Kuza Amaxesha Alunge Ngakumbi
ELINYE ibhinqa lithi: “Thina siphila ngo-one-zero-one.”
Umhlobo walo uphendula athi: “Kubi ngakumbi kum. Ndiphila ngo-zero-zero-one.”
Kwamanye amazwe aseNtshona Afrika, incoko enjalo ayifuni kucaciswa. Kunokutya kathathu ngemini (one-one-one), umntu ophila ngo-one-zero-one ukwazi ukutya kabini kuphela ngemini—kanye kusasa nakanye ngokuhlwa. Omnye umfana oku-zero-zero-one uyichaza ngolu hlobo eyakhe imeko: “Nditya kanye ngemini. Ndigcine amanzi amaninzi kwisikhenkcisi sam. Nditya igari [imifuno ethile efana nebhatata] ebusuku ngaphambi kokuba ndilale. Leyo yindlela ebendiphila ngayo.”
Liyanda inani labantu abaphila ngolo hlobo namhlanje. Amaxabiso ayenyuka, yaye ixabiso lemali liyehla.
Ukunqongophala Kokutya Kwaxelwa Kwangaphambili
Kungcelele lwemibono eyanikwa umpostile uYohane, uThixo wazixela kwangaphambili iimeko ezinzima abajamelene nazo abaninzi namhlanje. Phakathi kwazo yayiza kuba kukunqongophala kokutya. UYohane uyabalisa: “Ndabona, nalo ihashe elimnyama; lowo ke wayehleli phezu kwalo ubenesikali sokulinganisa esandleni sakhe.” (ISityhilelo 6:5) Eli hashe nomkhweli walo ongendawo lifanekisela indlala—ukutya kwakuza kunqaba kangangokuba kwakuza kulinganiswa ngezikali.
Emva koko umpostile uYohane uthi: “Ndeva izwi . . . lisithi, Ibhekile yengqolowa iya kudla idenariyo, neebhekile ezintathu zerhasi zidle idenariyo.” Ngomhla kaYohane, ibhekile yengqolowa yayingumxhesho wosuku wejoni, yaye idenariyo yayiyimali eyayihlawulwa ngomsebenzi wosuku. Ngaloo ndlela, inguqulelo kaRichard Weymouth iyiguqulela ngolu hlobo le ndinyana: “Umvuzo wosuku lonke uya kuthenga ilofu yesonka, umvuzo wosuku lonke uya kuthenga amaqebengwana amathathu erhasi.”—ISityhilelo 6:6.
Ungakanani umvuzo wosuku lonke namhlanje? Ingxelo ethi State of World Population, 1994 ithi: “Abantu abazizigidi ezili-1 100, abemi bamazwe asakhasayo abamalunga nama-30 ekhulwini, bamkela malunga ne-$1 [R3,50] ngemini.” Ngaloo ndlela, kumahlwempu asehlabathini, umvuzo wosuku uphelela kwilofu yesonka ngokoqobo, okanye malunga nalapho.
Noko ke, oku akuxhomisi mehlo kwabo bahlwempuzeke kakhulu. Enye indoda yathi: “Isonka! Ngubani oty’ isonka? Kule mihla isonka kukutya okukhethekileyo!”
Okumangalisayo kukuba, ukutya akunqongophalanga. Ngokutsho kwemithombo yeZizwe Ezimanyeneyo, ebudeni beminyaka elishumi edluleyo, imveliso yokutya yehlabathi yande ngama-24 ekhulwini, ngaphezu kolwando lwabemi behlabathi. Noko ke, oku kwanda kokutya akukhange kubekho kuzo zonke iindawo. Ngokomzekelo, eAfrika, eneneni imveliso yokutya iye yancipha ngesi-5 ekhulwini, ngoxa abemi beye banda ngama-34 ekhulwini. Ngoko nangona kukho intabalala yokutya ehlabathini lonke, ukutya kuyaqhubeka kunqongophele kumazwe amaninzi.
Ukunqongophala kokutya kwenza amaxabiso enyuke. Ukungabikho kwemisebenzi, imivuzo ephantsi nokunyuka kwamaxabiso kwenza kube nzima ngakumbi ukufumana imali yokuthenga izinto ezithengiswayo. IHuman Development Report 1994 ithi: “Abantu abalambi ngenxa yokuba kungekho kutya—kodwa ngenxa yokuba bengenayo imali yokukuthenga.”
Ukuphelelwa lithemba nokunxunguphala kuyanda. UGlory, ohlala eNtshona Afrika wathi: “Abantu bavakalelwa kukuba namhlanje kunzima, kodwa ngomso kuza kuba nzima ngakumbi.” Elinye ibhinqa lathi: “Abantu bavakalelwa kukuba kuza kwehla intlekele. Bavakalelwa kukuba kuya kuze kufike imini ongayi kufumana nento le emarikeni.”
UYehova Wabanyamekela Abakhonzi Bakhe Ngaphambili
Abakhonzi bakaThixo bayazi ukuba uYehova uyabavuza abo bathembekileyo kuye ngokubaxhasa ngezinto abazifunayo nangokubanika amandla okuhlangabezana neemeko ezinzima. Eneneni, ukuthembela kwabo kumandla kaThixo okubaxhasa kuyinxalenye ebalulekileyo yokholo lwabo. Umpostile uPawulos wabhala: “Lowo uzayo kuThixo, umelwe kukukholwa ukuba ukho, nokuba ungumvuzi wabo bamfunayo.”—Hebhere 11:6.
UYehova ebesoloko ebanyamekela abakhonzi bakhe abathembekileyo. Ebudeni bembalela yeminyaka emithathu enesiqingatha, uYehova wamlungiselela ukutya umprofeti uEliya. Ekuqaleni, uThixo wayalela amahlungulu ukuba aphathele uEliya isonka nenyama. (1 Kumkani 17:2-6) Kamva, ngokungummangaliso uYehova wawandisa umgubo neoli yomhlolokazi owayelungiselela uEliya ukutya. (1 Kumkani 17:8-16) Ebudeni baloo ndlala, nangona babetshutshiswa ngokukrakra ngenxa yonqulo nguKumkanikazi ongendawo uIzebhele, kwakhona uYehova waqinisekisa ukuba abaprofeti bakhe babesifumana isonka namanzi.—1 Kumkani 18:13.
Kamva, xa ukumkani waseBhabhiloni wangqinga iYerusalem ewexukileyo, kwafuneka ukuba abantu “basidle isonka ngomlinganiselo, benesithukuthezi.” (Hezekile 4:16) Imeko yaba maxongo kangangokuba abanye abafazi batya inyama yabantwana babo. (IZililo 2:20) Ukanti, nangona umprofeti uYeremiya wayebanjiwe ngenxa yokuba wayeshumayela, uYehova waqinisekisa ukuba ‘uYeremiya wayenikwa intenda yesonka imihla ngemihla esitratweni saboji, sada saphela sonke isonka phakathi komzi.’—Yeremiya 37:21.
Ngaba uYehova wamlibala uYeremiya xa saphelayo isonka? Kubonakala ngathi akazange, kuba xa eso sixeko sawela kumaBhabhiloni, uYeremiya wanikwa ‘umxhesho nesipho, wandululwa.’—Yeremiya 40:5, 6; kwakhona bona INdumiso 37:25.
UThixo Uyabaxhasa Abakhonzi Bakhe Namhlanje
Kanye njengokuba uYehova wayebaxhasa abakhonzi bakhe kwizizukulwana ezidlulileyo, wenjenjalo nanamhlanje, ebanyamekela ngokwenyama nangokomoya. Ngokomzekelo, khawucinge ngamava kaLamitunde, ohlala eNtshona Afrika. Uyabalisa: “Ndandinefama enkulu yeenkuku. Ngenye imini, kwafika abaphangi abaxhobileyo kwifama yam baza beba inkoliso yeenkuku, umatshini wokuvelisa umbane osetyenziswa ngethuba lokuxakeka nemali esasinayo. Kungadlulanga xesha lide, iinkuku ezimbalwa ezazisele zabulawa sisifo esithile. Oko kwaliphelisa ishishini lam leenkuku. Kangangeminyaka emibini ndawa ndivuka ndifuna umsebenzi. Kwakunzima kakhulu, kodwa uYehova wasomeleza.
“Okwandinceda ndakwazi ukuhlangabezana naloo maxesha anzima yayikukuqonda ukuba uYehova uyazivumela izinto ukuba zisehlele ukuze sisulungekiswe. Mna nenkosikazi yam saqhubeka nocwangciso lwethu lwesifundo seBhayibhile sentsapho, yaye oku kwasinceda ngenene. Umthandazo wawukwangumthombo obalaseleyo wamandla. Maxa wambi ndandiziva ndingafuni ukuthandaza, kodwa xa ndandithandazile, ndandiye ndizive ndomelele.
“Ebudeni belo xesha linzima, ndafunda indlela ekubaluleke ngayo ukucamngca ngeZibhalo. Ndandidla ngokucinga kakhulu ngeNdumiso 23, ethetha ngoYehova njengoMalusi wethu. Esinye isibhalo esandikhuthazayo yayingamaFilipi 4:6, 7, athetha ‘ngoxolo lukaThixo, olugqithisele kuko konke ukuqonda.’ Esinye isicatshulwa esasindomeleza yayiyeyoku-1 kaPetros 5:6, 7, ethi: ‘Zithobeni ngoko ngaphantsi kwesandla esinamandla sikaThixo, ukuze aniphakamise ngexesha elifanelekileyo. Lonke ixhala lenu liphoseni phezu kwakhe, ngokuba yena enikhathalele.’ Zonke ezi ndinyana zandinceda ebudeni baloo maxesha anzima. Xa ucamngca, uyakwazi ukuzishenxisa engqondweni yakho izinto ezidandathekisayo.
“Ngoku ndiqeshiwe kwakhona, kodwa xa ndithetha inyaniso, akukho lula. Kanye njengokuba iBhayibhile yaxela kwangaphambili kweyesi-2 kuTimoti 3:1-5, siphila ‘kwimihla yokugqibela,’ ebonakala ‘ngamaxesha anomngcipheko [ekunzima ukujamelana nawo, NW].’ Asinakukuguqula oko kuthethwa sisibhalo. Ngoko andilindelanga ukuba ubomi bube lula. Sekunjalo, ndivakalelwa kukuba umoya kaYehova uyandomeleza.”
Phezu kwako nje ukuba siphila kumaxesha anomngcipheko, abo bakholosa ngoYehova noNyana wakhe onguKumkani, uKristu Yesu, abasayi kudaniswa. (Roma 10:11) UYesu uyasiqinisekisa: “Ngenxa yoko ndithi kuni, Musani ukubuxhalela ubomi benu, nisithi nodla ntoni na; nosela ntoni na; kwanomzimba wenu, nisithi niya kwambatha ntoni na. Ubomi abungaphezulu na kuko ukudla, nomzimba awungaphezulu na kwinto yokwambatha? Yondelani ezintakeni zasezulwini; ngokuba azihlwayeli, azivuni, azibutheli koovimba; ukanti ke uYihlo osemazulwini uyazondla. Nina anizidlule kakhulu na? Nguwuphi na ke kuni onokuthi ngokuxhala ongeze ebukhulwini bakhe ikubhite ibe nye? Kanjalo yini na ukuba nixhalele into yokwambatha?”—Mateyu 6:25-28.
Leyo yimibuzo ehlola intliziyo ngokwenene kula maxesha anomngcipheko. Kodwa uYesu wahlabela mgama wathetha la mazwi akhuthazayo: “Gqalani iinyibiba zasendle, ukuhluma kwazo; azibulaleki, azisonti nokusonta; ke ndithi kuni, noSolomon kubo bonke ubunewunewu bakhe, wayengavathiswanga nanjenganye kuzo ezi. Ukuba ke ingca leyo yasendle, ethi namhla ibekho, ize ngomso iphoswe eziko, wenjenjalo uThixo ukuyambathisa, akayi kunambathisa kakhulu ngakumbi na, bantundini balukholo luncinane? Musani ukuxhala ngoko, nisithi, Sodla ntoni na, sosela ntoni na, siya kwambatha ntoni na? Kuba zonke ezo zinto zingxanyelwe ziintlanga; kuba uYihlo wasemazulwini uyazi ukuba ezo zinto zonke ziyafuneka kuni. Funani ke tanci ubukumkani bukaThixo nobulungisa bakhe, zaye zonke ezo into ziya kongezelelwa kuni.”—Mateyu 6:28-33.
Kuza Amaxesha Alunge Ngakumbi
Kubonakala ngokuphandle ukuba kumazwe amaninzi ehlabathini, iimeko zezoqoqosho nezentlalo eziwohlokayo ziza kuqhubeka zisiba mbi ngakumbi. Sekunjalo, abantu bakaThixo bayaqonda ukuba ezi meko zezokwexeshana. Ulawulo oluzukileyo lukaKumkani uSolomon lwalumela ulawulo lobulungisa loKumkani omkhulu kunoSolomon oya kulawula wonke umhlaba. (Mateyu 12:42) Loo Kumkani nguKristu Yesu, “uKumkani kakumkani, uNkosi kankosi.”—ISityhilelo 19:16.
INdumiso 72, eyazaliseka okokuqala kuKumkani uSolomon, ichaza ulawulo olubalaseleyo lukaYesu Kristu. Qwalasela ezinye zezinto ezimangalisayo ezixela kwangaphambili ngekamva lomhlaba phantsi kukaKristu njengoKumkani.
Uxolo Ehlabathini Lonke: “Malityatyambe ngemihla yakhe ilungisa, nobuninzi boxolo, ide ingabi sabakho inyanga. Makaphathe ubukhosi ethabathela elwandle ase elwandle, ethabathela kuwo uMlambo ase eziphelweni zehlabathi.”—INdumiso 72:7, 8.
Inkxalabo Ngabasweleyo: “Uya kulihlangula ihlwempu elizibikayo, nabaziintsizana abangenaluncedo; abenzele inceba abasweleyo nabangamahlwempu; asindise imiphefumlo yamahlwempu; akhulule imiphefumlo yawo ekuxinezelweni nasekugonyamelweni; linqabile emehlweni akhe igazi lawo.”—INdumiso 72:12-14.
Intabalala Yokutya: “Makubekho intabalala yengqolowa ezweni, ise encotsheni yeentaba.”—INdumiso 72:16.
Uzuko LukaYehova Luya Kuzalisa Umhlaba: “Makabongwe uYehova uThixo, uThixo kaSirayeli. Ulomenzi wemisebenzi ebalulekileyo yena yedwa. Malisikelelwe igama lakhe elizukileyo ngonaphakade, lizale lonke ihlabathi luzuko lwakhe.”—INdumiso 72:18, 19.
Ngoko kuza amaxesha alunge ngakumbi ngokwenene.