Imini “Evutha Njengeziko”
“Yabonani, iyeza imini evutha njengeziko.”—MALAKI 4:1.
1. Yiyiphi imibuzo ephakamayo ngokuphathelele uMalaki 4:1?
KULE mihla yokugqibela, banoyolo abo uYehova akhetha ukuwabhala encwadini yakhe yokukhumbuza amagama abo. Kodwa kuthekani ngabo bangalifanelekeliyo eli lungelo? Enoba ngabalawuli okanye ngabantu abaqhelekileyo, kuya kwenzeka ntoni kubo ukuba babajongela phantsi abavakalisi boBukumkani bukaThixo nesigidimi sabo? UMalaki uthetha ngomhla wokuphenduliswa. Kwisahluko 4, indinyana 1, sifunda oku: “Ngokuba, yabonani, iyeza imini evutha njengeziko; baya kuba ziindiza bonke abakhukhumali, nabenzi bonke bokungendawo, ibalenye loo mini izayo, utsho uYehova wemikhosi, ingabashiyeli ngcambu nasebe.”
2. Yiyiphi inkcazelo ecacileyo yomgwebo kaYehova enikelwa nguHezekile?
2 Kwakhona nabanye abaprofeti bafanisa ukugweba kukaYehova iintlanga nobushushu obugqithileyo beziko. Hayi indlela uHezekile 22:19-22 akufanelekela kakuhle ngayo ukugweba kukaThixo amahlelo awexukileyo eNgqobhoko! Ufundeka ngolu hlobo: “Ngako oko itsho iNkosi uYehova ukuthi, Ngenxa yokuba naba ligwebu lentsimbi nonke niphela, ngako oko, yabonani, ndiya kunibutha . . . Njengokuhlanganiselwa kwesilivere nobhedu nesinyithi nelothe nebhekile phakathi eziko, ukuba umlilo uzifuthe, ukuze zinyibilike: ndiya kwenjenjalo ukunibutha ngomsindo wam, nangobushushu bam, ndinifake, ndininyibilikise. Ndonifumba, ndifuthe umlilo wokuphuphuma komsindo wam kuni, ninyibilike phakathi kwawo. Njengokuba isilivere inyibilikiswa phakathi eziko, niya kwenjenjalo ukunyibilikiswa phakathi kwayo; nazi ukuba mna Yehova ndibuthulule ubushushu bam phezu kwenu.”
3, 4. (a) Liliphi ibango lokuhanahanisa elenziwe ngabefundisi? (b) Luluphi udumo olubi unqulo olunalo?
3 Onjani wona ukuba namandla umzekeliso! Abefundisi abaye bakuphepha ukusebenzisa igama likaYehova, bada balinyelisa elo gama lingcwele, bamele bafikelwe yiloo mini yokugwetywa. Bezikhukhumalisa, bazingomb’ isifuba besithi bona namahlakani abo ezobupolitika baya kumisela uBukumkani bukaThixo emhlabeni, okanye ubuncinane benze umhlaba ufanelekele ukuba yindawo uBukumkani obunokufikela kuyo.
4 INgqobhoko ewexukileyo iye yathelela abalawuli bezobupolitika ekulweni iimfazwe ezimasikizi. Imbali inengxelo yeeMfazwe Zomnqamlezo ezaliwa ngamaxesha aphakathi, ukunyanzelwa kwamaguquka kwiiNkundla zaseSpeyin Zokuncina Amakholwa, iMfazwe Yeminyaka Engamashumi Amathathu eyabulala inyambalala yabantu kwelaseYurophu ngenkulungwane ye-17, neMfazwe Yamakhaya yaseSpeyin ngeminyaka yee-1930, eyayisiliwa ukuze kukhuselwe ubuKatolika eSpeyin. Ezona zantyalantyala zegazi zaphalazwa kwiimfazwe zehlabathi ezimbini zenkulungwane yethu, xa amaKatolika namaProtestanti ayengene zwabha emfazweni, ebulala ngokungenalusini abo ayekholwa nabo nabezinye iinkonzo. Kutshanje, kuye kwakho umlo phakathi kwamaKatolika namaProtestanti eIreland, phakathi kwamahlelo onqulo eIndiya, naphakathi kwamaqela eenkonzo zendawo eyayisakuba yiYugoslavia. Imbali yonqulo ikwazaliswe ziingxelo zokuphalazwa kwegazi lamawaka abafeli-nkolo abangamangqina kaYehova athembekileyo.—ISityhilelo 6:9, 10.
5. Nguwuphi umgwebo olindele unqulo lobuxoki?
5 Sinokukuqonda kakuhle ukuba sesikweni komgwebo kaYehova osondelayo kwiBhabhiloni Enkulu, ubukhosi behlabathi bonqulo lobuxoki, nabaxhasi bayo. Lo mgwebo uchazwa kwiSityhilelo 18:21, 24: “Isithunywa esithile esinamandla safunqula ilitye, langa lilitye lokusila, ukuba likhulu kwalo; saliphosa elwandle, sisithi: Iya kwenjiwa nje ke ukugadlelwa kwayo iBhabheli, umzi omkhulu, ingabi saba safunyanwa. Kuwo kwafunyanwa igazi labaprofeti, nelabangcwele, nelabo bonke abasikiweyo emhlabeni.”
6. (a) Ngoobani abamele babe njengeendiza, yaye ngoba? (b) Baqinisekiswa ngantoni abo boyika uYehova?
6 Ekuhambeni kwexesha, zonke iintshaba zobulungisa, nabo babambelele kuzo, “baya kuba ziindiza.” Kubo imini kaYehova iya kuvutha njengeziko. “Ingabashiyeli ngcambu nasebe.” Ngaloo mini yomgwebo, abantwana abancinane, okanye amasebe, ngokusesikweni baya kohlwaywa ngokuvisisana nendlela uYehova azijonga ngayo iingcambu zabo, abazali babo, abongamela aba bantwana. Abazali abangendawo abayi kuba nazizukulwana zakuhambisela phambili iindlela zabo ezingendawo. Kodwa abo banokholo kumadinga oBukumkani bukaThixo abayi kuchukunyiswa. Ngoko ke amaHebhere 12:28, 29 abongoza esithi: ‘Masibe nombulelo, simkhonze ngawo uThixo ngokukholekileyo, sinokuhlonela nokoyika; kuba uThixo wethu ungumlilo odlayo.’
Ngaba UYehova NguThixo Okhohlakeleyo?
7. Uthando lukaYehova ludibana njani nomgwebo wakhe?
7 Ngaba oku kuthetha ukuba uYehova nguThixo okhohlakeleyo nonenqala? Akunjalo konke konke! Kweyoku-1 kaYohane 4:8, lo mpostile uchaza le nyaniso isisiseko: “UThixo uluthando.” Andule ke, kwindinyana 16 agxininise kwakhona, esithi: “UThixo uluthando; lowo uhleli eluthandweni uhleli kuye uThixo, noThixo uhleli kuye.” Kungenxa yothando lwakhe ngoluntu le nto uYehova enenjongo yokucoca bonke ubungendawo kulo mhlaba. UThixo wethu onothando nonenceba uvakalisa oku: “Ndihleli nje, . . . unakanye ukuba kube mnandi kum ukufa kongendawo; kumnandi kum ukubuya kongendawo endleleni yakhe, aphile. Buyani, buyani ezindleleni zenu ezimbi! Yini na ukuba nide nife?”—Hezekile 33:11.
8. UYohane walubethelela njani uthando, waza sekunjalo wazibonisa enguNyana weeNdudumo?
8 UYohane uthetha izihlandlo ezininzi ngoa·gaʹpe, uthando lomgaqo, kunabanye ababhali beVangeli bobathathu, ukanti kuMarko 3:17, uYohane uchazwa ‘njengoNyana weeNdudumo.’ Lo Nyana weeNdudumo waphefumlelwa nguYehova ukuba abhale izigidimi zesityhilelo ezikwincwadi yokugqibela yeBhayibhile, ISityhilelo, ezibonisa uYehova njengoThixo ophumeza okusesikweni. Le ncwadi izaliswe ngamazwi avakalisa umgwebo, njengathi ‘isixovulelo esikhulu somsindo kaThixo,’ ‘iingqayi ezisixhenxe zomsindo kaThixo,’ nathi ‘ingqumbo kaThixo uSomandla.’—ISityhilelo 14:19; 16:1; 19:15.
9. UYesu wasebenzisa waphi amazwi ukuchaza imigwebo kaYehova, yaye iziprofeto zakhe zazalisekiswa njani?
9 INkosi yethu uYesu Kristu, ‘ongumfanekiselo kaThixo ongenakubonwa,’ ngoxa yayilapha emhlabeni yavakalisa imigwebo kaYehova ngenkalipho. (Kolose 1:15) Ngokomzekelo, kukho ooyeha abasixhenxe kuMateyu isahluko 23 eyabavakalisa ngokungqalileyo kubahanahanisi bonqulo bomhla wayo. Loo migwebo yayiqukumbela ngala mazwi: “Yerusalem, Yerusalem, wena ubabulalayo abaprofeti, ubagibisele ngamatye abo bathunywe kuwe, kufuthi kangakanani na ndithande ukubabuthela ndawonye abantwana bakho, ngohlobo esithi isikhukukazi siwabuthele ndawonye amathole aso ngaphantsi kwamaphiko, anavuma! Yabonani, indlu yenu ishiywa nani ize.” Kwiminyaka engama-37 kamva, umgwebo wayo waphunyezwa ngumkhosi wamaRoma ukhokelwa nguNjengele Titus. Leyo yayiyimini eyoyikekayo, isisiprofeto seyona mini iya koyikeka kuzo zonke ezakha zafikela abantu—imini kaYehova, eza kufika kungekudala.
“Ilanga” Liyakhanya
10. “Ilanga lobulungisa” libazisela uvuyo njani abantu bakaThixo?
10 UYehova uvakalisa ukuba kuya kubakho abasindi ngemini yakhe. Ubhekisela kwaba kuMalaki 4:2, esithi: “Ke kuni, nina baloyikayo igama lam, ilanga lobulungisa liya kuphuma, linophiliso emaphikweni alo.” Elo langa lobulungisa nguYesu Kristu. ‘Ulukhanyiselo lokomoya lwehlabathi.’ (Yohane 8:12) Ukhanyisa njani? Undanda ngamaphiko aphilisayo—okokuqala uphilisa ngokomoya, nto leyo esinokuyinandipha nanamhlanje, andule ke, kwihlabathi elitsha elizayo, aphilise ngokwenyama abantu bazo zonke iintlanga. (Mateyu 4:23; ISityhilelo 22:1, 2) Ngokufuziselayo, njengokuba uMalaki watshoyo, abaphilisiweyo baya ‘kuphuma badlobe, njengamankonyana’ asandul’ ukuphuma esitalini. Kwakhona olunjani lona uvuyo abaya kuba nalo abo bavusiweyo kwaye benethemba lokuba ngabantu abafezekileyo!
11, 12. (a) Ekugqibeleni kuya kwenzeka ntoni kwabangendawo? (b) Abantu bakaThixo ‘babaxovula njani abangendawo’?
11 Noko ke, kuthekani ngabangendawo? KuMalaki 4:3 sifunda oku: “Nibaxovule abangendawo; ngokuba baya kuba luthuthu phantsi kweentende zeenyawo zenu ngemini endikwenzayo oku; utsho uYehova wemikhosi.” Ngoxa ebalondolozile abo bamthandayo, uThixo wethu onguMphumi-mkhosi uya kuba ewucocile umhlaba ngokususa ezo ntshaba zikhohlakeleyo, aziphanzise. USathana needemon zakhe baya kuba bevalelwe.—INdumiso 145:20; ISityhilelo 20:1-3.
12 Abantu bakaThixo abananxaxheba ekutshatyalalisweni kwabangendawo. Ngoko, ‘babaxovula njani abangendawo’? Oku bakwenza ngokufuziselayo ngokuba nesabelo kumsitho omkhulu woloyiso. IEksodus 15:1-21 ichaza umsitho onjalo. Walandela ukutshatyalaliswa kukaFaro namahlakani akhe kuLwandle Olubomvu. Kuzaliseka uIsaya 25:3-9, ukususwa ‘kwabangcangcazelisayo’ kuya kulandelwa sisidlo soloyiso esinxulumene nedinga likaThixo: “Iya kuginya ukufa kuphele, izisule iNkosi uYehova iinyembezi ebusweni bonke, ingcikivo yabantu bayo iyisuse ehlabathini lonke, kuba uYehova ethethile. Kuya kuthiwa ngaloo mini, Yabona, lo nguThixo wethu; . . . NguYehova lo besithembele kuye; masigcobe, sivuye ngosindiso lwakhe.” Kolu vuyo asiboni nqala okanye kuzigwagwisa, kodwa luvuyo lokubona igama likaYehova lingcwalisiwe nomhlaba ucociwe ukuze uhlalwe ngoxolo luluntu olumanyeneyo.
Inkqubo Yokufundisa Ezukileyo
13. Kukuphi ukufundisa okuya kuqhubeka ‘kumhlaba omtsha’?
13 KuMalaki 4:4, amaYuda abongozwa ukuba ‘akhumbule umyalelo kaMoses.’ Ngoko namhlanje kufuneka silandele “umthetho kaKristu,” okhankanywe kumaGalati 6:2. Ngokungathandabuzekiyo abasindileyo kwiArmagedon baya kunikwa imiyalelo engakumbi esekelwe kuwo, ibe kusenokwenzeka ibhalwe ‘kwiincwadi’ ezichazwe kwiSityhilelo 20:12 eziya kuvulwa ngexesha lovuko. Hayi indlela eya kuzuka ngayo loo mini, xa abavuswe ekufeni befundiswa ukulandela indlela yokuphila ‘yomhlaba omtsha’!—ISityhilelo 21:1.
14, 15. (a) Uchazwa njani uEliya wanamhlanje? (b) Yiyiphi imbopheleleko ephunyezwa ludidi lukaEliya?
14 Oko iya kuba kukwandiswa komsebenzi wokufundisa uYehova athetha ngawo, njengokuba kubhalwe kuMalaki 4:5: “Yabonani, ndiya kuthumela kuni uEliya umprofeti, ingekafiki imini enkulu eyoyikekayo kaYehova.” Ngubani uEliya wanamhlanje? Njengokuba kuboniswe kuMateyu 16:27, 28, ethetha ‘ngokuza kwakhe esebukumkani’, uYesu wathi: “UNyana woMntu uza kuza esebuqaqawulini boYise, enezithunywa zakhe, andule ukubavuza bonke ngabanye ngokokwenza kwabo.” Kwiintsuku ezintandathu kamva, esentabeni noPetros, uYakobi noYohane, “wenziwa waba kumila kumbi phambi kwabo, bathi ubuso bakhe bakhazimla njengelanga, zasuka ke iingubo zakhe zamhlophe njengokukhanya.” Ngaba wayeyedwa kulo mbono? Akunjalo, kuba “Nanko kubonakala kubo uMoses noEliya, bethetha naye.”—Mateyu 17:2, 3.
15 Kwakuthetha ntoni oku? Kwakusalatha kuYesu njengoMoses Omkhulu ngexesha lokuza kwakhe ezokugweba. (Duteronomi 18:18, 19; IZenzo 3:19-23) Ngelo xesha wayeya kunxulumana noEliya wanamhlanje ukuze aphumeze umsebenzi obalulekileyo, lowo wokushumayela iindaba ezilungileyo zoBukumkani kuwo wonke umhlaba ngaphambi kokufika kwemini enkulu neyoyikekayo kaYehova. Echaza umsebenzi walo “Eliya,” uMalaki 4:6 uthi: “Wobuyisela iintliziyo zooyise kubantwana, neentliziyo zabantwana kooyise, hleze ndize ndilichithe ilizwe ngokuliphanzisa.” Ngaloo ndlela lo “Eliya” uchazwa njengamaKristu athanjisiweyo odidi lomkhonzi othembekileyo noqondayo asesemhlabeni, eyathi iNkosi, uYesu, yawaphathisa yonke impahla Yayo. Oku kuquka ukubanika abendlu yokholo ‘ukudla kokomoya okufunekayo ngexesha elifanelekileyo.’—Mateyu 24:45, 46.
16. Yiyiphi imiphumo evuyisayo eye yaveliswa ngumsebenzi wodidi lukaEliya?
16 Namhlanje ehlabathini lonke, sinokuyibona imiphumo evuyisayo yaloo nkqubo yokondla. Iphephancwadi IMboniselo, ekushicilelwa izi-16 100 000 kwinkupho nganye yalo ngeelwimi ezili-120, ezingama-97 kuzo ziphuma ngaxesha-nye, lizalisa umhlaba ‘ngeendaba ezilungileyo zobukumkani.’ (Mateyu 24:14) Kwiinkalo ezahlukeneyo zomsebenzi wokushumayela nokufundisa wamaNgqina kaYehova kusetyenziswa nezinye iimpapasho ngeelwimi ezininzi. Udidi lukaEliya, umkhonzi othembekileyo noqondayo, lukuphaphele ukuxhasa ngokuyintabalala bonke “abangamahlwempu ngomoya.” (Mateyu 5:3) Ngaphezu koko, abo balamkelayo eli themba loBukumkani baze benze ngokuvisisana nalo bayinxalenye yomanyano olumangalisayo lwehlabathi lonke. Luquka isihlwele esikhulu ‘esiphuma kuzo zonke iintlanga, nezizwe, nabantu, neelwimi.’ (ISityhilelo 7:9) Xa lo msebenzi uphunyezwe ngomlinganiselo uYehova afuna ngawo, kuya kwandula ke ukufika ukuphela ngemini yakhe enkulu neyoyikekayo.
17. Iya kufika nini imini kaYehova eyoyikekayo?
17 Kodwa iya kufika nini loo mini yoyikekayo? Umpostile uPawulos uyaphendula: “Imini yeNkosi, njengesela ebusuku, yenjenjalo ukuza kwayo. Kuba xenikweni baya kuthi [ngendlela ekhethekileyo], Luxolo nokunqaba, oko baya kufikelwa yintshabalaliso ngebhaqo, kwanjengenimba komithiyo; baye bengayi kukha basinde.”—1 Tesalonika 5:2, 3.
18, 19. (a) Luvakaliswa njani “uxolo nokunqaba”? (b) Baya kukhululwa nini abantu bakaYehova?
18 Ngoobani aba kuthiwa “baya” kwesi siprofeto? Ziinkokeli zobupolitika ezizibanga zinokwakha ulungelelwaniso olutsha olumanyeneyo zisebenzisa amazwe angamanyananga eli hlabathi linogonyamelo. Iimveliso zawo ezidumileyo, uManyano Lwezizwe neZizwe Ezimanyeneyo, aziphumelelanga ekwenzeni oku. Njengokuba umprofeti kaYehova waxela kwangaphambili, kwanangoku ‘bathi, Luxolo, luxolo; kungekho luxolo.’—Yeremiya 6:14; 8:11; 14:13-16.
19 Okwangoku, abantu bakaYehova basanyamezele iingcinezelo neentshutshiso zeli hlabathi lingahloneli Thixo. Kodwa kungentsuku zatywala, njengokuba isitsho eyesi-2 kwabaseTesalonika 1:7, 8, baya kukhululwa “ekutyhilekeni kweNkosi uYesu, ivela emazulwini inezithunywa zamandla ayo; inomlilo odangazelayo, ibaphindezela abangamaziyo uThixo, nabangazilulameliyo iindaba ezilungileyo zeNkosi yethu uYesu.”
20. (a) UZefaniya noHabhakuki baprofeta ntoni ngemini “evutha njengeziko”? (b) Sisiphi isiluleko nokhuthazo olukhoyo kwezi ziprofeto?
20 Kusondele kangakanani oko? Abaninzi kuthi sele benexesha elide belindile. Kwangaxesha nye, abalulamileyo abaninzi abaya kusinda basabela kubizo olukuZefaniya 2:2, 3: “Funani uYehova . . . funani ubulungisa, funani ululamo. Mhlawumbi nositheliswa ngemini yomsindo kaYehova.” Wandula ke uZefaniya 3:8 abe nesi sibongozo: “Ngako oko yilindeleni kum, utsho uYehova, ide ibe yimini yokuvuka kwam, ndithimbe. Ngokuba kulunge kum ukuhlanganisa iintlanga, ndibuthe izikumkani, ukuze ndiyiphalaze ingqumbo yam phezu kwazo, konke ukuvutha komsindo wam; kuba liya kutshiswa ngumlilo wekhwele lam lonke ihlabathi.” Isiphelo asifikanga sigalelekile! UYehova uyawazi loo mhla neyure yaye akayi kuyiguqula indlela alicwangcise ngayo ixesha. Masinyamezele ngomonde. “Kuba umbono usaya kuba ngowexesha elimisiweyo, ukhawulezela ekupheleni, angathethi wona amanga; ukuba uthe wazilazila, wulinde, kuba uya kuza, awuyi kubuya umva.” (Habhakuki 2:3) Imini kaYehova eyoyikekayo isondela ngokukhawuleza. Khumbula, loo mini ayisayi kubuya umva!
Impinda:
◻ Kuya kwenzeka ntoni kubalawuli nakubantu abaqhelekileyo ngemini kaYehova eyoyikekayo?
◻ UYehova nguThixo onjani?
◻ Yimfundo enjani eya kufunyanwa ngabantu bakaThixo?
◻ Abaprofeti bakaThixo basibongoza njani ngenxa yokusondela kwesiphelo?
[Umfanekiso okwiphepha 21]
Ebudeni bokuNcinwa Kwamakholwa eSpeyin abaninzi banyanzelwa ukuba baguqukele kubuKatolika
[Inkcazelo]
The Complete Encyclopedia of Illustration/J. G. Heck