Isimemo Sothando Kwabo Badiniweyo
“Yizani kum nonke nina nibulalekayo, nisindwayo ngumthwalo, ndoninika ukuphumla [“ndiya kunihlaziya,” NW].”—MATEYU 11:28.
1. Wabona ntoni uYesu eGalili kukhenketho lwakhe lwesithathu lokushumayela?
NGASEKUQALENI konyaka wama-32 C.E., uYesu wayekukhenketho lwakhe lwesithathu lokushumayela kwisithili saseGalili. Wayehamba kwimizi nemizana, “efundisa ezindlwini zabo zesikhungu, evakalisa iindaba ezilungileyo zobukumkani, ephilisa izifo zonke nezikhuhlane zonke ebantwini.” Njengokuba wayesenza oku, wabona izihlwele, waza “wasikwa yimfesane zizo, ngokuba zibe zityhafile, zichithakele ngokwezimvu ezingenamalusi.”—Mateyu 9:35, 36.
2. UYesu wabanceda njani abantu?
2 Noko ke, uYesu akazange aphelele nje ngokusikwa yimfesane ngezihlwele. Emva kokuyalela abafundi bakhe ukuba bathandaze “eNkosini yokuvuna,” uYehova uThixo, wabathuma ukuba baye kubanceda aba bantu. (Mateyu 9:38; 10:1) Wandula ke wabaqinisekisa ngokobuqu abantu ngendlela yokukhululeka nokuthuthuzeleka ngokwenene. Wadlulisela kubo esi simemo sivuyisayo: “Yizani kum nonke nina nibulalekayo, nisindwayo ngumthwalo, [“ndiya kunihlaziya”]. Thabathani idyokhwe yam niyithwale, nifunde kum; ngokuba ndinobulali, ndithobekile ngentliziyo; noyifumanela [“ukuhlaziyeka”] imiphefumlo yenu.”—Mateyu 11:28, 29, thelekisa iNW.
3. Kutheni isimemo sikaYesu sisenomtsalane nanamhlanje?
3 Namhlanje siphila kwixesha apho abaninzi baziva besindwa yimithwalo enzima. (Roma 8:22; 2 Timoti 3:1) Abanye, ukuze bafumane imali eyaneleyo yokuphila kufuneka basebenzise ixesha namandla amaninzi kangangokuba basala benexesha namandla amancinane gqitha xa befika kwiintsapho zabo, abahlobo, okanye nayo nantoni na enye. Abaninzi bathwaxwa kukugula ngokungaginyisi mathe, iinkxwaleko, udandatheko nezinye iingxaki zomzimba nezeemvakalelo. Beziva becinezelekile, bambi bazama ukuziphumza ngokuzinikela ngokupheleleyo kwiziyolo, ekudleni, ekuseleni, kwanasekusebenziseni kakubi iziyobisi. Kambe ke, oku kuzibangela iimeko zibe mandundu ngakumbi, kubafaka kwiingxaki neengcinezelo ezingakumbi. (Roma 8:6) Ngokucacileyo, isimemo sikaYesu sothando sisenomtsalane nanamhlanje kanye njengokuba sasinjalo ngoko.
4. Yiyiphi imibuzo esifanele siyiqwalasele ukuze singenelwe kwisimemo sikaYesu sothando?
4 Noko ke, yintoni eyayisenzeka ebantwini ngomhla kaYesu, eyayibangela babonakale ‘betyhafile, bechithakele,’ nto leyo eyashukumisela uYesu ekubeni asikwe yimfesane ngabo? Yiyiphi imithwalo ekwakufuneka bayithwale, yaye isimemo sikaYesu sasiya kubanceda njani? Iimpendulo kule mibuzo zinokuba luncedo kakhulu kuthi ukuze singenelwe kwisimemo sothando uYesu awasidlulisela kwabo badiniweyo.
Abo ‘Babulalekayo Nabasindwayo Ngumthwalo’
5. Kutheni kwakufanelekile ukuba ibe ngumpostile uMateyu onikela ingxelo ngesi siganeko sobulungiseleli bukaYesu?
5 Kubangel’ umdla ukuba ibe nguMateyu kuphela onikela ingxelo ngesi siganeko kubulungiseleli bukaYesu. Ekubeni wayefudula engumbuthi werhafu, uMateyu, owayekwaziwa ngokuba nguLevi, wayeqhelene kakuhle nomnye umthwalo owawuthwelwe ngabantu. (Mateyu 9:9; Marko 2:14) Incwadi ethi Daily Life in the Time of Jesus ithi: “Iirhafu [ekwakufuneka amaYuda] azihlawule njengemali nangezinye iindlela zazingaphaya kokuqonda, yaye zazinzima ngakumbi ngenxa yokuba kwakukho iintlobo ezimbini zerhafu ezazihambisana, iirhafu zikarhulumente neerhafu zonqulo; yaye akukho nanye kuzo eyayilula.”
6. (a) Yiyiphi inkqubo yerhafu eyayisetyenziswa ngexesha likaYesu? (b) Kwakutheni ukuze ababuthi berhafu badume kakubi kangako? (c) UPawulos wabona imfuneko yokuwakhumbuza ngantoni amaKristu?
6 Okwakusenza oku kube nzima ngokukodwa yinkqubo yokurhafisa ngelo xesha. Amagosa amaRoma ayelijizeka oyena wayenokuwahlawula imali eninzi ilungelo lokuqokelela iirhafu kwiphondo ngalinye. Aba, babeqesha abantu kwiindawo zasekuhlaleni ababesongamela umsebenzi wokuqokelelwa kwerhafu. Nabani na okweli lungiselelo wayeziva eselungelweni lokuzixhwithela. Ngokomzekelo, uLuka wabalisa ukuba “[kwakukho] ndoda ibizwa ngegama elinguZakeyu; yaye yona iyintloko yababuthi berhafu; yaye isisityebi yona.” (Luka 19:2) “Intloko yababuthi berhafu” enguZakeyu nabo babengaphantsi kwayo kubonakala ukuba babezityebise ngeenyembezi zabantu. Ukuxhaphaza nokunganyaniseki okwakubangelwa yiloo nkqubo kwakubangela ukuba abantu bababalele phakathi kwaboni namahenyukazi ababuthi berhafu, yaye mhlawumbi benezizathu ezivakalayo zokwenjenjalo kwiimeko ezininzi. (Mateyu 9:10; 21:31, 32; Marko 2:15; Luka 7:34) Ekubeni abantu babeziva bethwele umthwalo onganyamezelekiyo, akumangalisi ke ukuba umpostile uPawulos wabona imfuneko yokukhumbuza amanye amaKristu ukuba angadinwa yidyokhwe yamaRoma kodwa ‘bonke abanike okubafaneleyo; amnike irhafu ofanelwe yirhafu, unikelo ofanelwe lunikelo.’—Roma 13:7a; thelekisa uLuka 23:2.
7. Imithetho yezohlwayo yamaRoma yongezelela njani kumthwalo wabantu?
7 Kwakhona uPawulos wakhumbuza amaKristu ukuba amnike “ukoyika ofanelwe kukoyikwa, imbeko ofanelwe yimbeko.” (Roma 13:7b) AmaRoma ayesaziwa ngenkohlakalo nangemithetho eqatha yokohlwaya. Ukukatsa, ukutyabula, ukugwetyelwa ukuhlala entolongweni ithuba elide nokubulawa zizinto ezazisetyenziswa ngokufuthi ukuze kugcinwe abantu bethobela. (Luka 23:32, 33; IZenzo 22:24, 25) Kwaneenkokeli zamaYuda zazinalo igunya lokudlulisela izohlwayo ezinjalo xa zazibona kufanelekile. (Mateyu 10:17; IZenzo 5:40) Ngokuqinisekileyo inkqubo enjalo yayikukulawula ngegqudu, ukuba yayingeyongcinezelo yokwenene, kuye nabani na owayephila ngaphantsi kwayo.
8. Iinkokeli zonqulo zabathwalisa umthwalo onzima njani abantu?
8 Noko ke, okwakukubi nangakumbi kuneerhafu nemithetho yamaRoma, ngumthwalo owawubekwe emagxeni abantu abaqhelekileyo ziinkokeli zonqulo zelo xesha. Eneneni, oku kwakubonakala kuyeyona nto yayixhalabise uYesu xa wachaza abantu ‘njengababulalekayo nabasindwayo ngumthwalo.’ UYesu wathi kunokunika abantu ababetyhafile ithemba nentuthuzelo, iinkokeli zonqulo ‘zibopha imithwalo enzima, esindayo, ziyibeke emagxeni abantu, zibe ke zona zingathandi kuyishukumisa nangomnwe lo wazo.’ (Mateyu 23:4; Luka 11:46) IiNcwadi zeVangeli ziyenza icace nasesidengeni indlela ezichazwa ngayo iinkokeli zonqulo—ngokukodwa ababhali nabaFarisi—njengeqela elinekratshi, elingenaluvelwano nelabahanahanisi. Zazibajongela phantsi abantu abaqhelekileyo njengabangafundanga nabangahlambulukanga, yaye zazibacekisa abasemzini ababephakathi kwazo. Enye inkcazelo ngesimo sazo sengqondo ithi: “Namhlanje umntu olibophela umthwalo osindayo ihashe unetyala phambi komthetho. Kuthekani ngomntu othwalisa ‘abantu belizwe’ ababengaqeqeshwanga ngokonqulo imithetho engama-613; aze, engenzanga nento le ukubanceda, abagwebe njengabangazani noThixo?” Kambe ke, owona mthwalo unzima, yayingenguwo uMthetho kaMoses, kodwa yayiyinkitha yezithethe abantu ababemele bazithobele.
Unobangela Wokwenene Wobunzima
9. Iimeko ezazikho phakathi kwabantu ngomhla kaYesu zinokuthelekiswa njani nezo zomhla kaKumkani uSolomon?
9 Maxa wambi umthwalo wemali phezu kwabantu wawunzima, kangangokuba kwakukho ubuhlwempu kuyo yonke indawo. AmaSirayeli ayefanele ahlawule iirhafu ezisengqiqweni ezazifuneka kuMthetho kaMoses. Kwandula ke ebudeni bolawulo lukaSolomon, abantu banyamekela imisebenzi eyayisenziwa sisizwe eyayinexabiso elikhulu, efana nokwakhiwa kwetempile nezinye izakhiwo. (1 Kumkani 7:1-8; 9:17-19) Sekunjalo, iBhayibhile isixelela ukuba abantu ‘babesidla, besela, bevuya. Ahlala ke amaYuda namaSirayeli ekholosile, elowo ehleli phantsi komdiliya wakhe naphantsi komkhiwane wakhe, ethabathela kwaDan esa eBher-shebha, yonke imihla kaSolomon.’ (1 Kumkani 4:20, 25) Wawubangelwa yintoni lo mahluko?
10. Yabangelwa yintoni imeko awayekuyo amaSirayeli ngenkulungwane yokuqala?
10 Logama nje olo hlanga lwalubambelele ngokuqinileyo kunqulo lokwenyaniso, lwalunandipha inkoliseko kaYehova yaye lwalusikelelwa ngonqabiseko nempumelelo phezu kwazo nje iindleko ezinkulu zesizwe olwalujongene nazo. Noko ke, uYehova walumkisa ngelokuba ukuba babethe ‘babuya ekumlandeleni, abayigcina imithetho yakhe,’ babeya kufumana imiphumo ebuhlungu. Eneneni, “amaSirayeli [ayeya kuba] ngumzekeliso nento yentsini ezizweni zonke.” (1 Kumkani 9:6, 7) Kwaba njalo kanye. USirayeli walawulwa zezinye iintlanga, yaye obo bukumkani babufudula buzukile baba lithanga lamanye amazwe. Onjani ukuba yintlekele umphumo wokutyeshela iimbopheleleko zabo zokomoya!
11. Kwakutheni ukuze uYesu avakalelwe kukuba abantu ‘babetyhafile bechithakele ngokwezimvu ezingenamalusi’?
11 Konke oku kusinceda siqonde isizathu sokuba uYesu avakalelwe kukuba abantu awayebabona ‘babetyhafile, bechithakele.’ Lawo yayingamaSirayeli, abantu bakaYehova, ubukhulu becala ababezama ukuphila ngokuvisisana nemithetho kaThixo nokuqhubeka nonqulo lwabo ngendlela eyamkelekileyo. Sekunjalo, babexhatshazwa yaye benyathelelwa phantsi kungekuphela nje ngamagunya ezobupolitika nawezoqoqosho kodwa kwanaziinkokeli zonqulo eziwexukileyo phakathi kwabo. Babefana ‘nezimvu ezingenamalusi’ kuba babengenamntu wokubanyamekela okanye wokubathethelela. Babefuna uncedo lokumelana nobunzima ababejamelene nabo. Hayi indlela esafika ngexesha elifanelekileyo ngayo isibongozo sikaYesu sothando nesobubele!
Isimemo SikaYesu Namhlanje
12. Ziziphi iingcinezelo abakhonzi bakaThixo nabanye abantu abanyanisekileyo abazivayo namhlanje?
12 Namhlanje iimeko ziyafana ngeendlela ezininzi. Abantu abanyanisekileyo abazama ukuziphilisa ngeendlela zokunyaniseka bafumanisa ukuba iingcinezelo noko kufuneka bekwenzile kule nkqubo yezinto yonakeleyo akunyamezeleki. Kwanabo bahlulele ubomi babo kuYehova abagonywanga koku. Iingxelo zibonisa ukuba abathile kubakhonzi bakaYehova bakufumanisa kunzima ngakumbi ukuzalisekisa iimbopheleleko zabo zonke, nangona befuna ukwenjenjalo. Baziva besindwa, bediniwe, bephelelwe ngamandla. Bambi bade bavakalelwe kukuba kunokuthi qabu ukuba banokusuka nje balibale ngako konke baze banyamalale ndaweni ithile ukuze baqale isiqalo esitsha. Ngaba wakha wavakalelwa ngaloo ndlela? Ngaba kukho umntu omaziyo osondeleyo kuwe okuloo meko? Ewe, isimemo sikaYesu esikhuthazayo sinentsingiselo kakhulu kuthi namhlanje.
13. Kutheni sinokuqiniseka ukuba uYesu unokusinceda sifumane ukuphumla nokuhlaziyeka?
13 Ngaphambi kokuba uYesu avakalise isimemo sakhe sothando, wathi: “Zonke izinto zinikelwe kum nguBawo; kanjalo akukho umaziyo uNyana, kuphela nguYise; akukho umaziyo uYise, kuphela nguNyana, nalowo athi uNyana athande ukumtyhilela.” (Mateyu 11:27) Ngenxa yolu lwalamano lusenyongweni phakathi koYesu noYise, sinokuqiniseka ukuba ngokwamkela isimemo sikaYesu size sibe ngabafundi bakhe, sinokungena kulwalamano olusenyongweni lobuqu noYehova, “uThixo onako konke ukuthuthuzela.” (2 Korinte 1:3; thelekisa uYohane 14:6.) Ukongezelela, ekubeni ‘zonke izinto zinikelwe kuye,’ nguYesu Kristu kuphela onegunya lokwenza imithwalo yethu ibe lula. Eyiphi? Leyo siyithwaliswa ziinkqubo zobupolitika, ezoqoqosho nezonqulo ezonakeleyo, kwanemithwalo esiyithwala ngenxa yesono nokungafezeki esakuzuz’ ilifa. Enjani yona ukukhuthaza nokomeleza ingcamango echanileyo zisuka nje!
14. UYesu wayenokubahlaziya kokuphi ukubulaleka abantu?
14 UYesu wahlabela mgama wenjenje: “Yizani kum nonke nina nibulalekayo, nisindwayo ngumthwalo, [“ndiya kunihlaziya,” NW].” (Mateyu 11:28) Ngokuqinisekileyo uYesu wayengathethi ngokuchaseneyo nokusebenza nzima, kuba ngokufuthi wayeluleka abafundi bakhe ukuba bazibhokoxe kumsebenzi ekwakufuneka bewenzile. (Luka 13:24, NW) Kodwa igama elithi “nibulalekayo” (“nitsala nzima,” Kingdom Interlinear) linengcamango yokutsala nzima ixesha elide udiniwe, ngokufuthi kungekho mphumo wanelisayo. Yaye elithi “nisindwayo ngumthwalo” linengcamango yokuthwaliswa umthwalo ongaphaya kwamandla akho. Umahluko unokufaniswa nalowo uphakathi komntu owembayo efuna ubutyebi obufihliweyo nomnye owemba imisele kwinkampu ekusetyenzwa nzima kuyo. Benza umsebenzi onzima ngokufanayo. Omnye uwenza ngolangazelelo, kodwa komnye, uyindinisa engaphele ndawo. Umahluko ubangelwa yinjongo yomsebenzi okanye ukungabikho kwenjongo.
15. (a) Yiyiphi imibuzo esifanele sizibuze yona ukuba sivakalelwa kukuba sinomthwalo onzima emagxeni ethu? (b) Kunokuthiwani ngomthombo wemithwalo yethu?
15 Ngaba uvakalelwa kukuba ‘uyabulaleka yaye uyasindwa ngumthwalo,’ yaye zininzi gqitha izinto ekufuneka uzenzile ngexesha namandla akho? Ngaba imithwalo oyithweleyo ibonakala inzima kakhulu kuwe? Ukuba kunjalo, kusenokuba luncedo ukuzibuza, ‘Ndibulaleka ngenxa yantoni? Ngumthwalo onjani endiwuthweleyo?’ Kule nkalo, omnye umphengululi weBhayibhile wakha wathi kwiminyaka engaphezu kwama-80 eyadlulayo: “Xa sijonga imithwalo ekhoyo ebomini singayahlulahlula ibe ziindidi ezimbini; eminye sinokuthi yileyo sizithwalisa yona nengenakuphepheka: leyo ibangelwa, naleyo ingabangelwa, zizenzo zethu.” Wandula ke wongezelela oku: “Abaninzi bethu bangamangaliswa, emva kokuzihlolisisa, kukufumanisa ukuba mininzi kangakanani kwimithwalo yethu esizithwalise yona.”
16. Yiyiphi imithwalo esinokuthi ngokungebobulumko sizithwalise yona?
16 Yiyiphi eminye yemithwalo esisenokuzithwalisa yona? Namhlanje siphila kwihlabathi elithanda izinto eziphathekayo, elithanda uyolo, nelinabantu abaziphethe kakubi. (2 Timoti 3:1-5) KwanamaKristu azahluleleyo asoloko ephantsi kwengcinezelo yokwenza ngokuvisisana neefashoni neendlela zokuphila zeli hlabathi. Umpostile uYohane wabhala ‘ngenkanuko yenyama, nenkanuko yamehlo, noqhankqalazo lobu bomi.’ (1 Yohane 2:16) Ezi ziimpembelelo ezinamandla ezinokusichaphazela ngokulula. Kuyavunywa ukuba abathile baye ngokuzithandela bangena abavela nangonwele ematyaleni ukuze bazinandiphe ngakumbi iziyolo zeli hlabathi okanye ukuze baqhubeke nendlela ethile yokuphila. Bandula ke bafumanisa ukuba bamele bachithe ixesha elininzi emsebenzini, okanye baphangele kwiindawo eziliqela, ukuze bafumane imali yokuhlawula amatyala abo.
17. Yiyiphi imeko enokwenza kube nzima ngakumbi ukuthwala umthwalo, yaye inokulungiswa njani?
17 Ngoxa umntu esenokuqiqa ngelokuba akunto iphosakeleyo ukuba nezinto okanye ukwenza izinto abanye abanazo okanye abazenzayo, kubalulekile ukuhlolisisa enoba wongeza ngokungeyomfuneko kusini na kumthwalo wakhe. (1 Korinte 10:23) Ekubeni umntu enokuthwala umthwalo othile kuphela, kufuneka kuthulwe othile ukuze akwazi ukuthwala omnye. Ngokufuthi, iba zizinto eziyimfuneko kwimpilo-ntle yethu yokomoya—ufundisiso lweBhayibhile lobuqu, ukubakho kwiintlanganiso nobulungiseleli basentsimini—ezithulwa kuqala. Umphumo uba kukuphelelwa ngamandla okomoya, nto leyo ekwenza kube nzima ngakumbi ukuthwala umthwalo. UYesu Kristu walumkisa ngengozi enjalo xa wathi: “Zilumkeleni ke, hleze zisindwe iintliziyo zenu kukuzingxala, nakukunxila, nangamaxhala obu bomi, ize loo mini inifikele ngebhaqo [njengomgibe, NW].” (Luka 21:34, 35; Hebhere 12:1) Kunzima ukubona umgibe nokuwuphepha ukuba umntu usindwa yimithwalo yaye udiniwe.
Ukuphumla Nokuhlaziyeka
18. UYesu wabathembisa ntoni abo beza kuye?
18 Ngoko ke, ngothando uYesu wanikela uncedo: “Yizani kum . . . [ndiya kunihlaziya, NW].” (Mateyu 11:28) Igama elithi “hlaziya” apha nelithi “ukuhlaziyeka” kwindinyana 29 avela kumagama esiGrike angqamana negama inguqulelo yeSeptuagint elisebenzisela ukuguqulela igama lesiHebhere elithetha “isabatha” okanye “ukugcina isabatha.” (Eksodus 16:23) Ngaloo ndlela, uYesu akazange athembise ukuba abo babesiza kuye kwakungayi kufuneka basebenze kwakhona, kodwa wathembisa ukuba wayeya kubahlaziya ukuze balungele umsebenzi abamele bawenze ngokuvisisana nenjongo kaThixo.
19. Umntu ‘uza njani kuYesu’?
19 Noko ke, umntu ‘uza njani kuYesu’? Kubafundi bakhe, uYesu wathi: “Ukuba kukho othanda ukundilandela, makazincame ngokwakhe, awuthwale [“umthi wakhe wentuthumbo”], andilandele [ngokuqhubekayo].” (Mateyu 16:24, thelekisa iNW.) Ngenxa yoko, ukuza kuYesu kuthetha ukuvisisanisa ukuthanda kukabani nokukaThixo nokukaKristu, ukwamkela umthwalo othile wembopheleleko, ukwenze oko ngokuqhubekayo. Ngaba oku kukufuna lukhulu? Ngaba ixabiso lako likhulu? Masiqwalasele oko kwathethwa nguYesu emva kokuba edlulisele isimemo sothando kwabadiniweyo.
Uyakhumbula Na?
◻ Abantu bomhla kaYesu babesindwa yimithwalo ngaziphi iindlela?
◻ Nguwuphi unobangela wokwenene weenzima zabantu?
◻ Sifanele sizihlolisise njani ukuba sivakalelwa kukuba siyasindwa ngumthwalo?
◻ Yiyiphi imithwalo esinokuthi ngokungebobulumko sizithwalise yona?
◻ Sinokukufumana njani ukuphumla uYesu awakuthembisayo?
[Imifanekiso ekwiphepha 15]
Yiyiphi eminye yemithwalo esinokuzithwalisa yona?
[Inkcazelo Ngomfanekiso okwiphepha 15]
Courtesy of Bahamas Ministry of Tourism