Ilungiselelo Elitsha Lamathala EeHolo ZoBukumkani

Sele kuyiminyaka emininzi ngoku amabandla asehlabathini lonke engenelwa ngokusebenzisa ithala elikwiHolo yoBukumkani, ebelikade lisaziwa njengethala leSikolo Sobulungiseleli Sobuthixo. Kwixa elidluleyo, kuye kwabonakala kufanelekile ukuba ibandla ngalinye libe nethala lalo. Noko ke, ekubeni ngoku iiHolo zoBukumkani ezininzi zisetyenziswa ngamabandla aliqela, kubonakala kulungile ukuba nethala leHolo yoBukumkani elinye, elineencwadi ezipheleleyo neliya kunyamekela amaqela eelwimi asebenzisa loo Holo. KwiiHolo zoBukumkani ezinamagumbi okuhlanganisana angaphezu kwelinye, igumbi lokuhlanganisana ngalinye lifanele libe nethala lolwimi olusetyenziswa liqela elihlanganisana kuyo.

Kulindeleke ukuba eli lungiselelo liya kunceda ekongeni indawo kunye neendleko. Ngaphezu koko, ukudibanisa amathala kuya kuwenza aphucuke nangakumbi. Xa edityaniswa, imibhalo eyongezelelekileyo yeencwadi inokugcinwa ize isetyenziswe kamva xa kusakhiwa iiHolo zoBukumkani ezintsha. Ukuba iHolo yoBukumkani inekhompyutha eneWatchtower Library ekwiCD-ROM, bambi basenokukufumanisa kuyingenelo ukusebenzisa esi sixhobo.

Kwithala leHolo yoBukumkani ngalinye, umzalwana omnye, ukuba kunokwenzeka mayibe ngomnye wabaveleli beSikolo Sobulungiseleli Sobuthixo, ufanele abe ngumgcini-thala. Ufanele ongeze xa kukho iimpapasho ezifunekayo ethaleni, azibhale kakuhle ngaphakathi ukuba zezethala leHolo yoBukumkani. Ubuncinane kanye ngonyaka, ufanele ahlole ithala ukuba lisaphelele kusini na aze aqiniseke ukuba likwimeko entle. Iincwadi ezikula mathala azifanele zikhutshwe kwiHolo yoBukumkani.

Ithala leHolo yoBukumkani lisaxatyiswa kakhulu ngabo bonke abanxulumana nebandla. Ngamana singabonisa ukuba siyalixabisa eli lungiselelo ngokulisebenzisa ukuze sifune “ukumazi uThixo.”—IMize. 2:5.