Ukuthobela UThixo Kwintsapho Eyahluleleneyo Ngonqulo

“KWENZAKALISA ngaphezu kokubethwa emzimbeni. . . . Ndiziva ngathi ndinezivubeko kuwo wonke umzimba, ibe sekunjalo akukho mntu uzibonayo.” “Maxa wambi ndiziva ndinqwenela ukufa . . . okanye ndilishiye ikhaya ndingaze ndiphinde ndibuye.” “Maxa wambi kunzima nokucingisisa kakuhle.”

Loo mazwi abuhlungu atyhila iimvakalelo zokuphelelwa lithemba nokuba lilolo. Aphuma kumaxhoba okuxhatshazwa ngamazwi—ezityholo, ezisongelo, ukuthukwa ngokuthob’ isidima, ukungahoywa ngokugqithiseleyo—kwanokuxhatshazwa emzimbeni ngamaqabane awo namalungu entsapho. Kutheni aba bantu bephethwe kakubi kangaka nje? Kungenxa nje yeenkolelo ezahlukileyo zonqulo. Phantsi kwezi meko, ukuhlala kwintsapho eyahluleleneyo ngonqulo kwenza ukunqula uYehova kube lucelomngeni lokwenene. Sekunjalo, uninzi lwaloo maxhoba angamaKristu akubonakalisa ngokunempumelelo ukuthobela uThixo.

Okuvuyisayo kukuba oko kubandezeleka nokucinezeleka akukho kuwo onke amakhaya ahluleleneyo ngonqulo. Sekunjalo, kona kukho. Ngaba nelakho ikhaya likwanjalo? Ngoko, unokukufumanisa kunzima ukuhlonela iqabane lakho okanye abazali bakho. Ukuba ungumfazi okuloo meko okanye ningabantwana abakuloo meko, ningaphumelela njani ekuthobeleni uThixo kwintsapho eyahluleleneyo ngonqulo? Banokubaxhasa njani abanye? Yaye uThixo uwujonga njani lo mbandela?

Kutheni Kunzima Kangaka Nje Ukuthobela?

Ukuzingca nokungabi nambulelo kweli hlabathi xa kudibene notyekelo lwethu lokungafezeki kwenza ukuthobela uThixo kube ngumzabalazo ozingisileyo. USathana uyakwazi oku, yaye injongo yakhe kukulwaphula uzimiselo lwakho. Ngokufuthi usebenzisa amalungu entsapho anoxabiso nentlonelo encinane okanye angenayo kwaphela intlonelo ngemilinganiselo kaThixo. Ngokufuthi imilinganiselo yakho ephakamileyo yokuziphatha neyokomoya yahluke gqitha kunaleyo yentsapho yakho engakholwayo. Oku kuthetha ukungqubana kweembono ngehambo nomsebenzi. (1 Petros 4:4) Ingcinezelo yokukushenxisa kumlinganiselo wobuKristu inokuba qatha, ekubeni uthobele lo myalelo uthi: “Musani ukuba nabudlelane ngemisebenzi yobumnyama engenasiqhamo.” (Efese 5:11) Ngokokubona kwabo yonke into oyenzayo ayilunganga. Konke oko kubangelwa lunqulo lwakho. Omnye umama, xa wayexakene nabantwana abagulayo, wacela uncedo kumyeni wakhe waza wafumana impendulo ephoxayo, “Unalo ixesha lonqulo lwakho; akuluswelanga uncedo.” Amagqabaza anjengalawo ongezelela kucelomngeni lokuthobela.

Kwandula ke kubekho amaxesha okuba ningavumelani ngemibandela engekokuvukelwa ngokungqalileyo kweZibhalo. Sekunjalo, uyaqonda ukuba ulilungu lentsapho yaye ukusa kuloo mkhamo uneembopheleleko ezithile. UConnie uthi: “Ndikhathazeka gqitha xa ndicinga ngendlela utata asiphatha ngayo kuba ndiyaqonda ukuba uziva elilolo. Ngokufuthi kuye kufuneke ndizikhumbuze ukuba ndingayithiyi inkcaso katata. Kufuneka ndizixelele ukuba kukho isizathu esinamandla esimbangela asabele okanye akukhabe ngawo omane ukuma kwethu. USathana ungumlawuli wale nkqubo yezinto.” USusan, otshate nongakholwayo, uzityand’ igila esithi: “Ekuqaleni ndandidla ngokuziva ndifuna ukwahlukana naye—kodwa akusenjalo ngoku. Ndandisazi ukuba uSathana wayemsebenzisa ukuze andilinge.”

Imigudu kaSathana yokukwenza uzive ungento yanto isenokubonakala iyengapheliyo. Iintsuku zisenokudlula ningathethisani neqabane lakho. Ubomi bunokuba sisithukuthezi. Oku kunokuphelisa ukuzithemba nokuzihlonela kuze kuvavanye ukumthobela kwakho uThixo. Abantwana nabo basenokuziva bengahoywa ngokweemvakalelo nangokwasemzimbeni. Ngesinye isihlandlo, nangona abazali babo babengafuni, abakhonzi bakaThixo abathathu abaselula babesiya rhoqo kwiintlanganiso zamaKristu. Omnye wabo, ongumlungiseleli wexesha elizeleyo ngoku, wavuma esithi: “Sasidla ngokuziva sidakumbile yaye sityhafile; ubuthongo babungehli; iintliziyo zethu zazibuhlungu.”

Yintoni UThixo Ayilindeleyo Kuwe?

Ukuthobela uThixo kusoloko kubekwa tanci, yaye ukuthobela ubuntloko bendoda ukusa kumlinganiselo othile kumele kusoloko kunjengoko uYehova esalathisa. (IZenzo 5:29) Oko kusenokuba nzima, kodwa kusenokwenzeka. Hlala ujonge kuThixo ukuba akuncede. Ufuna ukuba ‘umnqule ngoMoya nangenyaniso’ uze uphulaphule yaye ulandele ulwalathiso lwakhe. (Yohane 4:24) Ulwazi olufumaneka eLizwini likaThixo, njengokuba luzalisa intliziyo elungileyo, lukushukumisela ukuba ukulungele ukuthobela. Nangona iimeko zakho zobuqu zisenokutshintsha, uYehova neLizwi lakhe abatshintshi. (Malaki 3:6; Yakobi 1:17) UYehova ubunike indoda ubuntloko. Oku kuhlala kunjalo enoba iyabamkela ubuntloko bukaKristu okanye ayibamkeli. (1 Korinte 11:3) Nangona kusenokuba nzima ukukunyamezela oku ukuba ujamelene nokuxhatshazwa nokwenziwa intlekisa ngokuzingisileyo, umfundi uYakobi uthi: “Ubulumko baphezulu . . . buthozame kakuhle.” (Yakobi 3:17) Ukuze ubugqale ngokupheleleyo obu buntloko uze ubamkele kufuneka umoya kaThixo, ngokukodwa isiqhamo sawo esiluthando.—Galati 5:22, 23.

Xa uthanda umntu othile, kulula ngakumbi ukubonakalisa ukuthobela uThixo kwigunya elimiswe nguThixo. Eyabase-Efese 5:33 inikela esi siluleko: “Kodwa ke manithi nani ngabanye, elowo amthande umkakhe, njengoko azithanda ngako; umfazi ke makayoyike indoda.”

Khawucinge ngoYesu. Waxhatshazwa ngamazwi nasemzimbeni, sekunjalo akazange anyelise namnye. Wagcina udumo olungenasiphako. (1 Petros 2:22, 23) Ukuze uYesu akwazi ukunyamezela oko kudelelwa kungako, wayefuna inkalipho engathethekiyo nothando oluqhubekayo ngoYise, uYehova. Kodwa, uthando “lunyamezela iinto zonke.”—1 Korinte 13:4-8.

UPawulos wakhumbuza uTimoti awayesebenza kunye naye, yaye uyasikhumbuza nathi namhlanje: “UThixo akasinikanga moya wabugwala; wasinika owamandla, nowothando, nowesidima.” (2 Timoti 1:7) Uthando olunzulu ngoYehova nangoYesu Kristu lunokukukhuthazela ekuthobeleni uThixo xa iimeko zibonakala zingenakunyamezeleka. Ukuba nengqiqo kuya kukunceda ube nembono elungeleleneyo uze ugcine ingqalelo yakho kulwalamano lwakho noYehova kunye noYesu Kristu.—Thelekisa eyabaseFilipi 3:8-11.

Amaqabane Aphumelelayo Ekubonakaliseni Ukuthobela UThixo

Maxa wambi kufuneka ulinde ixesha elide ukuze ubone indlela uYehova aya kuzicombulula ngayo iingxaki zakho. Sekunjalo, isandla sakhe asisifutshane. Omnye ophumelelayo ekubonakaliseni ukuthobela uThixo ucebisa oku: “Ngalo lonke ixesha yenza izinto uYehova akunika imfanelo nelungelo lokuba uzenze—ukumnqula ezintlanganisweni nasezindibanweni, ukufundisisa, ukuya entsimini, nokuthandaza.” UYehova usikelela imigudu yakho, kungekhona nje oko ukuphumezileyo. Kweyesi-2 yabaseKorinte 4:17, umpostile uPawulos wathi ‘imbandezelo yethu yeyomzuzwana isisebenzela ngokuncamise kwaphela ubuqaqawuli obukhulukazi obungunaphakade.’ Khawucamngce ngoku. Kuya kukuzinzisa. Omnye umfazi uthi: “Ubomi bentsapho yam abuphucuki, ibe maxa wambi ndiye ndizibuze enoba uYehova uyakholiswa na ndim. Kodwa enye into endiyithabatha njengentsikelelo yakhe yinto yokuba mna ndiphuma ndisezingqondweni kunomyeni wam kwezi meko zinzima. Ukwazi ukuba oko sikwenzayo kuyamkholisa uYehova kwenza yonke le ngxaki iwufanele umgudu.”

UYehova uyathembisa ukuba akayi kukuvumela ube kwiimeko ezinzima ngaphezu konokuzinyamezela. Kholosa ngaye. Wazi ngaphezu kokuba usazi, yaye ukwazi ngaphezu kokuba uzazi wena. (Roma 8:35-39; 11:33; 1 Korinte 10:13) Ukuthandaza kuYehova kwiimeko ezinzima kuyanceda. Thandazela umoya wakhe ukuba ukukhokele, ngokukodwa xa ungazi ikhondo omawulithabathe okanye indlela yokusingatha imeko ethile. (IMizekeliso 3:5; 1 Petros 3:12) Mbongoze ngokuzingisileyo ukuba akuphe umonde, ukuzeyisa, nokuthobeka ukuze uthobele igunya ebomini bakho. Umdumisi wathi: “Yehova, ngxondorha yam, mboniselo yam, msindisi wam.” (INdumiso 18:2) Ukukhumbula oku kuluncedo olomelezayo kwabo bakwiintsapho ezahluleleneyo ngonqulo.

Ngaphezu koko, yenza zonke iinzame ukwenza umtshato wakho ube ngowonwabileyo. Ewe, uYesu wabona kwangaphambili ukuba iindaba ezilungileyo zaziya kubangela ukwahlukana. Noko ke, thandazela ukuba nayiphi na iyantlukwano ingabangelwa sisimo sakho sengqondo okanye yihambo yakho. (Mateyu 10:35, 36) Unaloo njongo engqondweni yakho, intsebenziswano iyazinciphisa iingxaki zomtshato. Kwanaxa ubonakalisa esi simo sengqondo sifanelekileyo kuphela, sinokwenza okukhulu ekuthinteleni iingxaki ukuba zifike kwinqanaba lokungquzulana nokungavani ngokugqithiseleyo. Umonde nothando zibaluleke gqitha. “Thantamisa” yaye “nyamezela ububi.”—2 Timoti 2:24.

Umpostile uPawulos ‘kubo bonke wesuka waba ziinto zonke.’ (1 Korinte 9:22) Ngokufanayo, ngoxa ungatyesheli iimbopheleleko zakho zobuKristu, maxa wambi kusenokufuneka uhlengahlengise ucwangciso lwakho ukuze uchithe ixesha elingakumbi neqabane lakho kunye nentsapho yakho. Yiba nexesha elininzi kangangoko kunokwenzeka nalowo wawukhethe ukuchitha ubomi bakho naye. Bonakalisa ulwazelelelo lobuKristu. Oku kuyimbonakaliso yokuthobela uThixo.

Umfazi owoyika uThixo nothobelayo obhetyebhetye nonovelwano ukufumanisa kulula ngakumbi ukubonakalisa ukuthobela uThixo. (Efese 5:22, 23) Amazwi obubele, ‘avakaliswe ngetyuwa,’ ayanceda ukunciphisa amathuba okruthakruthwano olunokubakho.—Kolose 4:6; IMizekeliso 15:1.

Ubulumko bukaThixo bukubongoza ukuba uzinzise iingxabano ngokukhawuleza uze ugcine uxolo ngamazwi alungileyo akhayo, kunokuya kulala ‘ucaphukile.’ (Efese 4:26, 29, 31) Oku kufuna ukuthobeka. Yayama ngoYehova ngokupheleleyo ukuze womelele. Omnye umfazi ongumKristu ngokuthobekileyo wavuma esithi: “Ngemva komthandazo osuka entliziyweni, ndiye ndawuva umoya kaYehova uphakamisa ingalo yam ukuze ndiwole iqabane lam.” ILizwi likaThixo linikela esi siluleko: “Ningabuyekezi ububi nakubani. . . . Boyise ububi ngokulungileyo.” (Roma 12:17-21) Eli licebiso lobulumko nekhondo lokuthobela uThixo.

Abantwana Ababonakalisa Ukuthobela UThixo

Isiluleko sikaYehova kuni bantwana abakwiintsapho ezahluleleneyo ngonqulo nasi: “Balulameleni abazali benu ezintweni zonke; kuba oko kukholekile kuyo iNkosi.” (Kolose 3:20) Phawula ukuba iNkosi uYesu Kristu iyabandakanywa kulo mbandela. Ngenxa yoko, ukuthobela abazali kusikelwe umda. Ngandlel’ ithile isiluleko esikwiZenzo 5:29, sokuba “sive uThixo kunokuba sive abantu,” sikwabhekisela nakulutsha olungamaKristu. Aya kubakho amaxesha okuba kufuneke wenze isigqibo ngomawukwenze ngokusekelwe koko ukwazi kulungile ngokweZibhalo. Kusenokuphumela kwisohlwayo esithile ukwala ukubandakanyeka kwisenzo sonqulo lobuxoki. Ngoxa kungeyonto ethandekayo oko, unokufumana intuthuzelo yaye usenokude uvuye ngesibakala sokuba ubandezeleka ngenxa yokwenza okulungileyo emehlweni kaThixo.—1 Petros 2:19, 20.

Ekubeni iingcinga zakho zikhokelwa yimigaqo yeBhayibhile, unokungavisisani nabazali bakho ngemibandela ethile. Oku akubenzi babe ziintshaba zakho. Kwanokuba abangobakhonzi abazinikeleyo bakaYehova, bafanelwe yimbeko efanelekileyo. (Efese 6:2) USolomon wathi: “Mphulaphule uyihlo, lowo wakuzalayo, ungamdeli unyoko akuba mkhulu.” (IMizekeliso 23:22) Zama ukuyiqonda intlungu abayivayo ngokuqhubeka kwakho nonqulo olubonakala lungaqhelekanga kubo. Ncokola nabo, yaye ‘ukululama kwakho makwazeke.’ (Filipi 4:5, Appleyard’s Version) Thetha nabo ngeemvakalelo zakho nangoko kukuxhalabisayo. Qina kwimigaqo yobuthixo, sekunjalo, “ukuba kunokwenzeka, okukokwenu hlalani ninoxolo nabantu bonke.” (Roma 12:18) KuYehova isibakala sokuba uthobela ulawulo lwabazali ngoku sibonisa ukuba unqwenela ukuqhubeka uthobela njengomlawulwa woBukumkani.

Okunokwenziwa Ngabanye

AmaKristu ahlala kwiintsapho ezahluleleneyo ngonqulo afuna ukuxhaswa nokuqondwa ngabo banqula kunye nawo. Oku kubonakala kumazwi awathethwa ngomnye esithi: “Ndiziva ndingenathemba yaye ndingenakuzinceda ngokupheleleyo, ekubeni kungekho nto inokwenziwa nguye nabani na, yaye kungekho nto ndinokuyenza ukuyiguqula loo nto. Ndikholose ngoYehova ukuba enze ukuthanda kwakhe kwintsapho yethu, enoba kuyintoni na.”

Ukunxulumana nabazalwana noodade bokomoya kwiintlanganiso zamaKristu kuyakhusela. Lo mntu ukwamnye wabuchaza ubomi bakhe “bufana neendlela ezimbini zokuphila ezingafaniyo. Enye kufuneka ndiphile ngayo yaye enye ndiyakuthanda ukuphila ngayo.” Luthando lobuzalwana olwenza kube nokwenzeka ngaba babandezelekileyo ukuba banyamezele baze bakhonze phantsi kwazo zonke iimeko. Baqukeni emithandazweni yenu. (Efese 1:16) Rhoqo, ngalo lonke ixesha, thetha amazwi alukhuthazo, awakhayo, nathuthuzelayo kubo. (1 Tesalonika 5:14) Xa kunokwenzeka yaye kufanelekile, baqukeni kwimisebenzi yenu yobuthixo neyasekuhlaleni.

Iintsikelelo Neengenelo Zokuthobela UThixo

Yonke imihla camngca ngeentsikelelo neengenelo zokubonakalisa ukuthobela uThixo kwikhaya elahluleleneyo ngonqulo. Sebenzela ekubeni ngothobelayo. ‘Ungatyhafi.’ (Galati 6:9) Ukunyamezela iimeko ezingentle nentswela-bulungisa “ngenxa yokumazi uThixo . . . kuyabuleleka” kuThixo. (1 Petros 2:19, 20) Thobela ukusa kumkhamo wokuba imigaqo nemithetho kaYehova yobulungisa ingatyeshelwa. Oku kubonisa ukuthembeka kwilungiselelo likaYehova. Ihambo yakho yokuhlonela uThixo inokude ibusindise ubomi beqabane lakho, abantwana, okanye abazali bakho.—1 Korinte 7:16; 1 Petros 3:1.

Njengoko uhlangabezana nezinto ezifunwa nezilindelwe yintsapho eyahluleleneyo ngonqulo, khumbula ukubaluleka kokugcina ingqibelelo kuYehova uThixo nakuYesu Kristu. Unokuyekelela kwiinkalo ezininzi, kodwa ukuyekelela ingqibelelo kukuyekelela yonke into, kuquka ubomi ngokwabo. Umpostile uPawulos wathi: “UThixo . . . uthethe ngale mihla yokugqibela kuthi ngonyana; awammisayo wayindlalifa yeento zonke, awathi kwangaye wayenza indalo yonke.” Ukulugqala olu “sindiso lungakanana” kuya kukuqinisa ukuze uthobele.—Hebhere 1:1, 2; 2:3.

Ukuthobela kwakho ngokungalalanisiyo nokumela ngokuqinileyo imilinganiselo elungileyo yokuziphatha kulukhuselo olusengqiqweni kuwe nakwiqabane lakho elingakholwayo. Ukuthembeka kwakha amaqhina omeleleyo entsapho. IMizekeliso 31:11 ithetha yenjenje ngomfazi onesidima nonyanisekileyo: “Ikholose ngaye intliziyo yendoda yakhe.” Ihambo yakho enyulu nentlonelo enzulu isenokuwavula amehlo omyeni wakho ongakholwayo. Isenokumkhokelela ekwamkeleni inyaniso kaThixo.

Eneneni ukuthobela uThixo kuxabisekile yaye kusindisa ubomi. Kuthandazele kubomi bakho bentsapho. Kuya kuphumela kuxolo lwengqondo kuze kuzise indumiso kuYehova.