Intuthuzelo Kwabo ‘Bamoya Udakumbileyo’

NAMHLANJE, ihlabathi likaSathana ‘alisaziva.’ (Efese 4:19; 1 Yohane 5:19) Ukukrexeza nokuhenyuza kuxhaphakile. Kumazwe amaninzi imitshato engama-50 ekhulwini okanye engakumbi iyaqhawulwa. Ubufanasini buyinto eyamkelekileyo. Ugonyamelo olungokwesini—ukudlwengula—lukhankanywa ngokufuthi ezindabeni. Izinto ezibonisa amanyala zilushishino olungenisa amawaka ezigidi zeedola.—Roma 1:26, 27.

Phakathi kokona kuziphatha kugqwethekileyo kukuxhatshazwa ngokwesini kwabantwana abamsulwa. Njengobulumko behlabathi likaSathana, ukuxhatshazwa kwabantwana ngokwesini ‘kububulwanyana, kububudemon.’ (Yakobi 3:15, NW) Iphephancwadi iTime lithi, kwelaseUnited States nje kuphela “zingaphezu kwama-400 000 iingxelo ekuqinisekiweyo ngazo zokuhlaselwa ngokwesini ngabafundisi-ntsapho noogqirha ezithi zigcinwe kwiifayile zaseburhulumenteni nyaka ngamnye.” Abaninzi babo bangamaxhoba okuxhatshazwa ngolu hlobo, xa bekhulile, baqhubeka benamanxeba angapholiyo, yaye loo manxeba ngawokwenene! IBhayibhile ithi: “Umoya [utyekelo lwengqondo, iimvakalelo neengcinga zangaphakathi] wendoda uyasinyamezela isifo sayo; ke umoya odakumbileyo [onamanxeba, obandezelekileyo], ngubani na ongawuthwalayo?”—IMizekeliso 18:14.

Iindaba ezilungileyo zoBukumkani bukaThixo zinomtsalane kubantu bazo zonke iindidi, kuquka “abantliziyo zaphukileyo” nabo ‘bamoya udambayo.’ (Isaya 61:1-4) Akumangalisi ukuba, abaninzi abaneemvakalelo ezibuhlungu besabela kwisimemo esithi: “Lowo unxaniweyo makeze; lowo uthandayo, makawathabathe amanzi obomi ngesisa.” (ISityhilelo 22:17) Ibandla lamaKristu linokuba yindawo yokuthuthuzela abanjalo. Bayavuyiswa kukufunda ukuba kungekudala ukubandezeleka kuza kuba yinto yexesha elidluleyo. (Isaya 65:17) Noko ke, okwangoku, kusenokufuneka ‘bethuthuzelwe’ kuze ‘kubotshwe’ namanxeba abo. Ngokufanelekileyo uPawulos waluleka amaKristu esithi: “Bakhuzeni abamxhelo mncinane; basekeleni abathambileyo; yibani nokuzeka kade umsindo kubantu bonke.”—1 Tesalonika 5:14.

“Iinkumbulo Ezicinezelweyo”

Kwiminyaka yakutshanje bambi baye ‘baphuka iintliziyo’ ngezizathu ekunzima ngabanye ukuziqonda. Aba ngabakhulileyo abathi, ngokusekelwe koko kuye kwachazwa ‘njengeenkumbulo ezicinezelweyo,’ baye baxhatshazwa ngokwesini xa babengabantwana.a Abanye ababi nazo iingcinga zokuxhatshazwa okunjalo de, ngokungalindelekanga, kuthi qatha ngequbuliso “iinkumbulo” zokuxhatshazwa kwabo ngumntu okhulileyo (okanye ngabantu abakhulileyo) ngoxa babeselula. Ngaba bakho ebandleni lamaKristu abaneengcinga eziphazamisayo ezilolo hlobo? Ewe bakho kumazwe ambalwa, yaye aba bazahluleleyo basenokuxinezeleka ngokunzulu, babe nomsindo, bazive benetyala, beneentloni okanye bengamalolo. NjengoDavide basenokuvakalelwa ngathi uThixo ubalahlile baze badanduluke bathi: “Yini na ukuba umele mgama, Yehova, uzifihle ngamaxesha engxingongo?”—INdumiso 10:1.

Iingcali kwizigulo zengqondo azibuqondi bonke ubucukubhede obunokuthanani nezi “nkumbulo.” Sekunjalo, ezi “nkumbulo” zinokubuchaphazela ubumoya bamaKristu azahluleleyo. Ngoko sikhangela ngentembelo eLizwini likaThixo ukuze sifumane ulwalathiso lwendlela yokuzisingatha. IBhayibhile inikela ‘ukuqonda kwizinto zonke.’ (2 Timoti 2:7; 3:16) Yaye inceda bonke abaxhalabileyo ukuba bathembele kuYehova, “uSozimfefe, uThixo onako konke ukuthuthuzela, osithuthuzelayo kuyo yonke imbandezelo yethu.”—2 Korinte 1:3, 4.

Ngaba Ngenene Kwenzeka?

Ehlabathini, kukho impikiswano enkulu mayela noko zikuko ezi “nkumbulo” kwanomkhamo ezichane ngawo ngokubhekisele kwizinto ezenzeke ngokwenene. AmaNgqina kaYehova ‘akangawo awehlabathi’ yaye akananxaxheba kule mpikiswano. (Yohane 17:16) Ngokweengxelo ezipapashiweyo, ezi “nkumbulo” ziye maxa wambi zangqineka zichanile. Ngokomzekelo, emva kokuba ummeli weinshorensi ohlola umonakalo owenziwe ebantwini okanye kwimpahla yabo uFrank Fitzpatrick “wakhumbula” ukuxhatshazwa kwakhe ngokwesini ngumfundisi othile, nabanye abaphantse babe likhulu beza kufaka isimangalo sokuba nabo baxhatshazwa kwanguloo mfundisi. Kubikwa ukuba loo mfundisi wavuma ukuba wayebaxhaphazile.

Noko ke, kuphawuleka ukuba abantu abaninzi ababanga nabungqina bakuxhasa ezo “nkumbulo” zabo. Bambi ababandezeleke ngale ndlela baye baba neenkumbulo ezicacileyo zokuxhatshazwa ngumntu othile okanye kwindawo ethile. Noko ke, ngokwahlukileyo koku, kamva ubungqina obubambekayo benza kwacaca ukuba ezi nkcukacha “zikhunjulwayo” zazingenakuba yinyaniso.

Ukulungiselela Ikhusi

Kodwa ke, inokunikelwa njani intuthuzelo kwabo ‘bamoya udakumbileyo’ ngenxa “yeenkumbulo” ezinjalo? Khumbula umzekeliso kaYesu womSamariya olungileyo. Indoda ethile yahlaselwa ngabaphangi, bayimbokra, baza bayikhuthuza. Akufika lo mSamariya, wayisizela le ndoda ingxwelerhekileyo. Wenza ntoni? Ngaba wafuna yonke ingcombolo mayela nokubethwa kwayo? Okanye ngaba lo mSamariya wafuna inkcazelo ngabo baphangi waza wabaleqa ngoko nangoko? Akunjalo. Le ndoda yayenzakele! Ngoko lo mSamariya wawabopha ngenyameko amanxeba ayo waza ngothando wayithwala wayisa ngokukhuselekileyo endlwini yabahambi ekufuphi apho yayinokuchacha khona.—Luka 10:30-37.

Enyanisweni, ukho umahluko phakathi kwamanxeba asemzimbeni kunye ‘nomoya odakumbileyo’ obangelwa kukuxhatshazwa kokwenene ngokwesini ebuntwaneni. Kodwa zombini ezi zinto zibangela ukubandezeleka okukhulu. Ngenxa yoko, oko umSamariya wakwenzela umYuda owayengxwelerhekile kubonisa oko kunokwenziwa ukunceda umKristu onguwethu oxhwalekileyo. Into yokuqala kukumthuthuzela ngothando nokumnceda achache.

UMtyholi wambandezela uYobhi othembekileyo, mhlawumbi enentembelo yokuba intlungu yeemvakalelo okanye yasemzimbeni yayiya kuyaphula ingqibelelo yakhe. (Yobhi 1:11; 2:5) Ukususela ngoko, uSathana uye wazama ngokufuthi ukusebenzisa ukubandezeleka—enoba ukubangela ngokungqalileyo okanye akunjalo—ukuze enze buthathaka ukholo lwabakhonzi bakaThixo. (Thelekisa eyesi-2 kwabaseKorinte 12:7-9.) Ngaba sinokulithandabuza elokuba uMtyholi ngoku usebenzisa ukuxhatshazwa kwabantwana ‘nokudakumba emoyeni’ kwabantu abakhulileyo abaninzi abaye babandezeleka kukuxhatshazwa okunjalo (okanye abakhathazwa “ziinkumbulo” zoku) ukuzama ukwenza buthathaka ukholo lwamaKristu? NjengoYesu xa wayehlaselwa nguSathana, umKristu ova intlungu kodwa athi ngokuqinileyo angavumi ukulahla ingqibelelo yakhe uthi: “Suka umke, Sathana.”—Mateyu 4:10.

Hlala Womelele Ngokomoya

‘Umkhonzi othembekileyo noqondayo’ upapashe inkcazelo eluncedo ekusingatheni intlungu yokomoya neyeemvakalelo ebangelwa kukuxhatshazwa kwabantwana. (Mateyu 24:45-47) Amava abonisa ukuba lowo ubandezelekayo unokuncedwa ukuba uthembela ‘ekomelezeni kweNkosi, nasekuqineni kokomelela kwayo,’ exhoba “sonke isikrweqe sikaThixo.” (Efese 6:10-17) Esi sikrweqe siquka “inyaniso” yeBhayibhile, ebhenca uSathana njengotshaba oluyintloko ize idandalazise nobumnyama asebenza kubo yena nabaxhasi bakhe. (Yohane 3:19) Kwandula ke, kubekho “isigcina-sifuba sobulungisa.” Lowo ubandezelekileyo ufanele azabalazele ukubambelela kwimilinganiselo yobulungisa. Ngokomzekelo, abanye baba neentshukumisa ezinamandla zokufuna ukuzenzakalisa okanye ukuziphatha kakubi. Sihlandlo ngasinye bezixhathisa ezi ntshukumisa, bayoyisa!

Isikrweqe sokomoya sikwaquka ‘iindaba ezilungileyo zoxolo.’ Ukuthetha nabanye ngeenjongo zikaYehova kuyamomeleza lowo uthethayo kwanaye nabani na ophulaphulayo. (1 Timoti 4:16) Ukuba ‘unomoya odakumbileyo,’ owenza kube nzima ngawe ukuthetha ngeendaba ezilungileyo, zama ukupheleka omnye umKristu xa esenza lo msebenzi ubalulekileyo. Yaye ungalilibali “ikhaka lokholo.” Yiba nokholo lokuba uYehova uyakuthanda yaye uza kukubuyisela konke olahlekelwe kuko. Kholwa ngaphandle kwamathandabuzo ukuba noYesu uyakuthanda, yaye wakungqina oku ngokukufela. (Yohane 3:16) USathana ubesoloko etyhola uYehova ngokuba akabakhathalele abakhonzi bakhe. Obo bobunye nje bobuxoki bakhe obukhulu nobenkohlakalo.—Yohane 8:44; thelekisa uYobhi 4:1, 15-18; 42:10-15.

Ukuba intliziyo ebuhlungu yenza kube nzima ngawe ukukholelwa ukuba uYehova ukukhathalele, kuya kukunceda ukunxulumana nabanye abakholelwa ngokuqinileyo ukuba unayo inkathalo. (INdumiso 119:107, 111; IMizekeliso 18:1; Hebhere 10:23-25) Musa ukumvumela uSathana ukuba akuphulukanise nomvuzo wobomi. Khumbula ukuba, “isigcina-ntloko sosindiso” siyinxalenye yesikrweqe; kukwanjalo ‘nangekrele lomoya.’ IBhayibhile iphefumlelwe ngomoya oyingcwele, lowo uSathana angenakuwoyisa. (2 Timoti 3:16; Hebhere 4:12) Amazwi ayo aphilisayo anokuyidambisa intlungu engokweemvakalelo.—Thelekisa INdumiso 107:20; 2 Korinte 10:4, 5.

Okokugqibela, thandazela rhoqo amandla okunyamezela. (Roma 12:12; Efese 6:18) Umthandazo osuk’ entliziyweni wamomeleza uYesu xa wayengcungcutheka ngokweemvakalelo, yaye unokukunceda nawe. (Luka 22:41-43) Ngaba ukufumanisa kunzima ukuthandaza? Cela abanye bathandaze kunye nawe yaye bakuthandazele. (Kolose 1:3; Yakobi 5:14) Umoya oyingcwele uya kuyixhasa imithandazo yakho. (Thelekisa abaseRoma 8:26, 27.) Njengoko kunjalo ngesigulo esibuhlungu sasemzimbeni, bambi abanamanxeba anzulu angokweemvakalelo basenokunganyangeki ngokupheleleyo kule nkqubo yezinto. Kodwa ngoncedo lukaYehova sinokunyamezela, yaye unyamezelo lululoyiso, njengoko kwakunjalo kwimeko kaYesu. (Yohane 16:33) “Kholosani [ngoYehova] ngamaxesha onke, nina bantu; phalazani intliziyo yenu phambi kwakhe. UThixo ulihlathi kuthi.”—INdumiso 62:8.

Kuthekani Ngalowo Kuthiwa Ngumxhaphazi?

Umntu othi ngokwenene axhaphaze umntwana ngokwesini ungumdlwenguli yaye ufanele agqalwe ngaloo ndlela. Nabani na olixhoba loku unelungelo lokummangalela lowo umxhaphazileyo. Sekunjalo, isimangalo asifanele senziwe ngokungxama ukuba sisekelwe kuphela “kwiinkumbulo ezicinezelweyo” zokuxhatshazwa. Kule meko eyona nto ibalulekileyo kukuba lowo ubandezelekayo azuze amandla okulawula iimvakalelo zakhe. Emva kwexesha elithile, usenokuba kwimeko entle ngakumbi yokuziphicotha ezi “nkumbulo” aze agqibe ngoko afuna ukukwenza ngazo, ukuba kukho okuthile afuna ukukwenza.

Qwalasela imeko kaDonna. Kuthiwa wayesitya ngokungalungelelananga waza waya kumcebisi othile—ekubonakala ukuba wayethandabuzeka. Kungekudala wamangalela uyise ngokumxhaphaza ngokwesini waza wasiwa enkundleni yamatyala. Inkundla ayizange ifikelele esigqibeni, ngoko uyise akazange avalelwe, kodwa kwafuneka ehlawule iindleko zenkundla ezabiza i-$100 000 (R360 000). Wandula ke, emva kwako konke oko, uDonna waxelela abazali bakhe ukuba wayengasakholwa ukuba wayexhatshaziwe ngokwenene!

Ngobulumko, uSolomon wathi: “Musa ukuphuma ungxamile, ukuya ekubambaneni nomnye.” (IMizekeliso 25:8) Ukuba kukho isizathu esibambekayo sokurhanela ukuba lowo kuthiwa ngumenzi-bubi usabaxhaphaza abantwana, kusenokufuneka kunikelwe isilumkiso. Abadala bebandla banokunceda kwimeko enjalo. Ngaphandle koko, musa ukungxama. Ekugqibeleni, usenokukhetha ukuwubetha ngoyaba lo mbandela. Phofu, ukuba ufuna ukuthetha nalowo kuthiwa ngumenzi-bubi (emva kokuba uqale waphicotha indlela oya kuvakalelwa ngayo ngendlela asenokusabela ngayo), unelungelo lokwenjenjalo.

Ebudeni bexesha lokuchacha kwalowo “uneenkumbulo,” kusenokuvela iimeko ezingaqhelekanga. Ngokomzekelo, ubani usenokuba nemifanekiso-ngqondweni ecacileyo yokuxhatshazwa ngokwesini nguthile ambona mihla le. Akunakumiselwa migaqo ngendlela yokusingatha oku. “Elowo uya kuwuthwala owakhe umthwalo.” (Galati 6:5) Maxa wambi ubani usenokuvakalelwa kukuba isalamane okanye ilungu elisondeleyo lentsapho libandakanyekile. Khumbula ukuba ezinye “iinkumbulo ezicinezelweyo” zisekelwe kumathandabuzo xa kufikelela ekuchazeni lowo urhanelwa njengomenzi-bubi. Kwimeko enjalo, lo gama nje umbandela lowo ungekacaci ngokuqinisekileyo, ukuqhagamshelana nentsapho—ubuncinane ngokutyelela ngamathub’ athile, ngokubhala ileta, okanye ngokutsala umnxeba—kuya kubonisa ukuba ubani lowo uzama ukulandela ikhondo elingokweZibhalo.—Thelekisa eyabase-Efese 6:1-3.

Yintoni Abanokuyenza Abadala?

Ukuba abadala bachazelwa lilungu lebandla ngokufikelwa kwalo ngequbuliso “ziinkumbulo ezicinezelweyo” zokuxhatshazwa ebuntwaneni, ngokuqhelekileyo kwabelwa ababini kubo ukuba bancede. Aba badala bafanele bamkhuthaze lowo uxhwalekileyo ukuba okwethutyana anikel’ ingqalelo ekuhlangabezaneni nokubandezeleka ngokweemvakalelo. Amagama abo nabaphi na abaxhaphazi “abakhunjulwayo” afanele agcinwe eyimfihlo ngokungqongqo.

Umsebenzi oyintloko wabadala kukusebenza njengabalusi. (Isaya 32:1, 2; 1 Petros 5:2, 3) Bafanele bakuphaphele ngokukhethekileyo ‘ukwambatha iimfesane zeemfefe, ububele, ukuthobeka kwentliziyo, ubulali nokuzeka kade umsindo.’ (Kolose 3:12) Mabaphulaphule ngobubele baze banikele amazwi aphilisayo angokweZibhalo. (IMizekeliso 12:18) Bambi abathwaxwe “ziinkumbulo” ezibuhlungu bavakalise uxabiso ngabadala ababatyelela okanye babatsalele nje umnxeba rhoqo behlola ukuba baqhuba njani na. Uqhagamshelwano olunjalo akuyomfuneko ukuba luthabathe ixesha elide, kodwa lubonisa ukuba intlangano kaYehova inenkathalo. Xa ubani obandezelekileyo eqonda ukuba abazalwana abangamaKristu bamthanda ngokunyanisekileyo, usenokuncedakala ukuba alungelelane ngokweemvakalelo ukusa kumlinganiselo othile.

Kuthekani ukuba lowo ubandezelekayo ugqiba kwelokuba ufuna ukumangala?b Ngoko aba badala babini banokumcebisa ukuba, ngokuvisisana nomgaqo okuMateyu 18:15, ufanele aqhagamshelane ngokobuqu nommangalelwa lowo ngalo mbandela. Ukuba ngenxa yeemvakalelo ummangali akanakukwazi ukwenza oku ubuso ngobuso, unokwenjenjalo ngemfonomfono okanye mhlawumbi ngokubhala ileta. Ngale ndlela ummangalelwa unikwa ithuba lokunikela ingxelo enyanisekileyo phambi koYehova ngempendulo ayinikelayo kwisimangalo eso. Usenokukwazi nokunikela ubungqina bokuba bekungenakwenzeka ukuba abe uye waxhaphaza. Okanye mhlawumbi ummangalelwa uya kusivuma isono sakhe, aze axolelwe. Enjani intsikelelo ekuya kuba yiyo oko! Ukuba uyasivuma isono, abo badala babini baya kuwusingatha ngokubhekele phaya lo mbandela ngokwemigaqo yeZibhalo.

Ukuba isimangalo siyakhanyelwa, abadala bafanele bamchazele ummangali ukuba akukho okungakumbi okunokwenziwa ngokuphathelele isigwebo. Yaye ibandla liya kuqhubeka limgqala njengomntu omsulwa lowo umangalelwayo. IBhayibhile ithi kumele kubekho amangqina amabini okanye amathathu ngaphambi kokuba kuthatyathwe inyathelo lokugweba. (2 Korinte 13:1; 1 Timoti 5:19) Kwanokuba baliqela abantu “abaneenkumbulo” zokuxhatshazwa ngumntu okwamnye, imo yezi nkumbulo ayiqinisekanga kakhulu ukuba kungade kusekelwe izigqibo zekomiti egwebayo kuzo ngaphandle kobunye ubungqina obuxhasayo. Oku akuthethi ukuba “ezo nkumbulo” zigqalwa njengezibubuxoki (okanye zigqalwa njengeziyinyaniso). Kodwa kumele kulandelwe imigaqo yeBhayibhile xa kuthatyathwa inyathelo lokugweba.

Kuthekani ukuba ummangalelwa—nangona ebukhanyela obu bubi—unetyala ngokwenene? Ngaba “uyabhungca,” ngokungathi kunjalo? Ngokuqinisekileyo akunjalo! Umbandela wokuba netyala okanye wokuba msulwa kwakhe unokushiyelwa ngokukhuselekileyo ezandleni zikaYehova. “Izono zabanye abantu zisekuhleni kanye, ziyandulela ukuya emgwebeni; abanye ke ziyabalandela nokubalandela.” (1 Timoti 5:24; Roma 12:19; 14:12) Incwadi yeMizekeliso ithi: “Ukulinda kwamalungisa luvuyo; ithemba labangendawo liyadaka.” “Ekufeni komntu ongendawo liyaphela ithemba lakhe.” (IMizekeliso 10:28; 11:7) Ekugqibeleni, uYehova uThixo noKristu Yesu banikela umgwebo ongunaphakade ngokusesikweni.—1 Korinte 4:5.

Ukuxhathisa UMtyholi

Xa imiphefumlo ezahluleleyo inyamezela intlungu enkulu yasemzimbeni okanye yeemvakalelo, obunjani bona ubungqina oko okubunikelayo ngamandla abo angaphakathi nothando abanalo ngoThixo! Yaye obunjani bona ubungqina bamandla omoya kaYehova wokubazimasa!—Thelekisa eyesi-2 kwabaseKorinte 4:7.

Abhekisa kwabanjalo amazwi kaPetros athi: “Mchaseni [uSathana], nizimasekile elukholweni.” (1 Petros 5:9) Ukwenjenjalo kusenokungabi lula. Maxa wambi kusenokude kube nzima ukucinga kakuhle nangokusengqiqweni. Kodwa musa ukudimazeka! Kungekudala, uMtyholi nezenzo zakhe zobuqhophololo azisayi kuba sabakho. Enyanisweni, siyalilangazelela elo xesha laxa ‘uThixo eya kuzisula zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.’—ISityhilelo 21:3, 4.

[Imibhalo esemazantsi]