Ukuvuya Kubuzalwana Bokwenene Behlabathi Lonke

NGOKUBALISWA NGUWILLIE DAVIS

Ngowe-1934 ihlabathi laligutyungelwe kukuDodobala Kwezoqoqosho, yaye iUnited States yayisemgubasini wokuwohloka kwezoqoqosho. Ngaphandle kwiProspect Relief Station eCleveland, eOhio, owakwantsasana wayejijisana nomKomanisi owaziwayo. Owakwantsasana wamdubula waza wambulala umKomanisi nomntu owayemi kufuphi, umakhulu, uVinnie Williams.

AMAKOMANISI azama ukusiguqulela esi siganeko sokufa kwaba bantu njengesibangelwe bubuhlanga, ekubeni umakhulu wayentsundu yaye owakwantsasana emhlophe. Asasaza iincwadi ezithunyelwa kumalungu ezazinomxholo othi “Amapolisa AseCleveland Anobuhlanga” nothi “Mabaphindezelelwe Aba Bantu Babuleweyo.” AmaKomanisi alungiselela aze awusingatha umngcwabo kamakhulu. Ndinomfanekiso wabantu ababethwele ibhokisi yomngcwabo—bonke bemhlophe yaye bonke bengamalungu eli qela. Bonke babephakamise inqindi elisongwe ngendlela eyathi kamva yamkelwa njengomqondiso weBlack Power.

Ngexesha lokufa kukamakhulu, intombi yakhe yayindithwele esibelekweni, yaye kwiinyanga ezine kamva ndazalwa. Ndakhula ndinengxaki yokuthetha. Ndandingakwazi ukuthetha ngaphandle kokuthintitha, ngoko ekuqaliseni kwam esikolweni kwafuneka ndifundiswe nokuthetha.

Abazali bam bahlukana xa ndandineminyaka emihlanu ubudala, yaye mna nodadewethu sakhuliswa ngumama. Xa ndandineminyaka elishumi ubudala, ndaqalisa ukuhambisa iimpahla ezithengiweyo ezindlwini emva kokuphuma kwesikolo ukuze ndincedise kwiindleko zentsapho. Kwiminyaka emibini kamva ndaqalisa ukusebenza ngaphambi kokungena nasemva kokuphuma kwesikolo, ndisiba ngoyena mntu uzisa imali eninzi ekhaya. Xa uMama walaliswa esibhedlele kwaza kwafuneka enziwe utyando kwiindawo ezininzi, ndayeka ukufunda ndaza ndaqalisa ukusebenza ixesha elizeleyo.

Ukuqalisa Ukuba Yinxalenye Yobuzalwana

Ngowe-1944 omnye wamaNgqina kaYehova washiya incwadi ethi “The Truth Shall Make You Free” kumfazi kamza, yaye ndaqalisa ukubakho kwisifundo seBhayibhile esasiqaliswe naye. Kwangaloo nyaka ndaqalisa ukuya kwiSikolo Sobulungiseleli Sobuthixo kwiBandla lase-Eastside. Umqhubi wesikolo, uAlbert Cradock, wayenengxaki yokuthintitha endandinayo, kodwa wayefunde indlela yokuyilawula. Hayi indlela awaba lukhuthazo ngayo kum!

Ubukhulu becala ekuhlaleni kwakuhlala amaTaliyane, amaPolish, amaHungary namaYuda, yaye ebandleni kwakukho abantu bezi ntlanga nezinye izizwe. Mna nomfazi kamza sasiphakathi kwabantu bokuqala abangama-Afrika aseMerika ukunxulumana nebandla labamhlophe, kodwa amaNgqina akazange abonakalise ikhethe lobuhlanga kuthi. Enyanisweni, rhoqo ayendimemela ezidlweni ezindlwini zawo.

Ngowe-1956, ndafudukela kumazantsi elaseUnited States ukuze ndikhonze apho kwakukho imfuneko enkulu yabalungiseleli. Xa ndabuyela kumntla ngelinye ihlobo ndiye kwindibano yesithili, abazalwana abaninzi eCleveland bandityelela baza babonakalisa umdla wokwenene kumsebenzi endandiwenza. Inkxalabo yabo yandifundisa isifundo esibalulekileyo: Ngamaxesha onke ‘ndingaxuneli kwezam izinto zodwa, ndixunele nakwezabanye.’—Filipi 2:4.

Ubulungiseleli Bexesha Elizeleyo Obandisiweyo

Emva kokukhonza iminyaka emithathu kumsebenzi wexesha elizeleyo wokushumayela njengovulindlela, ngoNovemba 1959, ndamenyelwa ukuya kusebenza kwiBheteli eseBrooklyn, ikomkhulu lehlabathi lamaNgqina kaYehova eNew York. Ndabelwa kwiSebe Lokuthunyelwa Koncwadi. Owayevelela isebe lethu, uKlaus Jensen, nendandihlala naye egumbini, uWilliam Hannan, bobabini bengabantu abamhlophe, baba ngoobawo bokomoya. Ngamnye kubo wayekhonze phantse iminyaka engama-40 eBheteli ngexesha endandifika ngalo.

Ekuqaleni kweminyaka yee-1960, kwakukho amalungu entsapho yaseBheteli amalunga nama-600, yaye abamalunga nama-20 babengama-Afrika aseMerika. Ngelo xesha, eUnited States kwakuqalise ukugquba iziphithiphithi zobuhlanga, yaye iintlanga zazingavisisani. Sekunjalo, iBhayibhile ifundisa ukuba “uThixo akamkhethi wabuso bamntu,” yaye nathi asifanele sibe njalo. (IZenzo 10:34, 35) Iingxubusho zokomoya esasiba nazo ngexesha lokutya eBheteli ntsasa nganye zasomeleza ukuze sizimisele ukwamkela imbono kaThixo ngemibandela enjalo.—INdumiso 19:7.

Ngoxa ndandikhonza kwiBheteli yaseBrooklyn ndadibana noLois Ruffin, uvulindlela waseRichmond, eVirginia, yaye satshata ngowe-1964. Sasizimisele ukuhlala kubulungiseleli bexesha elizeleyo, ngoko emva komtshato wethu sabuyela emazantsi eUnited States. Ekuqaleni sakhonza njengoovulindlela abakhethekileyo, yaye ngowe-1965 ndamenyelwa ukuba ndibe kumsebenzi wesiphaluka. Kwiminyaka elishumi eyalandelayo, satyelela amabandla akwilizwana laseKentucky, eTexas, eLouisiana, eAlabama, eGeorgia, eMntla Carolina naseMississippi.

Ukuvavanywa Kobuzalwana Bethu

Leyo yayiyiminyaka yenguqulelo enkulu. Ngaphambi kokuba sifudukele eMzantsi, iintlanga zazahluliwe. Abantsundu babengavunyelwa ngumthetho ukufunda kwizikolo ezifanayo nabamhlophe, ukutya kwiindawo zokutyela ezifanayo, ukulala kwiihotele ezifanayo, ukuthenga kwiivenkile ezifanayo, okanye kwanokusela kumanzi avela kwiqula elinye. Kodwa ngowe-1964 iBhunga laseUnited States lamisela uMthetho Wamalungelo Abantu owaluphelisayo ucalucalulo kwiindawo zikawonke wonke, kuquka nakwezothutho. Ngoko kwakungasekho mthetho wokuxhasa ucalucalulo lobuhlanga.

Ngoko kwaphakama le mibuzo, Ngaba abazalwana noodade wethu kumabandla abantsundu kuphela nawabamhlophe kuphela babeza kuhlanganisana baze babonakalise uthando omnye komnye okanye ngaba ingcinezelo yasekuhlaleni neemvakalelo ezendeleyo zexesha elidluleyo zaziya kubangela bangavumi ukumanyana? Kwakulucelomngeni ukuthobela umyalelo weZibhalo othi: “Mayela nothando olu lobuzalwana, ndithi, yenzelanani ububele; mayela nembeko leyo, phangelanani.”—Roma 12:10.

Kwakudaladala, ingcamango eyayixhaphakile, ingakumbi eMzantsi, yayiyeyokuba abantu abantsundu babengaphantsi. Le mbono yayendele ezingqondweni zabantu phantse kuzo zonke iinkalo zebutho labantu, kuquka nasezicaweni. Ngoko kwakungelula ngabantu abathile abamhlophe ukubagqala abantsundu njengabalingana nabo. Enyanisweni, elo yayilixesha lokuvavanywa kobuzalwana bethu—kwabantsundu nakwabamhlophe.

Okuvuyisayo kukuba ubukhulu becala, kwabakho intsabelo entle ekumanyanisweni kwamabandla ethu. Iimbono ezazibethelelwe nzulu ebudeni beenkulungwane zokuba uhlanga oluthile luphakamile kunolunye azizange ziphele msinya. Kodwa xa kwaqaliswa ukumanyaniswa, abazalwana bethu bakwamkela kakuhle, inkoliso ikuvuyela ukuhlanganisana ndawonye.

Okubangel’ umdla kukuba kwanabo babengengawo amaNgqina ngokufuthi babevumelana nokumanyaniswa kwamabandla ethu. Ngokomzekelo, eLanett, eAlabama, abantu ababehlala kufuphi neHolo yoBukumkani babuzwa enoba babechasile kusini na ukuba abantsundu baze kwiintlanganiso. Ixhegokazi elimhlophe laxhawula umzalwana ontsundu, laza lathi: “Ungeza apha elumelwaneni uze unqule uThixo wakho ngendlela ofuna ngayo!”

Abazalwana Abathembekileyo E-Ethiopia

Ngowe-1974 sakuvuyela ukufumana uqeqesho lobuvangeli basemazweni lweenyanga ezintlanu ezinesiqingatha kwiSikolo seBhayibhile seWatchtower saseGiliyadi kwisiXeko saseNew York. Emva koko sabelwa kwilizwe laseAfrika e-Ethiopia. UHaile Selassie, owayengumlawuli, wayesandul’ ukususwa esihlalweni yaye evalelwe endlwini. Ekubeni umsebenzi wethu wawuvaliwe, sasibuxabisa ububele nomanyano lobuzalwana bethu bobuKristu.

Sasihlala yaye sikhonza nabaninzi abathi kamva babanjwa ngenxa yokubambelela kwabo kunqulo lokwenyaniso. Bambi babazalwana bethu abathandekayo bade babulawa. UAdera Teshome wayengumdala kunye nam kwibandla elikwikomkhulu lase-Ethiopia, iAddis Ababa.a Emva kweminyaka emithathu esentolongweni, wabulawa. Njengoko kulindelekile, umfazi wakhe wayebuhlungu gqitha. Olunjani lona uvuyo okwaba lulo kwiminyaka kamva ukumbona emomotheka luvuyo njengoko wayekhonza njengovulindlela!

UWorku Abebe, omnye umzalwana othembekileyo, wagwetyelwa ukufa izihlandlo ezisibhozo.b Kodwa konke oku akuzange kumoyikise! Ukugqibela kwam ukumbona, wandibonisa iindlebe zakhe ezazidlathukile ngenxa yokubethwa ngabagcini-ntolongo ngomva wompu. Eqhula wathi isidlo sakhe sakusasa, sasemini nesasebusuku yayingumva wompu. Nangona ngoku wafa, usakhunjulwa gqitha ngabazalwana.

UHailu Yemiru ngomnye umzalwana endimkhumbula gqitha.c Wabonisa uthando olungumzekelo ngomfazi wakhe. Wabanjwa, kodwa ekubeni wayekhulelwe yaye eza kubeleka kungekudala, uHailu wacela amagosa entolongo ukuba ibe nguye ovalelwa entolongweni endaweni yakhe. Kamva, xa engazange avume ukulalanisa kukholo lwakhe, wabulawa.—Yohane 15:12, 13; Efese 5:28.

Ngenxa yokuwohloka kwezobupolitika e-Ethiopia, safudukela eKenya ngowe-1976. Kangangeminyaka esixhenxe sasikhonza kumsebenzi wokuhambahamba, sityelela abazalwana kumazwe amaninzi aseMpuma Afrika—kuquka iKenya, i-Ethiopia, iSudan, iziqithi zeSeychelles, iUganda neTanzania. Kwakhona izihlandlo ezininzi ndiye ndatyelela eBurundi naseRwanda ndikwigqiza eliye kuthetha namagosa karhulumente ngokuphathelele ukwamkelwa komsebenzi wethu kuloo mazwe.

Kwakuluvuyo ukubuyela e-Ethiopia ngoJanuwari 1992 ukubakho kwindibano yesithili yokuqala emva kokuvulwa komsebenzi wethu. Abaninzi kwabangaphezu kwama-7 000 ababekho apho babengazani, ekubeni abazalwana ngaphambili babehlanganisana bengamaqela amancinane. Suku ngalunye lwendibano, inkoliso yayifika kwiiyure ezimbini ngaphambi kokuqalisa kocwangciso ize ihlale kude kube sebusuku, inandipha ubuzalwana bethu obunothando.

Ubuzwe Boyisiwe

Kangangeenkulungwane ubuzwe bebugquba eAfrika. Ngokomzekelo, eBurundi naseRwanda, isizwe samaHutu nesamaTutsi, bezithiyene kangangexesha elide. Ukususela ekufumaneni kwala mazwe umaziphathe kwiBelgium ngowe-1962, amawaka ezi zizwe zibini ayebulalana. Ngoko, hayi indlela ekuluvuyo ngayo ukubona amalungu ezi zizwe aye angamaNgqina kaYehova esebenza kunye ngoxolo! Uthando lokwenene alubonakalisa omnye komnye luye lwakhuthaza abaninzi ukuba baziphulaphule iinyaniso zeBhayibhile.

Ngokufanayo, izizwe zaseKenya ziye zanazo iingxabano. Onjani wona umahluko okhoyo kubuzalwana bamaKristu babantu bakaYehova eKenya! Unokubona abantu bezizwe ezahlukeneyo benqula ngokumanyeneyo kwiiHolo zoBukumkani. Kube luvuyo kum ukubona abaninzi baba belahla intiyo yabo yobuzwe baze babonise uthando lokwenene ngabazalwana noodade wabo bezinye izizwe.

Ndiyabuvuyela Ubuzalwana Bethu

Xa ndikhangela emva kwiminyaka engaphezu kwama-50 yokunxulumana nentlangano kaThixo, intliziyo yam izaliswa ngumbulelo kuYehova nakuNyana wakhe, uYesu Kristu. Enyanisweni bekumangalisa ukubona abakwenzileyo emhlabeni! Ewe, iimeko bezingasoloko zigqibelele phakathi kwabantu bakaThixo, yaye akunjalo nanamhlanje. Kodwa akunakulindelwa ukuba iimfundiso zobuhlanga eziye zadluliselwa lihlabathi likaSathana kangangamakhulu eminyaka zinokuphela ngephanyazo. Ngapha koko, sonke asifezekanga.—INdumiso 51:5.

Xa ndithelekisa intlangano kaYehova nehlabathi, intliziyo yam iphuphuma uxabiso ngobuzalwana bethu bokwenene bomhlaba wonke. Ndisabakhumbula gqitha abo bazalwana baseCleveland, bonke bemhlophe, abandikhulisayo enyanisweni. Intliziyo yam yavuya gqitha kukubona abazalwana bethu kumazantsi eUnited States, abamhlophe nabantsundu, beshenxisa iimvakalelo zabo zekhethe besamkela ubuzalwana obunothando. Kwandula ke, ukuya kwam eAfrika ndize ndizibonele ngawam amehlo indlela iLizwi likaYehova elinokuyiphelisa ngayo intiyo yobuzwe kundenze ndabuxabisa ngakumbi ubuzalwana bethu behlabathi lonke.

Enyanisweni, uKumkani uDavide wamandulo wakuvakalisa kakuhle oku xa wathi: “Yabonani, ukuba kuhle, ukuba mnandi, ukuthi abazalwana bahlale bemxhelo mnye!”—INdumiso 133:1.

[Imibhalo esemazantsi]

[Umfanekiso okwiphepha 23]

Umngcwabo kamakhulu

[Umfanekiso okwiphepha 24]

AmaNgqina angamaTutsi namaHutu asebenza kunye ngoxolo

[Umfanekiso okwiphepha 25]

Mna nomfazi wam, uLois