Abavakalisi BoBukumkani Bayabalisa
“Isikhumbuzo Somoya Wentsebenziswano”
KUFUTSHANE kwincam yomzantsi weSpeyin kumi ilityekazi elikhulu lesikhumbuzo elaziwa njengeLitye leGibraltar. Kangangamakhulu eminyaka, eli litye belilingqina elingathethiyo kwimpikiswano yezobupolitika nakukungavisisani kwezizwe ngezizwe. Ngokuchasene noko, kutshanje iLitye leGibraltar beliyimbonakaliso yesiganeko sentsebenziswano nemvisiswano engafane ibonwe kwihlabathi lanamhlanje.
Kumgama weekhilomitha ezintathu kuphela ukusuka kweli Litye kukho idolophu iLa Línea, eSpeyin. Ukwakhiwa kweHolo yoBukumkani yamaNgqina kaYehova apho kwahlanganisela ndawonye amakhulu abasebenzi bokuzithandela ababekuvuyela ukunikela ngexesha nangamandla abo. Njengoko babesebenza besakha indawo efanelekileyo yokunqula uMdali, uYehova uThixo, kwanokubaluleka kwesiganeko esibalaseleyo seLitye leGibraltar kwathi shwaka xa kuthelekiswa naloo msebenzi.
Abavakalisi boBukumkani kuloo nxalenye yehlabathi bathumela le ngxelo ilandelayo:
“Amakhulu asithoba abasebenzi bokuzithandela abanenzondelelo basebenza imini nobusuku, ukususela ngemva kwemini yangoLwesihlanu, ngoSeptemba 24, 1993. Ngentsimbi yesixhenxe ngengokuhlwa yangeCawa, kwakumiswe uphawu olutsha olwalufanisa eso sakhiwo njengeHolo yoBukumkani yamaNgqina kaYehova, yaye eso sakhiwo sitsha sinomtsalane sasetyenziselwa intlanganiso yesidlangalala okwesihlandlo sokuqala.
“AmaNgqina amaninzi asuka kwiGibraltar ekufutshane awela umda ukuze ancedise abazalwana bawo baseSpeyin. Omnye wabasebenzi bokuzithandela, ongummi waseGibraltar wathi: ‘Ukwahlukana ngezobupolitika akubuchaphazeli ubuzalwana bethu bazwenibanzi.’ Wongezelela esithi: ‘Kwiminyaka eliqela edluleyo, abahlobo abasuka eLa Línea beza kusinceda ukwakha iHolo yethu yoBukumkani eGibraltar, ngoko siyakuvuyela ukubuyekeza ububele babo ngoku.’
“Ukufaka isandla kwimigudu yokuzimisela yala mabandla mabini amaNgqina kaYehova neyamakhulu abancedisi abanobuchule abasuka kummandla waseAndalusia, isixeko saseLa Línea sagqiba ekubeni sinikele ngesiza esasifuneka. Ebudeni botyelelo lwakhe kwindawo ekwakusakhiwa kuyo, usibonda wedolophu yaseLa Línea wathi: ‘Ngokwesithethe, amagunya asekuhlaleni aseSpeyin ebesoloko ewabonelela amaKatolika ngomhlaba wokwakha izindlu zecawa. Inokuba yintoni embi ngokwenza okufanayo nakwamanye amahlelo onqulo? Ndichukunyiswe ngokunzulu kukungazingci kwaba basebenzi bokuzithandela, yaye ndivakalelwa kukuba bayifanele inkxaso yethu. Siyawufuna umoya ongakumbi onjalo kwihlabathi lanamhlanje elahluleleneyo.’
“Wabhekisela kwiHolo yoBukumkani ‘njengesikhumbuzo somoya wentsebenziswano.’ Eneneni, eyona nto yayichukumisa yayingebobuhle besakhiwo ingebubo nobukhulu baso. Kunoko, oko kwachukumisa abaninzi ekuhlaleni yayisisibakala sokuba yayakhiwe ngokupheleleyo ngabasebenzi bokuzithandela yaye yakhiwa ngeeyure ezingama-48 kuphela!”
Licacile elokuba amaNgqina kaYehova eLa Línea nakwimimandla eyijikelezileyo azingqina ethembekile kumazwi akumaGalati 6:10. Apho umpostile uPawulos wayala amakholwa awayekhonza nawo esithi: “Njengoko singathi sibe nethuba, masisebenze okulungileyo kubo bonke, ngokukodwa ke kwabendlu yokholo.”