IZiko Lemfundo LeWatchtower Lithumela Abavangeli Basemazweni

ISikolo SeBhayibhile SeWatchtower SaseGiliyadi siye saqhuba iiklasi zaso kwiindawo ezahlukahlukeneyo. Phakathi kowe-1943 nowe-1960, kwizakhiwo eziseMzantsi Lansing, eNew York, eUnited States, iiklasi ezingama-35, ezazinabafundi ababevela kumazwe angama-95, zafumana uqeqesho olukhethekileyo. Emva koko esi sikolo safudukela kwikomkhulu lehlabathi eliseBrooklyn, eNew York, apho besiqhutyelwa khona phantse iminyaka engama-28. Ukususela ngowe-1988 ukuza kufikelela ebutsheni bowe-1995, iSikolo saseGiliyadi besiqhutyelwa eWallkill, eNew York.

Ebudeni bale minyaka zaye zongezwa iindawo esiqhutywa kuzo esi sikolo. Ngaphantsi kolwalathiso lwaso kwaqhutywa izifundo zeeveki ezilishumi kwiiklasi ezintathu eMexico; kwaqhutywa iiklasi ezintlanu ezifanayo eJamani; nezimbini eIndiya. Ukususela ngowe-1987 esinye isikolo esingaphantsi kwesi esaziwa njengeSikolo Sokuqeqesha Abalungiseleli siqhube iiklasi kumazwe angama-34, silungiselela izifundo ezikhethekileyo zeeveki ezisibhozo zokuqeqesha abafana abafanelekayo. Noko ke, izifundo zeklasi yaseGiliyadi yama-99, kwiZiko Lemfundo leWatchtower elisandul’ ukwakhiwa ePatterson, eNew York, zithabathe iiveki ezingama-20, ziquka ukufundisiswa kwayo yonke iBhayibhile ngokucokisekileyo, ingxubusho yanamhlanje yembali nentlangano yamaNgqina kaYehova, kuquka neziluleko ezininzi eziphathelele umsebenzi wobuvangeli kwamanye amazwe.

NgoSeptemba 2, kwakuvuyiswana nababephumelele kuloo klasi yama-99. Ucwangciso lokuvuyisana nabaphumeleleyo olwathabatha iiyure ezintathu lwaqhutyelwa kwiholo entsha ekwiZiko Lemfundo leWatchtower. Yayizele imi ngeembambo. Abanye abaphulaphuli abakwizakhiwo zaseBheteli ePatterson, eWallkill naseBrooklyn babenxityelelaniswe ngobugcisa bombane. Olu suku lwalungabangeli mincili kubafundi bale klasi iphumeleleyo nakwizizalwana nabahlobo babo abasenyongweni kuphela kodwa kwanakumakhulu awayefake isandla ngokuzithandela ekwakhiweni kweso sikolo sibukekayo sitsha.

Kwintshayelelo yakhe, uCarey Barber weQumrhu Elilawulayo wanikela ingqalelo kwindlela ekubaluleke ngayo oko kwakusenzeka. Wathi: “Le ndawo iza kuba sisazulu semfundo yobuthixo engazange ibonwe kulo mhlaba.” Wachaza ukuba sisondele kwincopho yemfazwe ephakathi kwembewu yomfazi nembewu yenyoka. (Genesis 3:15) Wabonisa ukuba, ekuphela kwabantu abaya kusinda kolo ngquzulwano loyikekayo ebudeni bembandezelo enkulu ezayo, iya kuba ngabo banolwazi oluchanileyo lweLizwi likaThixo nabalithobelayo.

Wavakalisa oku: “Ucwangciso lwemfundo esinalo ngoku lwenzelwe ukubangela bonke abantu bakaYehova abakwiindawo zonke babe kwimeko entle yokukhula echazwe kwiMizekeliso 1:1-4—yokwazi ubulumko noqeqesho, yokukwazi ukuqonda, yokufumana uqeqesho olunika ingqiqo, ubulungisa, ugwebo, ukuthembeka namandla okucinga.” Hayi indlela ekukhusela ngayo ukuba nobo buncwane bokomoya!

Isiluleko Kwiklasi Ephumeleleyo

Loo magqabaza entshayelelo alandelwa lungcelele lweentetho ezimfutshane ezintlanu ezazibhekiswa kwiklasi ephumeleleyo. UHarold Jackson, owayengumhlohli waseGiliyadi nolilungu labasebenza kwikomkhulu eliseBrooklyn ngoku, wababongoza abo bafundi esithi, “Lubambeni Niluqinise Ulwaneliseko Lwenu Lobuthixo.” ULloyd Barry, owayengumvangeli wasemazweni ixesha elide nolilungu leQumrhu Elilawulayo ngoku, wathetha ngomxholo othi “Ukukhonza UYehova Ngokuthobeka.” Wachaza ukuba olu phawu lwaluya kubanceda abaphumeleleyo xa beziqhelanisa neemeko ezintsha kwanakwiinkqubano zabo nabanye abavangeli basemazweni, namabandla abaya kukhonza kuwo, nabantu basekuhlaleni.

UKarl Adams, okhonza eGiliyadi, waqiqa nabafundi ngombuzo othi “Luya Kukukhokelela Ekwenzeni Ntoni Ukholo Lwakho?” Wabakhuthaza ukuba bangafani namaSirayeli awakhalaza ngeemeko zasentlango enqwenela ukubuyela eYiputa kodwa, kunoko, babe njengoAbraham, owalindela kuBukumkani bukaThixo kunokufuna ukubuyela eUre yamaKaledi ukuze acombulule iingxaki zakhe. (Eksodus 16:2, 3; Hebhere 11:10, 15, 16) U-Ulysses Glass, ogcina iingxelo zesi sikolo, wasebenzisa umzekelo ka-Asafu obhalwe kwiNdumiso 73 ukukhuthaza abafundi abaphumeleleyo ukuba, “Bazibale Iintsikelelo Zabo.” Yaye uAlbert Schroeder, ilungu leKomiti Yokufundisa yeQumrhu Elilawulayo, wathetha phantsi komxholo othi “UYehova Uyasilungiselela.” Ukungqina ukuba uyasilungiselela, wabhekisela kwiSikolo saseGiliyadi negalelo laso ekuphumezeni umsebenzi omkhulu wokushumayela nokwenza abafundi.

Kamva abaphulaphuli babaz’ iindlebe xa uMilton Henschel, umongameli weWatch Tower Society, wayethetha ngomxholo othi “Amalungu Axhomekeke Elinye Kwelinye.” Wafunda waza wathetha kakhulu ngamaRoma isahluko 12. Phakathi kwezinye izinto, wathi: “Kufuneka sikhumbule ukuba sisebenza ngokusondelelene kakhulu nabanye abakhonzi ebandleni.” Wongezelela ngelithi: “Kubalulekile ukuba sihlale sizigqala njengempahla kaYehova, yaye kunokuthand’ ukugxeka, nokuhlaba amadlala, masisoloko siluncedo. Sinceda iziqu zethu xa silondoloza ubunye bokomoya kwibandla lamaKristu.” Wabonisa indlela abanokukubonakalisa ngayo ukuba luncedo xa kulungiselelwa izidlo kumakhaya abavangeli basemazweni, bekhumbula ukuba abanye abantu basenokungakwazi ukuyitya into etyiwa ngabanye. Kwakhona wakhuthaza ukuba luncedo kunokuthand’ ukugxeka xa sikwinkonzo yasentsimini namanye amaKristu angenazo izinto eziphathekayo. UMzalwan’ uHenschel wabonisa ukuba, ukuba ngenene siyancedana, siyakhana, yaye siyakhuthazana, “uYehova uya kusithanda ngenxa yoku.” Esinjani sona ukufaneleka isiluleko kubavangeli basemazweni abaza kukhonza kumazwe ahluke kunene kulawo bawashiya ngasemva!

Ukubazi Ngakumbi Abafundi

Abafundi abangama-48 bale klasi yama-99, ngokwesilinganiso, babeneminyaka engama-32 ubudala yaye babesele benikele ngaphezu kweminyaka eli-11 kubulungiseleli bexesha elizeleyo.

Udliwano-ndlebe olwaluyinxalenye yocwangciso lokuvuyisana nabaphumeleleyo lwavula ithuba lokuba abaphulaphuli babazi ngakumbi abathile kubo. UNikki Liebl, waseUnited States, noSimon Bolton, waseNgilani, babalisa ngezinto ezavavanya ukholo lwabo kumandla kaYehova okubaxhasa kwiintswelo zabo zokwenyama. Baba namava okunyanyekelwa nguYehova njengoko babegcina kwindawo yokuqala ubulungiseleli babo bexesha elizeleyo.

UIsabelle Kazan, ontetho isisiFrentshi, wathi wafunda isiArabhu ukuze akwazi ukunikela ubungqina kubantu abathetha isiArabhu kwilizwe lakowabo. Ekuqaliseni kwakhe ngowe-1987, elinye iqela elincinane laseParis lalinabazalwana abathetha isiArabhu abane kuphela, ukongezelela kuye nomnye udade ababesalufunda olu lwimi. (Kwakungekho lula. Babedla ngokuchitha iiyure ezisibhozo veki nganye belungiselela isifundo sabo seMboniselo ukuze bakwazi ukugqabaza.) Ngaba loo mgudu wawuyingenelo? Kaloku, namhlanje kukho iziphaluka ezihlanu zamaNgqina athetha isiArabhu eFransi. Omnye umfundi, uMiko Puro, wabalisa ngendlela esamnceda ngayo isiFrentshi awayesifunde esikolweni ukuba ashumayele kwiimbacu zaseAfrika ezikwilizwe lakhe lokuzalwa iFinland, yaye siseza kumnceda nakwisabelo sakhe sobuvangeli basemazweni eBenin. UBonny Bowes wabalisa ngomzamo wakhe wokuthetha isiFrentshi ngokutyibilikayo ukuze akwazi ukukhonza ngokuphumelelayo eQuebec, eKhanada. Yaye uBjarki Rasmussen, waseDenmark, wabalisa amava ababesele benawo nomfazi wakhe ebudeni bokukhonza kangangeminyaka kwiZiqithi zaseFaeroe. Ewe, aba bavangeli basemazweni batsha ngabalungiseleli bexesha elizeleyo abanamava.

Abaphumeleleyo babelwe kumazwe ali-19—eAfrika, kuMbindi noMzantsi Merika, eMpuma Yurophu nakumazwe aseMpuma. Abaphumelele kwiiklasi zangaphambili sele bekhonze kumazwe angaphezu kwama-200. Inkoliso yabo baphumelelayo isaxakekile kwizabelo zayo. Aba bavangeli basemazweni batsha bayabathelela ngoku ekuhambiseleni phambili ubungqina boBukumkani ukusa eziphelweni zomhlaba.—IZenzo 1:8.

[Imifanekiso ekwiphepha 25]

Imifanekiso ethatyathwe kumagumbi okufundisa kwiZiko Lemfundo leWatchtower

[Umfanekiso okwiphepha 26]

Abaphumelele Kwiklasi Yama-99 YeSikolo SeBhayibhile SeWatchtower SaseGiliyadi

Kuludwe olungezantsi, kuqalwa ukusuka kuluhlu olungaphambili ukuya kolungasemva, yaye amagama adweliswe ukusuka ngasekhohlo ukuya ngasekunene kuluhlu ngalunye.

(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.

[Imifanekiso ekwiphepha 27]

Basekwizabelo zabo: (ekhohlo) uCharles Leathco nenkosikazi yakhe, uFern, eBrazil, baphumelela kwiklasi yokuqala neyesithandathu yaseGiliyadi; (ezantsi) uMartha Hess, eJapan, waphumelela kwiklasi yesixhenxe yaseGiliyadi