Ugonyamelo Lukuyo Yonke Indawo
EHLELI kwinqwelo-mafutha yakhe elinde ukuba iirobhothi zibe luhlaza, ngequbuliso umqhubi wabona isigantsontso sendoda simbonzeleka sisiza ngakuye, sikhwaza simthuka, sisonge inqindi sifun’ undikho. Umqhubi wakhawuleza watshixa iingcango waza wavala neefestile zakhe, kodwa esi sigantsontso sendoda saqhubeka sisiza. Yaqubuda kwakanye, yaza le ndoda yayithi hlasi inqwelo-mafutha yayishukumisa ngamandla ixhuzula ucango. Ekugqibeleni, ngenxa yokucaphuka yaliphakamisa elo nqindi layo likhulu yaza yatsho sasinye kwifestile engaphambili, yayitsho yaziingceba.
Ngaba oku kwakusenzeka kumfanekiso oshukumayo obalekisa umzimba? Akunjalo! Lo yayingumlo wabaqhubi beenqwelo-mafutha kwisiqithi saseOahu, eHawaii, esaziwa njengendawo ezolileyo, nezinzileyo.
Oku akumangalisi. Amaqhaga aseminyango, iintsimbi ezisezifestileni, amagosa okhuseleko kwizakhiwo ezithile, kwanemiqondiso esezibhasini ethi “Umqhubi akaphathi mali”—zizonke ezo zinto zalatha kwinto enye: Ugonyamelo lukuyo yonke indawo!
Ugonyamelo Ekhaya
Kangangexesha elide ikhaya belixatyisiwe njengeyona ndawo ikhuselekileyo emntwini. Noko ke, le ngcamango itshintsha ngokukhawuleza. Ugonyamelo lwentsapho, oluquka ukuxhatshazwa kwabantwana, ukubethana kwamaqabane omtshato nokubulalana, lungundaba-mlonyeni ehlabathini lonke.
Ngokomzekelo, iManchester Guardian Weekly ithi “ubuncinane ngabantwana abangama-750 000 eBritani abasenokuba baphazamisekile engqondweni ngenxa yokuchanabeka kugonyamelo lwasekhaya.” Le ngxelo yayisekelwe kuhlolisiso olwathi kwakhona lwafumanisa ukuba “amabhinqa amathathu kwamane awabuzwayo athi abantwana bawo balubona ugonyamelo, yaye bamalunga nababini kwabathathu abantwana abaye babona oonina bebethwa.” Ngokufanayo, ngokutsho kweU.S.News & World Report, iU.S. Advisory Board on Child Abuse and Neglect iqikelela ukuba “abantwana abangama-2 000, inkoliso yabo eneminyaka engaphantsi kwemi-4 ubudala, babulawa ngabazali okanye ngabantu abagciniswe kubo nyaka ngamnye.” Le ngxelo ithi eli nani lingaphezulu kwelabantu abafa ngenxa yeengozi zeenqwelo-mafutha, ukurhaxwa, okanye ukuwa.
Kwakhona ugonyamelo lwasekhaya luquka ukuxhatshazwa kwamaqabane omtshato, okususela ekutyhalweni ukusa ekuqhwatyweni, ukukhatywa, ukukrwitshwa, ukubethwa, ukusongelwa ngokuhlatywa okanye ukudutyulwa, okanye nokubulawa. Ibe namhlanje olu hlobo logonyamelo luvela macala. Kolunye uhlolisiso kufunyaniswe ukuba kugonyamelo oluye lwaxelwa oluphakathi kwezibini, malunga nekota yalo luqalwa yindoda, enye ikota yalo iqalwa ngumfazi, yaye olunye oluseleyo lunokuchazwa njengeengxwabangxwaba ababekek’ ityala bobabini kuzo.
Ugonyamelo Emsebenzini
Ngokuqhelekileyo ngaphandle kwekhaya indawo yomsebenzi ibiyindawo apho umntu afumana khona ucwangco, intlonelo nokuphathwa ngesimilo. Kodwa kubonakala kungasenjalo. Ngokomzekelo, amanani akhutshwe yiU.S. Department of Justice abonisa ukuba nyaka ngamnye abantu abangaphezu kwama-970 000 baba ngamaxhoba olwaphulo-mthetho olunogonyamelo emsebenzini. Xa ibekwa ngolunye uhlobo, ngokutsho kweProfessional Safety—Journal of the American Society of Safety Engineers, “abasebenzi banethuba elinye kwamane lokuba ngamaxhoba ohlobo oluthile logonyamelo.”
Okuyingxaki nangakumbi kukuba ugonyamelo lwasemsebenzini alupheleli kwiingxwabangxwaba nokuthukana. Le ngxelo inye ithi: “Ugonyamelo olujoliswe ngokukhethekileyo kubaqeshi nakubaqeshwa olubangelwa ngabanye abaqeshwa lolona hlobo lokubulala lwanda ngokukhawuleza eUnited States.” Ngowe-1992, ingozi enye kwezintandathu ezinxulumene nomsebenzi yayiba yeyomntu obuleweyo; kumabhinqa, inani yayiphantse ibe libhinqa elinye kwamabini. Ayinakukhanyelwa into yokuba ugonyamelo luyagquba kwindawo yomsebenzi eyayikade inocwangco.
Ugonyamelo Kwimidlalo Nakulonwabo
Imidlalo nolonwabo ibikade isetyenziswa njengeendlela zokuyolisa okanye ukuphumza umntu kwimibandela enzulu yobomi. Namhlanje ulonwabo lishishini elingenisa izigidi zezigidi zeerandi. Ukuze bafumane ingeniso eninzi kangangoko kunokwenzeka kolu rhwebo lunenzuzo, abaququzeleli balo abakuchasanga ukusebenzisa nayiphi na indlela ephambi kwabo. Ibe enye yezo ndlela lugonyamelo.
Ngokomzekelo, iForbes, iphephancwadi loshishino, yanikela ingxelo yokuba omnye umvelisi wemidlalo yevidiyo unomdlalo odumileyo wemfazwe apho ijoni elithile liqhawula intloko likroncule namathambo omnqonqo otshaba lwalo ngoxa ababukeli bekhwaza besithi, “Mgqibezele! Mgqibezele!” Noko ke, olunye uhlobo lwalo mdlalo ukwamnye lwenye inkampani ekhuphisana naleyo alunako oko kuphalazwa kwegazi. Umphumo ube yintoni? Uhlobo olunogonyamelo oluninzi luthengwa ngaphezulu kunolunye ngomlinganiselo wesi-3 kwisi-2. Ibe oku kuthetha intywenka yemali. Xa uhlobo oludlalwa ekhaya lwale midlalo lwathi lwathengiswa, iinkampani zafumana ama-235 ezigidi zeerandi ehlabathini jikelele kwiiveki zokuqala ezimbini! Xa kubandakanyeke ingeniso, ugonyamelo lungomnye nje umgibe kubathengi.
Ugonyamelo kwimidlalo lungomnye umbandela omele uqwalaselwe. Ngokufuthi abadlali bayazidla ngengozi abanokuyibangela. Ngokomzekelo, komnye umdlalo we-hockey ngowe-1990, kwakukho izohlwayo ezingama-86—ezona zakha zazininzi embalini. Lo mdlalo waphazamiseka kangangeeyure ezintathu ezinesiqingatha ngenxa yezidubedube. Omnye umdlali owanyangwayo wayaphuke ithambo lobuso, ekrweleke inwebu yeliso yaye enenxeba elinzulu. Kwakutheni ukuze kubekho ugonyamelo olungako? Omnye umdlali wacacisa: “Xa uphumelele umdlalo ovus’ ihlombe ngokwenene, obunemilo emininzi, ugoduka uziva usondele ngakumbi kwabo bakwiqela lakho. Ndandicinga ukuba imilo yayiwenze wangumdlalo oshushu nyhani.” Kwinkoliso yemidlalo yanamhlanje, kubonakala ukuba ugonyamelo alwanelanga nje ukuba yindlela yokufikelela usukelo, kodwa lube lusukelo ngokwalo.
Ugonyamelo Esikolweni
Isikolo besisoloko sijongwa njengenqaba apho abantu abaselula banokushiya onke amaxhala abo ngasemva baze banikele ingqalelo ekukhuliseni iingqondo nemizimba yabo. Noko ke, namhlanje isikolo asiseyiyo indawo ekhuseleke nenqabiseke ngolo hlobo. Kuhlolisiso lukaGallup lowe-1994 kwafunyaniswa ukuba ugonyamelo namaqela eenjubaqa ziyeyona ngxaki iphambili kwizikolo zikawonke wonke eUnited States, nangaphezu kokunqongophala kwemali, ebekuyeyona ngxaki iphambili kuluhlu lweengxaki zonyaka ongaphambi kwalowo. Ngaba imbi kangakanani le meko?
Kumbuzo othi, “Ngaba wakha walixhoba logonyamelo olwenzeka esikolweni okanye kufutshane naso?” phantse abe mnye kubafundi abane ophendula ngokuthi ewe. Kwakhona bangaphezu komfundisi-ntsapho omnye kwabalishumi abaphendula ngokuthi ewe. Kolu hlolisiso lunye kwafunyaniswa ukuba i-13 ekhulwini labafundi, amakhwenkwe namantombazana, lavuma ukuba lalikhe laphatha isixhobo esikolweni ngenye imini. Inkoliso yabo yathi yayisenzela ukucela injezu kwabanye okanye ukuze izikhusele. Kodwa omnye umfundi oneminyaka eli-17 ubudala wadubula umfundisi-ntsapho wakhe esifubeni xa lo mfundisi-ntsapho wayezama ukuhlutha umpu wakhe.
Ibutho Labantu Elinogonyamelo
Alinakukhanyelwa elokuba ugonyamelo lukuyo yonke indawo namhlanje. Ekhaya, emsebenzini, esikolweni nakulonwabo, sijamelene nebutho labantu elinogonyamelo. Ngenxa yokuba belubona imihla ngemihla, abaninzi baye balwamkela njengento eqhelekileyo—de babe ngamaxhoba alo. Bandule ke ukubuza, Ngaba luya kuze luphele? Ngaba nawe ubungathanda ukuyazi impendulo? Ngoko ke nceda ufunde eli nqaku lilandelayo.