Isiqabu Kuxinezeleko—Unyango Olusebenzisekayo
“Yizani kum, nonke nina nibulalekayo nenisindwa ngumthwalo, yaye ndiza kunihlaziya.”—MATEYU 11:28.
1, 2. (a) Yintoni equlethwe yiBhayibhile, enokunciphisa ukuxinezeleka ngokugqithiseleyo? (b) Zaziyingenelo kangakanani iimfundiso zikaYesu?
MHLAWUMBI uyavuma ukuba uxinezeleko olugqithiseleyo luyingozi; lubangela unxunguphalo. IBhayibhile ibonisa ukuba yonke indalo engabantu ibandezelekile ziingcinezelo kangangokuba abantu abaninzi balinde ngolangazelelo ukukhululwa kubomi banamhlanje obubangela uxinezeleko. (Roma 8:20-22) Kodwa iZibhalo zibonisa nendlela esinokufumana ngayo isiqabu ekubandezelekeni ukusa kumlinganiselo othile kanye ngoku. Eso siqabu sinokufumaneka ngokulandela icebiso nomzekelo womfana owayephila kwiinkulungwane ezingama-20 ezadlulayo. Wayengumchweli, ukanti eyona nto wayeyithanda kakhulu yayingabantu. Wayechukumisa iintliziyo zabantu, wayebanceda kwiintswelo zabo enceda ababuthathaka ethuthuzela abadandathekileyo. Ngaphezu kwako konke, wayenceda abaninzi ukuba bakhule ngokomoya. Ngaloo ndlela, bafumana isiqabu kuxinezeleko olugqithiseleyo, njengokuba nawe unokusifumana.—Luka 4:16-21; 19:47, 48; Yohane 7:46.
2 Le ndoda, inguYesu waseNazarete, yayingasebenzisi ubulumko obabuzuzwa ngenxa yemfundo eyayifunyanwa ngabanye eRoma, eAthene okanye kwiAleksandriya yamandulo. Sekunjalo, iimfundiso zayo zaziwa ngokubanzi. Zazinomxholo othi: urhulumente oya kusetyenziswa nguThixo ukulawula umhlaba wethu ngokuphumelelayo. UYesu wachaza nemigaqo esisiseko yokuphila—imigaqo exabiseke ngokwenene namhlanje. Abo bakufundayo baze bakusebenzise oko uYesu wakufundisayo banandipha iingenelo ngoko nangoko, kuquka isiqabu ekuxinezelekeni ngokugqithiseleyo. Ngaba ubungayi kukunandipha oko?
3. Sisiphi isimemo esichukumisayo esadluliselwa nguYesu?
3 Usenokubuza. ‘Ngaba umntu owayephila kudala kangaka angaba nempembelelo ebomini bam ngoku?’ Khawuphulaphule la mazwi kaYesu achukumisayo: “Yizani kum, nonke nina nibulalekayo nenisindwa ngumthwalo, yaye ndiza kunihlaziya. Thabathani idyokhwe yam nize nifunde kum, kuba ndinomoya wobulali, ndithobekile ngentliziyo, kwaye niya kuyifumanela ukuhlaziyeka imiphefumlo yenu. Kuba idyokhwe yam yeyobubele nomthwalo wam ukhaphukhaphu.” (Mateyu 11:28-30) Wayethetha ukuthini? Makhe sihlolisise la mazwi ngokweenkcukacha size sibone indlela anokukunceda ngayo ufumane isiqabu kuxinezeleko.
4. UYesu wathetha noobani, yaye kutheni abo babemphulaphule bakufumanisa kunzima ukwenza oko kwakusithiwa mabakwenze?
4 UYesu wathetha nabantu abaninzi ababezama ngamandla ukwenza okufunwa ngumthetho kodwa ‘ababesindwa ngumthwalo’ ngenxa yokuba iinkokeli zamaYuda zazisenza unqulo lube ngumthwalo onzima. (Mateyu 23:4) Zazinikel’ ingqalelo kwimithetho engenasiphelo phantse kuzo zonke iinkalo zobomi. Ngaba wawungayi kukufumanisa kudandathekisa ukusoloko usiva kusithiwa “musa” ukwenza oku okanye okuya? Ngokwahlukileyo koko, xa bephulaphula uYesu abantu babemenyelwa kwinyaniso, ebulungiseni nakubomi obulunge ngakumbi. Ewe, ukwazi uThixo oyinyaniso kwakuquka ukuphulaphula uYesu Kristu, kuba ngelo xesha—nangoku—abantu babebona oko uYehova akuko. UYesu wathi: “Lowo undibonileyo mna umbonile noBawo.”—Yohane 14:9.
Ngaba Ubomi Bakho Bubangela Uxinezeleko Olugqithiseleyo?
5, 6. Zazinjani iimeko zomsebenzi nemivuzo eyayifunyanwa ngabantu bomhla kaYesu xa ithelekiswa neyethu namhlanje?
5 Oku kusenokukuxhalabisa ngenxa yokuba umsebenzi wakho okanye imeko yentsapho yakho inokukubangela udandatheke. Okanye ezinye iimbopheleleko zisenokubonakala zikongamela. Ukuba kunjalo, ufana nabantu abanyanisekileyo uYesu awadibana nabo waza wabanceda. Ngokomzekelo, khawuqwalasele ingxaki yokuziphilisa. Abantu abaninzi namhlanje bawa bevuka bezama ukuphila, yaye kwakunjalo nakwabaninzi ngexesha likaYesu.
6 Emva phayaa, umsebénzi wayesebenza nzima iiyure ezili-12 ngosuku, iintsuku ezi-6 ngeveki, ngokuqhelekileyo wayefumana idenariyo nje enye ngomsebenzi wosuku lonke. (Mateyu 20:2-10) Ungakanani loo mvuzo xa uthelekiswa nomvuzo owufumanayo okanye ofunyanwa ngabahlobo bakho? Kusenokuba nzima ukuthelekisa imivuzo eyayifunyanwa ngabantu bamandulo naleyo ifunyanwa ngabantu banamhlanje. Enye indlela yokuthelekisa oku, kukucinga ngexabiso lemali. Omnye umphengululi uthi ngomhla kaYesu isonka esenziwe ngeekomityi ezine zomgubo wengqolowa sasixabisa imali emalunga nomvuzo weyure. Omnye umphengululi uthi indebe yewayini esemgangathweni yayixabisa malunga nomvuzo weeyure ezimbini. Ngokusuka kwezi nkcukacha unokubona ukuba ngelo xesha, abantu babesebenza nzima ukuze baphile. Babesifuna isiqabu nokuhlaziyeka, njengokuba kunjalo nakuthi. Ukuba uqeshiwe, unokuziva unyanzelekile ukuba ube nemveliso engakumbi. Ngokufuthi asilifumani ixesha lokwenza izigqibo ezicingisiswe kakuhle. Usenokuvuma ukuba uyakulangazelela ukufumana isiqabu.
7. Basabela njani abantu kwisigidimi sikaYesu?
7 Ngokucacileyo, isimemo sikaYesu awasibhekisa kubo bonke abo ‘babebulaleka nababesindwa ngumthwalo’ simele ukuba sasibangel’ umdla kwabaninzi ababephulaphule ngelo xesha. (Mateyu 4:25; Marko 3:7, 8) Yaye khumbula ukuba uYesu wongezelela ngesi sithembiso, “ndiza kunihlaziya.” Eso sithembiso sisasebenza nanamhlanje. Sinokubhekisela nakuthi ukuba ‘siyabulaleka yaye sisindwa ngumthwalo.’ Yaye sinokubhekisela nakwabo sibathandayo, abo mhlawumbi bakwimeko efanayo.
8. Ukukhulisa abantwana nokwaluphala kulongezelela njani uxinezeleko?
8 Zikho nezinye izinto ezinxunguphalisa abantu. Ukukhulisa abantwana lucelomngeni oluphambili. Kwanokuba ngumntwana kunokuba lucelomngeni. Abantu abaninzi abadala nabaselula bahlangabezana neengxaki zempilo ezichaphazela ingqondo nomzimba. Yaye ngoxa abantu benokuphila ixesha elide, abantu abasele bekhulile baneengxaki zabo abajamelana nazo, nangona kukho inkqubela-phambili kwezonyango.—INtshumayeli 12:1.
Ukuba Phantsi Kwedyokhwe
9, 10. Kumaxesha amandulo, idyokhwe yayiluphawu lwantoni, yaye kwakutheni ukuze uYesu ameme abantu ukuba bathabathe idyokhwe yakhe?
9 Ngaba uye waphawula ukuba kumazwi acatshulwe kuMateyu 11:28, 29, uYesu wathi: “Thabathani idyokhwe yam nize nifunde kum.” Emva phayaa, kusenokwenzeka ukuba umntu oqhelekileyo wayevakalelwa kukuba usebenza phantsi kwedyokhwe. Ukususela kumaxesha amandulo, idyokhwe yayiluphawu lobukhoboka. (Genesis 27:40; Levitikus 26:13; Duteronomi 28:48) Uninzi lwabo babesebenza emini, awadibana nabo uYesu lwalusebenza luthwele idyokhwe yokwenene emagxeni, luthwele imithwalo enzima. Kuxhomekeka kwindlela eyayakhiwe ngayo idyokhwe, kwakusenokuba lula ukuyibeka entanyeni nasemagxeni okanye yayisenokumtyabula umntu. Njengomchweli, kusenokwenzeka ukuba uYesu wayezenza iidyokhwe, yaye kusenokwenzeka ukuba wayekwazi ukuyixoza ukuze ibe yidyokhwe ‘yobubele.’ Mhlawumbi indawo ehlala entanyeni nasemagxeni wayeyifaka ithwathwa okanye ilaphu ukuze ibe tofotofo kangangoko kunokwenzeka.
10 Xa uYesu wathi, “Thabathani idyokhwe yam,” kusenokwenzeka ukuba wayezifanisa nomntu owayesenza iidyokhwe ezazinokuba ‘zezobubele’ entanyeni nasemagxeni omsebénzi. Ngaloo ndlela, uYesu wongezelela: ‘Umthwalo wam ukhaphukhaphu.’ Oku kwakubonisa ukuba kwakungenzima ukusebenzisa idyokhwe, yaye nomsebenzi wawungengowobukhoboka. Kuyavunywa ukuba, ngokumema abo babephulaphule ukuba bathabathe idyokhwe yakhe, uYesu wayengabathembisi ngesiqabu ababeza kusifumana ngoko nangoko kuzo zonke iimeko ezazibacinezela ngelo xesha. Sekunjalo, imbono eyahlukileyo awayivezayo yayiza kubazisela isiqabu ukusa kumlinganiselo othile. Ukwenza uhlengahlengiso kwindlela ababephila ngayo nababesenza ngayo izinto kwakuza kubazisela isiqabu. Okubaluleke nangakumbi kukuba, ithemba elicacileyo nelomeleleyo laliza kubanceda baphile ubomi obungabangeli luxinezeleko kangako.
Unokuhlaziyeka
11. Kutheni sinokuthi uYesu wayengathi makutshintshwe iidyokhwe?
11 Nceda phawula ukuba, uYesu wayengathi abantu mabatshintshe iidyokhwe. IRoma yayiza kuqhubeka ilawula elo lizwe, kanye njengokuba oorhulumente banamhlanje belawula kumazwe ekuhlala kuwo amaKristu. Irhafu yayiza kuqhubeka ihlawulwa eRoma ngenkulungwane yokuqala. Iingxaki zempilo nezoqoqosho zaziza kuhlala zikho. Ukungafezeki nesono kwakuza kuqhubeka kubachaphazela abantu. Sekunjalo, ngokwamkela imfundiso kaYesu, babenokuhlaziyeka, njengoko nathi namhlanje sinokuhlaziyeka.
12, 13. Yintoni eyabalaseliswa nguYesu nawathi yayiya kubangela ukuhlaziyeka, yaye basabela njani abanye?
12 Intsingiselo eyintloko yomzekeliso kaYesu wedyokhwe yabonakala ngokucacileyo kumsebenzi wokwenza abafundi. Alithandabuzeki elokuba owona msebenzi kaYesu uyintloko yayikukufundisa abanye, ebalaselisa uBukumkani bukaThixo. (Mateyu 4:23) Ngoko xa wayesithi, “Thabathani idyokhwe yam,” ngokuqinisekileyo oko kwakuquka ukulandela emanyathelweni akhe ngokwenza loo msebenzi. Ingxelo yencwadi yeVangeli ibonisa ukuba uYesu washukumisela amadoda anyanisekileyo ukuba ayeke umsebenzi awayewenza, nto leyo exhalatyelwe kakhulu ngabantu abaninzi namhlanje. Khumbula isibongozo awasenza kuPetros, uAndreya, uYakobi noYohane: “Ndilandeleni, yaye ndiya kunenza nibe ngabalobi babantu.” (Marko 1:16-20) Wabonisa abo balobi indlela ababeya kwaneliseka ngayo ukuba babenokwenza loo msebenzi wawubaluleke kakhulu ebomini bakhe, bewenza phantsi kokhokelo noncedo lwakhe.
13 Abanye kumaYuda awayemphulaphule bayifumana ingongoma baza bakusebenzisa oko babekuva. Yiba nomfanekiso-ngqondweni woko kwakusenzeka kufuphi naselwandle, njengoko sikufunda kuLuka 5:1-11. Abalobi beentlanzi abane bazibhokoxa ubusuku bonke kodwa abazange babambise nto. Ngequbuliso, iminatha yabo yayizele! Oku akuzange kuzenzekele nje; kwabangelwa kukungenelela kukaYesu. Njengoko babekhangela ngaselunxwemeni, babona inkitha yabantu ababenomdla onyanisekileyo kwiimfundiso zikaYesu. Oko kwanceda loo madoda mane akuqonda oko kwakuthethwa nguYesu xa wayesithi: ‘Ukususela ngoku niya kubambisa abantu bephila.’ Asabela njani? ‘Abuyisela izikhephe emhlabeni, ashiya yonk’ into aza amlandela.’
14. (a) Sinokukufumana njani ukuhlaziyeka namhlanje? (b) Ziziphi iindaba ezilungileyo ezihlaziyayo ezavakaliswa nguYesu?
14 Ngokusisiseko, unokusabela ngendlela efanayo. Umsebenzi wokufundisa abantu inyaniso yeBhayibhile usaqhubeka. Malunga namaNgqina kaYehova azizigidi ezithandathu emhlabeni wonke aye asamkela isimemo sikaYesu ‘sokuthabatha idyokhwe yakhe’ aza aba ‘ngabalobi babantu.’ (Mateyu 4:19) Abanye bawenza njengomsebenzi wexesha elizeleyo; bambi benza konke okusemandleni bewenza njengomsebenzi wokwexeshana. Bonke bafumanisa ukuba lo msebenzi uyahlaziya, ngaloo ndlela, ubomi babo abubangeli luxinezeleko kangako. Oku kuquka ukwenza into abayinandiphayo, ukuxelela abanye ngeendaba ezilungileyo—“iindaba ezilungileyo zobukumkani.” (Mateyu 4:23) Ngalo lonke ixesha kumnandi ukuthetha ngeendaba ezilungileyo ngokukodwa ezi ndaba zilungileyo. IBhayibhile iqulethe umbandela osisiseko esiwufunayo ukuze siqinisekise abanye ukuba banokuphila ubomi obungaxinezeli kangako.—2 Timoti 3:16, 17.
15. Unokungenelwa njani kwiimfundiso zikaYesu ngokuphathelele ubomi?
15 Ukusa kumlinganiselo othile, kwanabantu abasandul’ ukuqala ukufunda ngoBukumkani bukaThixo baye bangenelwa kwiimfundiso zikaYesu eziphathelele indlela yokuphila. Abaninzi ngokunyanisekileyo banokuthi iimfundiso zikaYesu ziye zabenza bahlaziyeka zaza zabanceda baguqula ubomi babo ngokupheleleyo. Nawe unokuzibonela oko ngokuhlolisisa eminye yemigaqo yokuphila efumaneka kwiingxelo ezithetha ngobomi nobulungiseleli bukaYesu, ngokukodwa kwiincwadi zeVangeli ezibhalwe nguMateyu, uMarko noLuka.
Indlela Yokufumana Ukuhlaziyeka
16, 17. (a) Unokuzifumana phi ezinye zeemfundiso zikaYesu ezisisiseko? (b) Yintoni efunekayo ukuze uhlaziyeke ngokusebenzisa iimfundiso zikaYesu?
16 Ngentwasahlobo yowama-31 C.E., uYesu wanikela intshumayelo edumileyo ehlabathini nanamhlanje. Ngokufuthi ibizwa ngokuba yiNtshumayelo yaseNtabeni. Ibhalwe kuMateyu isahluko 5 ukusa kwisahluko 7 nakuLuka isahluko 6, yaye ishwankathela inkoliso yeemfundiso zakhe. Unokuzifumana ezinye iimfundiso zikaYesu kwezinye iincwadi zeVangeli. Uninzi lwezinto awazithethayo zizicacele, nangona ukuziqhelisela kunokuba lucelomngeni. Kutheni ungazifundi ezi zahluko ngenyameko, uze ucamngce ngazo? Vumela iingcamango zakhe ziphembelele indlela ocinga ngayo nesimo sakho sengqondo.
17 Ngokucacileyo, iimfundiso zikaYesu zinokulungelelaniswa ngeendlela ezahlukahlukeneyo. Masahlulahlule iimfundiso ezisisiseko ukuze kubekho imfundiso suku ngalunye lwenyanga, ngenjongo yokuzisebenzisa ebomini bethu. Njani? Musa ukuzikha nje phezulu. Khumbula umlawuli osisityebi owabuza uYesu Kristu wathi: “Ndenze ntoni na ukuze ndibudle ilifa ubomi obungunaphakade?” Xa uYesu waphinda izinto ezibalulekileyo eMthethweni kaThixo, le ndoda yaphendula ngokuthi yayisele izenza ezi zinto. Sekunjalo, waphawula ukuba kwakusafuneka yenze okungakumbi. UYesu wayicela ukuba yenze umgudu ongakumbi isebenzise imigaqo kaThixo ngokoqobo, ukuze ibe ngumfundi okhutheleyo. Kuyabonakala ukuba, le ndoda yayingakulungelanga ukuba nenxaxheba ukusa kuloo mkhamo. (Luka 18:18-23) Ngenxa yoko, umntu ofuna ukufunda ngeemfundiso zikaYesu namhlanje kufuneka akhumbule ukuba kukho umahluko phakathi kokuvumelana nje nazo nokuzamkela, ngaloo ndlela anciphise uxinezeleko.
18. Zekelisa indlela onokuyisebenzisa ngokunengenelo ngayo imibuzo esebhokisini.
18 Ekuqaliseni ukuhlolisisa nokusebenzisa iimfundiso zikaYesu, khangela ingongoma yokuqala esebhokisini. Ibhekisela kuMateyu 5:3-9. Eneneni, nabani na kuthi unokuchitha ixesha elininzi ecamngca ngesiluleko esihle esikwezo ndinyana. Noko ke, xa uzikhangela zonke, ufikelela kwesiphi isigqibo ngokuphathelele isimo sengqondo? Ukuba eneneni ufuna ukoyisa imiphumo yoxinezeleko olugqithiseleyo ebomini bakho, yintoni eza kukunceda? Unokungenelwa njani ukuba unikela ingqalelo ngakumbi kwimicimbi yokomoya, uyivumele ukuba ibe yeyona nto ucinga ngayo? Ngaba kukho nto ikuxhalabisayo ebomini bakho leyo kunokufuneka unganikeli ngqalelo kangako kuyo, uze unikele ingqalelo engakumbi kwizinto zokomoya? Ukuba wenjenjalo, oko kuya kukwenza ufumane ulonwabo olungakumbi ngoku.
19. Yintoni onokuyenza ukuze uzuze ukuqonda okungakumbi?
19 Nali elinye inyathelo onokulithabatha. Kutheni ungaxubushi ezo ndinyana nomnye umkhonzi kaThixo, mhlawumbi iqabane lakho lomtshato, isalamane esisondeleyo okanye umhlobo wakho? (IMizekeliso 18:24; 20:5) Ukhumbule ukuba umlawuli osisityebi wabuza omnye umntu—uYesu—ngombandela obalulekileyo. Intsabelo yakhe yayinokulwandisa ulonwabo lwakhe aze afumane nobomi obuhlala buhleli. Omnye umnquli oxubusha naye ezo ndinyana akanakulingana noYesu; sekunjalo, ukuncokola ngeemfundiso zikaYesu kuya kuzisa iingenelo kuni nobabini. Zama ukwenjenjalo ngokukhawuleza.
20, 21. Luluphi ucwangciso onokulusebenzisa ukuze ufunde ngeemfundiso zikaYesu, yaye unokuyihlolisisa njani inkqubela oyenzileyo?
20 Kwakhona khangela ebhokisini, umbandela othi “Iimfundiso Zokunceda Wena.” Ezi mfundiso zibekwe ndawonye ukuze ubuncinane uqwalasele imfundiso enye ngosuku. Okokuqala unokufunda oko kwathethwa nguYesu kwezo ndinyana zicatshuliweyo. Emva koko cinga ngamazwi akhe. Camngca ngendlela onokuwasebenzisa ngayo ebomini bakho. Ukuba uvakalelwa kukuba sele ukwenza oko, cingisisa ukuba akunakwenza okungakumbi na ekuphileni ngokuvisisana naloo mfundiso yobuthixo. Zama ukuyisebenzisa ngolo suku. Ukuba akuyiqondi kakuhle okanye akuyiqondi indlela onokuyisebenzisa ngayo, chitha olunye usuku ucamngca ngayo. Noko ke, khumbula ukuba akuyomfuneko ukuba uqale uyiqonde ngokupheleleyo ngaphambi kokuba udlulele kwenye. Ngosuku olulandelayo, unokuqwalasela enye imfundiso. Ekupheleni kweveki, unokuhlolisisa impumelelo oye wayizuza ekusebenziseni iimfundiso zikaYesu ezine okanye ezintlanu. Ngeveki yesibini, yongeza ezingakumbi, suku ngalunye. Ukuba ufumanisa ukuba kukho imfundiso ongakhange uyisebenzise, musa ukudimazeka. Iya kwenzeka loo nto kumKristu ngamnye. (2 Kronike 6:36; INdumiso 130:3; INtshumayeli 7:20; Yakobi 3:8) Qhubeka usebenzisa ezo mfundiso kwiveki yesithathu neyesine.
21 Emva kwenyanga, usenokuzigubungela zonke ezo ngongoma zingama-31. Eneneni, uya kuvakalelwa njani emva koko? Ngaba akuyi konwaba ngakumbi, mhlawumbi uhlaziyeke? Kwanokuba wenza uphuculo olungephi, mhlawumbi uya kufumanisa ukuba uxinezeleko lwehlile, okanye ubuncinane uya kuhlangabezana nalo bhetele, yaye uya kukwazi ukuqhubeka nobomi. Musa ukulibala ukuba zikho ezinye iingongoma ezintle kwiimfundiso zikaYesu ezingekhoyo kolu ludwe. Kutheni ungaphandi ezinye zazo uze uzame ukuzisebenzisa?—Filipi 3:16.
22. Yintoni esinokuyifumana xa sithobela imfundiso kaYesu, kodwa yiyiphi enye inkalo eyongezelelekileyo ekufuneka sifunde ngayo?
22 Unokubona ukuba idyokhwe kaYesu, ngoxa inabo ubunzima, yeyobubele ngenene. Umthwalo weemfundiso zakhe nowokuba ngumfundi ulula. Emva kweminyaka engaphezu kwama-60 yamava obuqu, umpostile uYohane, umhlobo osenyongweni kaYesu, wavumelana noku: “Kuba ukumthanda uThixo kuko ukuthi, siyigcine imiyalelo yakhe; kwaye ayinzima imiyalelo yakhe.” (1 Yohane 5:3) Nawe unokuba nentembelo efanayo. Okukhona usebenzisa imfundiso kaYesu, kokukhona uya kufumanisa ukuba izinto ezibangela uxinezeleko olugqithiseleyo kubantu abaninzi namhlanje azikunxunguphalisi kangako wena. Uya kubona ukuba ufumene isiqabu ngendlela ephawulekayo. (INdumiso 34:8) Ukanti, ikho nenye inkalo yedyokhwe kaYesu yobubele ekufuneka uyiqwalasele. UYesu wakhankanya nokuba ‘unomoya wobulali yaye uthobekile ngentliziyo.’ Kungena njani oko ekufundeni kwethu ngoYesu nasekumxeliseni? Siya kukuqwalasela oko kwinqaku elilandelayo.—Mateyu 11:29.
Unokuphendula Uthini?
• Kutheni sifanele sikhangele kuYesu xa sifuna isiqabu kuxinezeleko olugqithiseleyo?
• Idyokhwe yayiluphawu lwantoni, yaye ngoba?
• Kwakutheni ukuze uYesu ameme abantu ukuba bathabathe idyokhwe yakhe?
• Unokukuzuza njani ukuhlaziyeka ngokomoya?
[Amagama acatshulweyo akwiphepha 14]
Umxholo wonyaka wamaNgqina kaYehova ebudeni bowama-2002 uya kube usithi: “Yizani kum . . . yaye ndiza kunihlaziya.”—Mateyu 11:28.
[Ibhokisi/Umfanekiso okwiphepha 12, 13]
Iimfundiso Zokunceda Wena
Ziziphi izinto eziluncedo onokuzifumana kuMateyu isahluko 5 ukusa kwisahluko 7? Ezi zahluko ziqulethe iimfundiso ezanikelwa nguMfundisi Omkhulu, uYesu, kwithambeka laseGalili. Nceda ufunde iindinyana ezicatshulwe ngezantsi, usebenzisa iBhayibhile yakho, uze uzibuze le mibuzo ehambisana nazo.
1. 5:3-9 Kundixelela ntoni oku ngesimo sengqondo endinaso? Ndinokwenza njani ukuze ndizuze ulonwabo olungakumbi? Ndinokuyinikela njani ingqalelo engakumbi kwiintswelo zam zokomoya?
2. 5:25, 26 Yintoni elunge ngakumbi kunokuxelisa umoya wosukuzwano oxhaphakileyo kwabaninzi?—Luka 12:58, 59.
3. 5:27-30 Yintoni egxininiswa nguYesu ngokuphathelele ukucinga ngeentlobano zesini? Ukuphepha iingcinga ezinjalo kunokuba negalelo njani kulonwabo lwam nasekubeni noxolo lwengqondo?
4. 5:38-42 Kutheni ndifanele ndizame ukuphepha isimo sengqondo sokuba neengcwangu esibalaseliswayo kwibutho lanamhlanje?
5. 5:43-48 Ndinokungenelwa njani ngokuqhelana ngakumbi nabo bendifudula ndibagqala njengeentshaba? Oku kunokuyinciphisa okanye kuyiphelise njani mhlawumbi imbambano?
6. 6:14, 15 Ukuba maxa wambi ndinotyekelo lokungaxoleli, ngaba oko kubangelwa kukuba nomona okanye inzondo? Ndinokukuguqula njani oku?
7. 6:16-18 Ngaba ndityekele ekuxhalabeleni imbonakalo yam yangaphandle kunokuba kunjalo ngeengcinga endinazo ngaphakathi? Yintoni endifanele ndiyiphaphele ngakumbi?
8. 6:19-32 Unokuba yintoni umphumo ukuba ndixhalabele imali nezinto endinazo ngokugqithiseleyo? Kukucinga ngantoni okunokundinceda ndibe nembono elungeleleneyo ngokuphathelele le nkalo?
9. 7:1-5 Ndivakalelwa njani xa ndiphakathi kwabantu abathanda ukugweba abanye nabathanda ukugxeka? Kutheni kubalulekile ukuba ndiphephe ukuba njalo?
10. 7:7-11 Ukuba ukuzingisa yinto entle xa sicela izinto kuThixo, kuthekani kwezinye iinkalo zobomi?—Luka 11:5-13.
11. 7:12 Nangona ndiwazi uMthetho Omkhulu, ndisisebenzisa ngokufuthi kangakanani esi siluleko kwindlela endibaphatha ngayo abanye?
12. 7:24-27 Ekubeni ndinembopheleleko yokulawula ubomi bam, ndinokuzilungiselela njani izaqhwithi nezikhukula zobunzima? Kutheni ndifanele ndicinge ngale nto ngoku?—Luka 6:46-49.
Iimfundiso ezongezelelekileyo endinokuziqwalasela:
13. 8:2, 3 Ndinokuyibonakalisa njani imfesane kwabo basweleyo, njengoko uYesu wayesenza ngokufuthi?
14. 9:9-38 Ukubonakalisa inceba kunayiphi indima ebomini bam, yaye ndinokuyibonakalisa ngakumbi njani?
15. 12:19 Ngokufunda kwisiprofeto esithetha ngoYesu, ngaba ndizabalazela ukuphepha iingxabano zochuku?
16. 12:20, 21 Kunokuba luncedo njani ukungabenzakalisi abanye enoba kungamazwi okanye ngezenzo?
17. 12:34-37 Yintoni endithanda ukuthetha ngayo? Ndiyazi ukuba xa ndikhama iorenji, kuphuma incindi yeorenji, ngoko kutheni ndifanele ndicinge ngoko kungaphakathi entliziyweni yam?—Marko 7:20-23.
18. 15:4-6 Ngokusuka kumazwi kaYesu, yintoni endiyifumanisayo ngokuphathelele ukunyamekela abantu abakhulileyo ngothando?
19. 19:13-15 Yintoni ekufuneka ndizinike ithuba lokuyenza?
20. 20:25-28 Kutheni kungeyongenelo ukusebenzisa igunya ngenxa nje yokufuna inzuzo? Ndinokumxelisa njani uYesu kule nkalo?
Iingongoma ezongezelelekileyo, ezibhalwe nguMarko:
21. 4:24, 25 Ibaluleke ngantoni indlela endibaphatha ngayo abanye?
22. 9:50 Ukuba oko ndikuthethayo noko ndikwenzayo kuhle, yiyiphi imiphumo emihle esenokubakho?
Okokugqibela, iimfundiso ezimbalwa ezibhalwe nguLuka:
23. 8:11, 14 Ukuba ndivumela ixhala, ubutyebi neziyolo zilawule ubomi bam, unokuba yintoni umphumo?
24. 9:1-6 Nangona uYesu wayenamandla okuphilisa abagulayo, yintoni eyayiphambili ebomini bakhe?
25. 9:52-56 Ngaba ndiyakhawuleza ukukhathazeka? Ngaba ndiyawuphepha umoya wokuziphindezela?
26. 9:62 Ndifanele ndiyigqale njani imbopheleleko endinayo yokuthetha ngoBukumkani bukaThixo?
27. 10:29-37 Ndifanele ndizingqine njani ndingummelwane kungekhona owasemzini?
28. 11:33-36 Ziziphi iinguqulelo endinokuzenza ukuze ubomi bam bube lula ngakumbi?
29. 12:15 Luluphi ulwalamano olukhoyo phakathi kobomi nezinto esinazo?
30. 14:28-30 Ukuba ndizinika ixesha lokucingisisa ngezigqibo endizenzayo ngenyameko, yintoni endinokuyiphepha yaye ziziphi iingenelo endinokuzifumana?
31. 16:10-12 Ziziphi iingenelo endinokuzifumana ngokugcina ingqibelelo?
[Imifanekiso ekwiphepha 10]
Umsebenzi wokusindisa ubomi owenziwa phantsi kwedyokhwe kaYesu uyahlaziya