Ngaba Izithethe Zimele Zingqubane Nenyaniso?
UMARTIN LUTHER wayeqinisekile ukuba wayengaphazami. Wayevakalelwa kukuba, iBhayibhile yayimngqinela. Kwelinye icala, isazi ngeenkwenkwezi sasePoland uCopernicus, sasicinga ukuba inkolelo yesithethe eyayikho ngelo xesha yayiphosakele.
Yintoni le yayikholelwa? Ukuba umhlaba wawusesazulwini sendalo yaye zonke izinto zazijikeleza wona. UCopernicus wayesithi, inyaniso kukuba umhlaba ujikeleza ilanga. ULuther wakuphikisa oku, esithi: “Abantu baphulaphula umvumisi ngeenkwenkwezi ongenamava ozabalazela ukungqina ukuba ngumhlaba ojikelezayo, kungekhona amazulu okanye izinto esizibona esibhakabhakeni, ilanga nenyanga.”—History of Western Philosophy.
NGOKUFUTHI iinkolelo zesithethe ziye zingqubane nezibakala, nenyaniso. Zinokude zikhokelele abantu ekwenzeni izinto eziyingozi.
Kakade ke, oku akuthethi ukuba izithethe zisoloko zingqubana nenyaniso. Eneneni, umpostile uPawulos wakhuthaza amaKristu omhla wakhe ukuba aqhubeke ezilandela izithethe awayewanike zona: “Ke kaloku ndiyanidumisa, bazalwana, kuba . . . nizibambile izithethe, njengoko ndaninikelayo.”—1 Korinte 11:2; bona kwaneyesi-2 kwabaseTesalonika 2:15; 3:6.
Wayebhekisela enini uPawulos xa wayesithi “izithethe”? I-Insight on the Scriptures, uMqulu 2, iphepha 1118, ibonisa ukuba igama lesiGrike awalisebenzisayo ukubhekisela ‘kwizithethe,’ pa·raʹdo·sis, lithetha okuthile “okudluliselwa ngomlomo okanye ngokubhalwa phantsi.” Igama lesiNgesi lithetha “inkcazelo, iimfundiso, okanye uqheliselo oludluliselwa ngabazali kubantwana okanye oluye lwasekwa njengendlela yokucinga okanye yokwenza izinto.”a Ngenxa yokuba izithethe umpostile uPawulos awayezifundisa zaziphuma kumthombo ofanelekileyo, loo maKristu enza kakuhle ngokubambelela kuzo.
Noko ke, kuyabonakala ukuba izithethe zinokuba yinyaniso okanye zibe bubuxoki, zibe zezilungileyo okanye ezibi. Ngokomzekelo, isithandi sobulumko saseBritani uBertrand Russell, siyabancoma abantu abafana noCopernicus wenkulungwane ye-16 owayenyanisekile yaye enenkalipho yokuzithandabuza iinkolelo zesithethe. Bahlakulela “ukwamkelwa kwesibakala sokuba into ebikholelwa kwamandulo isenokuba ayichananga.” Ngaba uyabubona ubulumko bokungalandeli izithethe ungakhange uzihlolisise?—Thelekisa uMateyu 15:1-9, 14.
Noko ke, kuthekani ngeenkolelo namasiko onqulo? Ngaba sinokuzamkela njengezichanileyo nezingenabungozi singakhange sizihlolisise? Sinokwazi njani? Sifanele senze ntoni xa sifumanisa ukuba izithethe zonqulo eneneni ziyangqubana nenyaniso? Inqaku elilandelayo liza kuhlolisisa le mibuzo.
[Umbhalo osemazantsi]
a Ipapashwe yiWatchtower Bible and Tract Society of New York, Inc.
[Inkcazelo Ngomfanekiso okwiphepha 2]
Cover: Jean-Leon Huens © National Geographic Society
[Inkcazelo Ngomfanekiso okwiphepha 3]
Universität Leipzig