Inzululwazi, Unqulo, Nephulo Lokufuna Inyaniso

“Isibakala sokuba iinkonzo ezininzi zobuxoki ziye zanda . . . sibe nempembelelo kum.”—Charles Darwin

EBUTSHENI benkulungwane ye-19, inzululwazi nonqulo zazingumtya nethunga. Incwadi ethi Darwin: Before and After ithi: “Kwanakwiincwadi zenzululwazi, ababhali babengabi mathidala ukuthetha ngoThixo ngendlela eyayibonakala iyeyokwemvelo yaye inyanisekile.”

Incwadi kaDarwin ethi Origin of Species yaba negalelo ekuguquleni oko. Inzululwazi nendaleko zamanyana zaza zalukhuphela ecaleni unqulo—noThixo. UMhlekazi Julian Huxley uthi: “Kwindlela yendaleko yokucinga, ubukho bomdali onamandla angaphezu kwawomntu abuyomfuneko ibe abufanelekanga.”

Namhlanje ingcamango yendaleko kuthiwa sisiseko esibalulekileyo senzululwazi. Esona sizathu siphambili solu lwalamano sichazwa sisazi ngephysics uFred Hoyle: “Izazinzulu ezisadla ngendeb’ endala zikuxhalabele gqitha ukuthintela ukubuyela kwiimbono zamandulo ezigabadeleyo zonqulo kunokuba zikhangele phambili enyanisweni.” Kukuphi oku kugabadela kwenze unqulo lwangathandeki kangaka kwinzululwazi?

Unqulo Luyenzela Udumo Olubi Indalo

Kwilinge labo lokuthethelela iBhayibhile, abo “bakholelwa kwindalo”—uninzi lwabo olwalunxulumene namaProtestanti aphambili—baye bema ngelithi umhlaba nendalo iphela uneminyaka engaphantsi kwe-10 000 ukho. Le mbono igabadeleyo ibangele izazi ngembali yomhlaba nendalo ekuwo, izazi ngeenkwenkwezi, nezazi ngephysics, zikugculele oko kuba kuyaphikisana noko zikufumanisileyo.

Kodwa eneneni ithini iBhayibhile? “Ekuqalekeni uThixo wadala amazulu nehlabathi.” (Genesis 1:1) Akuthethwa nto ngokuba oko kwathabatha ixesha elide kangakanani. “Umhla wokuqala” wokudala awukhankanywa kwaukukhankanywa ngaphambi kweGenesis 1:3-5. “Amazulu nehlabathi” ayesele ekho xa kwaqalisa lo “mhla” wokuqala. Ngoko ke, ngaba kunokwenzeka ukuba amazulu nomhlaba aneminyaka engamawaka ezigidi ekho, njengoko zisitsho izazinzulu? Kusenokwenzeka oko. IBhayibhile ayisixeleli ixesha awabakho ngalo.

Okunye ukugabadela konqulo yindlela bambi abayichaza ngayo ‘imihla’ emithandathu yokudala. Bambi abachaza iBhayibhile ngokoqobo bathi le mihla yeyokoqobo, nto leyo ethetha ukuba umhlaba wadalwa ngeeyure ezili-144. Izazinzulu azikwamkeli oku, kuba zivakalelwa kukuba eli bango liyangqubana nezinto ezicacileyo ezifunyaniswe yinzululwazi.

Noko ke, yindlela aba bantu bayichaza ngokoqobo iBhayibhile abayichaza ngayo—asiyoBhayibhile—engavumelaniyo nenzululwazi. IBhayibhile ayitsho ukuba ‘umhla’ ngamnye wokudala wawuneeyure ezingama-24; eneneni, yonke le ‘mihla’ iyiquka ‘kwimini uYehova uThixo awenza ngayo ihlabathi namazulu’ ende ngakumbi, nto leyo ebonisa ukuba asiyiyo yonke ‘imihla’ ekuthethwa ngayo eBhayibhileni eyayineeyure ezingama-24 kuphela. (Genesis 2:4) Zimbi zisenokuba zazingamawaka amaninzi eminyaka ubude.a

Ngaloo ndlela, ingcamango yendalo iye yenzelwa udumo olubi ngabantu abakholelwa kwimfundiso yendalo yokuzakhela nangabantu abachaza iBhayibhile ngokoqobo. Iimfundiso zabo ngexesha eyabakho ngalo indalo nangobude ‘bemihla’ yokudala azivisisani nenzululwazi esengqiqweni ibe azivisisani neBhayibhile. Noko ke, kukho nezinye iindlela zokugabadela ezenze unqulo lwangathandeki kwizazinzulu.

Ukusetyenziswa Kakubi Kwegunya

Ukutyhubela imbali, unqulo belubekek’ ityala ngenxa yokungabikho kokusesikweni. Ngokomzekelo, ebudeni bamaXesha Aphakathi, imfundiso yendalo yagqwethwa ukuze ithethelele ukuxhasa kwecawa ulawulo lobuzwilakhe lwaseYurophu. Kwakusithiwa abantu babebekwe kwiimeko abakuzo, ukuba zizityebi okanye amahlwempu, ngomyalelo kaThixo. IThe Intelligent Universe iyacacisa: “Oonyana bezityebi ababengamagqibelo babexelelwa ukuba ‘yayiyinkqubo kaThixo’ ukuba bona bafumane izinto ezimbalwa okanye bangafumani nto kwaphela kwizinto zentsapho, yaye indoda esebenzayo yayisoloko ikhuthazwa ukuba ihlale yanelisekile ‘elubizweni uThixo athande ukuyibizela kulo.’”

Akumangalisi ukuba abaninzi boyike ukubuyela ‘kwiimbono zamandulo ezigabadeleyo zonqulo’! Kunokuba lwanelise iintswelo zabantu zokomoya, ngokufuthi unqulo luye lwazixhaphaza. (Hezekile 34:2) Inqaku lomhleli kwiphephancwadi i-India Today lagqabaza lenjenje: “Ngenxa yodumo oluzenzele lona ukutyhubela iminyaka, kuyamangalisa ukuba kube kusekho abasaluthembayo unqulo. . . . Egameni loMdali Ophakamileyo, . . . abantu benze ezona zenzo zenkohlakalo zimasikizi kwabanye abantu.”

Udumo olubi lonqulo lobuxoki lwaba nempembelelo enkulu gqitha kwindlela awayecinga ngayo uDarwin. Wabhala: “Ngokuthe ngcembe ndafikelela kwinqanaba lokuba ndingakholelwa ukuba ubuKristu sisityhilelo sikaThixo. Isibakala sokuba iinkonzo ezininzi zobuxoki zazande kwiindawo ezininzi zomhlaba okomlilo wedobo saba nempembelelo kum.”

Uloyiso Lonqulo Lokwenyaniso

Uhanahaniso lonqulo asinto intsha kweli hlabathi. UYesu wathi kwiinkokeli zonqulo zomhla wakhe ezazinxanelwe igunya: “Nibonakala ningabantu abalungileyo ngaphandle—kodwa ngaphakathi nizele luhanahaniso nobungendawo.”—Mateyu 23:28, Phillips.

Noko ke, ubuKristu bokwenyaniso, “abuyonxalenye yehlabathi.” (Yohane 17:16, NW) Abalandeli babo abananxaxheba kunqulo nakwezobupolitika ezinganyanisekanga; yaye abalahlekiswa ziintanda-bulumko ezibukhanyelayo ubukho boMdali. Umpostile uPawulos wabhala: “Ubulumko beli hlabathi bubudenge kuye uThixo.”—1 Korinte 3:19.

Ukanti, oku akuthethi ukuba amaKristu okwenyaniso akazi nowathwethwa ngenzululwazi. Ngokwahlukileyo koko, abalandeli bonqulo lokwenyaniso banomdla kwinzululwazi. Umprofeti wamandulo uIsaya waxelelwa oku: “Phakamiselani amehlo enu phezulu, nibone: ngubani na owadala ezi zinto?” (Isaya 40:26) Ngokufanayo, ukuze amqonde kakuhle ngakumbi uMdali, uYobhi wacelwa ukuba ahlolisise izinto ezimangalisayo zemvelo nezendalo iphela.—Yobhi, isahluko 38-41.

Ewe, abo bakholelwa kuMdali bayijonga ngentlonelo indalo. (INdumiso 139:14) Ngaphezu koko, bakholose ngoko uMdali, uYehova uThixo, akuthethayo ngethemba elimangalisayo ngekamva. (ISityhilelo 21:1-4) Ngokufundisisa iBhayibhile, izigidi zifunda ukuba umntu akazange avele ngamabona-ndenzile yaye nekamva lakhe alixhomekekanga kuwo. UYehova wayenenjongo xa wayesenza umntu, yaye loo njongo iya kuzaliseka—ukuze kusikelelwe bonke abantu abathobelayo. Siyakumema ukuba ukhe uwuhlolisise ngokwakho lo mbandela.

[Umbhalo osemazantsi]

[Ibhokisi ekwiphepha 6]

NGABA ABAZI NTO NGOBUNGQINA?

IGQWETHA uNorman Macbeth kwincwadi yalo yowe-1971 ethi Darwin Retried—An Appeal to Reason labhala lathi: “KwanamaNgqina kaYehova ayifunde kakuhle ibhayoloji.” Emva kokuba efunde inqaku likaVukani! elithetha ngendaleko, lo kaMacbeth uthi: “Ndimangaliswe kukufumanisa ukuba lalinezizathu ezivakalayo ezigxeka ingcamango kaDarwin.” Ephawula uphengululo olwalwenziwe neengcaphulo zobulumko ezithatyathwe kwiincwadi ezixubusha ngalo mbandela, umbhali waqukumbela ngelithi: “USimpson akasachananga ngokuthi: ‘. . . abo bangayikholelwayo [indaleko], phantse bonke bephela, ngokucacileyo abazi nto ngobungqina benzululwazi.’”

[Umfanekiso okwiphepha 7]

Ikamva loluntu aliyekelwanga kumabona-ndenzile