Abafundi Abaphumeleleyo BeLizwi LikaThixo
NJENGAMAKRISTU enkulungwane yokuqala, amaNgqina kaYehova aziwa ehlabathini lonke nanguthathatha ngomsebenzi wawo wokushumayela kwindlu ngendlu. Lo msebenzi wabalaseliswa kwingabula-zigcawu yocwangciso lwabaphumeleleyo beklasi ye-102 yeSikolo SeBhayibhile SeWatchtower SaseGiliyadi.
NgoMatshi 1, 1997, uAlbert Schroeder, olilungu leQumrhu Elilawulayo lamaNgqina kaYehova, watsalela ingqalelo kwinqaku lakutshanje elikulindixesha wesiFrentshi iLe Point. Lakhankanya izicwangciso zamaRoma Katolika zokusungula ukushumayela kwindlu ngendlu kwelaseItali. “Ukuze [abavangeli beVatican] bangabuyi bephaca njengoko bethe bhazalala inguwashiywa nowashiywa kwintsimi yamaNgqina kaYehova,” latsho njalo eli nqaku, “iVatican ayiphelelanga nje apho ide yashicilela izigidi zemibhalo yencwadi yeVangeli yeNgcwele uMarko, njengoko amasi ebekw’ elangeni kubathunywa bayo abajongene neengcali [amaNgqina] ‘ekushunyayelweni’ kwelizwi kwizindlu ngezindlu.”
Abaphumeleleyo abangama-48 baphakathi kwabo baye baxelisa iindlela ezichuliweyo zokushumayela zikaYesu ekusasazeni iLizwi likaThixo. Bebephuma kumazwe asibhozo besiya kwiWatchtower Educational Center esePatterson, eNew York. Ebudeni beenyanga ezintlanu abebebila besoma befunda ngazo, baye bayifunda bayigqiba iBhayibhile. Kwakhona izifundo zabo beziquka imbali yentlangano kaThixo, iinkalo ezisebenzisekayo kubomi bobuvangeli basemazweni neziqhamo zomoya kaThixo. Konke oku kwenziwe kucingwa ngosukelo olunye—ukubaxhobisela inkonzo yobuvangeli kumazwe asemzini ali-17 abathunyelwa kuwo. Njengoko bebefumana iimbasa zabo, abaphulaphuli abangama-5015 abebephuma kwiimbombo zone zomhlaba nabo basivuyela esi sihlandlo. Sisiphi isiluleko sokugqibela esisebenzisekayo abasiphathiswayo abo bafundi baseGiliyadi?
Ukhuthazo Olusexesheni Kubavangeli Basemazweni Abatsha
Emva kokuba usihlalo enze imbula-mbethe, uRalph Walls, osisandla seKomiti Yabasebenzi yeQumrhu Elilawulayo, wanikela intetho yokuqala emfutshane eyayiqulethe icebiso elisebenzisekayo kwaba bavangeli basemazweni batsha. Umxholo wakhe wawusithi “Khumbula Ukuba Nothando.” Wabonisa ukuba iBhayibhile, kweyesi-2 kuTimoti isahluko 3, yaxela kwangaphambili ukuba ihlabathi laliza kuthabath’ unyawo ekuphelelweni luthando. Wanikela la mazwi asexesheni okukhumbuza aba bavangeli basemazweni batsha, ngokuvisisana nengcaciso yothando ekweyoku-1 kwabaseKorinte 13:1-7 esithi: “Nina ke, njengabavangeli basemazweni, nisenokubetha ngaphaya kwesisikelo senu seeyure. Nisenokuba zizisele zenyathi ngenxa yoqeqesho enilufumene apha eGiliyadi. Okanye ngenzondelelo sisenokusebenza ixesha elithe chatha kwizabelo zethu kwisebe. Kodwa ukuba siyalibala ukuba nothando yonke imigudu nokuzincama kwethu iya kuba lilize.”
Wandula ke wadedela uCarey Barber, olilungu leQumrhu Elilawulayo, owagwadla umbandela othi “UYehova Usikhokelela Kuloyiso.” Ukususela kwiziqalo ezincinane emva kweMfazwe Yehlabathi I, uYehova uThixo uye wabakhokelela kuloyiso abakhonzi bakhe abathembekileyo njengoko bevakalisa iindaba ezilungileyo zoBukumkani bakhe phezu kwayo nje intshutshiso. Ngowe-1931 aBafundi beBhayibhile, njengoko babesaziwa njalo, bamkela igama elithi amaNgqina kaYehova, nto leyo eyabatsho bazizishwayimbana ludano abefundisi beNgqobhoko. “Kungokunje le klasi ye-102 yabavangeli basemazweni abaqeqeshwe eGiliyadi inelungelo elizukileyo lokuba nesabelo esikhulu kumsebenzi ozukileyo wokuvulela abaninzi kangangoko kunokwenzeka ithuba lokufunda ngelo gama lingcwele,” watsho uMzalwan’ uBarber. Aba baye bathelela ungcelele lwabavangeli basemazweni abangama-7131 abaye baqeqeshwa kwiSikolo saseGiliyadi nabaye bafak’ igxalaba ekuhambiseleni phambili ukushunyayelwa kweLizwi likaThixo ukususela kumazwe angama-54 ngowe-1943 ukusa kwangama-233 namhlanje.
Isithethi esalandelayo, uLloyd Barry, okwalilungu leQumrhu Elilawulayo, waphumelela kwiklasi ye-11 yaseGiliyadi waza wakhonza njengomvangeli wasemazweni eJapan kangangeminyaka engaphaya kwama-25. Yena wanikela ukhuthazo ngalo mxholo uthi, “Hlalani Kwezi Zinto.” “Uvuyo oluninzi niya kulufumana ngokunyamezela,” watsho njalo exelela abafundi. Yiyiphi imivuzo efumaneka ngokunyamezela kumsebenzi wobuvangeli basemazweni okanye kuso nasiphi na isabelo sobuthixo? “Ngaphezu kweento zonke, ukunyamezela kwethu kuvuyisa intliziyo kaYehova . . . Lukhulu ulwaneliseko olunokufunyanwa ngokugcina ingqibelelo phantsi kovavanyo . . . Inkonzo yobuvangeli basemazweni yenzeni umsebenzi wobomi benu . . . Niya kuthi ke kumvuzo wenu nifumane la mazwi avuyisa intliziyo athi ‘nenze kakuhle.’” (Mateyu 25:21; IMizekeliso 27:11) Equkumbela le ntetho yakhe, uMzalwan’ uBarry wabakhuthaza ngokusuk’ entliziyweni aba bavangeli batsha esithi ‘mabahlale kwezi zinto’ ngokuzimisela ukwenza umsebenzi wobuvangeli basemazweni ube bubomi babo.—1 Timoti 4:16.
“Niza Kubona Ntoni?” lowo yaba ngumbuzo owaphakanyiswa nguKarl Adams, naye okhe waphos’ ilitye esivivaneni ngokuhlohla uninzi lwabafundi baseGiliyadi. Walitsolisa elokuba okuza kubonwa ngabavangeli basemazweni abatsha kwizabelo zabo kuxhomekeke kungekuphela nje kwiliso labo lenyama kodwa kwanakumehlo entliziyo. (Efese 1:18) Oku wakuzekelisa ngokwabonwa ziintlola ezingamaSirayeli xa zaziye kuhlola ubume beLizwe Ledinga. Zoli-12 ezo ntlola zazibona ngasonye ngokwenyama, kodwa zimbini kuphela ezaba nembono kaThixo ngeLizwe Ledinga. Nabavangeli basemazweni basenokubona ngeendlela ngeendlela. Kumazwe athile apho baza kukhonza khona, basenokubona ubuhlwempu, intlungu nokuphelelwa ngamathemba. Kodwa abamele bakhalale baze balishiye elo lizwe. UMzalwan’ uAdams wathetha ngomnye umvangeli wasemazweni obekwiklasi yakutshanje owathi: “La mava anditsho ndaliqonda elokuba kufuneka ndihlale apha. Aba bantu banxubele ithemba ngekamva. Ngoko ke ndifuna ukwenza umahluko ebomini babo.” UMzalwan’ uAdams waqukumbela ngokubakhuthaza aba bavangeli basemazweni batsha ukuba babone amazwe abaza kwabelwa kuwo njengemimandla uYehova azimisele ukuyenza inxalenye yeParadesi Yakhe yomhlaba wonke nokubagqala abo bantu njengabo basenokuba ngamalungu ebutho lehlabathi elitsha.
Intetho yokugqibela kule nxalenye yocwangciso yanikelwa nguWallace Liverance, owankantsa iqela leminyaka kumsebenzi wobuvangeli basemazweni ngaphambi kokuba abe ngumhlohli waseGiliyadi. “Yenza Ngokuqonda Ngokuphathelele Imisebenzi KaThixo Engummangaliso” lowo yayingumxholo wakhe. Ukwenza ngokuqonda kubandakanya ukwenza ngobuqili, ngengqiqo nangengqondo. Leyo yinto angazange akwazi ukuyenza uKumkani uSawule wakwaSirayeli.—1 Samuweli 13:9-13; 15:1-22.
Enye indlela yokwenza ngokuqonda kungokwamkela amahlandinyuka ahambisana nokuhlengahlengisela ukuphila ubomi obutsha, kuquka ukufunda ulwimi olutsha nokwazi abantu. Amava abanawo abavangeli basemazweni ekuhlangabezaneni namahlandinyuka nokoyisa imiqobo anokubomeleza ngokomoya kanye ngendlela uYoshuwa noKalebhi abomelezwa ngayo xa baloyisayo ilizwe uThixo awayebanike lona.
Udliwano-ndlebe
Inxalenye elandelayo yolu cwangciso yayinongcelele lodliwano-ndlebe. UHarold Jackson wadlan’ indlebe noUlysses Glass, ongumamkeli wabafundi nongumhlohli ongumakad’ enetha kwiSikolo saseGiliyadi, oneminyaka engama-85 ubudala sithetha nje. Kuninzi lwabavangeli basemazweni abasesentsimini isathe thaa ezingqondweni iminyaka yakhe ebafundisa yaye ebaqeqesha ngokuthembeka. Owalandelayo yaba nguMark Noumair, umhlohli waseGiliyadi owagangatha iminyaka ekhonza kumazwe asemzini eAfrika ngaphambi kokuba abe ngomnye wabasebenzi beSikolo saseGiliyadi. Yena wadlan’ indlebe nabafundi ngokuphathelele ubulungiseleli babo ebudeni beenyanga ezintlanu bekwesi sikolo. Amava abo aliqaqambisa ngakumbi elokuba kusekho abantu abanomdla kwiLizwi likaThixo kwintsimi yasekuhlaleni.
Wandula ke uRobert Ciranko ekunye noCharles Molohan bathetha namadoda angamagqala awayekwesinye isikolo esikwakwezi zakhiwo, isikolo sabasebenzi bamasebe. Icebiso lawo awalifumbathisa abafundi abaphumeleleyo laliquka imfuneko yokuthobeka nokufak’ isandla kumanyano lwebandla. Acebisa abo baphumeleleyo ukuba bangahambi sele benolwazi ngoko kuza kwenzeka kumsebenzi wobuvangeli basemazweni, kunoko, bamele bayamkele ngezandla ezingenamkhinkqi nayiphi na imeko abagaxeleka kuyo. Ukusebenzisa esi siluleko ngokuqinisekileyo kuya kubanceda abavangeli basemazweni abatsha bazizalisekise izabelo zabo njengabafundisi beLizwi likaThixo.
Ekugqibeleni, uTheodore Jaracz, olilungu leQumrhu Elilawulayo, wathetha nabaphulaphuli ngalo mbandela “Ngubani Ophembelela Omnye?” Wacacisa wathi xa sisithi njengamaKristu sibonakalise isiqhamo somoya, sinokuba nempembelelo entle kwabanye abantu. Wathi: “Abavangeli basemazweni abathunywe yintlangano kaYehova baye banembali encomekayo yokuphembelela abantu ngendlela ephilileyo, neyokomoya.” Kobu buthuba wacaphula amagqabaza athile awenziwa ngabantu abaye bancedwa ukuba bakhonze uThixo ngenxa yemizekelo emihle eyamiselwa ngabavangeli basemazweni. Waqukumbela ngelithi: “Kwanga ningalugcina olu dumo luhle bazenzele lona abantu bakaYehova nize niqhubeke ninkqonkqoza kwezo zindlu zikwintsimi yasemzini nifuna abafanelekayo . . . Kananjalo, ngehambo yenu ethe tye, necocekileyo, wuxhathiseni umoya weli hlabathi, nize nibe nempembelelo entle ukuze kudunyiswe kuze kuzukiswe uYehova.”
Ekuqosheliseni kwakhe olu cwangciso, usihlalo wafunda imibuliso evela kwiindawo ezikufuphi nakude wandula ke wakhupha iziqinisekiso waza wachaza neendawo ababelwe kuzo abavangeli basemazweni. Emva koko, omnye wabaphumeleleyo wafunda isigqibo sabafundi besithi baswel’ imilomo eliwaka yokubulela ngenxa yemfundo abayifumeneyo. Licacile elokuba, ucwangciso lwabaphumeleleyo beklasi ye-102 lwabashiya bonke abebekho bezimisele nangakumbi ukutyhalela phambili ekuvakaliseni iLizwi likaThixo.
[Umfanekiso okwiphepha 31]
Iklasi Ye-102 Ephumelele KwiSikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukuya kolungasemva yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F.
(2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K.
(3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D.
(4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M.
(5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A.
(6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.