ISikolo SaseGiliyadi Sithumela Iklasi Yaso Ye-100

ISIKOLO SEBHAYIBHILE SEWATCHTOWER SASEGILIYADI siye sanendima ebalulekileyo ekuvakalisweni koBukumkani bukaThixo emhlabeni wonke kule mihla. Ekubeni iSikolo SaseGiliyadi saqalisa ukuqeqesha abavangeli basemazweni ngowe-1943, abaphumelele kuso baye bakhonza kumazwe angaphezu kwama-200. NgoMatshi 2, 1996, kwakuvuyiswana nokuphumelela kweklasi ye-100.

Abafundi baye baqeqeshwa kwesi sikolo ebudeni bexesha ebekuwe ikhephu elingaphezu kweemitha ezimbini kummandla weZiko Lemfundo LeWatchtower ePatterson, eNew York. Akumangalisi ukuba ikhephu lalisiwa ngosuku lokuvuyisana nabaphumeleleyo. Sekunjalo, iholo yayizele, yaye kwakukho nabanye ababephulaphule besePatterson, eWallkill naseBrooklyn—isimbuku sabantu abangama-2 878.

UTheodore Jaracz, olilungu leKomiti Yokufundisa yeQumrhu Elilawulayo, wayengusihlalo. Emva kokwamkela ngokufudumeleyo iindwendwe ezazivela kumazwe amaninzi, wazicela ukuba zonke ziphakame zize zivume ingoma 52. Kwahlokoma indumiso eya kuYehova kuloo holo njengoko kwakuvunywa ingoma ethi “Igama Lobawo Wethu,” ekwincwadi yamaculo ethi Mvumeleni Iindumiso UYehova. Loo ngoma, kunye namagqabaza kasihlalo ngendlela yokusebenzisa imfundo ekudumiseni uYehova, yalwandlalela isiseko ucwangciso olwaluza kulandela.

Isiluleko SeZibhalo Esivela Kumadoda Amakhulu

Inxalenye yokuqala yocwangciso yayiyilwe ziintetho ezimfutshane ezazinikelwa liqela labo bebekhonza uYehova kangangexesha elide zijoliswe kwabo babekuloo klasi iphumeleleyo. URichard Abrahamson, olilungu labasebenzi bekomkhulu owaqalisa inkonzo yakhe yexesha elizeleyo ngowe-1940, wabongoza le klasi esithi: “Hlalani Nilungisekile.” Wabakhumbuza ukuba babesele betyhubele amaxesha ahlukahlukeneyo okulungisa ubomi babo njengamaKristu, kuquka iinyanga ezintlanu zokuqeqeshwa eGiliyadi. Ngoko kutheni le nto babefanele bahlale belungisekile?

Isithethi sachaza ukuba ibinzana elisetyenziswe ngumpostile uPawulos kweyesi-2 kwabaseKorinte 13:11 “lithetha ngento eqhubekayo, ukuqhubeka kukabani ezithoba kwindlela uYehova amakha okanye amsulungekisa ngayo, ukulungiswa kakuhle, ukuze ubani afikelele kweyona milinganiselo ifanelekileyo kaYehova.” Kwizabelo zabo ezikumazwe asemzini, abaphumelele kule klasi babeza kujamelana nocelomngeni olutsha kukholo lwabo. Kwakuza kufuneka bafunde ulwimi olutsha, bazilungelelanise nezithethe kunye neemeko zokuphila ezahlukileyo, baze baziqhelanise neentlobo ezahlukahlukeneyo zentsimi. Kwakhona babeza kuqhubana nabantu abanobuntu obahlukahlukeneyo kumakhaya abavangeli basemazweni nakumabandla abo amatsha. Ngoko ke, ukuba babenokusebenzisa imigaqo yeBhayibhile kuzo zonke ezi meko, bekulungele ngokupheleleyo ukulungiswa, ‘babenokuqhubeka benemihlali,’ njengoko umpostile uPawulos wabhalayo.

UJohn Barr, ongomnye wamalungu amahlanu eQumrhu Elilawulayo awaba nesabelo kolu cwangciso, wasekela umxholo kweyoku-1 kwabaseKorinte 4:9. Wakhumbuza abaphulaphuli bakhe ukuba amaKristu angumboniso wokubonelwa ziingelosi nabantu. Wathi: “Ukwazi oku kulenza libaluleke ngakumbi ikhondo lomKristu ebomini, ngokukodwa xa eqonda ukuba ngoko akuthethayo nakwenzayo, unokuba nempembelelo enamandla kwabo bambukeleyo, ebonakalayo nengabonakaliyo. Ndicinga ukuba kuya kuba kuhle bazalwana noodade abathandekayo bale klasi ye-100 yaseGiliyadi ukuba niyikhumbule le nto njengoko nisiya kwiindawo ezikude zomhlaba.”

UMzalwan’ uBarr wabongoza abafundi abangama-48 ukuba bakhumbule ukuba njengoko benceda ababumvu ukuba bafunde inyaniso, “kubakho uvuyo phakathi kweengelosi zikaThixo ngenxa yomoni omnye oguqukayo.” (Luka 15:10) Ebhekisela kweyoku-1 kwabaseKorinte 11:10, wabonisa ukuba isimo sengqondo sikabani ngokuphathelele amalungiselelo obuthixo sichaphazela kungekuphela abazalwana noodade bethu esibabonayo kodwa neengelosi esingaziboniyo. Hayi indlela ekuyingenelo ngayo ukuba nale mbono iphangaleleyo!

Elinye ilungu leQumrhu Elilawulayo, uGerrit Lösch, naye owayephumelele kwiSikolo SaseGiliyadi, waxubusha izibhalo ezinjengeNdumiso 125:1, 2; Zekariya 2:4, 5; neNdumiso 71:21 ukuze abonise ukuba uYehova ‘ubajikelezile abantu bakhe.’ Ubanika ukhuseleko ngeendlela zonke. Ngaba uThixo uya kunikela ukhuseleko olunjalo ebudeni bembandezelo enkulu kuphela? Isithethi saphendula: “Hayi, kuba uYehova sele ‘eludonga lomlilo,’ uyabakhusela abantu bakhe. Ngonyaka owawusemva kwemfazwe we-1919 intsalela yoSirayeli wokomoya yayisitsha ziintambo ifuna ukushumayela iindaba ezilungileyo zoBukumkani ehlabathini lonke ukuze zibe bubungqina kuzo zonke iintlanga. Yayingabameli beYerusalem yasezulwini yokomfuziselo. UYehova uqinisekisa ngokubakhusela ngokobuthixo njengeqela aba bameli ebudeni bexesha lesiphelo. Ngoko ke ngubani onokuphumelela ekubathinteleni? Akakho.” Hayi indlela ekubaqinisekisa ngayo bona kunye nabo bazizinxulumani ezisondeleyo zabo ekwenzeni ukuthanda kukaThixo!

U-Ulysses Glass, ilungu elidala leqela labaqeqeshi, wakhuthaza abo babekuloo klasi ukuba ‘baqhubeke bezilungiselela isikhundla kwintlangano kaYehova esehlabathini lonke.’ Isikhundla yimeko okanye umsebenzi olungele ngokukhethekileyo ubuchule okanye ubuntu bukabani. Wathi: “Nina baza kuba ngabavangeli basemazweni niyifumene indawo yenu kwintlangano esehlabathini lonke yamaNgqina kaYehova. Kodwa, okona kubalulekileyo kukuba esi sisiqalo sobomi benu njengabavangeli basemazweni.” Kwakuza kufuneka bazibhokoxe ekusebenziseni kakuhle ubuchule babo baze balungele izabelo zabo ezikhethekileyo abazinikwe nguYehova nentlangano yakhe.

Intetho yokugqibela kolu cwangciso yanikelwa nguWallace Liverance, olilungu leqela labaqeqeshi baseGiliyadi nokhonze iminyaka eli-17 eBolivia. Wabuza abafundi oku: “Ngaba niya kumcikida uThixo?” Babefanele bakwenze njani oku? Uhlanga lakwaSirayeli lwamcikida ngendlela ephosakeleyo uThixo. (Duteronomi 6:16) Isithethi sathi: “Ngaphandle kwamathandabuzo, ukucikida uThixo ngokukhalaza okanye ngokumbombozela okanye mhlawumbi ngokubonakalisa ukungabi nakholo kwindlela azenza ngayo izinto kuphosakele.” Wababongoza esithi: “Xa nifika kwizabelo zenu ezitsha, luxhathiseni olo tyekelo.” Ngoko, yiyiphi indlela efanelekileyo yokumcikida uThixo? UMzalwan’ uLiverance wacacisa esithi: “Ngokukholelwa kwilizwi lakhe, ngokwenza kanye oko akutshoyo nandule ke ukuyekela umphumo ezandleni zakhe.” Njengoko kuboniswe kuMalaki 3:10, uYehova umema abantu bakhe esithi: “Nindicikide.” Wathembisa ukuba ukuba babezisa izishumi zabo kuvimba wetempile, wayeya kubasikelela. Isithethi sababuza: “Kutheni ningabi nembono efanayo ngezabelo zenu zobuvangeli basemazweni? UYehova ufuna niphumelele kuzo, ngoko mcikideni. Hlalani ezabelweni zenu. Yenzani uhlengahlengiso afuna nilwenze. Nyamezelani. Nibone ukuba akayi kunisikelela na.” Elinjani ukuba lihle icebiso kubo bonke abakhonza uYehova!

Emva kwengoma ucwangciso lweentetho lwaphela kwaza kwalandela udliwano-ndlebe oluchwayitisayo.

Amacebiso Asebenzisekayo Avela Entsimini

UMark Noumair, olilungu elitsha leqela labaqeqeshi baseGiliyadi, wacela abafundi ukuba babalise amava abawafumene entsimini ngoxa besesikolweni. La mava abalaselisa ukubaluleka kokukhuthala kubulungiseleli aza anika abaphulaphuli amacebiso asebenzisekayo abanokuwasebenzisa.

Ebudeni bezifundo zabo, abafundi bale klasi yaseGiliyadi bafumana ingenelo ekhethekileyo yokunxulumana namalungu eeKomiti zamaSebe asuka kumazwe angama-42, ababekwiZiko Lemfundo lasePatterson ukuza kufumana uqeqesho olukhethekileyo. Uninzi lwawo lwaluphumelele eGiliyadi kwiminyaka eyadlulayo. Kolu cwangciso, kwadliwan’ indlebe nabameli ababephumelele kwiklasi yesi-3, yesi-5, yama-51 neyama-92, kunye nabasuka kwiSikolo SaseGiliyadi Esandisiweyo esiseJamani. Hayi indlela ayeyingenelo ngayo amagqabaza abo!

Bachaza indlela abavangeli basemazweni abaye bavakalelwa ngayo njengoko babebona inani labadumisi bakaYehova lisanda ukusuka kwiqaqobana ukusa kumashumi amawaka kwiindawo abababelwe kuzo. Babalisa ngesabelo abaye banaso ekuseni iindaba ezilungileyo kwiindawo ezinemizi egqagqeneyo kwiiNtaba zeAndes nakwiidolophana ezingakwimingenela yoMlambo iAmazon. Babalisa ukuba babenikela ubungqina kubantu abangafundanga. Babalisa ngomzamo wabo wokufunda iilwimi ezintsha nangendlela abo baphumeleleyo ababeya kukhawuleza bakwazi ngayo ukunikela ubungqina yaye banikele iintetho ngeelwimi ezinjengesiTshayina. Bada benza imiboniso ngeSpanish nesiTshayina. Bayigxininisa into yokuba abavangeli basemazweni baba nempumelelo ngakumbi xa benganeli kufunda ulwimi kuphela kodwa bafunde nendlela abantu abacinga ngayo. Bachaza ngeemeko ngokufuthi eziba nzima kumazwe ahlwempuzekileyo baza bathi: “Abavangeli basemazweni bafanele baqonde ukuba le meko ngokufuthi iba nento yokwenza nengcinezelo. Umvangeli wasemazweni uya kuba wenza kakuhle ukuba uvakalelwa ngendlela efanayo noYesu—waba nosizi ngabantu, ababefana nezimvu ezingenamalusi.”

Emva kwengoma ucwangciso lwaqhubeka ngentetho eyayinikelwa ngu-A. D. Schroeder, olilungu leQumrhu Elilawulayo. Waba nelungelo lokuba ngomnye wabahlohli bokuqala kwiSikolo SaseGiliyadi xa savulwa ngowe-1943. Esenza umqukumbelo ofanelekileyo wocwangciso, waxubusha ngomxholo othi “Ukuzukisa UYehova NjengeNkosi EnguMongami.” Ingxubusho ebangel’ umdla kaMzalwan’ uSchroeder yeNdumiso 24 yachukumisa bonke ababekho, ngokubonisa indlela elikhulu ngayo ilungelo lokuzukisa uYehova njengeNkosi enguMongami.

Emva kokukhutshwa kweziqinisekiso, nengoma yokuqukumbela, uKarl Klein weQumrhu Elilawulayo waqukumbela ngomthandazo osuka entliziyweni. Hayi indlela olwalusebenziseka yaye luhlaziya ngokomoya ngayo olo cwangciso!

Kwiintsuku ezisemva kokuvuyisana nabaphumeleleyo, amalungu angama-48 eklasi ye-100 aqalisa ukunduluka esiya kwizabelo zawo zobuvangeli kumazwe ali-17. Kodwa ayengabuqali ubulungiseleli bawo. Ayenengxelo entle yobulungiseleli bamaKristu bexesha elizeleyo. Xa ayebhalisa eGiliyadi, ngokomlinganiselo, ayeneminyaka engama-33 ubudala yaye eneminyaka eli-12 ekubulungiseleli bexesha elizeleyo. Amanye awo ayengamalungu entsapho yasemhlabeni wonke yaseBheteli yeWatch Tower Society. Amanye ayekade ekhonza njengabaveleli abahambahambayo. Iqela laba bafundi lalisele linesabelo kuhlobo oluthile lwenkonzo yamazwe asemzini—eAfrika, eYurophu, kuMzantsi Merika, kwiziqithi zolwandle naphakathi kwabantu abathetha iilwimi zasemzini kumazwe abo. Kodwa ngoku bathelela abanye abavangeli basemazweni abaninzi abaye bavuyiswa kukukwazi ukuthi, ‘Siya kukhonza naphi na apho sifunwa khona ehlabathini.’ Umnqweno wabo osuka entliziyweni kukusebenzisa ubomi babo ekuzukiseni uYehova.

[Ibhokisi ekwiphepha 27]

Inkcazelo Engabafundi:

Inani lamazwe abavela kuwo: 8

Inani lamazwe ababelwe kuwo: 17

Inani labafundi: 48

Umlinganiselo wobudala: 33,75

Umlinganiselo weminyaka besenyanisweni: 17,31

Umlinganiselo weminyaka bekubulungiseleli bexesha elizeleyo: 12,06

[Umfanekiso okwiphepha 26]

Iklasi Ye-100 Ephumelele KwiSikolo SeBhayibhile SeWatchtower SaseGiliyadi

Kuludwe olungezantsi, kuqalwa ukusuka kuluhlu olungaphambili ukuya kolungasemva yaye amagama adweliswe ukusuka ngasekhohlo ukuya ngasekunene kuluhlu ngalunye.

(1) Shirley, M.; Grundström, M.; Genardini, D.; Giaimo, J.; Shood, W.; Phair, P.; Buchanan, C.; Robinson, D. (2) Pine, C.; Kraus, B.; Racicot, T.; Hansen, A.; Beets, T.; Berg, J.; Garcia, N.; Fleming, K. (3) Whinery, L.; Whinery, L.; Harps, C.; Giaimo, C.; Berg, T.; Mann, C.; Berrios, V.; Pfeifer, C. (4) Randall, L.; Genardini, S.; Kraus, H.; Fleming, R.; D’Abadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; D’Abadie, F.; Phair, M.; Stevenson, G.; Shood, D. (6) Beets, L.; Pfeifer, A.; Berrios, M.; Pine, J.; Mann, L.; Randall, P.; Grundström, J.; Hansen, G.