaBlankethi. Ndikhe ndimbuze ukuba uncumele ntoni kangaka. Uthi: “Bendicinga ngexesha elizayo xa umhlaba uza kube uyiparadesi. Yaye bendinomfanekiso-ngqondweni wam ndilapho.”
[Umfanekiso okwiphepha 25]
UNiurka nabanye abazalwana noodade basebandleni bemi ngaphambi kweHolo YoBukumkani
[Umfanekiso okwiphepha 25]
UNiurka ushumayela kwabanye ngezinto azifundileyo