Intlangano KaYehova Ixhasa Ubulungiseleli Bakho

“Ndabona enye ingelosi iphaphazela esazulwini sezulu, kwaye yayineendaba ezilungileyo ezingunaphakade ukuba izivakalise njengesigidimi esichulumancisayo.”—ISITYHILELO 14:6.

1. AmaNgqina kaYehova aye avavanywa njani, yaye kutheni eye asinda?

KUTHENI kubaluleke kangaka ukuqonda indima yentlangano kaYehova yasezulwini ekuxhaseni ubulungiseleli bamaKristu? Kaloku, ngaba amaNgqina kaYehova ebenokukwazi ukushumayela iindaba ezilungileyo zoBukumkani bukaThixo kulo lonke eli hlababathi lingenalusini ngaphandle kwenkxaso yemikhosi kaYehova yasezulwini? AmaNgqina aye ashumayela ebudeni benkulungwane ebiphehluzeliswa bubuzwe, iinkqubo zoozwilakhe bezobupolitika, iimfazwe zehlabathi kunye namanzithinzithi agqithileyo ahlukeneyo. Ngaphandle koncedo lukaYehova, ngaba amaNgqina ebenokuyiqabela imiqobo yezizwe ngezizwe yentiyo, umkhethe, kunye nentshutshiso enogonyamelo edla ngokujoliswa kuwo?—INdumiso 34:7.

Ukuqhubeka Phezu Kwayo Nje Inkcaso Yehlabathi Lonke

2. AmaKristu okwenyaniso enkulungwane yokuqala afana njani nawanamhlanje?

² Kule nkulungwane yama-20, iintshaba zonqulo nezobupolitika, ziye zabeka umqobo emva komnye, engokwasemthethweni neminye, zizama ukuthintela okanye ukuminxa umsebenzi kaYehova. Abazalwana noodade abangamaKristu baye batshutshiswa, kwathethwa kakubi ngabo, banyeliswa yaye batyatyekwa ngezityholo—uninzi lwabo lwada lwabulawa—ngokufuthi oko kusenziwa phantsi kwempembelelo yabefundisi beBhabhiloni Enkulu. NjengakumaKristu okuqala, kunokutshiwo ukuba “ngokwenyaniso ngokubhekisele kweli hlelo kuyazeka kuthi ukuba kuyo yonk’ indawo kuthethwa ngokunxamnye nalo.” Kanye njengokuba abefundisi abangamaYuda bomhla kaKristu babezama onke amaqhinga ukuze bathintele ubulungiseleli bakhe, wenjenjalo ke umfelandawonye oyilwe ngabefundisi, abawexuki kunye nezidwangube zezobupolitika, uzama ukucinezela umsebenzi omkhulu wokunikela bungqina obufundisayo wabantu bakaYehova.—IZenzo 28:22; Mateyu 26:59, 65-67.

3. Yintoni esinokuyifunda kwingqibelelo kaHenryka Żur?

³ Ngokomzekelo, khawuqwalasele okwenzeka ePoland ngoMatshi 1, 1946. UHenryka Żur, intwazana eliNgqina eneminyaka eli-15 ubudala eyayihlala kude kufuphi naseChełm, yapheleka elinye iNgqina, elingumzalwana, beye kutyelela abantu abanomdla kwidolophana ekufuphi. Babanjwa ngamalungu omkhosi wamaKatolika ekuthiwa yiNarodowe Siły Zbrojne (Umkhosi Wesizwe). Lo mzalwana wabethwa kanobom kodwa wakwazi ukusindisa ubomi bakhe. Kodwa akuzange kube njalo ngoHenryka. Wangcungcuthekiswa kabuhlungu kangangeeyure eziliqela njengoko la malungu ayezama ukumnyanzela ukuba enze umqondiso wamaKatolika womnqamlezo. Omnye wabo babemthuthumbisa wathi: “Makhe silibale ngale ifunwa nguwe, into esiyifunayo thina kukuba wenze umqondiso womnqamlezo wamaKatolika. Ngapha koko uza kuba lilifa lembumbulu!” Ngaba wayaphula ingqibelelo yakhe? Akunjalo. Loo matyutyusi asithela ngonqulo amrhuqela kwihlathi elikufuphi aza amdubula. Sekunjalo, eli qobokazana laliwoyisile! Akazange akwazi ukuyaphula ingqibelelo yalo.a—Roma 8:35-39.

4. Abezobupolitika nabonqulo baye bazama njani ukuthintela umsebenzi wokushumayela ngoBukukani?

⁴ Abakhonzi bakaThixo bale mihla baye baphathwa gadalala nangaphandle kwentlonelo kangangeminyaka engaphezu kwekhulu. Ngenxa yokuba amaNgqina kaYehova engeyonxalenye, yaye enganqweneli kuba yinxalenye yeenkonzo eziphambili zikaSathana, agqalwa njengamaxhoba afanelekayo kulo naluphi na uhlobo lokugxekwa okanye kwiintshaba ezinenzondelelo yempambano. Aye ahlaselwa ngeengcwangu ngabezobupolitika. AmaNgqina amaninzi aye ada abulawa ngenxa yokholo lwawo. Kwanamazwe ekufane kuthiwe anedemokrasi aye azama ukukuvala ukushunyayelwa kweendaba ezilungileyo. Ukususela emva phayaa ngowe-1917 eKhanada naseUnited States, abefundisi badyobha aBafundi beBhayibhile ngezityholo zokubhukuqa urhulumente, njengoko amaNgqina ayesaziwa ngelo gama ngoko. Amagosa eWatch Tower Society avalelwa entolongweni ngokungekho sikweni, kodwa kamva afunyanwa engenatyala.—ISithyilelo 11:7-9; 12:17.

5. Ngawaphi amazwi aye akhuthaza abakhonzi bakaYehova?

⁵ USathana uye wakhupha onke amaqhinga akhe ezama ukuthintela umsebenzi wokunikela ubungqina wabazalwana bakaKristu kunye noogxa babo abanyanisekileyo. Ukanti, njengoko amava amaninzi ebonisa, akukho sisongelo, siphazamiso, kungcungcuthekiswa ngokwasemzimbeni, kuvalelwa entolongweni, zinkampu zoxinaniso kwanokufa okuye kwawaval’ umlomo amaNgqina kaYehova. Ibe bekunjalo ukutyhubela yonke imbali. Ngawo onke amaxesha, amazwi kaElisha aye aba lukhuthazo: “Musa ukoyika; ngokuba baninzi abangakuthi, ngaphezu kwabangakubo.” Esinye isizathu kukuba iingelosi ezithembekileyo zingaphezulu lee kwimikhosi kaMtyholi ngobuninzi!—2 Kumkani 6:16; IZenzo 5:27-32, 41, 42.

UYehova Usikelela Ukushumayela Ngenzondelelo

6, 7. (a) Yiyiphi imigudu yokuqala eyenziwayo yokushumayela iindaba ezilungileyo? (b) Luluphi utshintsho olwaba yingenelo olwenzeka ekuqaleni kowe-1943?

⁶ Ebudeni benkulungwane yama-20, amaNgqina kaYehova aye ahambela phambili kubugcisa ukuze andise yaye akhawulezise umsebenzi wokunikela ubungqina ngaphambi kokuba kufike isiphelo. Emva phayaa ngowe-1914, uPastor Russell, umongameli wokuqala weWatch Tower Bible and Tract Society, wakhuthaza ukusetyenziswa kokuqala kweeslides kunye nemifanekiso eshukumayo, eyayihambisana neentetho zeBhayibhile ezazikumacwecwe egramafoni, kumfanekiso oshukumayo weBhayibhile othabatha iiyure ezisibhozo owawubizwa ngokuthi yi-“The Photo-Drama of Creation.” Ngelo xesha yayishiya abantu bebamb’ ongezantsi kumazwe amaninzi. Kamva, ngeminyaka yee-1930 neyee-1940, amaNgqina aziwa ngokushumayela kwindlu ngendlu neegramafoni, esebenzisa iintetho zeBhayibhile ezirekhodiweyo zikaJ. F. Rutherford, umongameli wesibini woMbutho.

⁷ Ngowe-1943 kwathatyathwa elinye inyathelo elibonakalisa inkalipho phantsi kolwalathiso lukaNathan H. Knorr, umongameli wesithathu woMbutho, xa kwagqitywa kwelokuba kusekwe isikolo sabalungiseleli kwibandla ngalinye. AmaNgqina ayeza kuqeqeshelwa ukushumayela nokufundisa kwindlu ngendlu engasasebenzisi amacwecwe egramafoni. Ukususela ngoko, kuye kwalungiselelwa ezinye izikolo ukuze kuqeqeshwe abavangeli basemazweni, abalungiseleli bexesha elizeleyo abangoovulindlela, abadala bamabandla, nabaveleli abanembopheleleko kumasebe eWatch Tower Society. Uye waba yintoni umphumo?

8. AmaNgqina alubonakalisa njani ukholo olubalaseleyo ngowe-1943?

⁸ Emva phayaa ngowe-1943, xa kwakugquba iMfazwe Yehlabathi II, kwakukho amaNgqina ali-129 000 kumazwe angama-54 kuphela. Kodwa, ayenokholo nozimiselo lokuba uMateyu 24:14 uza kuzaliseka singekafiki isiphelo. Ayeyisekile kwelokuba uYehova wayeza kwenza ukuba eso silumkiso sibalulekileyo sivakaliswe ngaphambi kokuba uthotho lweziganeko luphelise le nkqubo yezinto yonakeleyo. (Mateyu 24:21; ISityhilelo 16:16; 19:11-16, 19-21; 20:1-3) Ngaba iye yavuzwa ke imigudu yawo?

9. Ziziphi izibakala ezibonisa ukuba umsebenzi wokunikela ubungqina uye waqhubela phambili?

⁹ Ngoku ubuncinane ali-13 amazwe ngalinye kuwo elinamaNgqina akhutheleyo angaphezu kwe-100 000. Kwinkoliso yala mazwe uninzi lwabantu lukwiCawa yamaKatolika. Ukanti, khawubone nje imeko yawo. IBrazil inabavakalisi beendaba ezilungileyo abamalunga nama-450 000, ibe bangaphezu kwesi-1 200 000 abebekho kwiSikhumbuzo sokufa kukaKristu ngowe-1997, Omnye umzekelo yiMexico, enamaNgqina amalunga nama-500 000 yaye bebengaphezu kwesi-1 600 000 abebebhiyozela iSikhumbuzo. Amanye amazwe amaKatolika yi-Itali (enamaNgqina amalunga nama-225 000), iFransi (amalunga ne-125 000), iSpeyin (angaphezu kwe-105 000) neArgentina (angaphezu kwe-115 000). EUnited States, apho kutshotsha amaProtestanti, amaKatolika neenkonzo zamaYuda, kukho amaNgqina amalunga nama-975 000 yaye bangaphezu kwezi-2 000 000 abebekho eSikhumbuzweni. Ngokuqinisekileyo, inyambalala yabantu iyayishiya iBhabhiloni Enkulu, ubukhosi behlabathi bonqulo lobuxoki, kunye neemfundiso zayo eziyimfihlelo yaye ibhenela kumadinga kaThixo acacileyo naqinisekileyo “amazulu amatsha nomhlaba omtsha—2 Petros 3:13; Isaya 2:3, 4; 65:17; ISityhilelo 18:4, 5; 21:1-4.

Ukuzivisisanisa Neentswelo Zabantu

10. Ziye zaguquka njani iimeko kwezinye iindawo?

¹⁰ Uninzi Iwabo baye baphethukela kuYehova ngoKristu Yesu baye bafunyanwa kwindlu ngendlu. (Yohane 3:16; IZenzo 20:20) Kodwa zikho nezinye iindlela eziye zasetyenziswa. Amaxesha ngamanye, ibe iimeko zoqoqosho ziye zabangela ukuba amabhinqa amaninzi aye kuphangela. Ngokufuthi, ebudeni beveki, bambalwa abantu abafumaneka besekhaya. Ngenxa yoko, amaNgqina kaYehova aye azivisisanisa naloo meko. NjengoYesu nabafundi bakhe bokuqala, aya kwindawo abanokufumaneka kuyo abantu ngexesha elililo.—Mateyu 5:1, 2; 9:35; Marko 6:34; 10:1; IZenzo 2:14; 17:16, 17.

11. Ashumayela phi amaNgqina kaYehova namhlanje, yaye uyintoni umphumo?

¹¹ Iba ngamaNgqina athabatha inyathelo kuqala nasebenzisa ukuqonda ekushumayeleni kubantu abakwimimandla emikhulu yokupaka iinqwelo-mafutha, koobhazabhaza beevenkile, kwimizi-mveliso, eziofisini nakumashishini, ezikolweni, kwizikhululo zamapolisa, kwiindawo zokutha iinqwelo-mafutha, kwiihotele nakwiivenkile zokutyela nasezitratweni. Enyanisweni, ashumayela naphi na apho abantu bakhoyo. Yaye xa abantu besekhaya, amaNgqina ayaqhubeka esiya emakhayeni abo. Le ndlela yokwenza izinto ibhetyebhetye nesebenzisekayo iye yangunobangela wolwando ekusasazweni koncwadi lweBhayibhile. Kufunyanwa abantu ababumvu. Kuqaliswa izifundo zeBhayibhile ezitsha. Owona msebenzi mkhulu wokufundisa kwimbali yabantu uqhutywa ngenzondelelo ngabalungiseleli bokuzithandela abangaphezu kwezigidi ezihlanu ezinesiqingatha! Ngaba unelungelo lokuba ngomnye wabo?—2 Korinte 2:14-17; 3:5, 6.

Yintoni Eshukumisa AmaNgqina Kayehova?

12. (a) UYehova ubafundisa njani abantu bakhe? (b) Inayiphi impembelelo le mfundiso?

¹² Intlangano yasezulwini ingena njani kuyo yonke le nto? UIsaya waprofeta: “Bonke abantwana bakho baya kuba ngabafundi bakaYehova, lube lukhulu uxolo Iwabantwana bakho.” (Isaya 54: 13) UYehova ufundisa aba bazalwana bamanyeneyo basehlabathini lonke ngentlangano yakhe ebonakalayo yasemhlabeni—kwiiHolo zoBukumkani, kwiindibano ezinkulu nezincinane. Umphumo uba lumanyano noxolo. Imfundiso kaYehova iye yavelisa abantu abahlukileyo, abafundiswe ukuthandana nokuthanda ummelwane njengoko bezithanda, bangabathiyi abamelwane babo, enoba bahlala phi na kweli hlabathi liziintlabazahlukane nelahlu1eleneyo.—Mateyu 22:36-40.

13. Sinokuqiniseka njani ukuba umsebenzi wokushumayela walathiswa ziingelosi?

¹³ Luthando olushukumisa amaNgqina kaYehova ukuba aqhubeke eshumayela phezu kwayo nje inkcaso okanye intshutshiso. (1 Korinte 13:1-8) Ayazi ukuba umsebenzi wawo wokuhlangula ubomi walathiswa ezulwini, njengoko ISityhilelo 14:6 sisitsho. Sisiphi isigidimi esidluliselwa phantsi kolwalathiso lweengelosi? “Moyikeni uThixo nize nimnike uzuko, ngenxa yokuba lifikile ilixa lokugweba kwakhe, yaye ngoko mnquleni Lowo wenza izulu nomhlaba nolwandle nemithombo yamanzi.” Ukushunyayelwa kweendaba ezilungileyo zoBukumkani kuyaliphakamisa igama likaYehova. Abantu bayamenywa ukuba bazukise uMdali, uThixo, kungekhona izidalwa nobuvuvu bemfundiso yendaleko. Yaye kutheni umsebenzi wokushumayela ungxamiseke kangaka? Kungenxa yokuba ilixa lomgwebo lifikile—umgwebo onxamnye neBhabhiloni Enkulu nabo bonke abanye oothunywashe benkqubo yezinto ebonakalayo kaSathana.—ISityhilelo 14:7; 18:8-10.

14. Ngoobani ababandakanyekileyo kweli phulo likhulu lokushumayela?

¹⁴ Akukho mKristu uzahluleleyo ongamele awenze lo msebenzi wokushumayela. Abadala bokomoya bahamba phambili ekushumayeleni nebandla. Oovulindlela abaqeqeshiweyo baxakeke kupheleleyo ngulo msebenzi. Abavakalisi besigidimi soBukumkani abanenzondelelo, enoba bashumayela iiyure ezimbalwa okanye ezininzi ngenyanga, basasaza isigidimi kuzo zonke iimbombo zomhlaba.—Mateyu 28:19, 20; Hebhere 13:7, 17.

15. Yintoni ebonisa ukuba ukushumayela kwamaNgqina kaYehova kube nento okuyiphumezayo?

¹⁵ Ngaba wonke lo mgudu uye wanento oyiphumezayo ehlabathini? Obunye ubungqina obulula nje linani lezihlandlo aye amaNgqina kaYehova avela ngazo kwiinkqubo zikamabonwakude nakwimihlathi yeendaba. Ngokufuthi ezi nkqubo zibalaselisa inzondelelo nokuzimisela kwethu ukufikelela bonke abantu. Ewe, inzondelelo nokuzingisa kwethu zitsho kubonakale, kwanokuba inkoliso yabantu iyasichasa isigididimi kunye nabo basithweleyo!

Inzondelelo Yethu Yokuphumeza Umsebenzi Wokunikela Ubungqina

16. Sisiphi isimo sengqondo esifanele sibonakaliswe kweli xeshana lisaseleyo?

¹⁶ Asazi ukuba lingakanani ixesha eliseleyo kule nkqubo yezinto, phofu ke asinyeke kwazi logama nje intshukumisa yethu yokukhonza uYehova iyecocekileyo. (Mateyu 24:36; 1 Korinte 13:1-3) Kodwa siyazi ukuba ukuze lubonakaliswe uthando, amandla nokusesikweni kukaYehova, “kuqala” kumele kushunyayelwe iindaba ezilungileyo. (Marko 13:10) Ngoko ke, kungakhathaliseki ukuba mingaphi iminyaka esisenokuba siye sayilinda ngolangazelelo ukuze kufike isiphelo seli hlabathi lingendawo, lingenako okusesikweni nelinogonyamelo, simele sikuzondelele ukuphila ngokuvisisana nozahlulelo lwethu ngokuya ngokweemeko zethu. Sisenokuba saluphele okanye siyagula, kodwa sinokumkhonza uYehova ngenzondelelo efana nesasinayo xa sasiselula okanye siseyimiqabaqaba. Mhlawumbi asisakwazi ukuchitha ixesha elininzi kubulungiseleli njengoko besifudula sisenza, kodwa ngokuqinisekileyo sinako ukuligcina lisemgangathweni idini lendumiso yethu eya kuYehova.—Hebhere 13:15.

17. Khawusibalisele amava alukhuthazo naza kusinceda sonke.

¹⁷ Ngoko ke, enoba siselula okanye sibadala, masibonakalise inzondelelo size sabelane nabo bonke esidibana nabo ngesigidimi sethu esakhayo sehlabathi elitsha. Masibe njengentwazana eneentloni yaseOstreliya eyaya evenkileni nonina. Yayivile kwiHolo yoBukumkani indlela ekubaluleke ngayo ukuba wonke umntu ashumayele, ngoko yafaka iincwadana ezinemifanekiso zeBhayibhile ezimbini kwibhegi yayo. Ngoxa unina wayexakekile ekhawuntarini, le ntwazana yaphel’ emehlweni. Xa unina wayikhangelayo, nantso ihambisela elinye ibhinqa incwadana enemifanekiso! Unina waya kweli bhinqa eye kuxolisa ngokuba liphela endlebeni kwentombi yakhe. Kodwa elo bhinqa layamkela ngezandl’ ezishushu le ncwadana inemifanekiso. Xa lo mama wayeyedwa kwakhona nentombi yakhe wayibuza ukuba yayisifumana phi isibindi sokuya kuthetha nomntu engamaziyo. “Ndivele ndathi, Maxhalanga ndidleni! Ndatshona khona ke!”

18. Sinokusibonakalisa njani isimo sengqondo esihle’?

¹⁸ Kufuneka sonke sibe nomoya ofana nowale ntwazana yaseOstreliya, ngokukodwa xa sisiya neendaba ezilungileyo kubantu esingabaziyo okanye kwiindwalutho. Sisenokoyika ukuxhaywa. Masingakulibali oko uYesu wakuthethayo: “Musani ukuxhalela indlela okanye oko niya kuzithethelela ngako okanye oko niya kukutsho; kuba umoya oyingcwele uya kunifundisa kanye ngelo lixa izinto enifanele nizitsho.”—Luka 12:11, 12.

19. Uvakalelwa njani ngobulungiseleli bakho?

¹⁹ Ngoko kholosa ngoncedo lomoya kaThixo njengoko ngobubele usiya ebantwini neendaba ezilungileyo. Izigidi zabantu zikholose ngamadoda namabhinqa angafanele kuthenjwa athi gqi namhlanje aze athi pheselele ngomso. Thina sikholose ngoYehova nangentlangano yakhe yasezulwini—uKristu Yesu, iingelosi ezingcwele namaKristu athanjisiweyo avusiweyo—abaphila ngonaphakade! Ngoko ke, ungalibali: “Baninzi abangakuthi, ngaphezu kwabangakubo”!—2 Kumkani 6:16.

[Umbhalo osemazantsi]

How Do You Answer?

◻ Intlangano kaThixo yasezulwini iye yaphumeza yiphi indima ekuqhubekeni kwabantu bakaYehova?

◻ Ngabaphi oothunywashe bezobupolitika nabonqulo abaye bahlasela amaNgqina kaYehova ngenkulungwane yama-20?

◻ AmaNgqina kaYehova aye abuvisisanisa njani ubulungiseleli bawo neemfuno zala maxesha?

◻ Yintoni ekushukumisela ukuba ushumayele?

[Umfanekiso okwiphepha 17]

UHenryka Żur

[Imifanekiso ekwiphepha 18]

Japan

Martinique

United States

Kenya

United States

AmaNgqina kaYehova ashumayela nanini na yaye naphi na apho abantu bakhoyo

[Umfanekiso okwiphepha 20]

Ngasebutsheni bale nkulungwane, kwakusetyenziswa iigramafoni ukuze kusasazwe isigidimi soBukumkani