Abaphumeleleyo EGiliyadi—“Abavangeli Basemazweni Bokwenene!”
“YINTONI umvangeli wasemazweni?” Loo mbuzo wabuzwa kwinqaku lomhleli kwiphephandaba elithile kwiminyaka ephantse ibe ngamashumi amane eyadlulayo. Umbhali wayemi ngelithi abavangeli basemazweni bokwenyaniso babezizixhobo zokuhlaziya intlalo noqoqosho. Noko ke, ngeCawa, Matshi 5, 1995, kwiHolo yeNdibano yamaNgqina kaYehova ekwisiXeko saseJersey, impendulo eyahluke ngokupheleleyo yanikelwa ngokugxininisayo. Kwakusenzeka ntoni bethu? Kwakuvuyiswana nababephumelele kwiklasi yama-98 yeSikolo seBhayibhile seWatchtower saseGiliyadi—isikolo esiye sathumela abavangeli basemazweni kulo lonke ihlabathi!
Emva kwengoma nomthandazo wokuvula, uAlbert D. Schroeder weQumrhu Elilawulayo wabamkela ngokufudumeleyo bonke abangama-6 430 ababezile. Kumagqabaza akhe okuvula, uMzalwan’ uSchroeder wasenza sacaca isizathu sokuba abaphumelele eGiliyadi bahluke kwabanye abaye bazibiza ngokuba bangabavangeli basemazweni. Wathi: “IBhayibhile iyeyona ncwadi isisikhokelo eGiliyadi.” Abaphumelele eGiliyadi baqeqeshelwa, kungekhona ukuba ngoonontlalo-ntle, kodwa ukuba babe ngabafundisi beLizwi likaThixo. Ngaloo ndlela bakufanelekela ngokukhethekileyo ukunyamekela iintswelo zokomoya zabantu abakwintsimi yasemzini.
Izithethi ezalandelayo zachukumisa nezinye iinkalo eziliqela abaphumelele eGiliyadi abaye bazingqina ngazo bengabavangeli “bokwenene.” UCharles Molohan wathetha nabo ngomxholo othi: “Qhubekani Nithwala Iziqhamo Ezihle Njengabavangeli Basemazweni.” Etsalela ingqalelo kumazwi ompostile uPawulos akweyabaseKolose 1:9, 10, uMzalwan’ uMolohan wakhumbuza abo baphumeleleyo ukuba iinyanga zabo ezintlanu abazichithe beseGiliyadi ziye zabanceda ukuba bandise “ulwazi oluchanileyo ngoThixo.” Oku bekuya kubanceda bavelise iziqhamo ngeendlela ezimbini: ngokubonakalisa isiqhamo somoya kaThixo nangokwabelana nabanye ngeenyaniso zeBhayibhile.
UDaniel Sydlik weQumrhu Elilawulayo walandelisa ngomxholo ofanelekileyo othi “Musani Ukudlala Ngobomi Benu.” Wakhankanya umbuzo kaYesu othi: “Worhola ntoni na umntu, ibe sisananelo somphefumlo wakhe?” (Mateyu 16:26) UMzalwan’ uSydlik wathi: “Abantu baye barhweba ngemiphefumlo yabo ukuze baphile ubomi obulula ngakumbi, nobutofotofo.” Noko ke, abo banokholo oluphilileyo abanakuyekelela xa bejamelene neemvavanyo nezilingo. Amazwi kaYesu abonisa ukuba ubani umele akulungele “ukupha,” oko kukuthi, anikele, ukuze azuze umphefumlo, okanye ubomi bakhe. Aba bavangeli basemazweni batsha bayalwa ukuba bazinikele kuYehova ngomphefumlo uphela, banikele ngako konke abanako, enkonzweni yakhe!
Ngokulandelayo, uWilliam Van de Wall weKomiti yeSebe leNkonzo wathetha ngombandela othi “Umpostile UPawulos—Umzekelo Ofanelwe Kukuxeliswa.” UMzalwan’ uVan de Wall wathi: “UPawulos wakhokela kulo msebenzi wobuvangeli basemazweni ngenkulungwane yokuqala.” Kwandula ke, ngokufanelekileyo kwabalaseliswa iinkalo ezine apho umpostile uPawulos abamisela khona umzekelo omhle abavangeli basemazweni banamhlanje: (1) Ukubaxhalabela ngokwenene nokubathanda kukaPawulos abantu, (2) ukuphumelela kwakhe kubulungiseleli, (3) ukungavumi kwakhe ukuzigwagwisa ngenxa yobulali, (4) ukukholosa kwakhe ngokupheleleyo ngoYehova.
“Mvumeleni UYehova Anigocagoce Kwizabelo Zenu Ezitsha” lowo yayingumbandela owawuxutyushwa nguLyman A. Swingle weQumrhu Elilawulayo. Esebenzisa umbhalo wosuku, INdumiso 139:16, uMzalwan’ uSwingle wavuma ukuba, njengabavangeli basemazweni abatsha, babeya kuhlangabezana neengxaki kwizabelo zabo nokuba uYehova uyazazi izicombululo. Wabayala esithi: “Yiyani kuye, thethani naye xa ninengxaki. Zamani ukuqonda oko akuthandayo.”
Wandula ke, uJohn E. Barr weQumrhu Elilawulayo wathetha ngombandela othi “Lukhula Ngokugqithiseleyo Ukholo Lwenu.” (2 Tesalonika 1:3) KuLuka 17:1, (TE) sifunda ukuba uYesu wathi: “Azinakungehli izinto ezibakhubekisayo abantu.” Bambi baye bakhubeka ngenxa yobuntu babavangeli basemazweni abasebenza kunye nabo. Kodwa uMzalwan’ uBarr wakhuthaza abavangeli basemazweni ukuba babe nokholo oluyimfuneko ukuze baxolele. Eneneni, kukule nkalo apho abafundi bakaYesu bacela besithi: “Songezelele ukholo.” (Luka 17:2-5) Ukholo lwabavangeli basemazweni lusenokuvavanywa naluhlengahlengiso olwahlukahlukeneyo lwentlangano. UMzalwan’ uBarr wabuza: “Ngaba sinalo ukholo lokulwamkela, okanye ngaba luya kuba yimiqobo enjengentaba?”
Kwalandela izibongozo ezazivela kubahlohli ababini baseGiliyadi. UJack Redford wakhuthaza abaphumeleleyo ukuba bazigcine benesimo sengqondo esakhayo. Wabalisa ngomvangeli wasemazweni owashiya isabelo sakhe ngenxa yokuqhulwa ngabanye abavangeli awayesebenza kunye nabo. Noko ke, iZibhalo ziyasilumkisa ukuba singakhathazwa zizinto ngokungeyomfuneko. (INtshumayeli 7:9) Wabayala esithi: “Yibani nesimo sengqondo esihle. Zixoleleni iimpazamo nokungafezeki kwabanye abaningqongileyo.”
Wandula ke u-U. V. Glass, umamkeli wabafundi eGiliyadi, wabuza esithi: “Ngaba nikulungele ukujamelana ‘nexesha nesihlo’”? (INtshumayeli 9:11) UMzalwan’ uGlass wathi: “Indlela yethu yokuphila isoloko iguquguquka ngamaxesha onke, yaye zimbi iinguqulelo zisenokuba yingozi gqitha.” Abathile kubavangeli basemazweni baye ngokungalindelekanga bajamelana nempilo enkenenkene, isifo, neengxaki zentsapho, bambi zibanyanzela ukuba bashiye izabelo zabo. UMzalwana uGlass wathi: “Enoba siyintoni na isihlo, siyazi ukuba uYehova uyasazi kwaye unenkxalabo. Ukuba sayama ngaye, siyazi ukuba siya kuphumelela!”
Intetho enomxholo othi “Zigcinele Inkonzo Yobuvangeli Basemazweni” yalufikisa kuvuthondaba ungcelele lweentetho zakusasa. UTheodore Jaracz weQumrhu Elilawulayo waphendula umbuzo obuphakanyiswe ekuqaleni, othi, “Yintoni umvangeli wasemazweni?” Xa ephendula, waxubusha ngeZenzo isahluko 13 nese-14 ngomsebenzi kaPawulos noBharnabhas wobuvangeli basemazweni. Ngokucacileyo, loo msebenzi wawujoliswe, kungekhona ekucombululeni iingxaki zasekuhlaleni, kodwa ‘ekushumayeleni iindaba ezilungileyo.’ (IZenzo 13:32) UMzalwan’ uJaracz wabuza: “Ngaba anivumi na ukuba uPawulos noBharnabhas babonisa oko umvangeli wasemazweni wokwenene afanele abe kuko?” Kwandula ke, kwacelwa umvangeli wasemazweni onamava waseMexico uRobert Tracy ukuba anikele athile kumava akhe achukumis’ intliziyo njengomhambisi wevangeli.
Ucwangciso lwakusasa lwafikelela encotsheni njengoko uMzalwan’ uSchroeder wayenikezela iziqinisekiso kwabaphumeleleyo abangama-48. Imilomo yayingahlangani luvuyo kubaphulaphuli xa beva amagama amazwe angama-21 abababelwe kuwo aba bavangeli basemazweni: eBarbados, eBenin, eBolivia, kwiCentral African Republic, eCosta Rica, eCôte d’Ivoire, e-Ecuador, e-Equatorial Guinea, e-Estonia, e-Guinea-Bissau, eHonduras, eLatvia, kwiiLeeward Islands, eMauritius, eMozambique, eNicaragua, eParaguay, ePeru, eSenegal, eTaiwan naseVenezuela.
Ngemva kwekhefu lesidlo sasemini, abaphulaphuli bahlanganisana kwakhona baza banandipha udlwabevu lwesifundo seMboniselo, esasiqhutywa nguRobert P. Johnson weSebe leNkonzo. Amalungu eklasi yama-98 aphendula imibuzo. Oku kwalandelwa lungcelele lodliwano-ndlebe olonwabisayo olwaluqhutywa ngamalungu abasebenzi baseGiliyadi. Abaphulaphuli bakhuthazeka kakhulu njengoko abo baphumeleleyo babesabelana nabo ngamava abo asentsimini yaye bevakalisa iimvakalelo zabo ngezabelo zabo kumazwe asemzini.
Kangangeminyaka emithandathu enesiqingatha, iGiliyadi yayikwizakhiwo zeWatchtower Society eWallkill, eNew York. Noko ke, ngoAprili 1995, esi sikolo safuduselwa eWatchtower Educational Center entsha ePatterson, eNew York. Yavakalelwa njani intsapho yaseBheteli eWallkill ngolu tshintsho? Xa kwakuvuyiswana nabaphumeleleyo kwadliwan’ indlebe nabaninzi ababesuka eWallkill. Amazwi abo achukumisayo enza kwacaca mhlophe ukuba abafundi baseGiliyadi bashiye impembelelo eya kuhlala ihleli kubo. Kucacile ukuba la madoda nabafazi angabavangeli bokwenene—bathobekile, bazinikele, bakuxhalabele ngokunzulu ukunceda abanye.
Njengoko esi sihlandlo sokuvuyisana nabaphumeleleyo sasifikelela esiphelweni, bonke ababezile babenentembelo yokuba iSikolo saseGiliyadi siya kuqhubeka sisenza oko besikwenza kangangeminyaka engaphezu kwama-50 ngokunempumelelo—sivelise abavangeli basemazweni bokwenene!
[Ibhokisi ekwiphepha 18]
Inkcazelo Engabafundi:
Inani lamazwe abavela kuwo: 8
Inani lamazwe ababelwe kuwo: 21
Inani labafundi: 48
Umlinganiselo wobudala: 32,72
Umlinganiselo weminyaka besenyanisweni: 15,48
Umlinganiselo weminyaka bekubulungiseleli bexesha elizeleyo: 10,91
[Umfanekiso okwiphepha 18]
Abaphumelele Kwiklasi Yama-98 YeSikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukuya kolungasemva yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.