Unokuphila Njani Kwindawo Eyingozi?
UMARIA uthi: “Ndandisoyika lonke ixesha. Ndandisoyika xa ndikwisinyusi [elevator]. Ndandisoyika xa ndikwinqwelo-mafutha yam. Ndandisoyika xa ndisendlwini yam. Kwakukho ulwaphulo-mthetho kuyo yonk’ indawo. Abantu babesoloko bephangwa.” Ngaba uvakalelwa njengeli bhinqa laseBrazil, uyoyika kwindawo ohlala kuyo, ngokukodwa xa kumnyama ebusuku?
Kusenokuba mnandi ukufunda amabali abecuphi, kodwa xa esenzeka ngokoqobo ngokufuthi akabi nasiphelo sivuyisayo. Isenzo solwaphulo-mthetho sisenokuhlala singaconjululwanga. Okanye xa kukho umntu obuleweyo, kukho umntu omele ahlale engenamyeni, uyise okanye unyana, ahlale engenamfazi, unina okanye intombi. Ngaba ulwaphulo-mthetho olunogonyamelo luyanda kummandla ohlala kuwo? Ngaba ulangazelela ukuba kwindawo ezolileyo enokukhuseleka kuyo intsapho yakho? Okanye, ukuba unyanzelekile ukuba ukhulise abantwana bakho kummandla ozaliswe lulwaphulo-mthetho, yintoni onokuyenza ukuze uphumelele?
Kuyavunywa ukuba, zisekho izixeko ezingenalwaphulo-mthetho lungako. Kumazwe amaninzi, abantu basahlala kwiindawo zasemaphandleni ezizolileyo okanye kwiilali ezingenazinkathazo. Kodwa izinto ziguquka ngokukhawuleza kwanakwimimandla ebikade igqalwa njengengenalwaphulo-mthetho. Ngokomzekelo, kwiminyaka engama-50 eyadlulayo eBrazil, abemi abangama-70 ekhulwini babehlala emaphandleni. Ngoku ama-70 ekhulwini ahlala ezixekweni. Ukuvela kwamathuba omsebenzi kuye kwandisa iingxaki zasezidolophini, ezinjengolwaphulo-mthetho nogonyamelo. Enoba uhlala kummandla oyingozi okanye akunjalo, usamele uye emsebenzini okanye esikolweni yaye wenze izinto ezininzi kude nekhaya.
Umphathi wamapolisa aseRio de Janeiro uthi intswela-bulungisa kwezentlalo nolwaphulo-mthetho olulungelelanisiweyo ngoothunywashe abaphambili “besifo sonxunguphalo” esandileyo. Kwakhona uvakalelwa kukuba amaphephandaba nomabonwakude bafak’ isandla ekwandeni koloyiko, “ngokudandathekisa abantu ngeendaba ezimbi.” Ukukhotyokiswa ziziyobisi, ukuqhekeka kwentsapho nemfundiso yonqulo engachananga zikwanegalelo ekwandeni kokuchas’ umthetho. Yaye lisifumbathele ntoni ikamva? Ngaba ukondliwa ngemifanekiso yogonyamelo, eyenziwa ibonakale ingenamsebenzi ezincwadini nakwiifilimu njengokuzonwabisa, kuya kubangela abantu bangabi nanceba kwabanye? Ngaba nemimandla egqalwa njengengenalwaphulo-mthetho iza kuba yingozi?
Ekubeni ugonyamelo lungekho mnandi kulowo ulixhoba lalo, sikunqwenela ngokunzulu ukukhuseleka. Akummangaliso ukuba abemi abaxhalabileyo bafune ukuba kujikeleze amapolisa angakumbi ezitratweni nezigwebo zokuvalelwa entolongweni eziqatha ngakumbi okanye kubekho nesigwebo sentambo! Nangona bezibeka esichengeni, bambi bathenga imipu ukuze bazikhusele. Abanye bafuna ukuba abasemagunyeni bakuphelise ukuthengiswa kwemipu. Kodwa phezu kwazo nje iindaba ezimbi zokuba ulwaphulo-mthetho lwandile, asifanele siphelelwe lithemba. Eneneni, abantu abaninzi abahlala kwizixeko ezikhulu ezinjengeNew York, iRhawuti, iRio de Janeiro, iSão Paulo nesiXeko saseMexico abakaze baphangwe. Makhe sihlolisise indlela abaphila ngayo abanye abantu kwiindawo eziyingozi.
Ukulondoloza Isimo Sengqondo Esihle
Ngokuphathelele omnye ummandla ozaliswe lulwaphulo-mthetho, omnye umbhali ugqabaza “ngobulumko nokunyamezela kwamawaka abemi baseBrazil abakwaziyo ukuphila ubomi obundilisekileyo nobuhloniphekileyo phantsi kweemeko eziqatha.” Emva kweminyaka engama-38 ehlala eRio de Janeiro, uJorge uthi: “Ndiyaziphepha izitrato nemimandla ethile yaye andibonakalisi mdla kwizinto zasesitratweni. Kwakhona ndiyakuphepha ukuba sesitratweni ebusuku yaye andizenzi ndibonakale ndisoyika gqitha. Nangona ndilumkile, abantu ndibajonga njengabanyanisekileyo, ndibaphatha ngesidima nangentlonelo.”
Ewe, kuphephe ukuzifaka enkathazweni ngokungeyomfuneko. Musa ukugxuphuleka kwimicimbi yabanye. Ungaze usibethe ngoyaba isibakala sokuba uloyiko olugqithisileyo lunokuyiphazamisa imithambo-luvo, lwenze nabantu abanesimilo benze izinto ngokungekho ngqiqweni. Ngokuphathelele umsebenzi wakhe kwimimandla eyingozi, uOdair uthi: “Ndizama ukuhlala ndinesimo sengqondo esihle, ndingondli ingqondo yam ngoloyiko lwezinto ezimbi ezinokwenzeka kuba oku kubangela uxinezeleko nonxunguphalo olungeyomfuneko. Ndizama ukubahlonela bonke abantu.” Ukongezelela ekuhlaleni engophaphileyo nokuhambela kude nabantu abangaqondakaliyo, uchaza enye into eluncedo ekulawuleni iimvakalelo zikabani: “Ngaphezu kwako konke, ndihlakulela intembelo kuYehova uThixo, ndikhumbula ukuba akukho nto angayiboniyo yaye nantoni na eyenzekayo ivunyelwa nguye.”
Sekunjalo, akukho mntu ukuthandayo ukuhlala esoyika. Ngaphezu koko, ngubani oya kulikhanyela elokuba uloyiko noxinezeleko olugqithisileyo luyingozi kwimpilo yokweemvakalelo neyomzimba? Ngoko, liyintoni ithemba ngabo boyika ukuba bangahlaselwa nanini na? Ekubeni abaninzi besoyika ukuba ulwaphulo-mthetho luseza kuthabatha unyawo, ngaba luya kuze luphele ugonyamelo? Siyakumema ukuba ufunde inqaku elilandelayo elithi, “Luya Kuphela Nini Uloyiko?”