Liyintoni Ithemba Ngabaziimfama?

UJOHN MILTON wabhala incwadi yakhe yemibongo ethi Paradise Lost nethi Paradise Regained nangona wayeyimfama ngokupheleleyo. Ukuba yimfama nokuba sisithulu akuzange kumthintele uHelen Keller kumsebenzi wakhe nabaneziphene ngokwasemzimbeni. Ewe, abantu abaninzi abaziimfama baqhuba kakuhle. Kodwa hayi indlela ebekuya kubakuhle ngayo ukuba wonke umntu ebebona kakuhle! Usenokuvuma ngokukodwa ukuba unothile omthandayo okanye umhlobo oyimfama okanye ongaboni kakuhle.

Liyinyaniso elokuba, kumazwe athile iinkqubo zokubuyisela abantu kwimeko yesiqhelo zifundisa abantu abangaboni kakuhle ubuchule bobomi bemihla ngemihla. Iincwadi Zabantu Abangaboniyo nezinja eziqeqeshelwe ukukhokela abangaboniyo zinceda abaziimfama ukuze banyamekele inkoliso yeemfuno zabo. Sekunjalo, abantu abaninzi babujonga ubumfama njengesona siphene soyikekayo. Omnye umbhali wathi: “Ukuba yimfama kukuphulukana nelungelo leyona nxalenye ibalulekileyo yehlabathi lethu elibonakalayo.” Kwangaxeshanye, abaninzi bafanele baxhomekeke kakhulu kwabanye.

Usenokubuza, kutheni buxhaphake kangaka nje ubumfama? Ngaba ukhe weva ngesifo samehlo ekuthiwa yitrakoma? Singunobangela wobumfama kubantu abamalunga nezigidi ezisithoba. IThe New Encyclopædia Britannica ithi ngaso: “Esi sifo siyasulela yaye siyanwenwa apho abantu abaninzi bexinene ndaweninye kwiimeko-bume ezingacocekanga. Ukunqongophala kwamanzi okuhlamba, nezigidi zeempukane ezitsalwa lilindle lomntu, zinegalelo ekusasazeni esi sifo. Ngeendlela ezithile itrakoma iyingxaki yasentlalweni ngaphezu kokuba iyeyoogqirha; ukuba umgangatho wokuphila unokuphuculwa, ukuxinana kuncitshiswe, iimpukane zithintelwe, kuze kuqinisekiswe ngesixa samanzi esaneleyo, umlinganiselo wobukho betrakoma uhla ngokukhawuleza.” Esinye isigidi okanye malunga nalapho sineonchocerciasis, okanye ubumfama obubangelwa ngamanzi omlambo. Okanye kuthekani ngexerophthalmia? Nangona linzima eli gama, isibakala sesokuba esi sifo singunobangela oqhelekileyo wobumfama. Isifo seswekile, umqala omhlophe, imasisi, iscarlet fever, nezifo ezidluliselwa ngeentlobano zesini nazo zisenokukhokelela kubumfama.

Njengoko sikhula, amehlo ethu asenokuba norhatyazo ngenxa yezigulo ezinjengokuvaleka kwenwebu ephakathi kweliso nesifo samehlo ekuthiwa yiglaucoma, yaye asinako ukuwubetha ngoyaba umlanga. IThe New Encyclopædia Britannica ithi: “Umlanga usekwinqanaba eliphezulu kuludwe loonobangela bobumfama kumazwe amaninzi ehlabathini, yaye okuyintlekele ngakumbi kukuba unyangeka lula ngolona hlobo ngokwenziwa kotyando.”

Nangona kuye kwafunyanwa ulwazi olutsha ngeophthalmology, ukupheliswa kobumfama kubonakala kuyinto eya kwenzeka kudala. Intyilalwazi ekwanye ithi: “Inkqubela-phambili kuthintelo nakunyango lobumfama ngamayeza nangotyando inokuba yingenelo kuphela kubemi abakufumanayo ukunyanyekelwa ngokwempilo. Ubumfama obuthintelekayo buya kuhlala bukumlinganiselo wabo okhoyo nophezulu, de kuphuculwe umgangatho wokondliwa nowococeko lwabona bemi bomhlaba abaninzi.”

Ngoxa kungathandabuzeki ukuba izibulala-ntsholongwane notyando zinendawo yazo kumlo onxamnye nobumfama, ithemba lonyango olusisigxina linento yokwenza nokuthile okwenzeka phantse kwiminyaka engamawaka amabini eyadlulayo.

Ukuphilisa Abaziimfama Ngomhla KaYesu

Yiba nombono wendoda esebutsheni beminyaka yama-30 ubudala ehamba kwindlela enothuli. Eyiva idlula, amadoda amabini aziimfama ayadanduluka: “Senzele inceba!” Nangona ababukeleyo beziyalela ukuba zithule, iimfama zona zidanduluka ngakumbi: “Senzele inceba!” Le ndoda ibuza ngobubele: “Ninga ndinganenzela ntoni na?” Zingalibazisi ziyaphendula: “Ukuba kuvulwe amehlo ethu.” Ngoku khawube nomfanekiso-ngqondweni: Le ndoda ichukumisa amehlo azo, yaye kwangoko ziyabona!—Mateyu 20:29-34.

Hayi indlela avuya ngayo la madoda abekade eziimfama! Ukanti, ubumfama buxhaphake ngolona hlobo. Esi yayisisiganeko nje esinye. Kutheni ufanele usinikele ingqalelo nje? Kungenxa yokuba yayinguYesu waseNazarete owenzela loo madoda inceba yokuba abone. Enyanisweni, ngaphezu ‘kokuthanjiswa ukuze ashumayele iindaba ezilungileyo kumahlwempu,’ uYesu ‘wayethunywe ukuba abuyisele ukubona kwabaziimfama.’—Luka 4:18.

Abantu babekhwankqisiwe kukuphilisa okungummangaliso okunjalo okwakusenziwa ngamandla omoya oyingcwele kaThixo. Sifunda oku: “Zamangaliswa izihlwele ezo, zakubona izidenge zithetha, izilima ziphilile, iziqhwala zihamba, neemfama zibona; zamzukisa uThixo kaSirayeli.” (Mateyu 15:31) Engahlawulisi okanye azenzele udumo lokobuqu ngokuphilisa okunjalo, uYesu wabalaselisa uthando nenceba kaYehova uThixo. Noko ke, kwakhona uYesu wayenemfesane ngabantu ababeziimfama ngokomoya nababengakwazi ukuzinceda ‘ababetyhafile, bechithakele ngokwezimvu ezingenamalusi.’—Mateyu 9:36.

Nakuba imbali enjalo isenokubangela umdla, usenokuzibuza ukuba, Kuthekani namhlanje? Ekubeni namhlanje kungekho bani uphilisa abantu njengoko uYesu wayesenjenjalo, ngaba oko kuphilisa kunentsingiselo kuthi? Ngaba kukho naliphi ithemba ngabaziimfama? Nceda ufunde inqaku elilandelayo.

[Amagama acatshulweyo akwiphepha 4]

“Ubumfama obuthintelekayo buya kuhlala bukumlinganiselo wabo okhoyo nophezulu, de kuphuculwe umgangatho wokondliwa nowococeko lwabona bemi bomhlaba abaninzi.”—The New Encyclopædia Britannica