Ukunikela Ubungqina Kuzo “Zonke Iintlanga”

“Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.”—MATEYU 24:14.

1. Kutheni kumele ukuba amazwi kaYesu abhalwe kuMateyu 24:14 abothusa abalandeli bakhe?

HAYI indlela amele ukuba la mazwi kaYesu angasentla abothusa ngayo abafundi bakhe abangamaYuda! Ingcamango yokuba amaYuda angcwalisiweyo aye kuthetha nabantu beeNtlanga ‘abaziinqambi,’ ‘iintlanga,’ yayingaqhelekanga kumYuda, yaye inezothe.a Kaloku, umYuda onenzondelelo wayengayicingi nokuyicinga into yokungena kwikhaya lomntu weeNtlanga! Abo bafundi babengamaYuda kwakusekuninzi ekwakufuneka bekufundile ngoYesu, uthando lwakhe, nothumo lwakhe. Ibe kwakusekuninzi ekwakufuneka bekufundile ngokungakhethi buso kukaYehova.—IZenzo 10:28, 34, 35, 45.

2. (a) Bande kangakanani ubulungiseleli bamaNgqina? (b) Ngabaphi oothunywashe abathathu abasisiseko abaye banegalelo kwinkqubela yamaNgqina?

² AmaNgqina kaYehova ebeshumayela iindaba ezilungileyo kuzo zonke iintlanga, kuquka amaSirayeli anamhlanje, ibe ngoku azivakalisa kwiintlanga ezininzi kunanini na ngaphambili. Ngowe-1994 ngamaNgqina angaphezu kwezigidi ezine ezinesiqingatha ashumayela kumazwe amalunga nama-230. Aqhuba izifundo zeBhayibhile zamakhaya ezimalunga nezigidi ezine ezinesiqingatha nabantu abanomdla. Oku kwenziwa nangona kukho ikhethe emhlabeni wonke, ngokufuthi elisekelwe ekusweleni ulwazi ngeemfundiso neentshukumisa zamaNgqina. Njengokuba kwakusitshiwo ngamaKristu okuqala, kunokutshiwo nangawo: “Kuba okunene ngalo elo hlelo kuyazeka kuthi, ukuba lichasiwe ezindaweni zonke.” (IZenzo 28:22) Ngoko sinokuthi impumelelo yobulungiseleli bawo ibangelwa yintoni? Ubuncinane kukho oothunywashe abathathu abanegalelo kwinkqubela yawo—ukulandela ukhokelo lomoya kaYehova, ukuxelisa iindlela zikaKristu ezinempumelelo, nokusebenzisa izixhobo ezifanelekileyo zonxibelelwano olunempumelelo.

Umoya KaYehova Neendaba Ezilungileyo

3. Kutheni singenakuqhayisa ngoko kufeziweyo?

³ Ngaba amaNgqina kaYehova ayaqhayisa ngempumelelo yawo, ngokungathi ibangelwa bubuchule obukhethekileyo anabo? Akenjinjalo, kuba kusebenza amazwi kaYesu: “Xa nithe nazenza zonke izinto enazimiselwayo, yithini, Singabakhonzi abangancedi lutho; ngokuba sanele ukwenza oko besimelwe kukuthi sikwenze.” NjengamaKristu azahluleleyo nabhaptiziweyo, amaNgqina kaYehova ngokuzithandela ayamkele imbopheleleko yokukhonza uThixo, kungakhathaliseki ukuba zinjani na iimeko zawo zobuqu. Kwathile, oko kuthetha inkonzo yexesha elizeleyo njengabavangeli basemazweni okanye abasebenzi bokuzithandela kwiiofisi zamasebe nakwimizi yokushicilela iimpapasho zamaKristu. Kwabanye umoya ovumayo wobuKristu onjalo uwakhokelela kumsebenzi wokwakha izakhiwo zonqulo, ekushumayeleni ixesha elizeleyo njengabalungiseleli abangoovulindlela, okanye ukushumayela ngamathuba akhululekileyo njengabavakalisi beendaba ezilungileyo kumabandla asekuhlaleni. Akukho namnye kuthi onokuthi ngokufanelekileyo aqhayise ngokwenza umsebenzi wethu, “oko besimelwe kukuthi sikwenze.”—Luka 17:10; 1 Korinte 9:16.

4. Koyiswe njani ukuchaswa kobulungiseleli bamaKristu emhlabeni wonke?

⁴ Nayiphi na impumelelo esisenokuba nayo sinokuthi ibangelwa ngumoya kaYehova, okanye amandla akhe asebenzayo. Ngokufanelekileyo nanamhlanje njengakwimihla yomprofeti uZekariya sinokuthi: “Nali ilizwi likaYehova kuZerubhabheli, lisithi, Akungabukroti, akungamandla; kungoMoya wam; utsho uYehova wemikhosi.” Ngaloo ndlela, ukuchaswa emhlabeni wonke komsebenzi wokushumayela wamaNgqina akoyiswanga ngemigudu yabantu, kodwa koyiswe ngolwalathiso nenkuselo kaYehova.—Zekariya 4:6.

5. UYehova unayiphi indima ekusasazweni kwesigidimi soBukumkani?

⁵ Kwabo basabelayo kwisigidimi soBukumkani, uYesu wathi: “Kubhaliwe ebaprofetini kwathiwa, Baye bonke beya kuba ngabafundiswa bakaThixo; bonke ngoko abathe beva kuBawo, bafunda kuye, bayeza kum. . . . Akukho namnye unako ukuza kum, ukuba akathanga akunikwe nguBawo.” (Yohane 6:45, 65) UYehova unokufunda iintliziyo neengqondo, ibe uyabazi abo basenokusabela kuthando lwakhe nangona besenokuba abakamazi. Ukwasebenzisa izithunywa zakhe zezulu ukwalathisa obu bulungiseleli bukhethekileyo. Kungenxa yoko embonweni uYohane wabona izithunywa zezulu zinenxaxheba waza wabhala: “Ndabona esinye isithunywa sezulu, siphaphazela esazulwini samazulu, sineendaba ezilungileyo ezingunaphakade, ukuba sizishumayele kwabo bemiyo phezu komhlaba, nakwiintlanga zonke, nezizwe neelwimi, nabantu.”—ISityhilelo 14:6.

Ukuphaphela Intswelo Yokomoya

6. Ngokusisiseko sisiphi isimo sengqondo esifunekayo ukuze umntu asabele kwiindaba ezilungileyo?

⁶ Omnye uthunywashe obangela uYehova anike umntu ithuba lokwamkela iindaba ezilungileyo ngulowo uchazwa nguYesu: “Banoyolo abo bayiphapheleyo intswelo yabo yokomoya, ekubeni ubukumkani bamazulu ibobabo.” (Mateyu 5:3, NW) Umntu owanelisekileyo okanye ongayifuniyo inyaniso akayi kuyiphaphela intswelo yokomoya. Ucinga ngezinto eziphathekayo, zokwenyama kuphela. Ukwaneliseka kwakhe kuba ngumqobo. Ngoko ke, xa abaninzi esidibana nabo xa sikwindlu ngendlu besichasa isigidimi, sifanele sizijonge zonke izizathu ezahlukahlukeneyo ezisenokubangela abantu basabele ngeendlela abasabela ngazo.

7. Kutheni abaninzi bengasabeli kwinyaniso?

⁷ Abaninzi bayala ukuphulaphula ngenxa yokuba ngeenkani babambelele kunqulo abazalelwa kulo ibe abakulungelanga ukuxubusha ngalo. Abanye batsalwe lunqulo oluvumelana nobuntu babo—bambi bafuna iimfihlelo, abanye batsalwa kukuchukunyiswa kweemvakalelo, sekunjalo abanye bafuna ulonwabo ecaweni yabo. Namhlanje abaninzi bakhethe indlela yokuphila engqubanayo nemilinganiselo kaThixo. Mhlawumbi baphila ubomi bokuziphatha kakubi, nto leyo ebangela bathi, “Andinamdla.” Sekunjalo abanye, abasenokuzibanga befundile okanye bezizazinzulu, basenokungayamkeli iBhayibhile kuba besithi ilula gqitha.—1 Korinte 6:9-11; 2 Korinte 4:3, 4.

8. Kutheni ukungamkelwa kungafanele kuyithothise inzondelelo yethu? (Yohane 15:18-20)

⁸ Ngaba ukungamkelwa ngabaninzi kufanele kuluthothise ukholo nenzondelelo yethu kubulungiseleli obusindisa ubomi? Sinokukhuthazwa ngamazwi kaPawulos kwabaseRoma: “Kuyini na khona, ukuba abathile abakholwanga? Ukungakholwa kwabo kokuphuthisa na ukuthembeka kukaThixo? Nakanye! UThixo yena makabe nenyaniso, bonke abantu ke babe ngamaxoki; njengokuba kubhaliwe kwathiwa, Ukuze ube nokugwetyelwa [“ungqineke ulilungisa,” NW] emazwini akho, weyise ekumangalelweni kwakho.”—Roma 3:3, 4.

9, 10. Bubuphi ubungqina obukhoyo bokuba inkcaso yoyisiwe kumazwe amaninzi?

⁹ Sinokukhuthazwa yimizekelo emininzi emhlabeni wonke yamazwe abebonakala engenantsabelo kodwa kwathi, ekuhambeni kwethuba, angqineka engenjalo. UYehova nezithunywa zezulu bebesazi ukuba kukho abantu abantliziyo zilungileyo abamele bafunyanwe—kodwa amaNgqina kaYehova kuye kwafuneka azingise aze anyamezele kubulungiseleli bawo. Ngokomzekelo, khawucinge ngamazwe apho ubuKatolika babubonakala bungumqobo ongenakuqatyelwa kwiminyaka engama-50 eyadlulayo—iArgentina, iBrazil, iColombia, i-Ireland, i-Itali, iMexico, iPortugal, neSpeyin. AmaNgqina ayembalwa emva phayaa ngowe-1943, eli-126 000 kuphela emhlabeni wonke, angama-72 000 kula eseUnited States. Ukungabi nalwazi kwabantu nekhethe ayejamelene nalo amaNgqina lalibonakala liludonga lwezitena olwalungenakugqojozwa. Kodwa, namhlanje eminye yeyona miphumo inempumelelo yokushumayela ivela kula mazwe. Kukwanjalo nangamazwe amaninzi awayefudula engawobuKomanisi. Ngowe-1993 ukubhaptizwa kwabantu abangama-7 402 kwindibano ebiseKiev, eUkraine, kububungqina boku.

¹⁰ Ziziphi iindlela amaNgqina azisebenzisileyo ukuze adlulisele iindaba ezilungileyo kubamelwane bawo? Ngaba awarhwebeshe ngezinto eziphathekayo amaguquka, nto leyo abanye abawatyhola ngayo? Ngaba atyelele amahlwempu nabantu abangafundanga kuphela, njengokuba abanye besitsho?

Iindlela Ezinempumelelo Zokusasaza Iindaba Ezilungileyo

11. Nguwuphi umzekelo omhle uYesu awawumiselayo kubulungiseleli bakhe? (Bona uYohane 4:6-26.)

¹¹ UYesu nabafundi bakhe bamisela umzekelo amaNgqina awulandelayo nanamhla kumsebenzi wawo wokwenza abafundi. UYesu waya kuzo zonke iindawo ezazinabantu, abazizityebi okanye abangamahlwempu—emakhaya, kwiindawo zikawonke wonke, ecaleni kwamachibi, ecaleni kweentaba, nasezindlwini zesikhungu.—Mateyu 5:1, 2; 8:14; Marko 1:16; Luka 4:15.

12, 13. (a) UPawulos wawamisela umzekelo njani amaKristu? (b) AmaNgqina kaYehova awulandele njani umzekelo kaPawulos?

¹² Ngokuphathelele ubulungiseleli bakhe, umpostile uPawulos ngokufanelekileyo wayenokuthi: “Niyazi kakuhle nina, kususela kwimini yokuqala endathi qatha ngayo kwelaseAsiya, ukuba ndathini na ukuhlala kwam nani lonke ixesha, ndikhonza eNkosini, . . . andinifihlelanga nto, ndanityela onke amalungelo; ndanifundisa ekuhleni nakwizindlu ngezindlu.”—IZenzo 20:18-20.

¹³ AmaNgqina kaYehova aziwa ehlabathini lonke ngokulandela kwawo umzekelo wabapostile, ubulungiseleli bendlu ngendlu. Kunokunikela ingqalelo kakhulu kubulungiseleli obudla imali eninzi, obungenabunzulu, nobungajoliswanga kubantu ngabanye kumabonwakude, amaNgqina aya ebantwini, abazizityebi nabangamahlwempu, aze adibane nabo ubuso ngobuso. Afuna ukuncokola ngoThixo nangeLizwi lakhe.b Akazami kwenza amaKristu aguquka ngenxa yeengenelo zokuphathekayo, esebenzisa izipho. Kwabo bakulungeleyo ukuqiqa, abonisa ukuba ekuphela kwesicombululo sokwenene kwiingxaki zoluntu lulawulo loBukumkani bukaThixo, obuya kuguqula iimeko kulo mhlaba wethu zibe zezilunge ngakumbi.—Isaya 65:17, 21-25; 2 Petros 3:13; ISityhilelo 21:1-4.

14. (a) Abavangeli basemazweni noovulindlela abaninzi basibeke njani isiseko esiqinileyo? (b) Sifunda ntoni kumava amaNgqina kaYehova eJapan?

¹⁴ Ukuze lo msebenzi ufezwe kumazwe amaninzi kangangoko kunokwenzeka, abavangeli basemazweni noovulindlela baye bahlahle indlela kumazwe amaninzi. Babeka isiseko, aze ke amaNgqina asekuhlaleni akhokele. Ngaloo ndlela, akufunekanga ukuba ibe ngamaNgqina amaninzi avela kwamanye amazwe agcina umsebenzi wokushumayela uqhubeka yaye ulungelelene. Omnye umzekelo obalaseleyo ngowaseJapan. Emva phayaa ngasekupheleni kweminyaka yee-1940, ngokuyintloko ngabavangeli basemazweni baseOstreliya nabaseBritani ababelapho, bafunda ulwimi, bazivumelanisa neemeko ezazisemva noko zasemva kwemfazwe, baza bazimisela ukunikela ubungqina kwindlu ngendlu. Ebudeni beMfazwe Yehlabathi II, amaNgqina ayevaliwe ibe etshutshiswa eJapan. Ngoko abavangeli basemazweni bafumana imbinana kuphela yamaNgqina aseJapan akhutheleyo ekufikeni kwabo. Kodwa namhlanje ande aya kutsho ngaphezu kwe-187 000 kumabandla angaphezu kwama-3 000! Yayiyintoni imfihlelo yempumelelo yabo emva apho? Omnye umvangeli wasemazweni obekhonza apho ngaphezu kweminyaka engama-25 wathi: “Kwakubaluleke gqitha ukufunda ukuncokola nabantu. Ngokwazi ulwimi lwabo, sakwazi ukuzifanisa nabo, ukuqonda nokuxabisa indlela ababephila ngayo. Kwafuneka sibonise ukuba sasiwathanda amaJapan. Ngokuthobeka sazama ukuba yinxalenye yabantu basekuhlaleni, kakade ke, ngaphandle kokulalanisa kwimilinganiselo yobuKristu.”

Ihambo YobuKristu Nayo Inikela Ubungqina

15. AmaNgqina ayibonise njani ihambo yamaKristu?

¹⁵ Noko ke, abantu abasabelanga kwisigidimi seBhayibhile kuphela. Kwakhona babone indlela obusebenza ngayo ubuKristu. Babone uthando, imvisiswano, nomanyano lwamaNgqina nangaphantsi kwezona meko zilingayo, njengaxa kukho iimfazwe zamakhaya, ukruthakruthwano lwezizwana, nentiyo yobuhlanga. AmaNgqina aye agcina ubundilele bawo bobuKristu ngokucacileyo kuzo zonke iimpikiswano ibe aye azalisekisa amazwi kaYesu: “Ndiniwisela umthetho omtsha, wokuba nithandane, njengokuba ndinithandileyo nina, ukuze nani nithandane. Ngayo le nto baya kwazi bonke, ukuba ningabafundi bam, ukuba nithe nathandana.”—Yohane 13:34, 35.

16. Ngawaphi amava abonisa uthando lokwenene lobuKristu?

¹⁶ Uthando lommelwane lwabonakala kwimeko yendoda esele ikhulile eyabhala kwiphepha lasekuhlaleni ngo-“Mnu. noNkskz. Lungile.” Yachaza ukuba abamelwane bayo bayibonisa ububele xa umfazi wayo wayegulela ukufa. Yabhala: “Emva kokuba efile . . . bebebalasele. Ukususela ngoko baye ‘bandamkela’ . . . , bendenzela yonke imisetyenzana ibe bendinceda ndicombulule iingxaki zexhego elidl’ umhlala phantsi elineminyaka engama-74 ubudala. Okwenza oku kube kokungaqhelekanga ngakumbi kukuba bantsundu, mna ndimhlophe. BangamaNgqina kaYehova, mna ndingumKatolika ongasakhuthelanga.”

17. Liliphi ikhondo esifanele siliphephe?

¹⁷ La mava abonisa ukuba ubungqina sinokubunikela ngeendlela ezininzi, kuquka ihambo yethu yamihla le. Eneneni, ngaphandle kokuba ihambo yethu ibe yeyobuKristu, ubulungiseleli bethu buya kufana nobabaFarisi, bungabi namiphumo. Asifuni kufana nabo uYesu wabachaza ngokuthi: “Konke ngoko abasukuba besithi kuni kugcineni, ze nikugcine nikwenze; kodwa ze ningenzi ngokwemisebenzi yabo; kuba bathetha baze bangenzi.”—Mateyu 22:37-39; 23:3.

Udidi Lomkhonzi Lunikela Izixhobo Ezifanelekileyo

18. Uncwadi lweBhayibhile lusixhobisa njani ukuze sincede abantu abantliziyo zinyanisekileyo?

¹⁸ Enye inkalo ebalulekileyo ekushumayeleni iindaba ezilungileyo kuzo zonke iintlanga ibikukufumaneka koncwadi lweBhayibhile oluveliswa yiWatch Tower Bible and Tract Society. Sineencwadi, iincwadana ezinemifanekiso, amaphecana namaphephancwadi anokwanelisa phantse bonke abantu abanyanisekileyo abanemibuzo. Ukuba sidibana nomSilamsi, umHindu, umBhuda, umlandeli kaTao, okanye umYuda, sinokusebenzisa incwadi ethi Iphulo Loluntu Lokufuna UThixo okanye amaphecana neencwadana ezahlukahlukeneyo ukuze siqalise incoko nomntu osenokuba sisifundo seBhayibhile. Ukuba umntu okholelwa kwindaleko usibuza ngendalo, sinokusebenzisa incwadi ethi Life—How Did It Get Here? By Evolution or by Creation? Ukuba umntu oselula ubuza ukuba, ‘Yintoni Injongo Yobomi?’ sinokumalathisela kwincwadi ethi Imibuzo Yabantu Abaselula—Iimpendulo Eziluncedo. Ukuba umntu uneengxaki zobuqu—udandatheko, ukudinwa, ukudlwengulwa, uqhawulo-mtshato—sinamaphephancwadi aye axubusha ngemibandela enjalo ngendlela eluncedo. Ngokwenene, udidi lomkhonzi othembekileyo uYesu awaprofeta wathi lwaluya kunikela “ukudla ngexesha elifanelekileyo” luyayizalisekisa indima yalo.—Mateyu 24:45-47.

19, 20. Umsebenzi woBukumkani wande njani eAlbania?

¹⁹ Kodwa ukuze kufikelelwe izizwe, kuye kwafuneka kuveliswe uncwadi ngeelwimi ezininzi. Kwenzeke njani ukuba kuguqulelwe iBhayibhile noncwadi lweZibhalo ngeelwimi ezingaphezu kwama-200? Ukuhlolisisa ngokufutshane umzekelo omnye, iAlbania, kubonisa indlela udidi lomkhonzi othembekileyo noqondayo oluye lwakwazi ngayo ukuhambisela phambili iindaba ezilungileyo phezu kwazo nje iinzima yaye kungenzekanga nommangaliso wangePentekoste ukuze sikwazi ukuthetha iilwimi ngesiquphe.—IZenzo 2:1-11.

²⁰ Kwiminyaka nje embalwa edluleyo, iAlbania ibisajongwa njengekuphela kwelizwe lamaKomanisi angakholelwayo kuThixo ngokwenene. Iphephancwadi iNational Geographic lathi ngowe-1980: “IAlbania ayilwamkeli [unqulo], ngowe-1967 yathi ‘ililizwe lokuqala ekungakholelwayo kuThixo kulo ehlabathini.’ . . . Isizukulwana esitsha saseAlbania sazi ukungakholelwa kuThixo kuphela.” Njengokuba ubuKomanisi buphelile nje ngoku, abantu baseAlbania abayiqondayo intswelo yabo yokomoya bayasabela kumsebenzi wokushumayela owenziwa ngamaNgqina kaYehova. Iqela elincinane labaguquleli eliquka amaNgqina aselula azi isiTaliyane nesiNgesi lasekwa eTiranë ngowe-1992. Abazalwana abafanelekayo ababetyelele bevela kwamanye amazwe babafundisa ukusebenzisa iikhompyutha ezincinane ukuze babhale ngesiAlbania. Baqalisa ngokuguqulela amaphecana nephephancwadi IMboniselo. Njengokuba bezuza amava, benza umsebenzi wokuguqulela ezinye iimpapasho ezixabisekileyo zeBhayibhile. Sithetha nje kukho amaNgqina akhutheleyo amalunga nama-200 kweli lizwe lincinane (linabemi abangama-3 262 000), yaye ngabantu abali-1 948 abebekho eSikhumbuzweni ngowe-1994.

Sonke Sinembopheleleko

21. Siphila kwixesha elinjani?

²¹ Iziganeko zehlabathi zifikelela incopho. Ngenxa yokwanda kolwaphulo-mthetho nogonyamelo, ukubulala nokudlwengula kwiimfazwe zasekuhlaleni, ukuxhaphaka kokuziphatha kakubi nesiqhamo sako sezifo ezidluliselwa ngesini, ukungahlonelwa kwegunya elifanelekileyo, ihlabathi libonakala lisiba ngumbhodamo yaye lingalawuleki. Siphila kwixesha elifana nelangaphambi koMkhukula elichazwe kwiGenesis: “Wabona uThixo ukuba ububi babantu bandile ehlabathini, konke ukuyila kweengcinga zentliziyo yabo kubububi bodwa imihla yonke. Wazohlwaya uYehova ngokuba emenzile umntu ehlabathini, kwaba buhlungu kuye entliziyweni.”—Genesis 6:5, 6; Mateyu 24:37-39.

22. Yiyiphi imbopheleleko yobuKristu anayo onke amaNgqina kaYehova?

²² Kanye njengakwimihla kaNowa, uYehova uza kwenza okuthile. Kodwa ngenxa yokuba esesikweni yaye enothando, ufuna iindaba ezilungileyo nesigidimi esisisilumkiso zishunyayelwe kuqala kuzo zonke iintlanga. (Marko 13:10) Kule nkalo amaNgqina kaYehova anembopheleleko—yokufumana abo bafanelwe luxolo lukaThixo aze abafundise iindlela zakhe zoxolo. Kungekudala, ngexesha likaThixo elifanelekileyo, uthumo lokushumayela luya kugqitywa ngokunempumelelo. “Kwandule ke ukufika isiphelo.”—Mateyu 10:12, 13; 24:14; 28:19, 20.

[Imibhalo esemazantsi]

Uyakhumbula Na?

◻ AmaNgqina anamhlanje aphumelele njani kubulungiseleli bawo?

◻ Kutheni abaninzi bengasamkeli isigidimi samaKristu?

◻ AmaNgqina asebenzisa yiphi indlela yabapostile yokushumayela?

◻ Ziziphi izixhobo esinazo zobulungiseleli obuphumelelayo?

◻ Yintoni esimele sonke siyenze ngokuvisisana noMarko 13:10?

[Ibhokisi ekwiphepha 19]

ILIZWE AMANGQINA AWAYEKHUTHELE NGOWE-1943 NGOWE-1993

Argentina 374 102 043

Brazil 430 366 297

Chile 72 44 668

Colombia ?? 60 854

Fransi IMfazwe Yehlabathi II—akukho ngxelo 122 254

Ireland 150? 4 224

Itali IMfazwe Yehlabathi II—akukho ngxelo 201 440

Mexico 1 565 380 201

Peru Akukho ngxelo yomsebenzi 45 363

Philippines IMfazwe Yehlabathi II—akukho ngxelo 116 576

Poland IMfazwe Yehlabathi II—akukho ngxelo 113 551

Portugal Akukho ngxelo yomsebenzi 41 842

Speyin Akukho ngxelo yomsebenzi 97 595

Uruguay 22 9 144

Venezuela Akukho ngxelo yomsebenzi 64 081

[Umfanekiso okwiphepha 17]

AmaNgqina kaYehova ayanda kumazwe amaninzi obuKatolika, njengeSpeyin

[Imifanekiso ekwiphepha 18]

AmaNgqina kaYehova axakekile kumazwe asemhlabeni wonke