Ukuba Lihlwempu Nangona Usisityebi—Kunokwenzeka Njani?

Kwiinkulungwane ezadlulayo indoda esisilumko yathandazela ukuba ingabi lihlwempu. Kwakutheni ukuze yenze eso sicelo? Kungenxa yokuba yayisoyika ukuba ubuhlwempu babuya kuyibangela ibe nesimo sengqondo esithile ize yenze izinto ezaziya kulubeka engozini ulwalamano lwayo noThixo. Oku kungqinwa ngamazwi asuka kuyo athi: “Ndihlafunise isonka endisimiselweyo; . . . hleze ndihlwempuzeke, ndibe, ndilicukuceze igama likaThixo wam.”—IMIZEKELISO 30:8, 9.

NGABA oku kuthetha ukuba akunakwenzeka ukuba umntu olihlwempu amkhonze uThixo ngokuthembeka? Ngokuqinisekileyo akunjalo! Ukutyhubela imbali inginginya yabakhonzi bakaYehova uThixo iye yagcina ingqibelelo phezu kwabo nje ubunzima obubangelwa bubuhlwempu. Kwelinye icala, uYehova uyabathanda abo bakholosa ngaye yaye uyabalungiselela.

Abo Babethembekile Bamandulo

Umpostile uPawulos naye wajamelana namaxesha anzima. (2 Korinte 6:3, 4) Kwakhona uchaza ‘ilifu elikhulu’ lamangqina awayethembekile ngaphambi kwexesha lobuKristu, abanye bawo ‘ababehambahamba ngeemfele zeegusha, ngeemfele zeebhokhwe, ngoxa babeswele, . . . Babebhadu-bhadula ezinkqantosini nasezintabeni nasemiqolombeni nasemingxunyeni yomhlaba.’—Hebhere 11:37, 38; 12:1.

Omnye waba bathembekileyo yayingumprofeti uEliya. Ebudeni bembalela eyathabatha iminyaka emithathu enesiqingatha, uYehova wayemlungiselela ukutya rhoqo. Okokuqala, uThixo wathumela amahlungulu ukuba aphathele lo mprofeti isonka nenyama. (1 Kumkani 17:2-6) Kamva, ngokungummangaliso uYehova wawongeza umgubo neoli yomhlolokazi awayeyisebenzisele ukulungiselela uEliya. (1 Kumkani 17:8-16) Oko kutya yayikukutya nje okuqhelekileyo, kodwa kwamgcina umprofeti, elo bhinqa, nonyana walo bephilile.

Ngokufanayo uYehova wamlondoloza umprofeti othembekileyo uYeremiya ebudeni bamaxesha anzima ezoqoqosho. UYeremiya wasinda xa iYerusalem yayirhangqwe yiBhabhiloni, xa abantu kwakufuneka ‘badle isonka ngomlinganiselo, benesithukuthezi.’ (Hezekile 4:16) Ekugqibeleni, indlala yaqatsela ngakumbi kangangokuba bambi abafazi babesitya inyama yabantwana babo. (IZililo 2:20) Nangona uYeremiya wayesentolongweni ngenxa yokushumayela kwakhe ngesibindi, uYehova wayeqiniseka ukuba unikwa “intenda yesonka” yonke imihla “sada saphela sonke isonka phakathi komzi.”—Yeremiya 37:21.

Ngoko uYeremiya, njengoEliya, wayengenakutya kuninzi. IZibhalo azisixeleli ukuba uYeremiya wayesitya ntoni okanye kangaphi emva kokuba iYerusalem iphelelwe sisonka. Kodwa, siyazi ukuba uYehova wamomeleza wamsindisa ngexesha lendlala eyayibomvu.

Namhlanje, ubuhlwempu bugquba kuyo yonke indawo emhlabeni. Ngokutsho kweZizwe Ezimanyeneyo, eyona ndawo bugquba kuyo ubuhlwempu kuseAfrika. Ingxelo yeZizwe Ezimanyeneyo eyakhutshwa ngowe-1996 yayisithi: “Ubuncinane sisiqingatha sabantu baseAfrika abahlwempuzekileyo.” Phezu kwako nje ukwanda kweemeko ezibuhlungu zezoqoqosho, inani eliqhubeka lisanda labantu baseAfrika lisebenzisa imigaqo yeBhayibhile ebomini balo yaye ngokunyaniseka likhonza uThixo, liqinisekile ukuba uya kulomeleza. Qwalasela eminye imizekelo komnye ummandla wehlabathi lethu elizaliswe ziinkathazo.

Ukuhlala Unyanisekile

UMichael,a ohlala eNigeria, ungumlimi ekufuneka exhase abantwana abathandathu. Uthi: “Kunzima ukunyaniseka ukuba akunayo imali yokunyamekela intsapho yakho. Noko ke, xa ndilingelwa ekubeni ndinganyaniseki, ndizikhumbuza ngencwadi yabase-Efese 4:28, ethi: ‘Lowo ubayo makangabi seba, kodwa kunoko makenze umsebenzi onzima, esenza oko kungumsebenzi olungileyo ngezandla zakhe.’ Ngoko ukuba ndiyalingwa, ndiye ndizibuze, ‘Ngaba ndiyisebenzele le mali?’”

UMichael wongezelela athi: “Ngokomzekelo, ngenye imini njengoko ndandihamba, ndabona isipaji sisiwa kwisithuthuthu. Andizange ndikwazi ukumisa umqhubi waso, ngoko ndasithabatha isipaji yaye ndafumanisa ukuba sasizele yimali! Ndisebenzisa isazisi esisesipajini, ndafumana umnini waso ndaza ndasibuyisela kuye.”

Ukulwa Nodandatheko

Indoda ethile yakuMntla Afrika yathi: “Ubuhlwempu [bufana] nomntu otshone kumngxuma onzulu, okwaziyo ukubona ngaphandle nabantu abahamba-hambayo, kodwa engakwazi ukucela uncedo okanye ukucela ileli yokuphumela ngaphandle.” Akumangalisi ke ngoko ukuba ubuhlwempu ngokufuthi bubangela udandatheko nonxunguphalo! Kwanabakhonzi bakaThixo basenokubona ubutyebi babanye baze baqalise ukucinga ukuba ukugcina ingqibelelo kukuzibetha ngenyheke etyeni. (Thelekisa INdumiso 73:2-13.) Zinokoyiswa njani iimvakalelo ezinjalo?

UPeter, ongummi waseNtshona Afrika, wafumana umhlala-phantsi emva kweminyaka eli-19 kwinkonzo karhulumente. Ngoku uphila ngemali nje encinane yomhlala-phantsi. UPeter uthi: “Xa ndidimazekile ngamanye amaxesha, ndizikhumbuza ngoko ndikufunde eBhayibhileni nakwiimpapasho zeWatch Tower Society. Le nkqubo yezinto sekukufuphi ukuba idlule, yaye silindele inkqubo ebhetele.

“Kwakhona, ndicinga ngeyoku-1 kaPetros 5:9, ethi: ‘Yimani ngokunxamnye [noSathana], niqinile elukholweni, nisazi ukuba izinto ezifanayo ngendlela yeembandezelo ziyafezwa kumanyano lwabazalwana luphela ehlabathini.’ Ngoko asindim ndodwa ojamelana nobunzima. Loo mazwi akhumbuzayo andinceda ndikwazi ukulwa neengcinga ezidimazayo nezicinezelayo.”

UPeter wongezelela athi: “Ngaphezu koko, uYesu wenza imimangaliso emininzi xa wayesemhlabeni, nangona engazange enze nabani na ukuba abe sisityebi ngezinto eziphathekayo. Kutheni ndimele ndilindele ukuba andenze ndibe sisityebi?”

Amandla Omthandazo

Ukusondela kuYehova uThixo ngomthandazo yenye indlela yokulwa neengcinga eziphosakeleyo. Xa uMary waba ngomnye wamaNgqina kaYehova ngowe-1960, intsapho yakhe yamlahla. Akatshatanga yaye ngoku ukwiminyaka yakhe yama-50 ubudala, ubuthathaka ngokwasemzimbeni yaye zincinane gqitha izinto eziphathekayo anazo. Nangona kunjalo, unenzondelelo kubulungiseleli bobuKristu.

UMary uthi: “Xa ndiziva ndidimazekile, ndithandaza kuYehova. Ndiyazi ukuba akukho mntu onokundinceda ngaphezu kwakhe. Ndiye ndafunda ukuba ukuba ukholosa ngoYehova, uyakunceda. Ndiye ndikhumbule la amazwi oKumkani uDavide, afumaneka kwiNdumiso 37:25 athi: ‘Ndakha ndamtsha kungokunje ndimdala; ukanti andizanga ndilibone ilungisa lishiywa, nembewu yalo ivukela ukutya.’

“Ndiye ndifumane ukhuthazo kumava abazalwana noodade abakhulileyo ngokomoya afumaneka kwiMboniselo. UYehova uThixo wabanceda, ngoko ndiyazi ukuba uya kundinceda nam. Uyawusikelela umsebenzi wam wokuthengisa ifufu [isidlo esiyicassava], yaye ndiyakwazi ukuhlangabezana neentswelo zam zemihla ngemihla. Maxa wambi xa ndingenamali yaye ndingazi ukuba ndenze ntoni na, uYehova uye athumele umntu oye andiphe isipho aze athi, ‘Dade, nceda ukuthabathe oku.’ UYehova akazange andiphoxe.”

Ukuxabiseka Kwesifundo SeBhayibhile

AmaNgqina kaYehova ayakuxabisa ukufundisisa iLizwi likaThixo, iBhayibhile, kuquka nabo bahluphekileyo. UJohn oneminyaka engam-60 ukhonza njengovulindlela (umshumayeli woBukumkani wexesha elizeleyo) nanjengesicaka solungiselelo ebandleni. Uhlala kwindlu edilikayo enemigangatho emibini ehlala iintsapho ezili-13. Igumbi ahlala kulo licandelo lepaseji ekumgangatho wokuqala, yaye lahlukaniswe ngamaplanga. Ngaphakathi kukho izitulo ezibini ezidala netafile eneencwadi zokufundisisa iBhayibhile. Ulala phezu kokhukho.

UJohn wayefumana irandi ngemini ngokuthengisa isonka, kodwa xa ilizwe awayehlala kulo layeka ukuthenga ingqolowa ngaphandle, walahlekelwa yindlela yokuziphilisa. Uthi: “Maxa wambi ndifumanisa ukuba kunzima gqitha, kodwa ndiyaqhubeka nobuvulindlela. NguYehova ondomelezayo. Ndenza nawuphi na umsebenzi endiwufumanayo andithembeli mntwini ukuba andixhase okanye andondle, nangona abazalwana basebandleni beluncedo gqitha. Bayandincedisa ekufuneni umsebenzi yaye maxa wambi bandipha nemali.

“Ndizenzela ixesha lokufundisisa iBhayibhile neempapasho zeWatch Tower Society. Ndifundisisa ekuseni xa kuthe cwaka endlwini yaye ndifunde nasebusuku xa kukho umbane. Ndiyazi ukuba ndimele ndibe nesifundo sobuqu esithe rhoqo.”

Ukuqeqesha Abantwana Ukuze Bafumane Ubomi

UDaniel ungumhlolo onabantwana abathandathu. Ngowe-1985 waphelelwa ngumsebenzi awayekuwo kangangeminyaka engama-25, kodwa wawufumana umsebenzi wokuthengisela evenkileni. Uthi: “Ngokuphathelele ezoqoqosho ubomi buyacinezela entsatsheni. Ngoku sitya kube kanye ngemini. Ngesinye isihlandlo, asizange sitye kangangeentsuku ezintathu. Ukuze siqhubeke siphila kwakufuneka sisele amanzi kuphela.”

UDaniel ukhonza njengomdala ebandleni. Uthi: “Andizange ndiphoswe ziintlanganiso zamaKristu, yaye ndisoloko ndizixakekisa ngemisebenzi yobuthixo. Nanini na xa kukho umsebenzi omele wenziwe kwiHolo yoBukumkani, ndibakho. Yaye xa kunzima, ndiye ndizikhumbuze ngamazwi kaPetros awawathetha kuYesu, akwincwadi kaYohane 6:68 athi: ‘Nkosi, siya kumka siye kubani na?’ Ukuba ndiyayeka ukukhonza uYehova, ngaba ndiya kuyaphi? Kwakhona amazwi kaPawulos afumaneka kumaRoma 8:35-39 andenza ndizimisele kuba abonisa ukuba akukho nto inokusahlula nothando lukaThixo noKristu. Esi sisimo sengqondo endisidlulisela kubantwana bam. Rhoqo ndibaxelela ukuba singaze simlahle uYehova.” Inzondelelo kaDaniel, kuquka nesifundo seBhayibhile sentsapho esithe rhoqo, inempembelelo entle ebantwaneni bakhe.

Umoya Wokupha

Wumbi usenokucinga ukuba abo bahlala kwezona meko zimbi zobuhlwempu kusenokuba nzima kubo ukunikela ngemali yokuhambisela phambili izilangazelelo zoBukumkani. Kodwa oko akunjalo. (Thelekisa uLuka 21:1-4.) Wambi amaNgqina aseGhana aziphilisa ngokulima abeka inxalenye yomhlaba wawo ecaleni ukuze usetyenziselwe ukuhambisela phambili izilangazelelo zoBukumkani bukaThixo. Xa kuvuniwe kuloo mhlaba wabo kwaza ukutya kwathengiswa, imali isetyenziselwa loo njongo ngokukhethekileyo, kuquka nokunikela kwiHolo yoBukumkani yamaNgqina kaYehova yasekuhlaleni.

UJoan, ohlala kuMbindi Afrika, unguvulindlela. Ukuze akwazi ukunyamekela umyeni wakhe oyimbedlenge nabantu abane abaxhomekeke kuye, uthengisa isonka. Xa ibandla akulo lalifuna izitulo zeHolo yoBukumkani, intsapho yakuloJoan yagqiba kwelokuba inikele ngayo yonke imali eyayinayo. Oko kwayishiya ingenamali. Noko ke, ngemini elandelayo, umntu othile owayeyityala imali kangangexesha elide ngokungalindelekanga wayihlawula, eyinika imali ekwakungekho themba lokuba ingaze iyifumane!

UJoan wonwabile yaye akazikhathazi ngokungafanelekanga ngemali. Uthi: “Ndiye ndimchazele yonke imeko yam emthandazweni uYehova, yaye emva koko ndiya kubulungiseleli basentsimini. Siyazi ukuba lincinane ithemba lamaxesha abhetele kule nkqubo yezinto. Sekunjalo, siyaqonda ukuba uYehova uya kusilungiselela iintswelo zethu.”

Ukubonakalisa Inkuthalo

AmaNgqina kaYehova aziwa ngothando analo omnye komnye. (Yohane 13:35) Lawo anemali anceda amanye amaKristu afuna uncedo. Ngokufuthi oku kuza njengesipho yaye maxa wambi njengoncedo lokufumana umsebenzi.

UMark, ohlala eCongo, unesifo seqhenqa. Lamenzakalisa ezinzwaneni naseminweni. Ukuze akwazi ukuhamba, usebenzisa iintonga. Xa uMark wagqiba kwelokuba akhonze uYehova, waqalisa ukwenza iinguqulelo ezininzi ebomini bakhe. Kunokuba ahambe ecela ukutya njengoko wayesenza, waqalisa ukuzilimela okwakhe. Waqalisa nokwenza izitena zodaka ezingatshiswanga, awayezithengisa.

Phezu kwazo nje iziphene anazo emzimbeni, uMark uyaqhubeka esebenza ngenkuthalo. Ekugqibeleni wathenga isiqingatha somhlaba waza wakha indlu kuwo. Namhlanje, uMark ukhonza njengomdala webandla yaye uhlonelwa gqitha kwidolophu ahlala kuyo. Ngoku unceda abasweleyo.

Noko ke, kwiindawo ezininzi kunzima gqitha ukufumana umsebenzi. Omnye umdala ogumKristu okhonza kwelinye lamasebe eWatch Tower Society kuMbindi Afrika ubhala athi: “Apha abazalwana abaninzi abanamsebenzi. Bambi bazama ukuzenzela imisebenzi yabo, kodwa oko kunzima. Abaninzi baye baqiqa ngelithi ekubeni beya kuhlala behlupheka kungakhathaliseki ukuba benza ntoni na, baya kuncama izinto eziphathekayo baze babe ngabalungiseleli abangoovulindlela. Ngokwenza oko, abaninzi bafumanisa ukuba basikelelwa ngakumbi kunaxa besebenza baze bahlawulwe kancinane okanye bangahlawulwa.”

UYehova Uyabomeleza Abantu Bakhe

UYesu Kristu wathi ngaye: “Iimpungutye zinemingxuma neentaka zezulu zineendlwana, kodwa uNyana womntu akukho naphi na apho anokubeka khona intloko yakhe.” (Luka 9:58) Ngokufanayo, umpostile uPawulos wabhala: “Kude kuse kanye kweli lixa siyaqhubeka nokulamba kwanokunxanwa nokudlakazela nokuntlithwa nokungabi namakhaya.”—1 Korinte 4:11.

UYesu noPawulos bakhetha ukuphila ubomi obungenazinto zininzi ziphathekayo ukuze bakwazi ukuzondelela ngakumbi ubulungiseleli babo. AmaKristu amaninzi namhlanje angamahlwempu kuba kungekho nto anokuyenza. Sekunjalo, asebenzisa imigaqo yeBhayibhile ebomini yaye azama ngenzondelelo ukukhonza uThixo. Ayazi ukuba athandwa ngokwenene nguYehova njengoko ebona ubunyaniso bamazwi asisiqinisekiso awathethwa nguYesu xa wathi: “Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto [izinto eziphathekayo] ziya kongezelelwa kuni.” (Mateyu 6:25-33) Ngaphezu kwako konke, aba bakhonzi bakaThixo bangamahlwempu banobungqina bokuba “intsikelelo kaYehova,—yiyo etyebisayo.”—IMizekeliso 10:22.

[Imibhalo esemazantsi]

[Umfanekiso okwiphepha 7]

Isifundo seBhayibhile siyaxatyiswa ngabantu ehlabathini jikelele

[Ibhokisi ekwiphepha 6]

Ngoobani “Abenzi BeLizwi”?

NGOKUTSHO kohlolisiso lukaGallup lowe-1994, ngama-96 ekhulwini abantu baseMerika “abakholelwa kuThixo okanye kumoya okho kuzo zonke iindawo.” IU.S.News & World Report yathi kwakhona “xa kuthelekiswa nenani labantu kukho iicawa ezininzi gqitha eUnited States kunalo naliphi na elinye ilizwe eMhlabeni.” Phezu kwako nje ukubonakala ngokungathi bahlonela uThixo, umakhwekhwetha kuphando loluvo lwabantu uGeorge Gallup, Omnci., uthi: “Oyena ndoqo ngowokuba, inkoliso yabantu baseMerika abakwazi oko mabakukholelwe nesizathu sokuba bakukholelwe.”

Kwakhona amanani abonisa ukuba kukho umahluko omkhulu phakathi kweenkolelo zabantu abaninzi abanqulayo nezenzo zabo. Ngokomzekelo, uJeffery Sheler ongumbhali uthi: “Iingcali ngentlalo yoluntu ziphawula ukuba ezinye zeendawo ezigquba ulwaphulo-mthetho elizweni ikwaziindawo apho kukho abantu ababambelele kakhulu elunqulweni nakwizenzo zonqulo.”

Oku akumele kusimangalise. Ngoba? Ngenxa yokuba ukususela ngenkulungwane yokuqala, umpostile uPawulos walumkisa amaKristu awayekunye nawo ukuba alumkele abo “bavakalisa esidlangalaleni ukuba bayamazi uThixo, kodwa bayamkhanyela ngemisebenzi yabo.” (Tito 1:16) Ukongezelela, uPawulos waxelela umfana onguTimoti ukuba ‘imihla yokugqibela’ yayiya kuphawulwa ngabantu ‘abanohlobo lozinikelo lobuthixo kodwa bewakhanyela amandla ako.’—2 Timoti 3:1, 5.

Noko ke, amaKristu okwenyaniso enza konke okusemandleni awo ukuze alandele umyalelo kaYesu Kristu wokuba “ahambe . . . enze abafundi abantu beentlanga zonke.” (Mateyu 28:19) Ngale ndlela baba ‘ngabenzi belizwi, bangabi ngabevayo kuphela.’—Yakobi 1:22.