Abavakalisi BoBukumkani Bayabalisa
Ukunikela Ubungqina Kuvelisa Isiqhamo Ekhaya Nasesikolweni
UBOMI bomKristu buquka ukwenzela abanye izinto ezilungileyo, ingakumbi ukwabelana nabo ngeendaba ezilungileyo zoBukumkani bukaThixo. IMizekeliso 3:27 ithi: “Musa ukwala nento elungileyo kolunge nayo, kwakuba kusemandleni esandla sakho ukuyenza.” EArgentina iNgqina eliselula elalikunyaka walo wesithathu kwimfundo ephakamileyo lalifuna ukwabelana nomhlobo elalifunda naye ngeendaba ezilungileyo zoBukumkani. Lakuba likwenzile oko kwabakho imiphumo emininzi.
Ngenye imini eli Ngqina liselula laxelela umhlobo walo ukuba asizizo zonke iinkonzo ezilungileyo. Xa lo mfana waphendula ngokuthi akazange enze nto imbi, iNgqina lathi: “Kungekho nanto uyenzela uThixo.” Oku kwabangela ukuba lo usemtsha acinge. Kamva eli Ngqina lachaza ukuba le yimihla yokugqibela yaye ukuze azuze inkoliseko kaThixo, ubani umele azuze ulwazi oluchanileyo lweBhayibhile aze alusebenzise. Umhlobo elifunda naye wavuma. Kodwa ngaba intsapho yakowabo yayiza kumvumela ukuba abe nesifundo seBhayibhile? Ukuze linike umhlobo walo into yokucinga, eli Ngqina lamcela ukuba afunde incwadi ethi Unokuphila Ngonaphakade KwiParadisi Esemhlabeni.
Ixesha lahamba, yaye lo mhlobo wemka esikolweni. Akuzange kuvakale nto ngaye ixesha elingaphezu konyaka. Kodwa ngenye imini eli Ngqina liselula lamangaliswa kukufumana umnxeba ovela kumhlobo walo owathi wayebona ukuba iziprofeto zeBhayibhile zazizaliseka ngokwenene. Ngokukhawuleza eli Ngqina lalungiselela ukuba lifundisise naye iBhayibhile.
Xa laya kwikhaya lomhlobo walo elalifunda naye, laphawula ukuba abazali bomhlobo walo babenenkxalabo ngento umntwana wabo awayezifaka kuyo. Kwanomninawa walo mhlobo wacinga ukuba wayeshiywa ziingqondo. Ngoko abazali bathi umninawa makabekho kwisifundo esilandelayo. Emva koko, ethe gwantyi iinyembezi, lo mfana waxelela abazali bakhe ukuba umkhuluwa wakhe wayengashiywa ziingqondo, kulapho unina wadanduluka wathi, “Kunokuba ndibe nengxaki enye, ngoku ndinezimbini!”
Ngenxa yoko, naye wabakho kwisifundo esilandelayo yaye kwafuneka avume ukuba la makhwenkwe ayengashiywa ziingqondo. Kamva kwalungiselelwa ukuba yena nomyeni wakhe baqhutyelwe isifundo seBhayibhile. Kungekudala intsapho yonke yaqalisa ukuya kwiintlanganiso zebandla eHolweni YoBukumkani. Ekuhambeni kwexesha, utatomkhulu nomakhulu nabo baqalisa ukufundisisa iBhayibhile baza baqala nokuya kwiintlanganiso. Ukususela ngoko, umfana wokuqala uye wabhaptizwa. Utshatile, kwaye yena nomfazi wakhe bangabavakalisi abanenzondelelo.
Ngaphezu koko, ngobungqina obungacwangciswanga esikolweni, eli Ngqina liselula liye lanceda abanye oogxa balo basesikolweni ababini nonina nodade bomnye wabo ukuba baqalise ukufundisisa iBhayibhile. Xa bebonke, ngabantu abali-11 abafunde inyaniso yeBhayibhile ngenxa yokuba eli Ngqina liselula alizange lale ukwenza okulungileyo koogxa balo basesikolweni. Onjani wona ukuba mhle umphumo! Enyanisweni, “Hayi uyolo lwabantu abaThixo unguYehova!”—INdumiso 144:15.