“Izinto Zangaphambili Aziyi Kukhunjulwa”

IINKUMBULO zinokuba yintsikelelo. Ukukhumbula izihlandlo ezimnandi nabantu esibathandayo kunokwenza iintliziyo zethu zichwayite. Kodwa kwezinye iimeko, iinkumbulo zinokufana nesiqalekiso. Ngaba uthwaxwa ziinkumbulo ezibuhlungu okanye ngamava abuhlungu exesha elidlulileyo? Ukuba kunjalo, unokuzibuza ukuba, ‘Ngaba ezi nkumbulo zibuhlungu ziya kuze zicime engqondweni?’ Sifumana impendulo eqinisekisayo kumazwi awabhalwa ngumprofeti uIsaya.—Funda uIsaya 65:17.

UYehova unenjongo yokuzisiphula neengcambu iinkumbulo ezibuhlungu. Uza kuyenza njani loo nto? Ngokutshabalalisa eli hlabathi lingendawo nako konke ukubandezeleka lize lithatyathelwe indawo ziimeko ezilunge ngakumbi eziya kubakho ngonaphakade. NgoIsaya uYehova uthembisa oku: “ndidala amazulu amatsha nomhlaba omtsha.” Ukuqonda esi sithembiso kuya kuzizalisa ngethemba iintliziyo zethu.

Ayintoni amazulu amatsha? IBhayibhile isinika iintluva ezimbini ezinokusinceda. Eyokuqala, ingcamango yamazulu amatsha iyakhankanywa nangabanye ababhali beBhayibhile ababini, yaye kuzo zozibini ezi zihlandlo la mazwi anxulunyaniswa neenguqu ezinkulu emhlabeni. (2 Petros 3:13; ISityhilelo 21:1-4) Eyesibini, eBhayibhileni, ibinzana elithi “amazulu” linokuthetha ulawulo okanye urhulumente. (Isaya 14:4, 12; Daniyeli 4:25, 26) Ngalo ndlela, amazulu amatsha ngurhulumente omtsha, okwaziyo ukumisela iimeko zobulungisa emhlabeni. Lunye kuphela ulawulo olunokukwazi ukuyenza loo nto—buBukumkani bukaThixo, urhulumente wasezulwini awathi uYesu masimthandazele. Obo Bukumkani buya kubangela ukuba ubulungisa bukaThixo benziwe emhlabeni wonke.—Mateyu 6:9, 10.

Uyintoni umhlaba omtsha? Khawuqwalasele izibakala ezibini ezingokweZibhalo ezisinceda senze izigqibo ezifanelekileyo. Okokuqala eBhayibhile ibinzana elithi “umhlaba” ngamathuba athile libhekisela ebantwini, kungekhona kwigaqa lo mhlaba. (INdumiso 96:1) Okwesibini, iBhayibhile yaxela kwangaphambili ukuba phantsi kolawulo lukaThixo, abantu abathembekileyo baza kufunda ubulungisa, obuya kunwenwa emhlabeni wonke. (Isaya 26:9) Ngaloo ndlela umhlaba omtsha ubhekisela kwibutho labantu abaza kuthobela ulawulo lukaThixo baze baphile ngemilinganiselo yakhe yobulungisa.

Ngaba uyayibona indlela uYehova aza kuzisiphula neengcambu ngayo iinkumbulo ezibuhlungu? Kungekudala uYehova uza kusizalisekisa ngokupheleleyo isithembiso sakhe samazulu nomhlaba omtsha, ngaloo ndlela emisela ihlabathi litsha lobulungisa.a Kwelo hlabathi litsha, izinto ezibangela iinkumbulo ezibuhlungu—emzimbeni, engqondweni nangokweemvakalelo—ziya kuba zizinto zexesha elidlulileyo. Abantu abathembekileyo baya kunandipha ubomi ngokupheleleyo, yaye baya kuba neenkumbulo ezimnandi suku ngalunye.

Kuthekani ngezinto ezisenza buhlungu ngoku? Isithembiso sikaYehova ngoIsaya siqhubeka sisithi: “Izinto zangaphambili aziyi kukhunjulwa, zinganyuki zithi qatha entliziyweni.” Nayiphi na into ebuhlungu ekhe yasehlela kweli hlabathi elidala iya kucima ngokuthe ngcembe. Ngaba eso sithembiso sinomtsalane kuwe? Ukuba kunjalo, kutheni ungakhe ufune ukwazi indlela onokusondela ngayo kuThixo othembisa elo kamva liqaqambileyo?

Izibhalo onokuzifunda ngoMatshi:

◼ Isaya 63-66–Yeremiya 1-16

[Umbhalo osemazantsi]

[Amagama acatshulweyo akwiphepha 19]

UYehova unenjongo yokuzisiphula neengcambu iinkumbulo ezibuhlungu