Indlela Yokulungelelanisa Ithala Leencwadi Zobuthixo
USHEREZADE, intombazana encinane ekrelekrele yaseSpeyin, wayeneminyaka emine ubudala xa utitshalakazi wakhe waxelela abantwana abaseklasini ukuba kufuneka bafakele imibala kwimifanekiso ka-“Father Christmas.” Kwangoko, uSherezade wacela imvume yokuba yena angabi nanxaxheba koku. Wachaza ukuba isazela sakhe sasingayi kumvumela ukuba enze oko.
Emangaliswe yindlela alandula ngayo, utitshalakazi wamxelela ukuba oko kwakufana nje nokufaka imibala kumfanekiso kanopopi yaye kwakungekho nto iphosakeleyo koko. USherezade waphendula wathi: “Ukuba ngunopopi nje kuphela, mna bendingathanda ukuzizobela unopopi ngokwam ukuba akukhathazeki.”
Ngesinye isihlandlo abantwana abaseklasini baxelelwa ukuba bafakele imibala kwindwe yesizwe. Kwakhona uSherezade wabuza enoba ebengenakwenza enye into kusini na. Ecacisa oku, waxelela utitshalakazi ngebali likaShadraki, uMeshaki noAbhede-nego.—Daniyeli 3:1-28.
Kungekudala emva koko utitshalakazi watsalela umnxeba unina kaSherezade ukuze avakalise indlela othuke ngayo. Wathi: “Kangangezihlandlo eziliqela intombi yenu iye yandixelela ngesazela sayo. Khawufan’ ucinge? Intombazana elingana naye ngeminyaka indicacisele isizathu sokuba ikhathazwa sisazela sayo! Khangel’ apha, mna andivumelani noko nimfundisa kona, kodwa ndiyaniqinisekisa ukuba niyaphumelela. Yaye ndifuna nazi ukuba ndiyothulel’ umnqwazi intombi yenu.”
Intombazana eneminyaka emine ubudala inokusizuza njani isazela esiqeqeshwe ngeBhayibhile? Unina, uMarina, uchaza ukuba uSherezade kwigumbi lakhe lokulala unethala lakhe lobuqu leencwadi zobuthixo. Eli thala liquka imibhalo yakhe yobuqu yeMboniselo, ayikrwele iimpendulo, uncwadi lwakhe lokushumayela nazo zonke iimpapasho zeWatchtower Society eziye zakhululwa ukususela ekuzalweni kwakhe. Eyona nto ayithandayo kuluhlu lwezinto ezikwithala lakhe leencwadi ziikhasethi ezirekhodiweyo zeNcwadi Yam Yamabali EBhayibhile ayiphulaphula rhoqo ebusuku ngoxa elandela ngokufunda kweyakhe incwadi. Zezi ngxelo zeBhayibhile eziye zamnceda ukuba enze izigqibo ezikhankanywe ngasentla.
Ngaba ithala leencwadi zobuthixo elilungelelaniswe kakuhle lingakunceda wena nabantwana bakho? Kutheni ithala leencwadi lekhaya liyimfuneko nje?
“Ithala Leencwadi Asinto Nje Yobunewunewu”
UHenry Ward Beecher wathi: “Ithala leencwadi asinto nje yobunewunewu, kodwa liyenye yezinto eziyimfuneko ebomini.” Ngokungathandabuzekiyo, phantse sonke sinayo enye yezi zinto “ziyimfuneko ebomini” nangona thina sisenokungakuqondi oku. Ngoba? Kungenxa yokuba enoba sineBhayibhile kuphela, sinayo into enokubizwa ngokuba lithala leencwadi.
Eneneni iBhayibhile lelona thala leencwadi zobuthixo libalaseleyo. Ngenkulungwane yesine, uJerome waqamba ibinzana lesiLatini elithi Bibliotheca Divina (Ithala Leencwadi Zobuthixo) ukuchaza ingqokelela epheleleyo yeencwadi eziphefumlelweyo thina esilibiza ngokuthi yiBhayibhile. UYehova usilungiselele eli thala leencwadi lingcwele ukusinceda, ukusifundisa nokukhokela. Yinto esifanele singaze siyijongele phantsi. Nje ukuba neBhayibhile epheleleyo kuthetha ukuba sinelona thala leencwadi likhulu kunenkoliso yabakhonzi bakaThixo bamaxesha amandulo.
Xa imibhalo-ngqangi ebhalwe ngesandla enexabiso elikhulu yayikuphela kwento efumanekayo, ayembalwa, ukuba ayekho amakhaya awayenayo iBhayibhile epheleleyo. Xa uPawulos wayenqwenela ukufundisisa iZibhalo ebudeni bokuvalelwa kwakhe okokugqibela kwintolongo yaseRoma, kwakumele acele uTimoti ukuba amphathele imisongo eAsia Minor—mhlawumbi iinxalenye ezithile zeZibhalo zesiHebhere. (2 Timoti 4:13) Phofu ke, iingqokelela zale misongo zazigcinwe kwizindlu zesikhungu, yaye uYesu Kristu nompostile uPawulos bawasebenzisa la mathala eencwadi kumsebenzi wabo wokushumayela. (Luka 4:15-17; IZenzo 17:1-3) Okuvuyisayo kukuba, namhlanje iZibhalo zifumaneka ngokulula ngakumbi kunakwinkulungwane yokuqala.
Ngenxa yokuyilwa koomatshini bokushicilela, namhlanje phantse bonke abakhonzi bakaThixo—enoba bathetha luphi ulwimi—banokuyifumana iBhayibhile epheleleyo ngexabiso elifikelelekayo. Kwakhona sinelungelo elikhethekileyo lokongeza kweli “thala leencwadi” lingcwele. Ngaphezu kwenkulungwane, “umkhonzi othembekileyo noqondayo” ebesoloko exakekile elungiselela ukudla kokomoya ngexesha elifanelekileyo.—Mateyu 24:45-47.
Kodwa akunakwenzeka ukuba sizuze ngokuzeleyo kule nkcazelo ixabiseke kunene ukuba asililungelelanisi ithala leencwadi zobuthixo. Kunokwenziwa njani oko? Kakade ke, inyathelo lokuqala, kukufumana iincwadi ezo zifunekayo kwelo thala leencwadi. Kuwufanele umgudu, ekubeni kuya kusinceda sifumane ngokukhawuleza inkcazelo ethe ngqo esiyifunayo ukusingatha iingxaki nokuphendula imibuzo yeBhayibhile.
Ziziphi Iincwadi Endizifunayo?
Ngaba wakha wazibuza ngendlela onokuyicombulula ngayo ingxaki yokuncokolisana emtshatweni wakho okanye indlela onokubanceda ngayo abantwana bakho bathi hayi kwiziyobisi? Unokumnceda njani umhlobo wakho odandathekileyo? Ngaba ungachaza ngokucacileyo ukuba bubuphi ubungqina esinabo bokuba uThixo ukho yaye kutheni evumela ubungendawo? Lifuzisela ntoni irhamncwa elimfusa elikwiSityhilelo isahluko 17?
Le mibuzo neminye engenakubalwa inokuphendulwa ukuba uneencwadi ezaneleyo kwithala lakho leencwadi zobuthixo. IWatchtower Society iye yapapasha iincwadi, iincwadana ezinemifanekiso, namanqaku amaphephancwadi agubungela uluhlu olupheleleyo lwemixholo yeZibhalo. Ngaphezu koko, olu ncwadi luxubusha imibandela yentsapho, lwakha ukholo lwethu kuThixo naseBhayibhileni, luyasinceda siphucule ubuchule bethu bokushumayela, yaye luyasinceda siqonde iziprofeto zeBhayibhile.
Inkoliso yeempapasho ezishicilelwe nguMbutho kuma-20 eminyaka edluleyo zisafumaneka. Ukuba ungene kutshanje enyanisweni, kuya kuba yinto efanelekileyo ukuba wena ufumane lonke olo ncwadi lufumanekayo ngolwimi lwakho. Iincwadi zeembekiselo ezibalaseleyo, ezinjengeInsight on the Scriptures neComprehensive Concordance, nazo ziye zapapashwa ngeelwimi ezahlukeneyo. Phofu ke, ukufumana ezi ncwadi, linyathelo nje lokuqala.
Lungelelanisa Ithala Lakho Leencwadi!
Ukwazi ukuba unencwadi ethile ndaweni ithile kuyenye into, kodwa ukufumana leyo uyifunayo kuyenye into. Ukuba siza kuchitha ixesha elininzi sikhangela incwadi enembekiselo esiyifunayo, kunokwenzeka ukuba siphulukane nomdla kumbandela lowo. Kwelinye icala, ukuba iincwadi zethu sizicwangcise kakuhle, kwindawo efanelekileyo, siya kutyekela ngakumbi ekwenzeni uphando lobuqu.
Ukuba kunokwenzeka, kuluncedo ukuba nesixa seencwadi zobuthixo endaweni enye. Kunokwenziwa iishelufu zencwadi, yaye ngokufuthi ngexabiso elincinane, ukuba asinako ukuthenga esezenziwe, yaye akuyomfuneko ukuba zigqibe indawo enkulu. Kwakhona kubalulekile ukuba kube lula ukufikelela kwithala lakho leencwadi. Iincwadi ezisendaweni enqatyisiweyo zinengenelo encinane yaye ziba nothuli.
Inyathelo elilandelayo kukulungelelanisa ezo ncwadi. Ixesha nje elifutshane olichithele ekucwangciseni ezo ncwadi ngokulandelelana kwazo liyingenelo.
Kuthekani ukuba inkoliso yamalungu entsapho yakowenu ayingawo amaNgqina kaYehova? Nangona usenokungakwazi ukulilungelelanisa ithala leencwadi ngendlela obungathanda ngayo, kwigumbi lakho unokuba neshelufu yeencwadi ubuncinane eneempapasho ezithile zeZibhalo.
Ithala Leencwadi Zobuthixo Linokunceda Ukwakha Ubumoya
Xa sizicwangcisile iincwadi zethu, sifanele sibe nenkqubo ethile yokusinceda sizuze inkcazelo. Sisenokungakhumbuli, yaye sisenokuba ngokobuqu asiqhelananga nako konke okuqulethwe yincwadi nganye kwiincwadi ezikwithala lethu leencwadi zobuthixo. Sekunjalo, yonke inkcazelo ekwithala lethu leencwadi ifumaneka ngokulula. Ukuba iyafumaneka ngolwimi lwethu, iWatch Tower Publications Index inokusinceda sifumane inkcazelo phantse yawo nawuphi na umbandela esiwufunayo ngexesha elifutshane.
UJulián, okhonze iminyaka emininzi njengovulindlela okhethekileyo nanjengomdala, uchaza ukuba i-Index iluncedo kakhulu ekufundiseni unyana wakhe oyena umncinane ukuba enze ufundisiso lobuqu. “UJairo, oneminyaka esixhenxe ubudala, apha ezintsukwini ekufikeni kwakhe ekhaya evela esikolweni wandibuza, ‘Tata, utheni uMbutho ngezirhubuluzi ezizii-dinosaur?’ Saya ngqo kwi-Index saza sakhangela igama elithi ‘dinosaurs.’ Ngokukhawuleza safumana uVukani! [Februwari 8, 1990] onalo mbandela kumanqaku okuqala. Kwangaloo mini uJairo waqalisa ukumfunda. Sele esazi ukuba ithala lethu leencwadi zobuthixo linenkcazelo eluncedo phantse kuwo nawuphi na umbandela. Mna ngokwam, ndeyisekile kwelokuba xa abantwana bethu befunda ukulisebenzisa kakuhle ithala leencwadi zobuthixo, oku kubanceda bakhule ngokomoya. Bafunda ukuqiqa, yaye okungakumbi, bafumanisa ukuba ufundisiso lobuqu lunokunandipheka.”
UFausto, uyise kaSherezade okhankanywe ekuqaleni, ukholelwa ukuba ufanele uqale ngokukhawuleza kangangoko unako ukuqeqesha abantwana ukuba basebenzise ithala leencwadi zobuthixo. Uchaza esithi: “Sesiqalile ukubonisa uSherezade, ngoku oneminyaka emithandathu ubudala, indlela yokusebenzisa i-Index. Njengokuba ethabathekile sisithembiso somhlaba oyiParadisi, saqalisa ngokumbonisa igama elithi ‘paradise’ kwi-Index sandula ke sakhangela amanqaku eMboniselo akhankanyiweyo. Ngokuqhelekileyo sasidla ngokumbonisa nje imifanekiso. Sekunjalo, ngale ndlela uye wafunda ukuba i-Index ingundoqo ekufumaneni inkcazelo kwithala leencwadi lasekhaya. Saqonda ukuba wayeyifumene ingongoma xa wabuya esikolweni ngenye imini enombuzo omalunga nemibhiyozo yeIsta. ‘Kutheni singakhangeli kwi-Index?’ wabuza kunina.”
Enoba sibadala kangakanani na, iBhayibhile isikhuthaza ukuba ‘izinto zonke sizicikide, sibambe leyo intle.’ (1 Tesalonika 5:21) Oku kufuna ukuba sikuhlolisise oko kuthethwa ziZibhalo. (IZenzo 17:11) Ukuba sinethala leencwadi zobuthixo elilungelelaniswe kakuhle, uphando olunjalo lunokuba luyolo. Sihlandlo ngasinye silisebenzisa ngokuphumelelayo ithala lethu ukulungiselela intetho, ukufumana isiluleko esisebenzisekayo ukusingatha ingxaki ethile, okanye ukukhangela inkcazelo enika umdla, kuya kubethelela kuthi ukubaluleka kwethala lethu leencwadi.
Abazali bakaSherezade batsho ngokuphandle ukuba: “Kwindlu yomKristu, ngokucacileyo ithala leencwadi zobuthixo asibobunewunewu!”
[Ibhokisi ekwiphepha 30]
UNGAZICWANGCISA NJANI IINCWADI ZAKHO?
Akukho mgaqo uthe ngqo wendlela yokucwangcisa iincwadi zakho. Sekunjalo, uhlobo lokuzahlula ngokwamacandelo olulandelayo ngumzekelo obonisa enye indlela onokuzicwangcisa ngayo iincwadi zakho ngokweziqulatho.
1. Iincwadi eziqulethe uhlalutyo lweendinyana ngeendinyana zamacandelo athile eBhayibhile
(Imizekelo: Oyena Mntu Ubalaseleyo Wakha Waphila, ISityhilelo—Incopho Yaso Ezukileyo Isondele!, “The Nations Shall Know That I Am Jehovah”—How?, “Mayenziwe Intando Yakho Emhlabeni”)
2. Iincwadi ezinxibelelene nobomi bentsapho
(Imizekelo: Ukwenza Ubomi Bentsapho Yakho Bonwabe, Imibuzo Yabantu Abaselula—Iimpendulo Eziluncedo, Incwadi Yam Yamabali EBhayibhile)
3. IiBhayibhile neencwadi ezinembekiselo
(Imizekelo: New World Translation of the Holy Scriptures—With References, ezinye iiBhayibhile, Watch Tower Publications Indexes, Comprehensive Concordance, Insight on the Scriptures, The Kingdom Interlinear Translation of the Greek Scriptures, isichazi-magama esisemgangathweni)
4. Iincwadi ezisetyenziswa ngoku kwiSifundo Sencwadi Sebandla nakwiSikolo Sobulungiseleli Sobuthixo
5. Iikhasethi ezirekhodiweyo neevideo
6. Imiqulu yeMboniselo noVukani
7. Imbali yamaNgqina kaYehova
(Imizekelo: Yearbooks of Jehovah’s Witnesses, AmaNgqina KaYehova—Abavakalisi BoBukumkani BukaThixo)
8. Iincwadi neencwadana ezinemifanekiso esizisebenzisa rhoqo kubulungiseleli bethu
(Imizekelo: Unokuphila Ngonaphakade KwiParadisi Esemhlabeni, Ukuqiqa NgeZibhalo, Life—How Did It Get Here? By Evolution or by Creation?, Iphulo Loluntu Lokufuna UThixo, Ukumanyana Ekunquleni Okuphela KoThixo Oyinyaniso)
[Umfanekiso okwiphepha 31]
USherezade sele engumfundi weBhayibhile onenzondelelo
[Umfanekiso okwiphepha 31]
Nangona iselula, le nkwenkwe isebenzisa ithala leencwadi zobuthixo